TƏ́DA 34
34
Dɔ nin̄ dɔ nang kə́ Kanaan
1-2Kɔ́ɔ̄ɓē mēr̄ Moijə kəda ngán Israel gə̄ gō míndən gə̄ ń toō: Ré ā ūgī dɔ nang kə́ Kanaan tə́ anī, dɔ nang ń a tél dɔ nang yāsí ní i dɔ nang kə́ Kanaan ń dɔ ninə̄n gə̄ ton̄ toó:
3Loo kə́ mángá kə́ Təsin ō, dɔ nang kə́ Edom ō n i dɔ nin̄ dɔ nang yāsí kə́ dām̄ mbɔ́r ɓē kə́ geleé tə́ ní. Dɔ nin̄ dɔ nang yāsí kə́ dām̄ kə́ gír ɓē tə́ a əla gír i ta ngóy bā katə̄ tə́, a əla gír i ta ngóyn kə́ dām̄ mbɔ́r ɓē kə́ geleé tə́. 4A əya̰ loo kə́ kḭḭ kə̄ dɔɔ́ kə́ Akrabim kə̄ dām̄ mbɔ́r ɓē kə́ geleé tə́ ba a aw̄ bátə́ yā kugə̄ Təsin. A əya̰ Kades Barnea kə̄ dām̄ mbɔ́r ɓē kə́ geleé tə́, ba a teē Hasar Adar yā kaw̄ Asmon. 5A ra Asmon noó yā tetə rɔ̄n kaw̄ bā ń rīn na i man̄ kə́ Ejiptə tə́ ní. Ba a un gō man̄ kə́ Ejiptə tə́ yā gāngəń kum bā bo tə́.
6Dɔ nin̄ dɔ nang yāsí kə́ dām̄ kə́ no ɓē tə́ i bā bo.
7Ā ə́laī gír kəndā dɔ nin̄ dɔ nang yāsí kə́ dām̄ mbɔ́r ɓē kə́ ko̰ó̰ tə́ i bā bo tə́ bátə́ kadə̄ ūgīiń mbal̄ Hor tə́. 8Ā ī-raī mbal̄ Hor tə́ yā njar dɔ nin̄ ní kadə̄ teē Lebo Hamat bátə́ kadə̄ ugə̄ Sedad. 9Tá a ḭḭ noó yā kaw̄ kum kə̄ Jipəron bátə́ kadə̄ ugə̄ Hasar Enan. Dɔ nin̄ dɔ nang yāsí kə́ dām̄ mbɔ́r ɓē kə́ ko̰ó̰ tə́ n noó.
10Dɔ nin̄ dɔ nang yāsí kə́ dām̄ kə́ gír ɓē tə́ a ḭḭ Hasar Enan yā gān̄g Sepam. 11A ḭḭ Sepam yā kaw̄ Ribəla ba a əya̰ Ain kə̄ dām̄ kə́ no ɓē tə́. A aw̄ bátə́ yā kɔsə kílən tū mbal̄ gə̄ kə́ gidə bā bo kə́ Kineret tə́ dām̄ kə́ gír ɓē tə́. 12A ra noó yā kaw̄ bátə́ kugə̄ bā Jurdḛ tə́ ba kun gō bā Jurdḛ yā gāngəń kum bā katə̄ tə́.
Dɔ nang yāsí n noó ō, dɔ ninə́n̄ gə̄ n noó ō.
13Moijə əda ngán Israel gə̄ yá̰á̰ ń Kɔ́ɔ̄ɓē mēr̄də́ rāā ní. Ba gō tə́ anī ədadə́ na:
Dɔ nang ń Kɔ́ɔ̄ɓē mēr̄ túgə̄ wə̄lā yā gángəń naā tə́ kadə̄ gír ɓē kə́ ndōhó kə núsə gə̄ ní n noó. 14Tɔdɔ̄ de gə̄ kə́ gír ɓē yā Ruben tə́ ō, yā Gad tə́ ō, núsə de gə̄ kə́ gír ɓē yā Manase tə́ ō, əngen̄ dɔ nang yādə́ kɔ̄ɔ́ ɓá. 15Dɔ nang ń nin̄ əngen̄ ní i dɔ nang ń sɔɔ̄n̄ ta naā kə ɓē kə́ Jeriko gidə bā Jurdḛ tə́, dām̄ kə́ gír ɓē tə́ ní.
Rī ngé nə̄ɓō dɔ nang kə́ Kanaan gə̄
16Kɔ́ɔ̄ɓē əda Moijə na:
17De gə̄ ń a gángə̄n̄ dɔ nang kə́ Kanaan naā tə́ yā nə̄ɓōsí ní i Eleajar nge tun̄ yá̰a̰ ō, Jojue ngōn̄ Nun ō. 18Tá ā ɔ́yiī ngār gə̄ kógə̄ḿ kógə̄ḿ kə dɔ gír ɓē gēé kadə̄ a ərōn̄də́ tə́. 19Rī de gə̄ ní n toó:
De kə́ gír ɓē yā Juda tə́ i Kaleb ngōn̄ Yepune.
20De kə́ gír ɓē yā Simeo̰ tə́ i Semuel ngōn̄ Amihud.
21De kə́ gír ɓē yā Benjamḛ tə́ i Elidad ngōn̄ Kislon.
22De kə́ gír ɓē yā Dan tə́ i Buki ngōn̄ Yogəli.
23De kə́ gír ɓē yā Manase ngōn̄ Jəjep tə́ i Haniyel ngōn̄ Epod.
24De kə́ gír ɓē yā Epəraim ngōn̄ Jəjep tə́ i Kemuel ngōn̄ Sipətan.
25De kə́ gír ɓē yā Jabulo̰ tə́ i Elisapan ngōn̄ Parnak.
26De kə́ gír ɓē yā Isakar tə́ i Paltiel ngōn̄ Ajan.
27De kə́ gír ɓē yā Aser tə́ i Ahihud ngōn̄ Selomi.
28De kə́ gír ɓē yā Nepətali tə́ i Pedahel ngōn̄ Amihud.
29De gə̄ ń Kɔ́ɔ̄ɓē ɔjə dɔdə́ kadə̄ gángə̄n̄ dɔ nang kə́ Kanaan naā tə́ ba nə̄ɓōn̄ ngán Israel gə̄ ní n noó.
Currently Selected:
TƏ́DA 34: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.