PĀ GƏ̄ 138
138
m̄-ndigə tɔ̄yī kə ngarā̰ kemḿ malang
1Pā yā Dabid.
Kɔ́ɔ̄ɓē, m̄-ndigə tɔ̄yī kə ngarā̰ kemḿ malang.
M-ə̄nā pā, m-ɔ́səń gɔnií ta kum de kə́ bo kə́ dɔ rā̰ tə́ gə̄ tə́.
2M-ɔ́sə noḿ nang tə́ sɔɔ̄ kújə́ kə́ táĺ yāí ō, m̄-tɔ̄ȳ rīí ō,
i tām̄ kem majə yāí tə́ ō, najə̄ kə́ rɔ̄kum yāí tə́ ō,
tɔdɔ̄ ḭ̄ ī-rāā i yá̰á̰ ń ə̄nī míndí yā rāā ní ō,
ḭ̄ ī-rāā ādə̄ mān̄ dɔ ō.
3Ndɔ̄ ń m̄-ɓāríī á ī-ndigə ní,
ḭ̄ ə́la go̰ kemḿ tə́ ō, ādə̄m̄ tɔ́gə ō.
4Kɔ́ɔ̄ɓē, ādə̄ mban̄g kə́ dɔ nang tə́ gə̄ malang ɓōkə́nī tɔ̄ȳ,
tɔdɔ̄ nin̄ oōn̄ najə̄ ń teē taí tə́ ní.
5Ādə̄ ənīn̄ pā tɔ̄ȳn̄neé yá̰a̰ rāāí gə̄ ədan̄ na:
Kɔsə gɔn yā Kɔ́ɔ̄ɓē i ngá̰ý.
6Kɔ́ɔ̄ɓē ndi i dɔɔ́ sa̰y ɓá tā
ba a̰a̰ deē ń tél kə rɔ̄neé kə̄ nang tə́ ngá̰ý ní ō,
a̰a̰ nge kɔjə rɔ̄ sa̰y gerə̄n ō.
7Ré mā i dan wur kɔl tə́ anī,
ī-rāā ādə̄ m̄-ndi kə kumḿ gogə́.
Ī-ɓir̄ jīí ə́ndań kó̰ń ngé rɔ̄ɔ̄ḿ gə̄ ō,
jī ko̰í rāā adə̄ m̄-tetə rɔ̄ɔ̄ ō.
8Kɔ́ɔ̄ɓē a rāā yá̰a̰ malang tām̄ yāḿ tə́.
Kɔ́ɔ̄ɓē, kem majə yāí to ngándáńg!
Ngé gə̄ ń īkɔ́ ī-rāādə́ kə jīí ní, ī-lōō kəya̰də́ kɔ̄ɔ́.
Currently Selected:
PĀ GƏ̄ 138: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
