MATIYE 27

Aw̄n̄ kə Jeju no Pilatə tə́

(Á̰a̰ī Mark 15.1; Luk 23.1-2; Ja̰a̰ 18.28-32)

1Dan ń loo tīī unjə̄ anī ngol gə̄ kə́ dɔ ngé tun̄ yá̰a̰ gə̄ tə́ malang ō, kum kɔɔ̄ yā ngán Israel gə̄ ō, oōn̄ naā dɔ Jeju tə́ yā tɔ̄lən. 2Nin̄-do̰ō̰nən̄ kə kəlaá ba aw̄n̄ seneé, aw̄ əlanən̄ jī Pilatə nge ko̰o̰ ɓē tə́.

Judas oy

(Á̰a̰ī Kəla 1.18-19)

3Dan ń Judas nge kəlan jī de gə̄ tə́ a̰ā̰ kadə̄ gāngə̄n̄ sarya yo dɔn tə́ anī, ndə̄ngā rɔ̄n ba tél kə sə́lē arjā̰a̰ kə́ kum madə̄ kə́ bo gə̄ kutə mətá ní aw̄ń adə̄ ngol gə̄ kə́ dɔ ngé tun̄ yá̰a̰ gə̄ tə́ ō, kum kɔɔ̄ gə̄ ō, 4ba ədadə́ na:

m̄-rāā majaĺ, tɔdɔ̄ m-ə́la de kə́ kanjə̄ najə̄ dɔn tə́ jī de gə̄ tə́ kadə̄ tɔ̄l̄nən̄.

Banī nin̄-tél ədanən̄ na:

Nge ń noō usəjí i rí? I najə̄ yāí īkɔ́!

5Judas ɓōkə́ nar ní kem kújə́ yā Kɔ́ɔ̄ɓē tə́, ba teē aw̄ ənī kəlā.

6Ngol gə̄ kə́ dɔ ngé tun̄ yá̰a̰ gə̄ tə́ ɔyn̄ nar ní ba ədan̄ na:

Ndū najə̄ yājí ɔgə̄ ɓōkə́ nar kə́ beē loo ngɔ̄m̄ nar kə́ kem kújə yā Kɔ́ɔ̄ɓē tə́, tɔdɔ̄ i nar mósə.

7Nin̄-oōn̄ naā ba aw̄ mangən̄neé loo ndɔr̄ yā kɔdə̄ jóo yā dubə̄ń mbā gə̄. 8I tām̄ najə̄ ń toō tə́ n bátə́ ɓōólaā gə̄gē a ɓārə́n̄ ndɔr̄ ní na i ndɔr̄ mósə́ ní. 9Loo ń noō tə́ najə̄ ń Jeremi nge koō ta əda ní reē udə gírí, ni-əda kété na: Ɔyn̄ sə́lē kə́ kum madə̄ kə́ bo gə̄ kutə mətá, adə̄ i nar gír deē ń ngán Israel gə̄ gāngə̄n̄ gātə̄n ní, 10aw̄ mangən̄neé ndɔr̄ yā kɔdə̄ jóo, kə gō ń Kɔ́ɔ̄ɓē ədam̄neé ní.

Pilatə nge ko̰o̰ ɓē dəje Jeju najə̄

(Á̰a̰ī Mark 15.2-5; Luk 23.3-5; Ja̰a̰ 18.33-38)

11Aw̄n̄ kə Jeju no nge ko̰o̰ ɓē tə́. Anī nge ko̰o̰ ɓē dəjen na ké ni i mban̄g yā Jipə gə̄ wa.

Anī Jeju tél ədan na i īkɔ́ n ə́dá ní.

12Ba loo ń ngol gə̄ kə́ dɔ ngé tun̄ yá̰a̰ gə̄ tə́ ō, kum kɔɔ̄ gə̄ ō, əndān̄ najə̄ dɔn tə́ anī, ni-əda najə̄ alé. 13Loo ń noō tə́ Pilatə nge ko̰o̰ ɓē ədan na ké najə̄ gə̄ malang ń ədan̄ dɔn tə́ toō ní ké oō aĺ wa.

14Banī Jeju əda najə̄ kógə̄ḿ alé, adə̄ ɔr kum nge ko̰o̰ ɓē seneé ngá̰ý.

Gāngə̄n̄ sarya yo dɔ Jeju tə́

(Á̰a̰ī Mark 15.6-15; Luk 23.13-25; Ja̰a̰ 18.39—19.16)

15Kə dɔ nāā Pákə gə̄ malang ń ní nge ko̰o̰ ɓē a ɔr̄ deē kógə̄ḿ dəngáyá a adə̄ kósə de gə̄ tām̄ yā nāā Pákə tə́, adə̄ i dəngáý ń kósə de gə̄ dəjen̄ ní. 16Tá dan ngé ń noō tə́ ní, dəngáy kógə̄ḿ kə́ lūlūn ɓār̄ ngá̰ý i noó, rīn na i Jeju Barabas. 17Loo ń de gə̄ kánə̄n̄ naā anī, Pilatə dəjedə́ na ké i náā n kə n-əya̰n dɔɔ́ kə n-adə̄də́ ní wa, i Jeju ń a ɓāŕnən̄ na i Barabas ní aké i Jeju ń a ɓāŕnən̄ na i Kərist ní wa?

18Tɔdɔ̄ ni ger̄ majə kadə̄ i nii n rāādə́ á nin̄-əlan̄ Jeju jīn tə́ ní.

19Dan ń Pilatə ndi loo gān̄g sarya tə́ ní, nə̄yá̰n əla ədan na kə lōō kəla rɔ̄n dan najə̄ yā de kə́ súmūú ń noō tə́. Tɔdɔ̄ na n-nī nī kə́ majaĺ ngá̰ý dɔn tə́ ndɔ̄ɔ́ laā.

20Ngol gə̄ kə́ dɔ ngé tun̄ yá̰a̰ gə̄ tə́ ō, kum kɔɔ̄ gə̄ ō, sə̄lān̄ kósə de gə̄ kadə̄ dəjen̄ kadə̄ əya̰n̄ Barabas dɔɔ́, ba kadə̄ Jeju kə oy. 21Nge ko̰o̰ ɓē tél un najə̄ ɔr̄ ɓáý, dəjedə́ na dan de kə́ jōó gə̄ ń toō tə́ ní, ké kə n-ɔr̄ i náā dəngáyá wa.

Nin̄-tél ədanən̄ na i Barabas.

22Pilatə dəjedə́ na ké kə n-rāā i rí kə Jeju ń a ɓāŕnən̄ na i Kərist ní wa.

Anī nin̄ malang tél ədanən̄ na:

Ādə̄ ə́ndain̄ kə máyá̰ tū kāgə̄ kə́ dēsə́ tə́!

23Pilatə dəjedə́ na ké yá̰a̰ kə́ majaĺ ń rāā ní ké i rí wa.

Banī nin̄-əgan̄ kɔŕ tɔȳ kə́ kété gə̄ ədan̄ń na:

Ādə̄ əndanən̄ kə máyá̰ tū kāgə̄ kə́ dēsə́ tə́!

24Dan ń Pilatə a̰ā̰ kadə̄ najə̄ yān teē yá̰a̰ alé, ba de gə̄ a ənīn̄ i wúȳ jīn tə́ anī, un man̄ tə́goń jīn ta kum kósə de gə̄ tə́, ba əda na:

Mósə deē ń toō a əsō dɔḿ mā tə́ alé, i najə̄ yāsí sḭḭ̄ kɔ́ gə̄!

25Anī kósə de gə̄ malang tél ədan̄ na:

Ādə̄ mósən əsō dɔjí tə́ ō, dɔ ngáńjí gə̄ tə́ ō!

26Loo ń noō tə́ ni-ɔr̄ Barabas dəngáyá adə̄də́, ba adə̄ əndan̄ Jeju kə ndéy mərawaá pá tá əlan jī de gə̄ tə́ kadə̄ əndanən̄ kə máyá̰ tū kāgə̄ kə́ dēsə́ tə́ ɓáý.

Áskar gə̄ lurən̄ Jeju

(Á̰a̰ī Mark 15.16-20; Ja̰a̰ 19.2-3)

27Áskar gə̄ yā Pilatə nge ko̰o̰ ɓē aw̄n̄ kə Jeju kem kújə ngol yā nge ko̰o̰ ɓē tə́, ba kánə̄n̄ ɓūtə̄ áskar gə̄ malang dɔn tə́. 28Nin̄-ɔrə̄n̄ kūbə̄ kə́ rɔ̄n tə́ kɔ̄ɔ́ ba əlan̄ kūbə̄ kūl̄ kə́ kərē bḭḭ yā áskar gə̄ rɔ̄n tə́. 29Nin̄-sétə̄n̄ kōn̄ gə̄ rāān̄ jākā kə́ tītə̄ yā mban̄g gə̄ tə́, əlan̄ dɔn tə́ ō, əlan̄ tə̄ɓā jī ko̰n tə́ ō, ba ɔsən̄ kejədə́ nang tə́ non tə́ mbóon̄neé seneé ədan̄ na:

Lápə́ya, mban̄g yā Jipə gə̄!

30Tíbə̄n̄ hōr̄ rɔ̄n tə́, ba taān̄ tə̄ɓā ní əndan̄neé dɔn. 31Dan ń mbóon̄ seneé oy anī, ɔrə̄n̄ kūbə̄ kūl̄ kə́ kərē ní rɔ̄n tə́ kɔ̄ɔ́, ba téĺ tə́lan̄ kūbə̄ yān gə̄ rɔ̄n tə́ gogə́. Gō tə́ anī aw̄n̄ seneé yā kaw̄ kəndan kə máyá̰ tū kāgə̄ kə́ dēsə́ tə́.

Əndan̄ Jeju kə máyá̰ tū kāgə̄ kə́ dēsə́ tə́

(Á̰a̰ī Mark 15.21-32; Luk 22.26-43; Ja̰a̰ 19.17-27)

32Dan ń teē a aw̄n̄ seneé kə̄ gidə ɓē tə́ ndágá anī, əngen̄ deē kógə̄ḿ kə́ Siren, rīn na i Simo̰. Əhɔnən̄ adə̄ ətō kāgə̄ kə́ dēsə́ yā Jeju. 33Ugə̄n̄ loo ń a ɓārə́n̄ na i Golgota tə́ ní. Golgota ní, kumən na i kār̄ dɔ deē. 34Anī adə̄n̄ Jeju kasə nduú kə́ rāā man̄ yá̰a̰ kə́ atə̄ kárárá kum tə́ kadə̄ a̰ȳ. Ni nāā tan tə́ anī, mbātə́ ka̰ȳ kɔ̄ɔ́. 35Dan ń əndanən̄ kə máyá̰ tū kāgə̄ kə́ dēsə́ tə́ oy anī, áskar gə̄ túgə̄n̄ wə̄lā kēgə̄n̄neé naā kūbə̄ yān gə̄. 36Gō tə́ anī ndin̄ nang tə́ a ngɔ̄m̄nən̄. 37Nin̄-ndangən̄ sarya ń gāngə̄n̄ dɔn tə́ ní əndān̄ dɔn tə́ dɔɔ́. Ndangən̄ ədan̄ na: Nge ń toō i Jeju, mban̄g yā Jipə gə̄. 38Əndan̄ ngé kum̄ róbə gə̄ jōó kə máyá̰ tū kāgə̄ kə́ dēsə́ gə̄ tə́ kadə Jeju tə́. Kógə̄ḿ i dɔ jī ko̰n tə́ ō, kə́rēý i dɔ jī gelən tə́ ō.

39Ngé mān̄ róbə gə̄ tə́gān̄ dɔdə́ ō, tájə̄nən̄ ō, ba ədanən̄ na:

40Ḭ̄ ń ī-sāā tɔ̄ɔ̄ kújə́ yā Kɔ́ɔ̄ɓē kɔ̄ɔ́ ba tél rāā rang kem ndɔ̄ mətá ní, īkɔ́ ájə rɔ̄í. Ré ḭ̄ i Ngōn̄ Nə́ɓā anī, ī-risə kɔ̄ɔ́ dɔ kāgə̄ kə́ dēsə́ tə́!

41Ngol gə̄ kə́ dɔ ngé tun̄ yá̰a̰ gə̄ tə́ ō, ngé ndóō de gə̄ ndū najə̄ gə̄ ō, kum kɔɔ̄ gə̄ ō, mbóon̄ seneé ō, ədan̄ na:

42Ni ajə de kə́ rang gə̄, ba asə kajə rɔ̄n nəkɔ́ aĺ wa! Ni i mban̄g kə́ Israel tə́ aĺ a? Ādə̄ risə kɔ̄ɔ́ dɔ kāgə̄ kə́ dēsə́ tə́ ngɔr ń toō tə́ ādə̄ jə-taāī kemən. 43Ni-əndā kemən dɔ Nə́ɓā tə́ mámák adə̄ əda na ni na i Ngōn̄ Nə́ɓā ní, ré Nə́ɓā tárən anī, ādə̄ taān jī yo tə́ kə́ ngɔr ń toō tə́.

44Ngé kum̄ róbə gə̄ ń əndan̄də́ kə máyá̰ tū kāgə̄ kə́ dēsə́ tə́ kadən tə́ ní tájə̄nən̄ tītə̄ ń noō ō.

Jeju oy

(Á̰a̰ī Mark 15.33-41; Luk 23.44-49; Ja̰a̰ 19.28-30)

45Loo ń mbang i dan ɓēé ní, loo gān̄g tíbə ripə, adə̄ loo kə́ risə til taā loo dɔ nang tə́ malang, bátə́ ugə̄ń mbang kə́ mətá kə́ loo sɔlí tə́. 46Ugə̄ kum mbang kə́ mətá kə́ loo sɔlí tə́ anī, Jeju əga kɔŕ ngá̰ý əda na:

Eli, Eli, lama sabaktani. Kumən na i Nə́ɓā yāḿ, Nə́ɓā yāḿ, ə́ya̰m̄ kɔ̄ɔ́ i tām̄ rí tə́?

47Dan ń de kə́rēý gə̄ dan ngé gə̄ ń ran̄ noó tə́ ní oōn̄ beé anī, ədan̄ na:

A ɓāŕ i Eli.

48Anī deē kógə̄ḿ dandə́ tə́ a̰ȳ ngɔ̄də̄ kə̄ ta jī tə́ noō aw̄ un yá̰á̰ kə́ to tītə̄ ndɔkə́rɔ əla kum kasə kə́ masə̄ tə́ do̰ō̰ ta tə̄ɓā tə́, ba əla ta Jeju tə́ kadə̄ njíbə̄. 49Banī de kə́ rang gə̄ ədan̄ na kə ra ɓam kadə̄ kə n-a̰a̰n̄ ké Eli a reē yā kajən wa.

50Banī Jeju əga kɔŕ ngá̰ý ɓáý to̰, ba əhɔ tan kə̄ naā tə́ kɔ̄ɔ́. 51Anī kūbə̄ ń gāngə̄n̄neé kem kújə́ yā Kɔ́ɔ̄ɓē ní rə̄yā̰ naā tə́ jōó, dɔɔ́ bátə́ ugə̄ nang tə́. Dɔ nang ndebə ō, mbal̄ gə̄ njárə̄n̄ naā tə́ ō. 52Ta bāá ɓádə gə̄ teēn̄ ō, de gə̄ yā Nə́ɓā ń oyn̄ ní, ngá̰ý gə̄ ndólə̄n̄ ō. 53Nin̄-teēn̄ kɔ̄ɔ́ bāá ɓádə gə̄ tə́. Dan ń Jeju ń oy ní ndól̄ anī, nin̄-udən̄ Jerusalem ń i ɓē kə́ táĺ ní tə́, adə̄ de gə̄ ngá̰ý a̰a̰n̄də́.

54Ngol áskar gə̄ ō, áskar gə̄ ń ngɔ̄mə̄n̄ Jeju seneé ní ō, a̰a̰n̄ dɔ nang ń ndebə ní ō, yá̰a̰ ń rāā yá̰á̰ ní ō anī, ɓōlə́n̄ ngá̰ý ba ədan̄ na:

Deē ń toō i Ngōn̄ Nə́ɓā rɔ̄kum!

55Dəyá̰ gə̄ ngá̰ý ran̄ noó, ba dandə́ i sa̰y n a a̰a̰n̄neé loo ní. Nin̄-əlan̄ gír kun gō Jeju i Galile nú, njə̄rān̄ seneé a rāān̄neé kəla adə̄nən̄. 56Mari kə́ Magədala ō, Mari kó̰o̰ Jakə nin̄ kə Jəjep ō, kó̰ó̰ ngán Jebede gə̄ ō, nin̄ i dan dəyá̰ gə̄ ní tə́.

Dubə̄n̄ Jeju

(Á̰a̰ī Mark 15.42-47; Luk 23.50-56; Ja̰a̰ 19.38-42)

57Loo tíbí anī, de kə́ nge yá̰a̰ kal̄ loo kógə̄ḿ kə́ kem ɓē kə́ Arimate tə́ reē ugə̄. Rīn na i Jəjep. Ni i nge ndóō yá̰a̰ yā Jeju ō. 58Ni-aw̄ ənge Pilatə ba dəjen na kə adə̄n nīń Jeju. Anī Pilatə adə̄ ndūn kadə̄ adə̄nən̄. 59Jəjep un nīń Jeju, ɓír̄ kə pákə́tā lḛ́ḛ́ kə́ unjə̄ njáý njáý, 60ba aw̄ ənī kem bāá ɓádə́ kə́ kijə ń adə̄ tə́gān̄ kem mbal̄ tə́ tām̄ yān nəkɔ́ Jəjep tə́ ní. Gō tə́ anī, ndūbə̄rū mbal̄ kógə̄ḿ kə́ bo əndā ta bāá ɓádə́ ní tə́ utə̄ń ta, ba ɔtə aw̄. 61Mari kə́ Magədala ō, Mari kə́ rang ō, nin̄ i loo ngeé ń noō tə́, nin̄-ndin̄ kumdə́ sɔɔ̄ ta bāá ɓádə́ ní.

Ngɔ̄mə̄n̄ dɔ ɓádə Jeju

62Teē kə ndɔ̄ kə́ noō, adə̄ i ndɔ̄ ń utə̄ gō ndɔ̄ rāā yá̰a̰ gə̄ kə́ yā kəndāń dɔ rɔ̄ danaá tə́ ní#27.62 Jipə gə̄ a rāān̄ rɔ̄də́: Jipə gə̄ a rāān̄ gō rɔ̄də́ i ndɔ̄ mehḛ́ kəla tə́. Ndɔ̄ mehḛ́ kəla yādə́ ní loojí laā i ndɔ̄ mí kəla., ngol gə̄ kə́ dɔ ngé tun̄ yá̰a̰ gə̄ tə́ ō, Parijiyḛ gə̄ ō, aw̄n̄ naā tə́ malang rɔ̄ Pilatə tə́ ba ədanən̄ na:

63Kɔ́ɔ̄ɓē gə̄, əga kemjí dɔ najə̄ kógə̄ḿ kə́ nge gól̄ de gə̄ ngeé ń toō əda tə́, dan ń ni-ndiń kə kumneé ɓáý tə́ ní. Ni-əda na:

Ndɔ̄ mətá gō tə́ ɓáa n-a n-ndól̄.

64I beé, ní ādə̄ ndūí kadə̄ ngɔ̄mə̄n̄ dɔ ɓádən bátə́ ndɔ̄ mətá, na sōgə́ ngé ndóō yá̰a̰ yān gə̄ reē ɓogən̄ nīnə́n, ba ədan̄ de gə̄ na ni na oy ba na ndól̄ dan de kə́ koy gə̄ tə́. Loo ń noō tə́ gól̄ kə́ gō gogə́ ń noō a majaĺ ngá̰ý tɔȳ kə́ kété ɓáý.

65Pilatə ədadə́ na:

Sḭḭ̄ i kə ngé ngɔ̄m̄ loo gēé ní, āw̄ ī-ngɔ̄mī tītə̄ ń ī-gerīneé ní.

66Nin̄-aw̄ ɔrən̄ mbō̰ ta bāá bəlo ní tə́, ba əndān̄ ngé ngɔ̄m̄ loo gə̄ ta tə́ kadə̄ ngɔ̄mə̄n̄.

Currently Selected:

MATIYE 27: SARDC

Highlight

Copy