Ta Kəla gír yá̰a̰ gə̄ 7
7
Noe udə kem to boó
1Kɔ́ɔ̄ɓē əda Noe na:
Údiī kem to boó, ḭ̄ ō, deē yāí gə̄ malang ō, tɔdɔ̄ i ḭ̄ ngóy n i de kə́ súmūú ta kumḿ tə́ dan de kə́ dɔ nang tə́ gə̄ tə́. 2Dā̰ gə̄ malang ń *unjə̄ njáý njáý ní, ɔ́ý kə́ bəra gə̄ sīrí ō, kə́ kó̰o̰ gə̄ sīrí ō, kə gō gíŕdə́ gēé. Ba ngé gə̄ ń i kə́ yḛr ní tá, úń kə́ bəra kógə̄ḿ ō, kə́ kó̰ó̰ kógə̄ḿ ō, kə gō gíŕdə́ gēé. 3Ɔ́y yel̄ kə́ bɔbə̄ gə̄ sīrí ō, kə́ kó̰o̰ gə̄ sīrí ō, kə gō gíŕdə́ gēé kadə̄ ndin̄ kə kumuú dɔ nang tə́. 4Tɔdɔ̄ na̰y i ndɔ̄ sīrí kadə̄ m-ə́la kə maná kadə̄ edə dɔ nang tə́ ndɔ̄ kutə sɔ́. M-ā m̄-tɔ̄l̄ yá̰a̰ malang ń ndi kə kumuú dɔ nang tə́ ní kɔ̄ɔ́. 5Noe rāā yá̰a̰ malang ń Kɔ́ɔ̄ɓē ɔjən kadə̄ rāā ní.
Man̄ kaw̄ kə́ tɔȳ madə̄ gə̄ malang
6Dan ń man̄ kaw̄ taā loo dɔ nang tə́ malang ní, ɓāl̄ Noe i ɓú mehḛ́. 7Ni udə kem to bo tə́ kə ngánən kə́ dəngam gə̄ ō, nə̄yá̰n ō, umən gə̄ ō, yā ka̰ȳń man̄ kə́ a rāā yā taā loo. 8Dā̰ kə́ *unjə̄ njáý njáý gə̄ ō, dā̰ kə́ yḛr gə̄ ō, yel̄ gə̄ ō, ngán dā̰ kə́ kagə nang tə́ gə̄ ō, 9udən̄ kem to boó gō Noe tə́ jōó jōó, kə́ bɔbə̄ ō, kə́ kó̰o̰ ō, tītə̄ ń Nə́ɓā ədań Noe ní. 10Rāā ndɔ̄ sīrí gō tə́ anī man̄ kaw̄ taā dɔ nang.
11Kem ɓāl̄ ń ɓāl̄ Noe i ɓú mehḛ́ tə́ ní, kə ndɔ̄ kə́ nge ko̰ kutə gidə i sīrí yā nāā kə́ nge ko̰ jōó anī, ndɔ̄ ń noō tə́ ta kəɓa man̄ kə́ gír nángāá gə̄ malang teēn̄ ō, ta kār̄ man̄ kə́ dɔɔ́ gə̄ malang i kə́ teē ō. 12Man̄ edə dɔ nang tə́ bátə́ ndɔ̄ kutə sɔ́. 13Ndɔ̄ ń noō tə́ Noe udə kem to bo tə́ nin̄ kə nə̄yá̰neé ō, ngánən kə́ dəngam kə́ mətá gə̄ ń i Sem ō, Kam ō, Japet ní ō, umən kə́ dəyá̰ kə́ mətá gə̄ ō, 14gír dā̰ kə́ bembeé gə̄ malang ō, kə́ ɓēé gə̄ malang ō, gíŕ ngán dā̰ kə́ dūú gə̄ malang ō, yel̄ gə̄ malang ō, kur̄ gə̄ malang ō. 15-16Yá̰a̰ malang ń Nə́ɓā rāā á ndi kə kumuú ní, kə́ bəra ō, kə́ kó̰o̰ ō, udən̄ jōó jōó kem to boó gō Noe tə́ tītə̄ ń Nə́ɓā ədań Noe ní. Loo ń noō tə́ Kɔ́ɔ̄ɓē utə̄ ta róbə dɔ Noe tə́ tā.
17Man̄ kaw̄ taā loo dɔ nang tə́ ndɔ̄ kutə sɔ́, un to kə̄ dɔɔ́ kə̄ dɔɔ́. 18Man̄ ḭḭ ngá̰ý adə̄ ənda to aw̄ń kə gō nōó. 19Mbal̄ kə́ dɔ nang tə́ gə̄ kə́ ngāl̄ ngá̰ý gə̄ ní, man̄ un dɔ malang. 20Man̄ ḭḭ mān̄ tadə́ asə kíl deē kutə gidə i mí. 21Adə̄ yel̄ gə̄ ō, dā̰ kə́ ɓēé gə̄ ō, kə́ bembeé gə̄ ō, ngán dā̰ kə́ kagə nang tə́ gə̄ ō, de gə̄ ō, oyn̄ malang. 22Yá̰a̰ malang kə́ dɔ nang tə́ ń koō ndi kə kumuú i kemən tə́ ní oy. 23Kɔ́ɔ̄ɓē tɔ̄l̄ yá̰a̰ malang ń ndi kə kumuú dɔ nang tə́ ní kɔ̄ɔ́. De gə̄ gə̄gē, dā̰ kə́ bo gə̄gē, kə́ dūú gə̄gē, yel̄ gə̄gē malang. Na̰y i Noe ō, ngé gə̄ ń i seneé kem to boó ní ō ngóy.
Noe teē kem to boó kə̄ ndágá
24Man̄ kaw̄ taā loo rāā ndɔ̄ ɓú kə kutə mí.
Currently Selected:
Ta Kəla gír yá̰a̰ gə̄ 7: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
