JOB 9
9
Najə̄ ń Job tūr̄ əda ní, əda na Nə́ɓā ngan̄g tɔȳn
1Tā anī Job ɔr̄ najə̄ əda na:
2Rɔ̄kum, m̄-ger̄ kadə̄ to i tītə̄ ń noō.
Loo kadə̄ najə̄ yā deē i gōtə́ banī yā Nə́ɓā i gōtə́ aĺ ní i ba̰ý?
3Ré deē gḛy kadə̄ najə̄ yān i gōtə́ ba kadə̄ yā Nə́ɓā i gōtə́ aĺ anī,
ré kɔ́ɔ̄ əda najə̄ tan i dūbú anī, ni a tūr̄ kógə̄ḿ alé.
4Rɔ̄kum, tɔ́gən ni i ngá̰ý al̄ naā ō, i de kə́ ger̄ najə̄ ngá̰ý al̄ naā ō.
I náā n ənīn rɔ̄ɔ̄ kanjə̄ ɓōĺ ō, teē kum tə́ kanjə̄ kadə̄ yá̰á̰ kógə̄ḿ rāān ō ní?
5Ni ń i nge ndɔ́tə̄ kə mbal̄ gēé kɔ̄ɔ́ loo ndadə́ tə́ kanjə̄ kadə̄ nin̄ gerə̄n̄ gō ní,
ni ń wōn̄g rāān anī mbə́rē tə́nīdə́ gagəranda ní,
6ni-rāā adə̄ dɔ nang yéȳ ō, bir̄ njan gə̄ ń dɔ nang ndi tadə́ tə́ ní yéȳn̄ ō.
7Ni-əda kadə̄ mbang əɓa alé, anī mbang əɓa aĺ ō,
ni utə̄ ta tə́yō̰ gə̄ kə lakélé ō.
8Ni teē kem dɔ rā̰ kə kérneé ō, njə̄rā dɔ bəngál bā bo gə̄ tə́ ō.
9Ni-rāā tə́yō̰ gə̄ ń a ɓārə́n̄də́ na i ngáń ngé rāā kār̄ gə̄ ō,
dɔgə́ loo tīī ō, nja dabə ō ní.
10Ni-rāā yá̰á̰ kə́ bo gə̄ kə́ deē asə ger̄ aĺ gə̄.
Yá̰á̰ kə́ majə kə́ to kɔr kum gə̄ ń ni-rāā ní, deē asə tə́da kutədə́ alé.
11Ni mān̄ kadəḿ tə́ ngɔr ō, m-á̰a̰n aĺ ō,
ni-aw̄ ō, m̄-ger̄ kum yá̰á̰ kógə̄ḿ tū tə́ aĺ ō.
12Ré ni un yá̰a̰ kə gúu gēé anī, i náā n a rāān kadə̄ əya̰ ní?
De kə́ yā dəjen na ké a rāā i rí n toó wa ní gətóo.
13Nə́ɓā əhɔ gír wōn̄g yān alé.
Dā̰ man̄ kə́ kum bā bo tə́ gə̄, adə̄ i Rahab nin̄ kə ngé rāā seneé gēé ní,
tɔ́gə́də́ gətóó gír njan tə́.
14Ní i mā n kə m̄-tūr̄ m-ə́dan najə̄ a?
Kə m-ɔ́y najə̄ gə̄ kə m̄-rɔ̄ɔń seneé a?
15Ká ré mā i de kə́ gōtə́ gə̄gē a, m-ásə tūr̄ najə̄ kógə̄ḿ yā kəda aĺ ō,
i gáŕ kadə̄ m̄-dəje nge sekə́m̄ kadə̄ rajəm̄ tə́ ō!
16Ká ré m̄-ɓārə́nń yá̰a̰ adə̄ ni ndigəmə̄ń gə̄gē a,
m̄-taā kem kadə̄ ni a oō ɓār̄ yāḿ alé.
17Ni-ra kum néĺ kə́ əla kə ngangá ngá̰ý tə́ rējə̄m̄neé ō,
adə̄m̄ do kum kə̄ kété kanjə̄ kumən ō ní,
18əya̰m̄ adə̄ m̄-taā koō sḛ́ý alé,
banī ni rāām̄ adə̄ wurəḿ atə̄m̄ ngá̰ý.
19Ré i kadə̄ jə-rɔ̄ɔ̄ naā seneé anī, ni ngan̄g tɔȳm̄!
Ré i kadə̄ jə-rāā sarya kə naá yā kadə̄ jə-gāngəń najə̄ ń to dɔ dáńjí tə́ ní anī,
a ndigə ɓārə́m̄ loo sarya tə́ nəkɔ́ a?
20Ká ré mā i de kə́ gōtə́ gə̄gē anī, najə̄ kə́ taḿ tə́ a gān̄g sarya dɔḿ tə́.
Ká ré najə̄ gətóoń dɔḿ tə́ gə̄gē anī, ni a ɔjə kadə̄ mā i de kə́ majə aĺ.
21Mā ní najə̄ gətóo dɔḿ tə́ a? Mə̄kɔ́ m-ásə ger̄ alé.
Ndi kə kumuú nelə̄m̄ to̰ alé.
22Tām̄ yāḿ mā tə́ ɓáa i yá̰á̰ kə́ kógə̄ḿ beē, i yá̰á̰ ń noō n m-ə́da na:
De kə́ najə̄ gətóo dɔn tə́ a ni nujən ō, nge tɔ̄l̄ deē a ni nujən ō ní.
23Loo ń ré yá̰á̰ kə́ majaĺ kógə̄ḿ teē rétə́ gēé dɔ de gə̄ tə́ ō,
wur kɔl əsō dɔ de kə́ kanjə̄ najə̄ dɔdə́ tə́ gə̄ ō anī,
Nə́ɓā ndi a əgō i yá̰á̰ kə́ tōr̄ ń teē dɔdə́ tə́ ní.
24Loo ń ré ɓē kógə̄ḿ əsō jī ngé tɔ̄l̄ de gə̄ tə́ anī,
Nə́ɓā utə̄ kum ngé gān̄g sarya gə̄ kɔ̄ɔ́!
Ré i ni n rāā yá̰á̰ ń noō aĺ anī, i náā kə́ rang tā?
25Ndɔ̄ḿ gə̄ a̰ȳn̄ ngɔ̄də̄ tɔȳ ngé ka̰ȳ ngɔ̄də̄ gə̄,
nin̄ a̰ȳ aw̄n̄ kɔ̄ɔ́ kanjə̄ kadə̄ gerə̄n̄ yá̰á̰ ń i ndi majə ní.
26Nin̄ aw̄n̄ láẃ ngá̰ý tītə̄ too tə̄ɓā gə̄#9.26 Too tə̄ɓā i too kə́ əjan̄ i tə̄ɓā n rāān̄neé, adə̄ hɔɔ́lɔ̄ ō, ngɔ̄də̄ ngá̰ý ō. beé ō,
tītə̄ kə̄rō kə́ ḭḭ dɔɔ́ a jə̄ngā kə̄ dɔ dā̰ yān tə́ beé ō.
27M-ɔ̄r̄ najə̄ kə rɔ̄ḿ m-ə́da na: Majə kadə̄ dɔḿ ndígə̄nal nō rɔ̄ yāḿ kɔ̄ɔ́ ō,
m̄-lōō gír rɔ̄nel̄ aĺ yāḿ tə́ ba m-ādə̄ rɔ̄ḿ nelə̄m̄ ō.
28Banī yá̰a̰ malang ń tōr̄ rɔ̄ḿ ngá̰ý ní, rāā adə̄ m̄-na̰y kə̄ loo ɓōĺ tə́ ō,
m̄-ger̄ majə ngá̰ý kadə̄ Nə́ɓā a əda na najə̄ na gətóo dɔḿ tə́ aĺ ō.
29I gáŕ kadə̄ najə̄ i dɔḿ tə́.
Ní, kə m̄-njə́ɓā rɔ̄ḿ kanjə̄ kumən i tām̄ rí tə́?
30Ká ré m̄-ndogə̄ń i man̄ kə́ unjə̄ njáý njáý gə̄gē,
aláa m̄-tə́goń jīḿ i kə sabūn̄ katāá gə̄gē anī,
31ḭ̄ Nə́ɓā, ā ī-tél yā kəlam̄ gogə́ kum bɔr tə́ i kə̄ ta jī tə́ beé,
yā kadə̄ ká i kūbə̄ yāḿ gə̄gē a mbātə́mə̄n̄ kɔ̄ɔ́.
32Tɔdɔ̄ Nə́ɓā i deē ndul tītə̄ḿ
á kadə̄ m̄-tūrə̄n najə̄ tə́ alé,
aláa m̄-sekə́n rɔ̄ ngé gān̄g sarya gə̄ tə́ alé.
33Nə́ngētə́ nge mā̰ȳjí naā tə́ kógə̄ḿ i danjí tə́
kadə̄ əndā jīn dɔjí tə́ jōó mbak#9.33 Kəndā jīī dɔdə́ tə́ jōó mbak ní ɔjə kadə̄ ni-aw̄ kə tɔ́gə dɔdə́ tə́ ō, ni asə kəndādə́ naā tə́ ō..
34anī, ni a əhɔ ta ndéy yā Nə́ɓā dɔḿ tə́ kɔ̄ɔ́ ō,
yá̰a̰ yān kə́ to ndíl ka̰ȳ a əla ɓōĺ kemḿ tə́ to̰ aĺ ō.
35Loo ń noō tə́ m-ā m-ɔ̄r̄ najə̄ kanjə̄ ɓōlə́n.
Ba dan ń nge ń noō gətóó ní, mə̄kɔ́ i kə kérə́ḿ.
Currently Selected:
JOB 9: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.