PĀ GƏ̄ 119
119
Ndū najə̄ yā Nə́ɓā i yá̰á̰ kə́ to loo mundə̄ tə́ ō ajə ngá̰ý ō
1Ngé gə̄ ń najə̄ gətóo dɔdə́ tə́ ō,
unən̄ gō ndū najə̄ yā Kɔ́ɔ̄ɓē ō ní, rɔ̄də́ nel̄də́!
2Ngé gə̄ ń rāān̄ yá̰a̰ gə̄ ń ni-əda ní rɔ̄də́ nel̄də́,
nin̄ sāānən̄ i kə ngarā̰ kemdə́ malang.
3Nin̄ rāān̄ yá̰á̰ kə́ majaĺ alé,
banī rāān̄ i yá̰á̰ ń Nə́ɓā mēr̄də́ rāā ní.
4Kɔ́ɔ̄ɓē, ḭ̄ ɔ́jə́ yá̰a̰ gə̄ ń ī-ra kə de gēé ta rāā ní kə̄ ndágá,
kadə̄ ngɔ̄mə̄n̄ kə gōó majə.
5Ādə̄ hálə́ḿ dəba ra gotə kógə̄ḿ,
kadə̄ m̄-rāań yá̰a̰ gə̄ ń ī-ndang kadə̄ yā rāā ní!
6Loo ń noō tə́ ré m̄-tél m-á̰a̰ gō míndí gə̄ malang gogə́ rang anī
rɔ̄ḿ a sɔlə̄m̄ alé.
7M-ā m̄-ɓōkíī tɔ̄ȳ kanjə̄ gír̄ yá̰á̰ kə́ rang kemḿ tə́,
dan ń m-ā m̄-ndóō ndū gə̄ ń ḭ̄ ī-ra dɔ tə́ á i kə́ gōtə́ gə̄ ní.
8Yá̰a̰ gə̄ ń ī-ndang kadə̄ yā rāā ní m-ā m-ə̄ndā rɔ̄ḿ ta tə́ yā rāā.
Ī-lōō kəya̰m̄ kɔ̄ɔ́ kə́ njɔ́ḿ gə̄ tə́!
9Dan ń deē na̰y ngōn̄ ɓáý ní loo kadə̄ hálən majə ɔtə̄ kə taá i ba̰ý?
Kɔ́ɔ̄ɓē, hálən a majə i kə ta kūl̄ rāā yá̰á̰ ń ə́dá ní.
10m̄-sāāī i kə ngarā̰ kemḿ gēé malang,
ī-lōō kəya̰m̄ kadə̄ m-ə́ya̰ gō míndí gə̄ kɔ̄ɔ́ ba m̄-rā m̄-dáȳ sa̰y.
11m̄-ngɔ̄m̄ yá̰a̰ gə̄ ń ɔ́sə kə de gēé ta rāā ní kemḿ tə́,
kadə̄ m̄-rāań majaĺ seí alé.
12Kɔ́ɔ̄ɓē, m̄-rāāī kə́ra!
Ī-ndóōm̄ yá̰a̰ gə̄ ń ī-ndang kadə̄ yā rāā ní.
13Najə̄ gə̄ malang ń ə́dá ní, mā m-úńdə́ kə dɔḿ malang.
14M-ə́nge rɔ̄nel̄ loo rāā yá̰a̰ gə̄ ń ə́dá tə́ ní,
tītə̄ rɔ̄nel̄ yá̰a̰ kənge kə́ ngá̰ý beē.
15m̄-ndigə gír̄ yá̰a̰ dɔ yá̰a̰ gə̄ ń ī-ra kə de gēé ta rāā ní tə́ ō,
m-ā m-á̰a̰ gō róbə yāí gə̄ majə ō.
16Yá̰a̰ gə̄ ń ī-ndang kadə̄ yā rāā ní nelə̄m̄ ngá̰ý.
dɔḿ ndígə̄nal najə̄ yāí alé.
17Ī-rāā kem majə kə nge kəla yāí,
m-ā m̄-ndi kə kumḿ ō, m-ā m̄-ngɔ̄m̄ najə̄ yāí ō.
18Ī-teē kumḿ anī m-ā m-á̰á̰ yá̰á̰ kə́ majə ngá̰ý gə̄ ń ndū najə̄ yāí ɔjə ní.
19Mā i mbā dɔ nang tə́,
ī-lōō mundə̄m̄ gō míndí gə̄.
20Ndūí gə̄ ń ḭ̄ ī-ra dɔ tə́ kə kum mbang gə̄ malang ní,
nelə̄m̄ sedə́ ngá̰ý.
21Ḭ̄ ī-ndán̄g ngé kɔjə rɔ̄ gə̄ ń noō ń ndɔ̄ĺ i dɔdə́ tə́ ní,
nin̄ əya̰n̄ gō míndí gə̄ kɔ̄ɔ́ ba ndó̰mə̄n̄ sa̰y rɔ̄ tə́.
22Ndū ń tájə̄mə̄n̄ ní ɔ̄r̄ kɔ̄ɔ́ ō, kídə̄ ń kídə̄mə̄n̄ ní ɔ̄r̄ kɔ̄ɔ́ ō,
tɔdɔ̄ yá̰a̰ gə̄ ń ə́dá ní m-ə̄ndā kumḿ gíŕdə́ tə́ m̄-rāā.
23Ká ré ngār gə̄ oōn̄neé naā dɔḿ tə́ gə̄gē anī, mā nge kəla yāí
m̄-gír̄ yá̰á̰ ngá̰ý dɔ yá̰a̰ gə̄ ń ī-ndang kadə̄ yā rāā tə́ ní.
24Yá̰a̰ gə̄ ń ə́dá ní adə̄mə̄n̄ rɔ̄nel̄ ngá̰ý,
m-ə́nge kɔjə̄ kə́ majə gə̄ tū tə́.
25m̄-to i kum bumbə́rú tə́ ba
ī-rāā ādə̄ m̄-tél m-ndi kə kumḿ gogə́ tītə̄ ń ə́dań ní.
26M-ɔ́jiī yá̰a̰ gə̄ ń m̄-rāā ní anī ḭ̄ ī-tūrə̄m̄ najə̄ tə́.
Ī-ndóōm̄ yá̰a̰ gə̄ ń ī-ndang kadə̄ yā rāā ní.
27Ī-rāā ādə̄ m̄-ger̄ kum yá̰a̰ gə̄ ń ī-ra kə de gēé ta rāā ní,
loo ń noō tə́ m-ā m̄-gír̄ yá̰a̰ dɔ yá̰á̰ kə́ to kɔr kum yāí gə̄ tə́.
28Wur kɔl rāām̄ adə̄ man̄ kumḿ reē.
Ī-téĺ únəm̄ dɔɔ́ gogə́ tītə̄ ń ə́dań ní.
29Əhɔm̄ ādə̄ mā i kə̄ gogə́ sa̰y kadə róbə́ ń deē a un a a sor̄ tə́ ní.
ī-rāā ādə̄ m̄-ger̄ ndū najə̄ yāí kə ta kūl̄ kem majə yāí ō.
30Mā m̄-ndigə i rāā yá̰á̰ kə́ gōtə́,
i ndūí gə̄ ń ḭ̄ ī-ra dɔ tə́ ní n mā m̄-tetə rɔ̄ḿ gō tə́ ní.
31Mā m-ə́hɔ gō yá̰a̰ gə̄ ń ə́dá ní,
Kɔ́ɔ̄ɓē, ī-lōō kəya̰m̄ dan rɔ̄sɔl̄ tə́.
32M-ā̰ȳ ngɔ̄də̄ dɔ róbə yā gō míndí gə̄ tə́, tɔdɔ̄ ī-teē kumḿ.
33Kɔ́ɔ̄ɓē, ɔ́jəm̄ róbə yā yá̰a̰ gə̄ ń ī-ndang kadə̄ yā rāā ní,
anī yá̰a̰ kəndā nja yāḿ i ngɔ̄m̄ gōdə́.
34Ī-rāā ādə̄ m̄-ger̄ kum ndū najə̄ yāí, loo ń noō tə́ m-ā m-ún gō,
m-ā m-ə̄ndā rɔ̄ḿ ta tə́ kə ngarā̰ kemḿ malang.
35Āw̄ seḿ dɔ róbə yā gō míndí gə̄ tə́,
anī rɔ̄ḿ a nelə̄m̄ ngá̰ý loo kun gō tə́.
36Ī-tūr̄ kemḿ kə̄ rɔ̄ yá̰a̰ gə̄ ń ə́dá tə́ ní,
ba ī-lōō tūr̄ kemḿ kə̄ rɔ̄ yá̰a̰ kənge tə́.
37Ún kumḿ kɔ̄ɔ́ ta yá̰á̰ gól̄ tə́ ō,
ɔ́jəm̄ ta róbə yāí tá kadə̄ m̄-ndi kə kumḿ gogə́ ō.
38Ī-rāā yá̰a̰ gə̄ ń ɔ́sə kə de gēé ta rāā ní tām̄ yā nge kəla yāí tə́.
Loo ń noō tə́ de gə̄ a ɓōlə́n̄ ndílí.
39Rɔ̄sɔl̄ ń i yá̰á̰ kə́ m̄-gḛy aĺ ngá̰ý ní,
ī-tūr̄ ta kɔ̄ɔ́ kə̄ loo kə́ rang tə́,
tɔdɔ̄ ndūí gə̄ ń ī-ra dɔ tə́ ní i kə́ majə ngá̰ý.
40Rɔ̄kum, nelə̄m̄ kə yá̰a̰ gə̄ ń ī-ra kə de gēé ta rāā ní.
Ī-rāā seḿ kə háĺ kə́ gōtə́ yāí ādə̄ m̄-ndi kə kumḿ.
41Kɔ́ɔ̄ɓē, yá̰a̰ gə̄ ń ī-rāā kə gō kem majə yāí ní ādə̄ reēn̄ kə̄ dɔḿ tə́.
Ájəm̄ tītə̄ ń ə́dań ní.
42Loo ń noō tə́ m-ā m̄-ger̄ najə̄ kə́ kadə̄ m̄-tél m-ə́dá ngé tájə̄m̄ gə̄,
tɔdɔ̄ m-ə̄ndā kemḿ i dɔ najə̄ yāí tə́.
43Ī-lōō kɔr̄ najə̄ kə́ rɔ̄kum kɔ̄ɔ́ taḿ tə́,
tɔdɔ̄ m-ə̄ndā kemḿ dɔ ndūí gə̄ ń ī-ra dɔ tə́ ní tə́.
44M-ā m̄-ngɔ̄m̄ ndū najə̄ yāí kanjə̄ kɔr ta tə́ ō, i kə́ njɔ́ḿ gə̄ tə́ ō.
45M-ā m-ə̄nī kemḿ yā njə̄rań
tɔdɔ̄ m̄-sāā gō yá̰a̰ gə̄ ń ī-ra kə de gēé ta rāā ní.
46Yá̰a̰ gə̄ ń ə́dá ní m-ā m-ɔ̄r̄ najə̄n ta kum mban̄g gə̄ tə́ ō,
rɔ̄ḿ a sɔlə̄m̄ loon tə́ aĺ ō.
47Gō míndí gə̄ nelə̄m̄ ngá̰ý, m̄-rāā tɔdɔ̄də́ ngá̰ý.
48M-ɔ́y jīḿ kə̄ dɔɔ́ kə̄ gō míndí gə̄ ń nelə̄m̄ ngá̰ý tə́ ní ō,
m-ā m̄-gír yá̰a̰ dɔ yá̰a̰ gə̄ ń ī-ndang kadə̄ yā rāā ní tə́ ō.
49Ādə̄ əga kemií dɔ najə̄ ń ə́da nge kəla yāí ní tə́,
najə̄ ń ī-rāā adə̄ m-ə̄ndā kemḿ dɔ tə́ ní.
50I ni n a sɔl̄ kemḿ dan wur kɔl yāḿ tə́ ní,
tɔdɔ̄ yá̰á̰ ń ɔsə sedə́ ta rāā ní rāā adə̄ m̄-ndi kə kumḿ.
51Ngé kɔjə rɔ̄də́ gə̄ mbóon̄ seḿ ngá̰ý,
banī mā m̄-tɔ̄ɔ̄ kɔ̄ɔ́ gō ndū najə̄ yāí tə́ alé.
52Kɔ́ɔ̄ɓē, ndūí gə̄ ń ī-ra dɔ tə́ jóó jóó ní əga kemḿ dɔ tə́,
i nin̄ n a sɔlə̄n̄ kemḿ kə ndɔ̄ gə̄ ní.
53De kə́ sew aĺ gə̄ ń əya̰n̄ ndū najə̄ yāí kɔ̄ɔ́ ní,
m-á̰á̰də́ anī wōn̄g rāām̄ sedə́ ngá̰ý.
54Yá̰a̰ gə̄ ń ī-ndang kadə̄ yā rāā ní m̄-ndiń i kə pāá taḿ tə́
kem kújə́ ń mā i mbā tū tə́ ní tə́.
55Kɔ́ɔ̄ɓē, ndɔ̄ɔ́ anī əga kemḿ dɔ rīí tə́
yā kadə̄ m̄-ngɔ̄məń ndū najə̄ yāí.
56Yá̰a̰ kəngeḿ ī-rāā yá̰a̰ gə̄ ń ī-ra kə de gēé kadə̄ rāān̄ ní.
57Kɔ́ɔ̄ɓē, m-ə́da na dāmə̄n kə́ sɔɔ̄ dɔḿ i ngɔ̄m̄ najə̄ kɔrīí gə̄.
58M-ə́hɔ rɔ̄ḿ tɔgə kadə̄ nelī seḿ, ī-rajəm̄ tītə̄ ń ə́dań ní.
59m̄-gír̄ gō hálə́ḿ tə́ ō, m̄-sāā tél reē gogə́ dɔ yá̰a̰ gə̄ ń ə́dá tə́ ní ō.
60m̄-nāgə́ m̄-rāā yá̰a̰ kə gō míndí gə̄ kanjə̄ kɔr bā̰ā̰.
61M-ə̄sō kum gūmbə̄ yā ngé kem ndul gə̄ tə́,
banī dɔḿ ndígə̄nal gō míndí alé.
62M-ḭ́ḭ dan ndɔ̄ɔ́ m̄-ɓōkíī tɔ̄ȳ najə̄ yá̰á̰ kə́ gōtə́ gə̄ ń ī-ra dɔ tə́ ní.
63Mā i madə̄ de gə̄ malang ń a ɓōlə́n̄ ndílí ō,
a rāān̄ yá̰a̰ gə̄ ń ī-ra kə de gēé ta rāā ní ō.
64Kɔ́ɔ̄ɓē, kem majə yāí taā loo malang dɔ nang tə́.
Ī-ndóōm̄ yá̰a̰ gə̄ ń ī-ndang kadə̄ yā rāā ní.
65Kɔ́ɔ̄ɓē, ī-rāā majə seḿ mā nge kəla yāí tītə̄ ń ə́dań ní.
66Ī-ndóōm̄ loo ka̰a̰ yá̰a̰ majə ō, loo ger̄ gō míndí gə̄ ō,
tɔdɔ̄ m̄-taā kemdə́.
67Kété ní m̄-gól̄ i rɔ̄ḿ adə̄ rɔ̄ḿ sɔlə̄m̄,
ba ngɔlaā m̄-rāā yá̰a̰ gə̄ ń ɔ́sə kə de gēé ta rāā ní.
68Kɔ́ɔ̄ɓē, ḭ̄ i de kə́ majə ō, ā ī-rāā majə kə deé ō,
ī-ndóōm̄ yá̰a̰ gə̄ ń ī-ndang kadə̄ yā rāā ní.
69Ngé kɔjə rɔ̄ gə̄ əlan̄ rɔ̄sɔl̄ dɔḿ tə́ kə najə̄ yādə́ kə́ sor̄ gēé,
banī mā m̄-rāā yá̰a̰ gə̄ ń ī-ra kə de gēé ta rāā ní kə ngarā̰ kemḿ malang.
70Kemdə́ magə́rā kɔ̄ɔ́,
banī nelə̄m̄ mā rāā yá̰á̰ ń ndū najə̄ yāí əda ní ngá̰ý.
71Rɔ̄sɔl̄ ń əlan̄ dɔḿ tə́ ní i yá̰á̰ kə́ majə tām̄ yāḿ tə́,
kadə̄ m̄-ndóoń yá̰a̰ gə̄ ń ī-ndang kadə̄ yā rāā ní.
72 Ndū najə̄ kə́ teē taí tə́ majə ngá̰ý tām̄ yāḿ tə́
tɔȳ yá̰a̰ gə̄ dūbú ngá̰ý kə́ rāā kə lɔ́rɔ́ ō kə arjā̰a̰á̰ ō.
73Ī-rāām̄ kə jīí ō, ə́hɔm̄ dɔɔ́ kə jīí ō ní,
ādə̄m̄ kur̄ dɔ kə́ kun yá̰a̰ ādə̄ m̄-ndóōń gō míndí gə̄.
74Ngé gə̄ ń a ɓōlə́n̄ ndílí ní a̰a̰mə̄n̄ anī rāān̄ rɔ̄nel̄,
tɔdɔ̄ m-ə̄ndā kemḿ dɔ najə̄ yāí tə́,
75Kɔ́ɔ̄ɓē, ndūí gə̄ ń ī-ra dɔ tə́ ní, m̄-ger̄ kadə̄ i yá̰á̰ kə́ gōtə́ gə̄ ō,
kəla ń ə́la rɔ̄sɔl̄ dɔḿ tə́ ní i tām̄ ḭ̄ i nge ra dɔ ndūí tə́ ō.
76Ādə̄ kem majə yāí sɔl̄ kemḿ tītə̄ ń ə́dań tām̄ yā nge kəla yāí tə́ ní.
77Ɔ́jəm̄ kadə̄ ī-tárəm̄ anī m-ā m-ájə gogə́,
tɔdɔ̄ nelə̄m̄ mā rāā yá̰á̰ ń ndū najə̄ yāí əda ní ngá̰ý.
78Ngé kɔjə rɔ̄ gə̄ ń najə̄ kə́ sor̄ yādə́ gə̄ taān̄ tɔ́gə́ḿ ní rɔ̄də́ sɔl̄də́.
Yá̰a̰ gə̄ ń ī-ra kə de gēé ta rāā ní mā m̄-gír̄ yá̰á̰ ngá̰ý dɔ tə́.
79Ādə̄ ngé ɓōĺ ndílí gə̄ tél reēn̄ gogə́ rɔ̄ḿ tə́.
Nin̄ a gerə̄n̄ yá̰a̰ gə̄ ń ə́dá ní.
80m̄-ndigə rāā yá̰a̰ gə̄ ń ī-ndang kadə̄ yā rāā ní kə ngarā̰ kemḿ malang.
Loo ń noō tə́ rɔ̄ḿ a sɔlə̄m̄ alé.
81Tɔ́gə́ḿ gətóo kɔ̄ɔ́ loo ngóō kajə kə́ kadə̄ ájəm̄ tə́.
Mā m-ə̄ndā kemḿ dɔ najə̄ yāí tə́.
82Kumḿ roō kɔ̄ɔ́ loo ndəle yá̰a̰ gə̄ ń ɔ́sə kə de gēé ta rāā ní tə́.
adə̄ m-ə́da na: Ā ī-sɔl̄ kemḿ i rə́ngáý tə́?
83m̄-tél m̄-jōjə̄rō tītə̄ sɔl kə́ kəla dɔ sa hor tə́ beē,
banī yá̰a̰ gə̄ ń ī-ndang kadə̄ yā rāā ní dɔḿ ndígə̄nal alé.
84Ā ādə̄ nge kəla yāí i ndɔ̄ kóndóńg n kadə̄ ndiń kə kumneé ɓáý ní?
I rə́ngáý tə́ n ā ī-gān̄g sarya dɔ ngé rāā kumḿ ndoō tə́ gə̄ tə́ ní?
85Ngé kɔjə rɔ̄ gə̄ ndērə̄n̄ bəlo noḿ tə́, nin̄ kídə̄n̄ ndū najə̄ yāí.
86Gō míndí gə̄ malang i najə̄ kə́ rɔ̄kum gə̄.
Ngé ba̰ā̰ḿ gə̄ ngɔ̄də̄n̄ gōḿ kanjə̄ kumən ní, ī-rāā seḿ.
87Mā i nang tə́, m-á̰a̰ yo kə kumḿ,
banī m-ə́yá̰ yá̰a̰ gə̄ ń ī-ra kə de gēé ta rāā ní kɔ̄ɔ́ alé.
88Ī-rāā ādə̄ m̄-tél m̄-ndi kə kumḿ gogə́ kə gō kem majə yāí.
Loo ń noō tə́ m-ā m̄-ngɔ̄m̄ yá̰á̰ ń taí əda ní.
89Kɔ́ɔ̄ɓē, najə̄ yāí to ngándáńg dɔ rā̰ tə́.
90Hálí ń i hál ra dɔ ndūí tə́ ní to kə dɔ ɓāl̄ gə̄ kə dɔ ɓāl̄ gə̄.
Ḭ̄ ə̄ndā dɔ nang, anī dɔ nang ra loo ran tə́.
91Yá̰a̰ malang ra loo ran tə́ kə gō ndūí gə̄ ń ī-ra dɔ tə́ ní bátə́ ɓōólaā,
tɔdɔ̄ yá̰a̰ malang rāā kəla adī.
92Nə́ngētə́ ndū najə̄ yāí nelə̄m̄ ngá̰ý aĺ anī, wur kɔl tɔ̄lə̄m̄ kɔ̄ɔ́.
93Yá̰a̰ gə̄ ń ī-ra kə de gēé ta rāā ní, dɔḿ a ndígə̄nal aĺ bátə́,
tɔdɔ̄ ḭ̄ ī-rāām̄ ādə̄ m̄-ndi kə kumḿ i kə ta kūl̄də́.
94Mā i yāí, ájəm̄, tɔdɔ̄ m̄-sāā yá̰a̰ gə̄ ń ī-ra kə de gēé ta rāā ní.
95Ngé kem ndul gə̄ sāān̄ ta róbə tɔ̄lə̄m̄,
banī yá̰a̰ gə̄ ń ə́dá ní mā m̄-nēl̄ mbīḿ kə̄ gō tə́.
96Yá̰a̰ malang kə́ majə ɔtə̄ kə́ taá ní m-á̰a̰ ta ngóýn,
banī ta ngóy gō míndí gətóo.
97 Ndū najə̄ yāí nelə̄m̄ ngá̰ý. m̄-gír̄ dɔ tə́ kə dɔ ndɔ̄ gə̄ malang.
98Gō míndí rāā adə̄ kumḿ edə̄ tɔȳ ngé ba̰ā̰ḿ gə̄,
m̄-rāān i yá̰a̰ yāḿ tə́ ɗer.
99m̄-ger̄ yá̰a̰ m̄-tɔȳ ngé ndóōḿ yá̰a̰ gə̄ malang,
tɔdɔ̄ m̄-gír̄ yá̰a̰ dɔ yá̰a̰ gə̄ ń ə́dá tə́ ní.
100M-ə̄ndā ma̰ȳ yá̰a̰ m̄-tɔȳ kum kɔɔ̄ gə̄,
tɔdɔ̄ m̄-rāā yá̰a̰ gə̄ ń ī-ra kə de gēé ta rāā ní.
101m̄-mbātə́ kun róbə rāā majaĺ i yā kadə̄ m̄-ngɔ̄məń najə̄ yāí.
102Ndū gə̄ ń ḭ̄ ī-ra dɔ tə́ ní, mā m̄-tūr̄ gidəḿ ta tə́ kɔ̄ɔ́ alé,
tām̄ i ḭ̄ n ī-ndóōm̄ ní.
103Yá̰a̰ gə̄ ń ɔ́sə kə de gēé ta rāā ní nel̄ taḿ tɔȳ yibə̄ tejə.
104m̄-tél de kə́ nge kəndā ma̰ȳ yá̰á̰ ngá̰ý
i kə ta kūl̄ yá̰a̰ gə̄ ń ī-ra kə de gēé ta rāā ní.
I tām̄ najə̄ ń noō tə́ n m̄-mbātə́nń kun róbə sor̄ ní.
105Najə̄ yāí i hor lámbá kə́ unjə̄ kété noḿ tə́,
kadə̄ m-á̰a̰ń loo m-ə̄ndań njaḿ.
I hor kə́ unjə̄ dɔ róbə yāḿ tə́.
106m̄-túbə m-ə̄nīń míndə́ḿ
yā ngɔ̄m̄ ndūí gə̄ ń ī-ra dɔ tə́ á i yá̰á̰ kə́ gōtə́ gə̄ ní.
107Kɔ́ɔ̄ɓē, əlan̄ rɔ̄sɔl̄ dɔḿ tə́ ngá̰ý,
ī-rāām̄ ādə̄ m̄-ndi kə kumḿ gogə́ tītə̄ ń ə́dań ní.
108Kɔ́ɔ̄ɓē, ī-taā ndɔ̄ȳ yāḿ ń m-ādī kadə̄ karī tə́ ní,
ba ī-ndóōm̄ ndūí gə̄ ń ḭ̄ ī-ra dɔ tə́ ní.
109Mā i ta yo tə́ ngándáńg banī dɔḿ ndígə̄nal ndū najə̄ yāí alé.
110De kə́ sew aĺ gə̄ əyān̄ gūmbə̄ noḿ tə́
banī yá̰a̰ gə̄ ń ī-ra kə de gēé ta rāā ní mā m-ɔ̄r̄ rɔ̄ḿ kɔ̄ɔ́ rɔ̄ tə́ alé.
111Yá̰a̰ gə̄ ń ə́dá ní i yá̰a̰ kənge yāḿ gə̄ kə́ njɔ́ḿ gə̄ tə́,
nin̄ rāān̄ adə̄ kemḿ nelə̄m̄.
112Yá̰a̰ gə̄ ń ī-ndang kadə̄ yā rāā ní m-ə̄ndā kumḿ gírí m̄-rāā,
i yá̰a̰ kəndā nja yāḿ kə́ kə́ njɔ́ḿ gə̄ tə́ gə̄ tə́.
113Nelə̄m̄ kə ngé kem jōó gēé aĺ bátə́, banī ndū najə̄ yāí nelə̄m̄ ngá̰ý.
114I ḭ̄ n i loo ɓɔ̄ɔ̄ rɔ̄ yāḿ ō, der yāḿ ō ní. M-ə̄ndā kemḿ dɔ najə̄ yāí tə́.
115Ngé kem ndul gə̄, ɔ̄rī rɔ̄sí rɔ̄ḿ tə́ kɔ̄ɔ́,
anī m-ā m̄-rāā gō míndə gə̄ yā Nə́ɓā yāḿ.
116Ī-rāā seḿ ādə̄ m̄-ndi kə kumḿ tītə̄ ń ə́dań ní.
M-ə̄ndā kemḿ dɔí tə́ ní ādə̄ rɔ̄ḿ sɔlə̄m̄ alé.
117Ī-rāā seḿ anī m-ā m-ájə,
loo ń noō tə́ m-ā m̄-tūr̄ rɔ̄ḿ kə̄ rɔ̄ yá̰a̰ gə̄ ń
ī-ndang kadə̄ yā rāā ní tə́ ngándáńg.
118Ngé mbātə́ rāā yá̰a̰ gə̄ ń ī-ndang kadə̄ yā rāā
ba ra a dáȳn̄ sa̰y rɔ̄ tə́ ní, ḭ̄ ī-mbātə́də́ kɔ̄ɔ́,
tɔdɔ̄ koō naā yādə́ i dɔ sor̄ tə́.
119Ḭ̄ ī-ɓōkə́ ngé kem ndul gə̄ kə́ dɔ nang tə́ dɔ bū loo tə́,
i tām̄ najə̄ ń noō tə́ n nelə̄m̄ kə yá̰a̰ gə̄ ń ə́dá ní.
120m̄-ra ta kumií tə́ anī m̄-ndebə kə̄ rɔ̄ḿ gə̄ tə́ malang, tɔdɔ̄ m̄-ɓōĺ ndílí ō,
Ndūí gə̄ ń ī-ra dɔ tə́ yā rāā ní adə̄mə̄n̄ ɓōĺ ō.
121m̄-rāā yá̰á̰ kə́ súmūú ō kə́ gōtə́ ō,
adə̄ ī-lōō kəya̰m̄ jī ngé rāā kumḿ ndoō tə́ gə̄ tə́.
122Ɔ́jə kə̄ ndágá kadə̄ nge kəla yāí a ndi majə ngándáńg.
Ādə̄ ngé kɔjə rɔ̄də́ gə̄ rāān̄ kumḿ ndoō tə́ alé.
123Kumḿ ɔr kɔ̄ɔ́ loo ngóō kajə kə́ kadə̄ ájəm̄ tə́ ō,
loo sāā yá̰á̰ ń háĺ kə́ gōtə́ yāí ɔjə ní tə́ ō.
124Ī-rāā majə seḿ sɔɔ̄ń kem majə yāí ō,
ī-ndóōm̄ yá̰a̰ gə̄ ń ī-ndang kadə̄ yā rāā ní ō.
125Mā i nge kəla yāí, ī-rāā adə̄ m̄-ger̄ kəndā ma̰ȳ yá̰a̰,
anī m-ā m̄-ger̄ yá̰a̰ gə̄ ń ə́dá ní majə.
126Kum mbang kə́ kadə̄ Kɔ́ɔ̄ɓē rāań yá̰a̰ asə:
Tɔdɔ̄ de gə̄ mānə̄n̄ dɔ ndū najə̄ yāí.
127Nelə̄m̄ kə gō míndí gēé tɔȳ lɔ́r, tɔȳ lɔ́ŕ kə́ unjə̄ njáý njáý.
128Yá̰a̰ gə̄ malang ń ī-ra kə de gēé ta rāā ní m-á̰a̰ kadə̄ i yá̰á̰ kə́ gōtə́ gə̄.
Róbə sor̄ gə̄ malang ní nelə̄m̄ sedə́ aĺ bátə́.
129Yá̰a̰ gə̄ ń ə́dá ní i yá̰á̰ kə́ to kɔr kum gə̄, i tām̄ najə̄ ń noō tə́ n m̄-rāādə́ ní.
130Najə̄ yāí kə́ teē dɔ tə́ teē kum deē dɔ yá̰á̰ tə́,
rāā adə̄ ngé kum gān̄g aĺ gə̄ gerə̄n̄ kəndā ma̰ȳ yá̰a̰.
131M-ə́ya̰ taḿ kə wōyōó m̄-taāń najə̄ yāí,
tɔdɔ̄ kemḿ gḛy gō míndí gə̄ ngá̰ý.
132Ī-tūr̄ kumií kə̄ rɔ̄ḿ tə́, ba ī-rāā seḿ
tītə̄ ń ī-gḛyń kadə̄ i tītə̄ ń noō tām̄ yā ngé gḛy rīí gə̄ tə́ ní.
133Ī-rāā ādə̄ njaḿ əhɔ dɔ nang majə
kə ta kūl̄ yá̰a̰ gə̄ ń ɔ́sə kə de gēé ta rāā ní ō,
ī-lōō kəya̰ yá̰á̰ kə́ majaĺ kógə̄ḿ kadə̄ o̰o̰ ɓē dɔḿ tə́ ō.
134Ī-taām̄ jī ngé rāā kumḿ ndoō tə́ gə̄ tə́,
anī m-ā m̄-rāā yá̰a̰ gə̄ ń ī-ra kə de gēé ta rāā ní.
135Ādə̄ dɔ kumií i kə́ majə kə nge kəla yāí.
Ī-ndóōm̄ yá̰a̰ gə̄ ń ī-ndang kadə̄ yā rāā ní.
136m̄-nōō kə man̄ kumḿ,
tɔdɔ̄ de gə̄ rāān̄ yá̰á̰ ń ndū najə̄ yāí əda ní alé.
137Kɔ́ɔ̄ɓē, ḭ̄ i de kə́ gōtə́ ō,
yá̰a̰ gə̄ ń ī-ra dɔ tə́ yā rāā ní i yá̰á̰ kə́ súmūú gə̄ ō.
138Dan ń ādə̄ ndūí ní ɔ́jə́ háĺ kə́ gōtə́ yāí ō,
ra dɔ ndūí tə́ kə́ ngá̰ý yāí ō.
139Wōn̄g rāām̄ ngá̰ý dan ń m-á̰a̰ā̰
kadə̄ dɔ ngé rɔ̄ɔ̄ḿ gə̄ ndígə̄nal yá̰á̰ ń ə́dá ní kɔ̄ɔ́ ní.
140Najə̄ yāí ɔjə tɔ́gən kə̄ ndágá rɔ̄kum ō,
nge kəla yāí ndigə najə̄ yāí ngá̰ý ō.
141Mā i de kə́ m̄-dūú ō, kídə̄mə̄n̄ ō,
banī dɔḿ ndígə̄nal yá̰a̰ gə̄ ń ī-ra kə de gēé ta rāā ní alé.
142Háĺ kə́ gōtə́ yāí i háĺ kə́ a to ngándáńg ō,
ndū najə̄ yāí i najə̄ kə́ rɔ̄kum ō.
143Wur kɔl əsō dɔḿ tə́ ō, yá̰á̰ kə́ to ndíl ka̰ȳ rāām̄ ō,
banī yá̰á̰ ń adə̄m̄ rɔ̄nel̄ ngá̰ý ní i gō míndí gə̄.
144Yá̰a̰ gə̄ ń ə́dá ní i háĺ kə́ gōtə́ kə́ a to ngándáńg.
Ī-rāā ādə̄ m̄-ger̄ kəndā ma̰ȳ yá̰a̰, anī m-ā m̄-ndi kə kumḿ.
145Kɔ́ɔ̄ɓē, m̄-ɓāríī kə ngarā̰ kemḿ malang, ī-ndigəm̄ tə́.
M-ā m̄-rāā yá̰a̰ gə̄ ń ī-ndang kadə̄ yā rāā ní.
146m̄-ɓāríī, ájəm̄, anī m-ā m̄-rāā yá̰a̰ gə̄ ń ə́dá ní.
147Kété pá tá kadə̄ loo tīī ní, m̄-dəjeī kadə̄ ī-rāā seḿ.
M-ə̄ndā kemḿ dɔ najə̄ yāí gə̄ tə́.
148Kété pá tá kadə̄ gír loo kə́ ndɔ̄ɔ́ gān̄g ní, m̄-tḛḛ̄ kumḿ
yā gírəń yá̰á̰ ngá̰ý dɔ yá̰a̰ gə̄ ń ɔ́sə kə de gēé ta rāā ní tə́.
149Kɔ́ɔ̄ɓē, ōō ɓār̄ yāḿ kə gō kem majə yāí,
ba ī-rāā ādə̄ m̄-tél m̄-ndi kə kumḿ gogə́,
kə gō ndūí gə̄ ń ī-ra dɔ tə́ ní.
150Ngé rāā kumḿ ndoō tə́ ndāńg ndāńg gə̄ ń toō ndɔ́tə̄n̄ kə̄ rɔ̄ḿ tə́ ngɔr,
nin̄ ɔrə̄n̄ rɔ̄də́ sa̰y rɔ̄ ndū najə̄ yāí tə́.
151Kɔ́ɔ̄ɓē, ḭ̄ i ngɔr rɔ̄ḿ tə́ ō,
gō míndí gə̄ malang i najə̄ kə́ rɔ̄kum gə̄ ō.
152Yá̰a̰ gə̄ ń ə́dá ní, m̄-ger̄ i jóó ngá̰ý kadə̄ ə̄ndādə́ i kə́ njɔ́ḿ gə̄ tə́.
153Á̰á̰ yá̰á̰ kə́ to kum tō ndoō ń rāām̄ ní ba ī-gān̄g dɔḿ,
tɔdɔ̄ dɔḿ ndígə̄nal ndū najə̄ yāí alé.
154Ī-nējə̄ najə̄ dɔḿ tə́ ō, ī-rɔ̄ɔ̄ dɔḿ tə́ ō.
ī-rāām̄ ādə̄ m̄-ndi kə kumḿ gogə́ tītə̄ ń ə́dań ní.
155Kajə ndetə kadə de kə́ sew aĺ gə̄ ngɔr alé.
Tɔdɔ̄ nin̄ sāān̄ gō yá̰a̰ gə̄ ń ī-ndang kadə̄ yā rāā ní alé.
156Kɔ́ɔ̄ɓē, ī-rāā yá̰a̰ gə̄ ngá̰ý ɔ́jəń kadə̄ kumií o̰o̰ī kə de gēé ní,
ī-rāām̄ ādə̄ m̄-ndi kə kumḿ gogə́ kə gō ndūí gə̄ ń ī-ra dɔ tə́ ní.
157Ngé rāā kumḿ ndoō tə́ gə̄ ō, madə̄ kɔ̄lə̄ḿ gə̄ ō i ngá̰ý.
banī mā m-ɔ̄r̄ rɔ̄ḿ kɔ̄ɔ́ kadə yá̰a̰ gə̄ ń ə́dá ní tə́ alé.
158M-á̰a̰ de kə́ sew aĺ gə̄,
nin̄ ɔrə̄n̄ wurəḿ tɔdɔ̄ rāān̄ yá̰a̰ gə̄ ń ɔ́sə kə de gēé ta rāā ní alé.
159Kɔ́ɔ̄ɓē, á̰a̰ nel̄ ń nelə̄m̄ kə yá̰a̰ gə̄ ń ī-ra kə de gēé ta rāā ní.
Ī-rāām̄ ādə̄ m̄-ndi kə kumḿ gogə́ sɔɔ̄ń kem majə yāí.
160Gír ngəra najə̄ yāí i yá̰á̰ kə́ rɔ̄kum ō,
yá̰á̰ kə́ gōtə́ yāí gə̄ malang ń ə́da kadə̄ yā rāā ní a ton̄ ngándáńg ō.
161Ngār gə̄ rāān̄ kumḿ ndoō tə́ kanjə̄ kumən ɓá tā,
ba mā m̄-ɓōĺ i najə̄ yāí ngóy.
162m̄-rāā rɔ̄nel̄ yá̰a̰ gə̄ ń ɔ́sə kə de gēé ta rāā ní,
tītə̄ de kə́ rāā rɔ̄nel̄ yá̰á̰ kə́ əhɔ ngá̰ý ta rɔ̄ɔ̄ tə́ beē.
163Sor̄ nelə̄m̄ aĺ ō, m̄-gḛyn aĺ bátə́ ō, banī ndū najə̄ yāí nelə̄m̄ ngá̰ý.
164m̄-ɓōkíī tɔ̄ȳ nja sīrí kem ndɔ̄ kə́ kógə̄ḿ beē tə́,
tām̄ ndūí gə̄ ń ī-ra dɔ tə́ ní i yá̰a̰ kə́ gōtə́ gə̄.
165Ngé gə̄ ń ndū najə̄ yāí nel̄də́ ngá̰ý ní, ī-sɔl̄ kemdə́ ngá̰ý,
yá̰á̰ kógə̄ḿ kə́ əgadə́ bə̄dē tə́ gətóo.
166Kɔ́ɔ̄ɓē, m-ún gō míndí gə̄, adə̄ m̄-ngóō kadə̄ ájəm̄.
167m̄-ngɔ̄m̄ yá̰a̰ gə̄ ń ə́dá ní, nelə̄m̄ sedə́ ngá̰ý rɔ̄kum.
168m̄-rāā yá̰a̰ gə̄ ń ī-ra kə de gēé ta rāā ní ō, yá̰a̰ gə̄ ń ə́dá ní ō.
Ī-ger̄ yá̰a̰ rāāḿ gə̄ malang.
169Kɔ́ɔ̄ɓē, ādə̄ nōō yāḿ ugə̄ rɔ̄í tə́.
Ādə̄ m̄-ger̄ kɔr̄ kam̄ yá̰a̰ gə̄ naā tə́ tītə̄ ń ədań ní.
170m̄-rāāī ɓɔ́ ní, ī-nēl̄ mbīí ōoń. Ī-gān̄g dɔḿ kə gō ndūí!
171Ādə̄ taḿ ɓōkíī tɔ̄ȳ, tɔdɔ̄ ī-ndóōm̄ yá̰a̰ gə̄ ń kadə̄ yā rāā ní.
172Ādə̄ ta ndo̰ḿ ənī pā tɔ̄yń yá̰a̰ gə̄ ń ɔ́sə kə de gēé ta rāā ní,
tɔdɔ̄ gō míndí gə̄ malang i yá̰á̰ kə́ gōtə́ gə̄.
173Ə́la jīí ā̰ȳm̄neé mbērē tə́,
tɔdɔ̄ m̄-gḛy rāā yá̰a̰ gə̄ ń ī-ra kə de gēé ta rāā ní.
174Kɔ́ɔ̄ɓē, m̄-gḛy kadə̄ ájəm̄ kə jīí, ndū najə̄ yāí nel̄ kemḿ ngá̰ý.
175Ādə̄ m̄-ndi kə kumḿ kadə̄ m̄-ɓōkíīneé tɔ̄ȳ,
ɓá anī ndūí gə̄ ń ī-ra dɔ tə́ ní a rāān̄ seḿ.
176m̄-dáȳ tītə̄ batə̄ kə́ ta tḭ̄ḭ̄ beé, ī-sāā nja nge kəla yāí,
tɔdɔ̄ dɔḿ ndígə̄nal gō míndí gə̄ alé.
Currently Selected:
PĀ GƏ̄ 119: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.