PĀ GƏ̄ 2
2
Mban̄g ń Nə́ɓā əndān ní
1Nápar de gə̄ a̰a̰n̄ woy woy i tām̄ rí tə́?
Gír de gə̄ oōn̄ naā ba i karī.
2Mban̄g gə̄ kə́ dɔ nang tə́ rāān̄ gō rɔ̄də́ yā rɔ̄ɔ̄.
De kə́ bo gə̄ oōn̄ naā dɔ Kɔ́ɔ̄ɓē tə́ ō,
dɔ mban̄g yān#2.2 Mban̄g yān: Á̰a̰ī Kərist tū «Kum Najə̄ kə́ Ngón̄g Ngón̄g gə̄» tə́. tə́ ō.
3Nin̄ ədan̄ na: Ādə̄ jə-gángī kəlā yādə́ gə̄ ń tɔ́ɔ̄n̄neéjí ní kɔ̄ɔ́!
Jə-mbātíīdə́, ādə̄ ndin̄ dɔjí tə́ to̰ alé!
4Banī Kɔ́ɔ̄ɓē əgō mḛy,
nge ń ndi dɔ rā̰ tə́ ní mbóo sedə́.
5Gō tə́ anī ni-ɔr̄ najə̄ sedə́ kə wōngōó.
Wōn̄g yān adə̄də́ ɓōĺ.
6Ni-əda na: Mban̄g ń m̄-gə̄rān ní
m-ə̄ndān mban̄g i Siyo̰,
dɔ mbal̄ yāḿ kə́ táĺ tə́.
7Yá̰á̰ ń Kɔ́ɔ̄ɓē ndang kadə̄ yā rāā ní m-ā m-ə̄nī mbērən,
ni ədam̄ na:
Ḭ̄ i ngōnə̄ḿ,
ɓōólaā ní, mā i Bɔbí.
8Ré ī-dəjem̄ nápar de gə̄ malang anī
m-ā m-ādī sedə́ kadə̄ nin̄ i yá̰a̰ yāí gə̄ ō,
dɔ nang yāí a laa bátə́ yā kugə̄ ta ngóy dɔ nang tə́ ō.
9Ā ə́la dɔdə́ gíŕ tɔ́gə yāí tə́ i kə ko̰o̰ ɓē kə́ ngan̄g ngá̰ý ō,
ā ī-tɔ̄ɔ̄ kōōdə́ i tītə̄ loo tɔ̄ɔ̄ jóó nánjə beé ō.
10Ɓá anī sḭḭ̄ mban̄g gə̄,
ɔ́jiī kadə̄ sḭḭ̄ i de kə́ ger̄ kum najə̄ gə̄!
Ngé gān̄g sarya kə́ dɔ nang tə́ gə̄, ādə̄ ɔjə̄n̄sí!
11Ī-rāāī kəla ādī Kɔ́ɔ̄ɓē kə ɓōló ō,
ī-rāāī walya kə rɔ̄ ndebeé ō.
12Ī-rɔyī ngōn̄,
na sōgə́ wōn̄g rāān anī ā óyiī róbó.
Yá̰á̰ kə́ sḛ́ý beē gə̄gē anī wōn̄g rāān kɔ̄ɔ́.
De gə̄ malang ń ni i loo ɓɔ̄ɔ̄ rɔ̄ yādə́ ní rɔ̄də́ nel̄də́.
Currently Selected:
PĀ GƏ̄ 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
