Makətūbə̄ kə́ nge ko̰ jōó yā Mban̄g gə̄ 1

Nə́ɓā gān̄g sarya dɔ Akajias tə́

1Gō yo mban̄g Akab tə́ anī, Moab gə̄ mbātə́n̄ kadə̄ *Israel gə̄ ndin̄ dɔdə́ tə́.

2Ndɔ̄ kə́rēý tə́ mban̄g Akajias ndi kem kújə yān kə́ dɔɔ́ kə́ Samari tə́ anī teē ko̰rō̰ kújə́ tə́ əsō adə̄ ənge do ngá̰ý. Ni-əla koō taá rɔ̄ *Baal Jebul, nə́ɓā kə́ Ekəron tə́ yā gerə̄ń ké rɔ̄n a ngáā wa. 3Anī *de kə́ dɔ rā̰ tə́ yā Kɔ́ɔ̄ɓē əda *Eli kə́ Tisbe na kə ḭḭ dɔɔ́ kə aw̄ kə tə́nī ta ngé kəla gə̄ yā mban̄g kə́ Samari, ba kə dəjedə́ na ké Nə́ɓā gətóo i mbée *Israel tə́ áké aw̄n̄ sāá rɔ̄ Baal Jebul nə́ɓā kə́ Ekəron tə́ ní wa. 4Ba gō tə́ anī kə ədadə́ na najə̄ ń Kɔ́ɔ̄ɓē əda tām̄ yā mban̄g kə́ Israel tə́ ní n toó: Tə̄rá ń ī-to dɔ tə́ toō ā ḭ́ḭ dɔ tə́ karī alé, a oy gáŕ. Anī Eli ɔtə aw̄.

5Ngé kəla gə̄ ní télən̄ dɔ tə́ reēn̄ gogə́ rɔ̄ mban̄g tə́. Mban̄g dəjedə́ na ké i tām̄ rí tə́ áké télən̄ róbó ní wa. 6Anī tél ədanən̄ na:

Deē kógə̄ḿ tə́nī tají ba ədají na kə jə-tél dɔ tə́ kə jə-reē kə j-ədaī na Kɔ́ɔ̄ɓē əda na ké Nə́ɓā gətóo i mbée *Israel tə́ áké ə́la *koō taá rɔ̄ Baal Jebul nə́ɓā kə́ Ekəron tə́ ní wa. Beé ɓá ní tə̄rá ń ī-to dɔ tə́ toō ā ḭ́ḭ dɔ tə́ karī alé, a oy gáŕ.

7Mban̄g dəjedə́ na ké deē ń tə́nī tadə́ ba ədadə́ najə̄ ń noō ní ké to i ba̰ý wa. 8Anī tél ədanən̄ na deē ní na o̰ō̰ i kūbə̄ bḭḭ̄ jámbal ba na əhɔ ɓōdə̄n na i kə ndāŕá. Anī mban̄g əda na i *Eli kə́ Tisbe.

Akajias nāā kəhɔ Eli

9Mban̄g əla áskar yān gə̄ kutə mí kəhɔ *Eli tə́. Ngol áskar gə̄ ní aw̄ gō Eli tə́ kə áskar yān gēé. Eli ndi i ta tél mbal̄ tə́ dɔɔ́. Ngol áskar gə̄ ní əda Eli na:

Deē yā Nə́ɓā, mban̄g əda na kə ī-risə nang tə́!

10Banī *Eli tél əda ngol áskar gə̄ ní na:

Ré mā i deē yā Nə́ɓā anī, ādə̄ hor ḭḭ dɔ rā̰ tə́ o̰o̰ī naā tə́ kə deē yāí kə́ kutə mí gēé!

Anī kə̄ ta jī tə́ noō hor kógə̄ḿ ḭḭ dɔ rā̰ tə́ o̰o̰ ngol áskar gə̄ ní kə deē yān kə́ kutə mí gēé malang. 11Mban̄g əla ngol áskar gə̄ kə́ rang ɓáý to̰ kə áskar gēé kutə mí gō Eli tə́. Ngol áskar gə̄ ní əda Eli na:

Deē yā Nə́ɓā, mban̄g əda na kə ī-risə nang tə́ láẃ!

12Banī *Eli tūr̄ əda na: Ré mā i deē yā Nə́ɓā anī, ādə̄ hor ḭḭ dɔ rā̰ tə́ o̰o̰ī kə deē yāí kə́ kutə mí gēé!

Anī kə ta jī tə́ noō hor yā Nə́ɓā ḭḭ dɔ rā̰ tə́ o̰o̰ ngol áskar gə̄ ní kə deē yān kə́ kutə mí gēé malang. 13Mban̄g əla ngol áskar gə̄ kə́ nge ko̰ mətá kə áskar yān kə́ kutə mí gēé ɓáý to̰. Ngol áskar gə̄ kə́ nge ko̰ mətá ní al̄ aw̄ gō Eli tə́ kə deē yān gēé. Ba dan ń ugə̄n̄ anī, ɔsə kejən nang tə́ no Eli tə́ ba rāān ɓɔ́ əda na:

Deē yā Nə́ɓā, m̄-rāāī ɓɔ́! Ādə̄ ndiḿ kə kumḿ ō, ndi ngé kəla yāí kə́ kutə mí gə̄ ń toō kə kumdə́ ō, i yá̰á̰ kə́ ngá̰ý ta kumií tə́, ba ī-lōō tɔ̄l̄jí. 14m̄-ger̄ kadə̄ hor ḭḭ dɔ rā̰ tə́ o̰o̰ ngol áskar gə̄ kə́ jōó gə̄ kété kə deē yādə́ gēé. Banī kə ngɔr ń toō tə́ ní m̄-rāāī ɓɔ́, ādə̄ ndiḿ kə kumḿ i yá̰á̰ kə́ ngá̰ý ta kumií tə́ ba ī-lōō tɔ̄lə̄m̄!

15Loo ń noō tə́ *de kə́ dɔ rā̰ tə́ yā Kɔ́ɔ̄ɓē əda Eli na kə risə kə aw̄ seneé ba kə ɓōlə́n alé. Anī *Eli ḭḭ dɔɔ́ b a risə aw̄ kə ngol áskar gə̄ ní rɔ̄ mban̄g tə́. 16Eli əda mban̄g na:

Kɔ́ɔ̄ɓē əda na ə́la de gə̄ *koō taá rɔ̄ Baal Jebul nə́ɓā kə́ Ekəron tə́, tītə̄ kə́ Nə́ɓā kə́ yā kadə̄ deē aw̄ *koō taá rɔ̄n tə́ gətóo *Israel tə́ beē ɓá ní, tə̄rá ń ī-to dɔ tə́ toō ā ḭ́ḭ kɔ̄ɔ́ dɔ tə́ karī alé a oy gáŕ.

17Akajias oy tītə̄ ń Kɔ́ɔ̄ɓē əndāń ta *Eli tə́ adə̄ ədań ní. Ngōnən gətóo adə̄ i Joram n o̰o̰ ɓē gotən tə́ ní. I kem ɓāl̄ ko̰o̰ ɓē kə́ nge ko̰ jōó yā Joram ngōn̄ Josapat mban̄g kə́ *Juda tə́.

18Ndangən̄ gotə najə̄ kə́ rang gə̄ yā Akajias i kem makətūbə̄ kəla rāā mban̄g gə̄ kə́ *Israel tə́.

Currently Selected:

Makətūbə̄ kə́ nge ko̰ jōó yā Mban̄g gə̄ 1: BS

Highlight

Copy