JOJUE 24

Ngán Israel gə̄ ndigən̄ rāā kəla yā Nə́ɓā

1Jojue adə̄ gír ɓē gə̄ malang yā ngán Israel gə̄ kánə̄n̄ naā Sisem, ba ni ɓāŕ kum kɔɔ̄ yādə́ gə̄ ō, ngār yādə́ gə̄ ō, ngé gān̄g sarya yādə́ gə̄ ō, ngé ndóō de gə̄ ndū najə̄ yādə́ gə̄ ō, adə̄ reē ran̄ ta kum Kɔ́ɔ̄ɓē tə́, 2ba ni-əda de gə̄ malang na: Yá̰á̰ ń Kɔ́ɔ̄ɓē Nə́ɓā yā Israel əda ní n toó: Kété ní, kaasí gə̄ ndin̄ i gidə bā Opəratə tə́ ba a rāān̄ i ɓesə̄ gə̄ bátə́ ugə̄ń ɓāl̄ yā Tera kə́ bɔbə̄ Abəraham nin̄ kə Nahor tə́. 3m̄-teē kə kaasí Abəraham kɔ̄ɔ́ dɔ nang kə́ gidə bā Opəratə tə́, ba m-āw̄ seneé dɔ nang kə́ Kanaan tə́. m̄-rāā m-adə̄ ngán kaan gə̄ bəlan̄ ngá̰ý. M-ādə̄n Isaak. 4Ba m-ādə̄ Isaak Jakob nin̄ kə Esau. M-ādə̄ Esau gō nang mbal̄ kə́ Seir kadə̄ ndi tū tə́. Ba Jakob nin̄ kə́ ngánən gēé aw̄n̄ dɔ nang kə́ Ejiptə tə́. 5Gō tə́ anī m-ə́la Moijə nin̄ kə Aaro̰, ba m-ādə̄ yá̰á̰ kə́ tōr̄ kə́ tayā tayā gə̄ rāān̄ de kə́ Ejiptə gə̄ pá tá m̄-teē sesí kɔ̄ɔ́ kem ɓē kə́ Ejiptə tə́ ɓáý. 6Dan ń bɔbə̄sí gē teēn̄ kɔ̄ɔ́ kem ɓē kə́ Ejiptə tə́ ní, reēn̄ bátə́ ugə̄n̄ ta bā bo tə́, banī de kə́ Ejiptə gə̄ ngɔ̄də̄n̄ gōdə́ kə púsə rɔ̄ɔ̄ gə̄ ō, kə sə́nda gə̄ ō, reē teēn̄ gōdə́ tə́ ta bā tə̄ɓā gə̄ tə́. 7Bɔbə̄sí gə̄ əgan̄ kɔŕ kə̄ dɔ Kɔ́ɔ̄ɓē tə́, adə̄ Kɔ́ɔ̄ɓē əndā loo kə́ risə til dɔ dáńsí tə́ kə de gə̄ ké Ejiptə gēé. Ba gō tə́ anī Kɔ́ɔ̄ɓē rāā adə̄ bā bo ɔr tan dɔdə́ tə́. Yá̰á̰ ń m̄-rāā kə de kə́ Ejiptə gə̄ ní, sḭḭ̄ á̰a̰ī kə kumsí. Gō tə́ anī ī-ndiī kem dəla loo tə́ dan i ngá̰ý. 8Pá ta m-āw̄ sesí dɔ nang yā Amor gə̄ ń ndin̄ gidə bā Jurdḛ tə́ dām̄ kə́ gír ɓē tə́ ní. Nin̄-rɔ̄ɔ̄n̄sí banī m-ə́ládə́ kem jīsí tə́, adə̄ ī-taāī dɔ nang yādə́, tɔdɔ̄ m̄-rāā m-ādə̄ nin̄ gətóon̄ nosí tə́ kɔ̄ɔ́ malang. 9Balak ngōn̄ Sipor ń ni i mban̄g kə́ dɔ nang kə́ Moab tə́ ní sāā rɔ̄ɔ̄ ngán Israel gə̄. Ni-əla ɓāŕ Balam ngōn̄ Beor tə́ kadə̄ reē ndɔ̄ĺsí. 10Banī m̄-mbātə́ koō najə̄ yā Balam, adə̄ ni tɔ́r̄ i tan tá dɔsí tə́. I beé n m̄-gāngəń dɔsí jī Balak tə́ ní. 11Ī-teēī bā Jurdḛ ba ī-reē ūgī Jeriko. De kə́ Jeriko gə̄ rɔ̄ɔ̄n̄sí ō, Amor gə̄, kə Periji gə̄, kə Kanaan gə̄, kə Het gə̄ kə Girgas gə̄, kə Hibi gə̄ kə Yebus gə̄ rɔ̄ɔ̄n̄sí ō. Banī m-ə́ládə́ kem jīsí tə́ malang. 12M-ə́la kə gəmbā gēé adə̄ tə̄ɓān̄ mban̄g kə́ jōó gə̄ yā Amor gə̄ kɔ̄ɔ́ nosí tə́. Tū yá̰a̰ gə̄ ń noō tə́ malang ní, kaskar yāsí gə̄, kə ga̰ gərā yāsí gə̄ rāān̄ yá̰á̰ kógə̄ḿ alé. 13Adə̄ m-ādə̄sí dɔ nang kə́ á̰a̰ī tápə̄ loo ndɔr̄ tə́ tū tə́ kété aĺ ō, m-ādə̄sí ɓē gə̄ kə́ i sḭḭ̄ n ī-rāāī alé adə̄ ī-ndiī kemeé ō, m-ādə̄sí kāgə̄ nduú gə̄, kə kāgə̄ olibə gə̄ kə́ i sḭḭ̄ n ə̄ndāī alé, adə̄ ə́saī kan̄də́ gə̄ ō.

14Anī Jojue tél əda na: Ngɔlaā ní, ī-ɓōlíī ndíĺ Kɔ́ɔ̄ɓē ō, ī-rāāī kəla kə ngarā̰ kemsí malang ādīin̄ ō, ī-raī dɔ ndūsí tə́ ō. Ɓesə̄ gə̄ ń kaasí gə̄ a rāān̄ gidə bā tə́ ō, dɔ nang kə́ Ejiptə tə́ ō ní, ī-ró̰yīdə́ kɔ̄ɔ́ ba ī-rāāī kəla yā Kɔ́ɔ̄ɓē. 15Ba ré rāā kəla yā Kɔ́ɔ̄ɓē nel̄sí aĺ anī, ī-gə̄rāī ɓesə̄ gə̄ ń ī-ndigiī rāādə́ ní ɓōólaā. Ré i ɓesə̄ gə̄ ń kaasí gə̄ a rāān̄ dan ń ndinə̄ń gidə bā Opəratə tə́ ní n nel̄sí sedə́ anī, ī-gə̄rāīdə́ ō, ré i ɓesə̄ gə̄ yā Amor gə̄ ń ī-ndiī dɔ nang yādə́ tə́ toō n nel̄sí sedə́ anī, ī-gə̄rāīdə́ ō. Banī mā ō, de kə́ kem ndogə̄ yāḿ tə́ gə̄ ō, j-a jə-rāā i kəla yā Kɔ́ɔ̄ɓē.

16Ngán Israel gə̄ tūr̄ ədan̄ na: Jə-gír̄ kəya̰ Kɔ́ɔ̄ɓē kɔ̄ɔ́ ba rāań ɓesə̄ gə̄ alé. 17Tɔdɔ̄ i Kɔ́ɔ̄ɓē Nə́ɓā yājí n ɔr̄jí kə bɔbə̄jí gēé kɔ̄ɔ́ kem ɓē kə́ Ejiptə tə́ ní, ni-rāā yá̰á̰ kə́ yáā kə́ bo ngá̰ý gə̄ ta kumjí tə́ adə̄ j-a̰ā̰. I ni n ngɔ̄m̄jí dɔ róbə́ kə́ ngāl̄ ngá̰ý ń njə̄rā tū tə́ ní ō, dan gír de gə̄ malang ń jə-mān̄ dandə́ tə́ ní ō. 18I ni n tə̄ɓā gír de gə̄ malang kɔ̄ɔ́ nojí tə́ ní ō. I ni n tə̄ɓā Amor gə̄ ń ndin̄ dɔ nang ń toō tə́ ní. J-a jə-rāā kəla yā Kɔ́ɔ̄ɓē ō, tɔdɔ̄ i ni n i Nə́ɓā yājí ní.

19Tā anī Jojue əda de gə̄ na: Ā ásiī rāā kəla yā Kɔ́ɔ̄ɓē alé, tɔdɔ̄ ni i Nə́ɓā kə́ táĺ ō, Nə́ɓā kə́ nge rāā jang ō#24.19 Nə́ɓā kə́ nge rāā jang ɔjə kadə̄ ngán Israel gə̄ rāān̄ rɔ̄də́ i dəyá̰ tə́ tām̄ yā Kɔ́ɔ̄ɓē tə́, adə̄ ni sāā kadə̄ i nəkɔ́ ngóy n i Nə́ɓā yādə́ ní. Á̰a̰ī Teē 20.5. Ni a tə́gā tan dɔ mbātə́ najə̄ yāsí gə̄ tə́ aĺ ō, dɔ majaĺ yāsí gə̄ tə́ aĺ ō. 20Ré ā ə́ya̰ī Kɔ́ɔ̄ɓē kɔ̄ɔ́ yā rāań kəla kadə̄ nə́ɓā kə́ mbā gə̄ anī, ni a tūr̄ rɔ̄n kə̄ rɔ̄sí tə́ yā rāāsí majaĺ. Ni ń kété rāā majə sesí ní, a tél yā rāā kadə̄ ī-gətóoī kɔ̄ɔ́ malang. 21De gə̄ tél ədan̄ na: ḿ-m, i Kɔ́ɔ̄ɓē n j-a jə-rāā kəla yān ní 22Jojue tél əda na: Loo ń noō té ní, i sḭḭ̄ kɔ́ gə̄ n i nge kəda najə̄ kə́ kum tə́ dɔ rɔ̄sí sḭḭ̄ kɔ́ gə̄ tə́ ní tɔdɔ̄ i sḭḭ̄ kɔ́ gə̄ n ī-ndigiī rāā kəla yā Kɔ́ɔ̄ɓē ní. Nin̄ tél ədan̄ na: A̰á̰ā̰, jḭḭ i ngé kəda najə̄ kə́ kum tə́ dɔ rɔ̄jí jḭḭ kɔ́ gə̄ tə́. 23Tā anī Jojue əda na: I beé ɓáa nə́ɓā kə́ mbā gə̄ ń i dɔ dáńsí tə́ ní, ī-ró̰yḭ̄də́ kɔ̄ɔ́ ba ī-tūrī ngarā̰ kemsí kə̄ rɔ̄ Kɔ́ɔ̄ɓē Nə́ɓā yā Israel tə́. 24De gə̄ tél ədan̄ Jojue na: A̰á̰ā̰, j-a jə-rāā kəla yā Kɔ́ɔ̄ɓē ń i Nə́ɓā yājí ní ō, j-a j-oō tan ō.

25Ndɔ̄ ń noō tə́ Jojue rāā adə̄ de gə̄ ənīn̄ ndūdə́ əhɔnəń madə̄ naā kə Kɔ́ɔ̄ɓē kem ɓē kə́ Sisem tə́. Ni-əndā ndū najə̄ dɔ de gə̄ tə́ ō, ɔjədə́ loo rāā yá̰a̰ gə̄ ō. 26Jojue ndang najə̄ gə̄ ní kem makətūbə̄ ndū najə̄ yā Nə́ɓā tə́. Gō tə́ anī ni un mbal̄ kə́ ba, udə kə nja dɔɔ́ gír kāgə̄ sén tə́, loo kə́ táĺ yā Kɔ́ɔ̄ɓē tə́. 27ba əda de gə̄ na: Mbal̄ ń toō i nge kəda najə̄ kə́ kum tə́ dɔjí tə́, tɔdɔ̄ ni oō najə̄ malang ń Kɔ́ɔ̄ɓē ɔr̄ sejí ní. Ni i nge kəda najə̄ kə́ kum tə́ dɔsí tə́ yā kɔgə̄ńsí rāā háĺ kə́ gōtə́ aĺ kə Nə́ɓā yāsí. 28Loo ń noō tə́ Jojue əya̰ de gə̄ adə̄ aw̄n̄. Nin̄ kógə̄ḿ kógə̄ḿ télən̄ kə̄ dɔ nang yādə́ tə́.

Jojue oy

29Gō yá̰a̰ gə̄ ń noō tə́ anī, Jojue ngōn̄ Nun kə́ nge kəla yā Kɔ́ɔ̄ɓē oy. Ɓālə̄n i ɓú kə kutə kógə̄ḿ. 30Dubə̄nən̄ i dɔ nang ń adə̄nən̄ tə́ ní kem ɓē kə́ Timnat Sera tə́, gō nang ké mbalá yā Epəraim tə́. Ré deē ra mbal̄ ń rīn na i mbal̄ Gaas ní tə́ anī, loo ń dubə̄nən̄ tū tə́ ní i kə̄ dām̄ mbɔ́r ɓē kə́ ko̰ó̰ tə́. 31Ngán Israel gə̄ rāān̄ kəla yā Kɔ́ɔ̄ɓē dan ń Jojue ndiń kə kumneé ní tə́. Nin̄ rāān̄ kəla yā Kɔ́ɔ̄ɓē gō yo Jojue tə́ dan ń kum kɔɔ̄ yādə́ gə̄ ń a̰a̰n̄ kəla kə́ bo gə̄ ń Kɔ́ɔ̄ɓē rāā tām̄ yā ngán Israel gə̄ tə́ ní ndinə̄ń kə kumdə́ ní ō.

32Ngán Israel gə̄ dubə̄n̄ kə̄ngā Jəjep ń ḭḭnə̄ń Ejiptə ní kem ɓē ké Sisem tə́. Dubə̄n̄ i kem ndɔr̄ ń Jakob mang jī ngán Hamor kə́ bɔbə̄ Sisem tə́ kə kesita#24.32 Kesita kógə̄ḿ i nar gír batə̄ kógə̄ḿ. ɓú kógə̄ḿ. Ndɔr̄ ń dubə̄n̄ kə̄ngā Jəjep tū tə́ ní tél i ndɔr̄ yā ngán kaa Jəjep gə̄.

33Eleajar ngōn̄ Aaro̰ oy ō. Dubə̄nən̄ i dɔ ngōn̄ mbal̄ ń adə̄n̄ ngōnən Pinas ní tə́ gō nang kə́ mbalá yā Epəraim tə́.

Currently Selected:

JOJUE 24: SARDC

Highlight

Copy