JOJUE 22

Ngán Israel gə̄ kə́ gidə bā Jurdḛ tə́

1Tā anī Jojue ɓāŕ Ruben gə̄ ō, Gad gə̄ ō, de kə́ gír ɓē yā Manase tə́ gə̄ ń loo yādə́ i dām̄ kə́ gír ɓē tə́ ní ō, 2ba ədadə́ na: Sḭḭ̄ ī-rāāī yá̰a̰ malang ń Moijə kə́ nge kəla yā Kɔ́ɔ̄ɓē ədasí kadə̄ ī-rāāī ní ō, ōōī taḿ adə̄ ī-rāāī yá̰a̰ malang ń m-ə́dásí kadə̄ ī-rāāī ní ō. 3Asə ɓāl̄ ngá̰ý ɓōólaā ní sḭḭ̄ əya̰ī ngákó̰ó̰sí gə̄ kɔ̄ɔ́ alé, sḭḭ̄ ōōī ta Kɔ́ɔ̄ɓē Nə́ɓā yāsí adə̄ ī-rāāī gō míndə gə̄ ń ni ədasí kadə̄ ī-rāāī ní. 4Ngɔlaā ní Kɔ́ɔ̄ɓē Nə́ɓā yāsí adə̄ ngákó̰ó̰sí gə̄ ta róbə adə̄ ndin̄ lɔm dɔ nang yādə́ tə́ kɔ̄ɔ́ ɓá tītə̄ ń ni-ənīń ndūn adə̄də́ ní, ī-tél āwī gogə́ ɓēé loosí tā, āw̄ ī-ndiī dɔ nang ń Moijə kə́ nge kəla yā Kɔ́ɔ̄ɓē adə̄sí gidə bā Jurdḛ tə́ dām̄ ké gír ɓē tə́ ní. 5Ba ī-ngɔ̄mī ndū najə̄ gə̄ malang ń ni ədasí ní, ī-táriī Kɔ́ɔ̄ɓē Nə́ɓā yāsí, ī-rāāī yá̰á̰ ń kemən ndigə ní, ī-rāāī gō míndə gə̄ ń ni-əndā dɔsí tə́ kadə̄ ī-rāāī ní, ə́hɔī gōn ba ī-raī kəla ādīin̄ kə ngarā̰ kemsí malang ō, kə rɔ̄sí malang ō.

6Gō tə́ anī tɔ́r̄ tan dɔdə́ tə́ ba mērdə́ tél kaw̄ gogə́ ɓēé. 7-8Ni ədadə́ na: Ī-tél āwī ɓēé kə yá̰a̰ kənge ngá̰ý gə̄ ń ə́neī ní adə̄ i yá̰a̰ kul̄ gə̄ ō, gində̄ arjā̰a̰ ō, lɔ́r ō, gində̄ nə̄ngá kasə ō, gində̄ kə́ karī ō, kūbə̄ gə̄ ngá̰ý ō. Yá̰a̰ kənge yā madə̄ ba̰ā̰sí gə̄ ń ɔ́yiī ní ī-kēgī naā kə ngákó̰ó̰sí gēé. Núsə de gə̄ kə́ ta kəga dɔ kə́ gír ɓē yā Manase tə́ ní, Moijə adə̄də́ loo dɔ nang ké Basan tə́, gidə bā Jurdḛ tə́, dām̄ kə́ gír ɓē tə́. Ba núsə de gə̄ kə́ nge ko̰ jōó kə́ gír ɓē yā Manase tə́ ní, Jojue adə̄də́ loo gidə bā Jurdḛ dām̄ kə́ no ɓē tə́ tītə̄ yā gotə gír ɓē kə́ rang gə̄.

Loo tun̄ yá̰á̰ kə́ kadə bā Jurdḛ tə́

9Adə̄ ngán Ruben gə̄ ō, ngán Gad gə̄ ō, de kə́ gír ɓē yā Manase tə́ kə́ dām̄ kə́ gír ɓē tə́ gə̄ ō, əyan gotə ngán Israel gə̄ Silo dɔ nang kə́ Kanaan tə́, ba tél aw̄n̄ gogə́ ɓēé dɔ nang kə́ Galaad tə́. Nin̄ əngen̄ dɔ nang kə́ Galaad ní i kə gō ndū Kɔ́ɔ̄ɓē ń ədań Moijə ní. 10Dan ń ugə̄n̄ Gelilot kə́ kadə bā Jurdḛ tə́ ń loo kə́ dɔ nang kə́ Kanaan tə́ ɓáý ní anī, rāān̄ loo tun̄ yá̰á̰ kógə̄ḿ kə́ bo ngá̰ý tū tə́. 11De gə̄ reē ədan̄ gotə ngán Israel gə̄ na: Ngán Ruben gə̄ ō, Gad gə̄ ō, de ké gír ɓē yā Manase tə́ kə́ dām̄ kə́ gír ɓē tə́ gə̄ ō, rāān̄ loo tun̄ yá̰a̰ kadə bā Jurdḛ tə́ dām̄ yājí tə́, dɔ nang kə́ Kanaan tə́.

12Dan ń ngán Israel gə̄ oōn̄ najə̄ ń noō ní kánə̄n̄ naā malang Silo yā kaw̄ rɔ̄ɔ̄ gír ɓē gə̄ kə́ dām̄ kə́ gīr ɓē tə́. 13Nin̄ əlan̄ Pinas ngōn̄ Eleajar kə́ nge tun̄ yá̰a̰ dɔ nang kə́ Galaad tə́ kadə̄ aw̄ ɔr̄ najə̄ kə ngán Ruben gə̄ ō, ngán Gad gə̄ ō, de kə́ gír ɓē yā Manase tə́ ké dām̄ kə́ gír ɓē tə́ gə̄ ō. 14Ngāgəra dɔ ngán Israel gə̄ kutə kógə̄ḿ aw̄n̄ seneé ngāgəra dɔ gə̄ ní i kógə̄ḿ kógə̄ḿ kə dɔ gír ɓē gēé, nin̄ malang i ngār gə̄ dɔ kojə yādə́ gə̄ tə́ dan ngán Israel gə̄ tə́. 15Nin̄ aw̄n̄ rɔ̄ ngán Ruben gə̄ tə́ ngán Gad gə̄ tə́ ō, de kə́ gír ɓē yā Manase tə́ dɔ nang kə́ Galaad tə́ gə̄ ō, ba ədan̄də́ na: 16Ngán Israel gə̄ ń i de gə̄ yā Kɔ́ɔ̄ɓē ní, najə̄ ń ədan̄ malang ní n toó, ədan̄ na ī-rāāī yá̰á̰ kə́ gōtə́ aĺ ngá̰ý kə́ asə naā beé kə Nə́ɓā yā Israel i tām̄ rí tə́? Ī-lōōī gír koō ta Kɔ́ɔ̄ɓē tə́ ngɔlaā i tām̄ rí tə́? Dan ń ī-rāāī loo tun̄ yá̰a̰ yāsí sḭḭ̄ kɔ́ gə̄ kə́ dɔsí ní ī-mbātíī i najə̄ ta Kɔ́ɔ̄ɓē. 17Yá̰á̰ kə́ gōtə́ aĺ ń jə-rāāī Peor ní asəjí aĺ ɓáý a? Ngán Israel gə̄ ń i de gə̄ yā Kɔ́ɔ̄ɓē gə̄ ní, yá̰á̰ kə́ tōr̄ rāādə́ tāmən tə́, ba ɓōólaā gə̄gē gíŕ yá̰á̰ kə́ tōr̄ ní gān̄g dɔjí tə́ aĺ ɓáý, 18anī ɓōólaā ɔ̄rī rɔ̄sí kɔ̄ɔ́ rɔ̄ Kɔ́ɔ̄ɓē tə́ a? Ɓōólaā ī-mbātíī najə̄ ta Kɔ́ɔ̄ɓē tə́ ba bírí anī i ngán Israel gə̄ malang ń ni a rāā wōn̄g sedə́ ní. 19Ré á̰a̰ī kadə̄ dɔ nang yāsí i kə́ yḛr anī, ī-tél ī-reēī gogə́ dɔ nang yā Kɔ́ɔ̄ɓē tə́, loo ń loo ndi yān i tū tə́ ní tə́. Əhɔī loo ī-ndiīń dɔ dáńjí tə́ ba ī-lōōī rāā loo tun̄ yá̰á̰ kə́ rang kadə yā Kɔ́ɔ̄ɓē Nə́ɓā yājí tə́ ba mbātə́nń Kɔ́ɔ̄ɓē ō, mbātə́nńjí ō. 20Dan ń Akan ké ngōn̄ kaa Jera rāā yá̰á̰ kə́ gōtə́ alé kə́ ɔjə dɔ yá̰á̰ bāā dɔ ní, i ngán Israel gə̄ malang n wōn̄g rāā Kɔ́ɔ̄ɓē sedə́ ní aĺ a? Tá Akan oy i kə kérneé tām̄ majaĺ yān tə́ alé.

21Ngán Ruben gə̄ ō, ngán Gad gə̄ ō, de kə́ gír ɓē yā Manase tə́ kə́ dām̄ ké gír ɓē tə́ gə̄ ō, tél ədan̄ ngār gə̄ yā kósə́ ngé rɔ̄ɔ̄ gə̄ kə́ Israel tə́ na: 22Nə́ɓā kə́ ngan̄g, Kɔ́ɔ̄ɓē, Nə́ɓā kə́ bo, Kɔ́ɔ̄ɓē ger̄ kɔ̄ɔ́ ō, ngán Israel gə̄ a gerə̄n̄ ō. Ré jə-mbātə́ Kɔ́ɔ̄ɓē, aláa jə-rāā yá̰á̰ kógə̄ḿ kə́ gōtə́ alé kə Kɔ́ɔ̄ɓē anī, adə̄ Kɔ́ɔ̄ɓē ajəjí ɓōólaā alé. 23Ré jə-rāā loo tun̄ yá̰á̰ ní i yā kadə̄ jə-turəń gidəjí kɔ̄ɔ́ ta Kɔ́ɔ̄ɓē tə́, adə̄ i yā kadə̄ jə-róoń dā̰, aláa i yā ndējəń Nə́ɓā kadə̄ karī gə̄, aláa i yā tunə̄ń dā̰ kə́ tām̄ yā kem kógə̄ḿ tə́ anī, adə̄ Kɔ́ɔ̄ɓē rāājí yá̰á̰ kə́ tōr̄ tāmən tə́. 24Jə-rāā loo tun̄ yá̰á̰ ní i tām̄ jə-ɓōĺ najə̄ kadə̄ bírí beē anī ngán kaasí gə̄ ədan̄ yājí gə̄ na: I rí n ɓoosí naā tə́ kə Kɔ́ɔ̄ɓē Nə́ɓā yā Israel gēé ní. 25Sḭḭ̄ ngán Ruben gə̄ ngán Gad gə̄ ō, dɔ nin̄ ń Kɔ́ɔ̄ɓē əndā dɔ dáńjí tə́ ní i bā Jurdḛ, adə̄ yá̰á̰ kə́ ɓoosí naā tə́ kə Kɔ́ɔ̄ɓē gətóo. Loo ń noō tə́ ngán kaasí gə̄ a rāān̄ kadə̄ yājí gə̄ a ndɔ̄ȳn̄ Kɔ́ɔ̄ɓē to̰ alé. 26I tām̄ najə̄ ń noō tə́ n jə-rāań loo tun̄ yá̰á̰ ń toō n, i yā róōń dā̰ aĺ ō, yā tunə̄ń yá̰á̰ kə́ rang gə̄ aĺ ō. 27Ba i yā kadə̄ rāā rɔ̄n i yá̰á̰ kə́ kum tə́ tām̄ yājí tə́ ō, tām̄ yāsí tə́ ō, tām̄ yā ngán kaají gē tə́ ō, kə́ ɔjə kadə̄ jə-rāā kəla yā Kɔ́ɔ̄ɓē kə yá̰á̰ kə́ róō horoó gə̄ ō, kə tun̄ tām̄ yā kem kógə̄ḿ tə́ gə̄ ō, kə yá̰a̰ tun̄ yājí kə́ ɓoodə́ naā tə́ kə Kɔ́ɔ̄ɓē na gətóo alé. 28J-əda na ré ndɔ̄ń tə́ deē ədají jḭḭ aké ngán kaají gə̄ najə̄ ké tītə̄ ń noō anī, j-a jə-tél yā kəda kɔ́ɔ̄ na: Á̰a̰ī, kaají gə̄ rāān̄ loo tun̄ yá̰a̰ adə̄ to tītə̄ loo tun̄ yá̰a̰ yā Kɔ́ɔ̄ɓē beé, rāān̄ i yā róoń dā̰ aĺ ō, i yā tunə̄ń yá̰á̰ kə́ rang gə̄ aĺ ō, ba i yā kadə̄ tél yá̰á̰ kə́ kum tə́ kə́ to dɔ dáńjí tə́ sesí. 29Jə-gír̄ mbātə́ najə̄ ta Kɔ́ɔ̄ɓē tə́ aĺ ō, ɓōólaā gə̄gē ní jə-gír̄ tūr̄ gidəjí tan tə́ aĺ ō, tɔdɔ̄ jə-rāā loo tun̄ yá̰a̰ yā róoń dā̰ aĺ ō, yā ndejəń kadə̄ karī gə̄ aĺ ō, yā tunə̄ń yá̰á̰ kə́ rang gə̄ aĺ ō. Jə-ndigə̄ tun̄ yá̰a̰ loo kə́ rang tə́ alé. I loo tun̄ yá̰á̰ ń ra ta kújə yā Kɔ́ɔ̄ɓē Nə́ɓā yājí tə́ ní n jə-ndigə tun̄ yá̰a̰ dɔ tə́ ní.

30Dan ń nge tun̄ yá̰á̰ ń rīn na i Pinas ní ō, ngé gə̄ ń i seneé ō, i ngāgəra dɔ ngán Israel gə̄ ō, nin̄ i ngār gə̄ yā kósə́ ngé rɔ̄ɔ̄ gə̄ ō, ní oōn̄ najə̄ kɔr̄ ngán Ruben gə̄ ō, ngán Gad gə̄ ō, ngán Manase gə̄ ō anī, ndigən̄ najə̄ ní. 31Pinas ngōn̄ Eleajar kə́ nge tun̄ yá̰a̰ əda ngán Ruben gə̄ ō, ngán Gad gə̄ ō, ngán Manase gə̄ ō na: Ngɔlaā ní jə-ger̄ kadə̄ Kɔ́ɔ̄ɓē i dɔ dáńjí tə́ tām̄ sḭḭ̄ ī-rāāī yá̰á̰ kə́ gōtə́ aĺ ní seneé alé. I beé n ájiīń ngán Israel gə̄ jī Kɔ́ɔ̄ɓē tə́ ní.

32Gō tə́ anī Pinas ngōn̄ Eleajar kə́ nge tun̄ yá̰a̰ ō, ngāgəra dɔ gə̄ yā ngán Israel gə̄ ō, əya̰n̄ ngán Ruben gə̄ ō, ngán Gad gə̄ ō, ba télən̄ dɔ tə́. Nin̄ əya̰n̄ dɔ nang kə́ Galaad ba tél aw̄n̄ gogə́ dɔ nang kə́ Kanaan tə́ rɔ̄ ngán Israel gə̄ tə́, aw̄ ɔjən̄də́ gotə najə̄ ń oōn̄ nó. 33Ngán Israel gə̄ ndigən̄ najə̄ ní ō, tɔ̄ȳn̄ Nə́ɓā ō. Nin̄ lōōn̄ gír kaw̄ yā rɔ̄ɔ̄ ngán Ruben gə̄ ō, ngán Gad gə̄ ō, nin̄ lōōn̄ kadə̄ nujə dɔ nang yādə́ tə́.

34Loo ń noō tə́ ngán Ruben gə̄ ō, ngán Gad gə̄ ō, əndān̄ rī loo tun̄ yá̰á̰ ní na i yá̰á̰ kə́ kum tə́, tɔdɔ̄ i yá̰á̰ kə́ ɔjədə́ mbak kadə̄ Kɔ́ɔ̄ɓē i Nə́ɓā.

Currently Selected:

JOJUE 22: SARDC

Highlight

Copy