Makətūbə̄ yā Daniel 6
6
1Darius ń ni i Medə ní o̰o̰ ɓē ō. Dan ń ənge ta róbə ko̰o̰ ɓē ní ɓālə̄n i kutə mehḛ́ gidə i jōó.
Madə̄ ba̰ā̰ Daniel gə̄ əyā̰n̄ gūmbə̄ yā Daniel
2Darius gḛy kadə̄ ngé kɔsə kum gotə mban̄g dɔ ɓē tə́ gə̄ ɓú kógə̄ḿ kə́ kutə jōó yā tə́ndādə́ kə̄ loo gə̄ tə́ malang kem ɓē ko̰o̰ yān tə́. 3Ni tə́ndā de kə́ bo gə̄ mətá dɔdə́ tə́ ō, kadə̄ ngé kɔsə kum gotə mban̄g dɔ ɓē tə́ gə̄ ní ɔjən̄də́ kutə yá̰a̰ gə̄ yā kadə̄ yá̰á̰ ń i yá̰a̰ yā mban̄g ní deē a ɔgə̄ń mban̄g alé. De kə́ bo gə̄ kógə̄ḿ i Daniel. 4Daniel ngeé ń toō tɔȳ de kə́ bo madə̄n kə́ jōó gə̄ ō, tɔȳ ngé kɔsə kum gotə mban̄g dɔ ɓē tə́ gə̄ malang ō, tɔdɔ̄ ndíĺ kə́ kə́ kemən tə́ i ndíĺ kə́ tayā. Adə̄ mban̄g gír̄ kəndān dɔ ɓē ko̰o̰ tə́ kə taá malang. 5Anī de kə́ bo madə̄ Daniel gə̄ ō, ngé kɔsə kum gotə mban̄g dɔ ɓē tə́ gə̄ ō, sāān̄ yá̰á̰ kə́ gōtə́ aĺ kə́ dɔ ko̰o̰ ɓē tə́ kə́ Daniel rāā yā sekə́nneé. Banī nin̄ əngen̄ aĺ ō, əngen̄ yá̰á̰ kə́ gōtə́ aĺ kə́ ni-rāā aĺ ō, tɔdɔ̄ ni i de kə́ ra dɔ ndūn tə́. Adə̄ nin̄ əngen̄ yá̰á̰ kógə̄ḿ kə́ yā kəndāń najə̄ dɔn tə́ alé. 6Tā anī de gə̄ ní ədan̄ naā na:
Daniel ń toō j-a j-əngeī yá̰á̰ kógə̄ḿ kə́ gōtə́ aĺ kə́ yā sekə́nneé alé. Ré j-əngeī ɓáa i kə ta kūl̄ *ndū najə̄ yā Nə́ɓā yān tá.
7Tā anī de kə́ bo kə́ jōó gə̄ ō, ngé kɔsə kum gotə mban̄g dɔ ɓē tə́ gə̄ ō, aw̄ ədan̄ mban̄g na:
Mban̄g Darius, ādə̄ dɔí ngan̄g májə́ májə́! 8De kə́ bo gə̄ malang kə́ kem ɓē ko̰o̰ tə́ ō, ngé kəndā kumdə́ gíŕ yá̰a̰ kənge gə̄ tə́ ō, ngé kɔsə kum gotə mban̄g dɔ ɓē gə̄ ō, ngé kadə̄n kɔjə̄ gə̄ ō, ngé ko̰o̰ ɓē gə̄ ō, oōn̄ naā ba dəjeīn̄ kadə̄ ré ī-ndigə anī ī-teē kə *ndū najə̄ yā mban̄g kógə̄ḿ kə́ kadə̄ de gə̄ ran̄ dɔ tə́. *Ndū najə̄ ní n toó:
Kem ndɔ̄ kutə mətá ní, deē ń a ndɔ̄ȳ nə́ɓā kə́rēý, aláa de kə́ rang ba i ḭ̄ mban̄g aĺ anī, a ənīn̄ kɔ́ɔ̄ bəlo ɓɔl gə̄ tə́. 9Beé ní kɔ́ɔ̄ ɓē gə̄, majə kadə̄ ī-teē kə ndū najə̄ ní ō, ə̄ndā jīí gírí ō, kadə̄ deē tūr̄ ndū najə̄ ní alé, tītə̄ ń *ndū najə̄ yā Medə gə̄ ō Persə gə̄ ō ń i ndū najə̄ kə́ deē a ɔr̄ kɔ̄ɔ́ alé ədań ní. 10Loo ń noō tə́ mban̄g Darius ndang *ndū najə̄ ní ō, yá̰á̰ ń ɔgə̄n̄ de gə̄ rāā ní ō.
Ənīn̄ Daniel bəlo ɓɔl gə̄ tə́
11Dan ń Daniel oō kadə̄ ndangən̄ ndū najə̄ kə́ beé anī, tél aw̄ kújə yān tə́.
Ni al̄ aw̄ kem kújə yān tə́ ba teē ko̰rō̰n gə̄ kə́ dām̄ kə́ *Jerusalem tə́. Ni a tétə̄ kejən i loo ń noō tə́ n a ndɔ̄ń Nə́ɓā yān ō, a tɔ̄yń Nə́ɓā yān ō nja mətá ndɔ̄ kógə̄ḿ ní. Ni-rāā tītə̄ ń a rāań kété gə̄ ní. 12Anī de gə̄ ní reēn̄ láẃ əngenən̄ dɔ ndɔ̄ȳ Nə́ɓā yān tə́ ō, dɔ rāā Nə́ɓā yān ɓɔ́ tə́ ō. 13Tā anī nin̄ aw̄n̄ rɔ̄ mban̄g tə́ ba ədanən̄ na:
Kɔ́ɔ̄ ɓē gə̄, ī-ndang ndū najə̄ kógə̄ḿ kə́ kadə̄ kem ndɔ̄ kutə mətá ní deē ń a ndɔ̄ȳ nə́ɓā kə́rēý, aláa a ndɔ̄ȳ de kə́ rang ba i ḭ̄ mban̄g aĺ ní kadə̄ ənīn̄ kɔ́ɔ̄ bəlo ɓɔl gə̄ tə́ aĺ a? Mban̄g tūr̄ əda na:
Yá̰á̰ ń i kə́ ra dɔ tə́ kə gō *ndū najə̄ yā Medə gə̄ ō Persə gə̄ ō ń i ndū najə̄ kə́ deē a ɔr̄ kɔ̄ɔ́ alé ní n noó rɔ̄kum. 14anī de gə̄ né tél ədan̄ na:
Majə, kɔ́ɔ̄ ɓē gə̄, Daniel ń i de kə́ dan *Juda gə̄ ń əhɔn̄də́ reēn̄ sedə́ tə́ ní ɓōĺ ndílí aĺ ō, ɓōĺ ndū najə̄ n ī-ndang ní aĺ ō, ni ndɔ̄ȳ Nə́ɓā yān nja mətá ndɔ̄ kógə̄ḿ.
15Dan ń mban̄g oō najə̄ ń noō ní tōr̄ rɔ̄n ngá̰ý adə̄ ni gír̄ dɔ yá̰á̰ kə́ yā rāā yā teēń kə Danieleé kum tə́. Adə̄ bátə́ kadə̄ mbang udəń ní ni sāā i ta róbə́ kajən. 16Banī de gə̄ ní reēn̄ láẃ rɔ̄ mban̄g tə́ ədanən̄ na:
Kɔ́ɔ̄ ɓē gə̄, ī-ger̄ majə kadə̄ kə gō *ndū najə̄ yā Medə gə̄ ō Persə gə̄ ō ní, yá̰a̰ malang kə́ kɔgə̄ rāā, aláa kə́ yā rāā ń man̄g əda ní deē a tūr̄ alé. 17Loo ń noō tə́ mban̄g əda kadə̄ aw̄n̄ kə Danieleé. Aw̄ ənīnən̄ bəlo ɓɔl gə̄ tə́. Mban̄g əda Daniel na:
Nə́ɓā yāí ń ə́hɔ rɔ̄í tɔgə ī-na kə̄ loo rāā kəla yān tə́ ní, i ni ngóy n a asə kajiī.
18Reēn̄ kə mbal̄ kógə̄ḿ əndān̄ ta bəlo ní tə́. Mban̄g əndā *tambō̰o̰ yān nəkɔ́ ō, yā de kə́ bo yān gə̄ ō, dɔ tə́, yā kadə̄ yá̰á̰ kógə̄ḿ tūr̄ tām̄ yā Daniel tə́ alé. 19Gō tə́ anī mban̄g tél aw̄ gogə́ kem kújə yān tə́. Ndɔ̄ɔ́ ndɔ̄ ń noō tə́ ní, ni-mbātə́ kəsa yá̰á̰ bátə́ loo tīī dɔ n tə́ ō, adə̄ reēn̄ kə də̄yá̰ gidə ndogə̄ yān gēé rɔ̄n tə́ aĺ ō, ɓīī reē kumən tə́ aĺ ō.
Daniel teē bəlo ɓɔl gə̄ tə́ kanjə̄ kadə̄ yá̰á̰ kógə̄ḿ rāān
20Mban̄g ḭḭ dɔɔ́ kə gír looí ɓatə ba aw̄ láẃ ta bəlo ɓɔl gə̄ tə́. 21Dan ń ugə̄ kə̄ ta tə́ ndɔr anī ɓāŕ Daniel kə ndūn kə́ to kum ko̰ó̰ ədan na:
Daniel, nge kəla yā Nə́ɓā kə́ ndi kə kumneé, Nə́ɓā yāí ń ə́hɔ rɔ̄í tɔgə ī-na̰y kə̄ loo rāā kəla yān tə́ ní ajiī ta ɓɔl gə̄ tə́ a? 22Daniel tél ədan̄ na:
Kɔ́ɔ̄ ɓē gə̄ adə̄ dɔí ngan̄g májə́ májə́! 23Nə́ɓā yāḿ əla deē yān kə́ dɔ rā̰ tə́ adə̄ utə̄ ta ɓɔl gə̄ kɔ̄ɔ́, adə̄ ɓɔl gə̄ rāān̄ yá̰á̰ kógə̄ḿ kə́ majaĺ seḿ alé. Tɔdɔ̄ m̄-rāā yá̰á̰ gōtə́ aĺ kə Nə́ɓāá aĺ ō, kɔ́ɔ̄ ɓē gə̄, m̄-rāā yá̰á̰ kógə̄ḿ kə́ gōtə́ aĺ seí ḭ̄ aĺ ō!
24Loo ń noō tə́ rɔ̄ mban̄g nelə̄n ngá̰ý, adə̄ ni-əda kadə̄ ɔrə̄n̄ Daniel kɔ̄ɔ́ bəlo ɓɔl gə̄ tə́. Ɔrə̄n̄ Daniel bəloó banī a̰a̰n̄ do kógə̄ḿ rɔ̄n tə́ alé, tɔdɔ̄ ni-taā kem Nə́ɓā yā mámák. 25De gə̄ ń sekə́n̄ Daniel ní, mban̄g əda kadə̄ reēn̄ sedə́. Adə̄ reēn̄ ɓōkə́n̄də́ bəlo ɓɔl gə̄ tə́, nin̄ ō ngáńdə́ gə̄ ō, nə̄yá̰də́ naā tə́ kɔ̄ɔ́.
26Gō tə́ anī mban̄g Darius ndang najə̄ ń toō əlań adə̄ de gə̄ ń gíŕdə́ ō nápardə́ ō ta yādə́ ō i tayā tayā á ndin̄ dɔ nang tə́ malang ní:
m̄-ndə̄ngā kadə̄ ī-ndiī lápə́ya ngá̰ý!
27M-ə́da de gə̄ kadə̄ rāān̄ yá̰á̰ ń toō gō nang malang kə́ kem ɓē ko̰o̰ yāḿ tə́: Ādə̄ de gə̄ ɓōlə́n̄ ndíĺ Nə́ɓā yā Daniel.
Tɔdɔ̄ i ni n i Nə́ɓā kə́ ndi kə kumneé ō,
i Nə́ɓā kə́ a ndi ngándáńg ō ní.
Ko̰o̰ ɓē yān dan a gān̄g alé, ni a o̰o̰ ɓē bátə́ yā tɔ̄l̄ ta.
28Ni i nge gān̄g dɔ deē ō, nge kajə deē ō,
nge rāā yá̰á̰ kə́ ɔr kum gə̄ ō yá̰á̰ kə́ yáā gə̄ ō,
dɔ rā̰ tə́ ō dɔ nang tə́ ō,
tɔdɔ̄ i ni n ajə Daniel ta ɓɔl gə̄ tə́ ní.
29Daniel ngeé ń toō ndi i loo kəla kə́ bo tə́ ɓāl̄ ko̰o̰ ɓē yā Darius tə́ ō, ɓāl̄ ko̰o̰ ɓē yā Sirus kə́ Persə tə́ ō.
Currently Selected:
Makətūbə̄ yā Daniel 6: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
