JOB 39
39
1Ī-ger̄ kum mbang ń bə̄yā̰ kɔ̄r̄ gə̄ a ojənə̄ń ngáńdə́ gə̄ ní a?
Ə̄ndā ma̰ȳ dul gə̄ loo kojə ngáńdə́ gə̄ tə́ a?
2Ī-tə́da nāā gə̄ ń nin̄ jə-ndānə̄nəń ngáńdə́ gə̄ ní a?
Ī-ger̄ kum mban̄g ń nin̄ ojənə̄n̄neé ngáńdə́ gə̄ ní a?
3Nin̄ rodə̄n̄ ojənə̄n̄neé ngáńdə́ gə̄ ō,
gír rɔ̄də́ ń tōr̄də́ loo kojə tə́ ní gān̄g kɔ̄ɔ́ ō.
4Gō tə́ anī ngáńdə́ gə̄ ngangə̄n̄ ō, tɔgən̄ kum ndágə mbō tə́ ō.
Ndɔ̄ kə́rēý tə́ anī əya̰n̄ kó̰ó̰də́ gə̄, ba aw̄n̄ kanjə̄ tél reē gogə́ rɔ̄də́ tə́.
5I náā n əya̰ kərō kə́ bembeé dɔɔ́ ní?
I náā n tútə kəlā kə́ njan tə́ ba əya̰n dɔɔ́ ní?
6M-ādə̄n dəla loo kadə̄ i kújə yān ō,
dɔ nang kə́ katə̄ i tū tə́ kadə̄ i loo ndin ō.
7Usən dɔ yá̰á̰ kə́ ɓār̄ ngá̰ý gə̄ kə́ kem ɓēé tə́ aĺ ō,
ni-oō ndū nge rāā gír kərō loo ndán̄g loo tə́ nja kógə̄ḿ aĺ ō.
8Ni-njə̄rā mbo̰ō̰ mbal̄ gə̄ ń i loo kəsa yá̰a̰ yān ní tə́,
a sāań ngán mu kə́ mbōl̄ gə̄.
9Dɔgə a ndigə rāā kəla yā kadī a?
Ni a ra loo ń dā̰ yāí gə̄ a ran̄ tū tə́ ní a?
10Ásə́ rákə̄ kəlā rɔ̄n tə́ yā ndɔrə̄ń ndɔr̄ yāí a?
Ni a jɔ̄r̄yɔ̄ nán̄g ta kɔsə gōí tə́ kum wól loo tə́
kə yá̰a̰ jɔ̄r̄yɔ̄ nán̄g ta kɔsə ń rīn na i hérsə#39.10 Hérsə: I gində̄ rāā kəla ndɔ̄r̄ kə́ a jɔ̄r̄yɔ̄nəń nán̄g ta kɔsə kadə̄ gidə asə naā tá yā dubə̄ń kōō aláa kəhɔń kōō. ní a?
11Ā ə̄nī kemií mámák yā kadə̄n ō,
ā ə́ya̰ kəla yāí jīn tə́ ō, tām̄ tɔ́gən kə́ ngá̰ý tə́ a?
12Ā ə̄ndā kemií dɔn tə́ kadə̄ reē kə kum kōō yāí ɓēé ō,
kadə̄ kán̄ mō̰yō̰ó̰ ō a?
13Burum ənda bɔ̄gə̄n kə rɔ̄nelēé,
banī ni asə kəɓa bel̄ tītə̄ yā kóndə́la alé.
14Ni əya̰ kaan nang tə́ kɔ̄ɔ́,
kadə̄ nán̄g kə́ təngā ɔbə̄n.
15Ni gír̄ kadə̄ deē kógə̄ḿ a əɓa dɔ alé,
kadə̄ dā̰ kógə̄ḿ kə́ bembeé a əɓa dɔ alé.
16Ni-rāā háĺ kə́ ngan̄g ngá̰ý kə ngánən gēé tītə̄ kə́ nin̄ i ngán kemən gə̄ aĺ beē.
Ni sōl̄ tām̄ yā ka̰a̰ tápə̄ kə́ ndāńg karī tə́ alé.
17Kumən na Nə́ɓā ɔgə̄n kum kedə̄ kɔ̄ɔ́ ō, adə̄n kur̄ dɔ kə́ ger̄ yá̰a̰ aĺ ō.
18Ba dan ń ni-ḭḭ dɔɔ́ ō, ɔr̄ dɔɔ́ kə ngɔ̄dɔ̄ɔ́ ō anī,
ni əgō sə́nda ō, əgō nge kalə̄n ō.
19I ḭ̄ n ādə̄ sə́ndá tɔ́gə ō, ī-rāā ādə̄ hoȳn əɓa gɔ́sən tə́ ō ní a?
20I ḭ̄ n ī-rāān ādə̄ ḭḭ bal tītə̄ gaẃ ní a?
Sō̰ḿ kɔjə rɔ̄ yān əla ɓōĺ loo tə́.
21Ni tḭ́ḭ̄ bal walya kə tɔ́gɔ́ kum wól loo tə́,
ənda njan kə́ kété nang tə́ ō, ɔy dɔɔ́ ō kum wól loo tə́,
ba ɔr̄ dɔɔ́ kə ngɔ̄dɔ̄ɔ́ kum kə̄ dɔ ngé rɔ̄ɔ̄ gə̄ yā madə̄ ba̰ā̰ tə́.
22Ni ɓōĺ aĺ ō, ndílən a̰ȳ yá̰á̰ kógə̄ḿ aĺ ō,
tél kə gōneé ta kaskar tə́ aĺ ō.
23Ngong gərā ō, nənga kə́ kumən ndə́lē pipir ō, səngɔy ō,
tə́ndān̄ kadən adə̄ kōōdə́ ɓār̄.
24Ni-ndebə ngangan tɔdɔ̄ tə́gā tan sétə́,
a̰ȳ ngɔ̄də̄ láẃ ngá̰ý.
Dan ń kōō bərúnjə ɓār̄ anī ni-ra gotoó to̰ alé.
25Ni a ndigə kōō bərúnjə́ kə́ ɓār̄ i kə sɔ̄mɔ́. Ni-ra sa̰y unəń usə rɔ̄ɔ̄ ō,
ger̄ ndán̄g loo yā ngol gə̄ kə́ dɔ ngé rɔ̄ɔ̄ gə̄ tə́ ō, ger̄ kɔĺ rɔ̄ɔ̄ ō.
26Nənga əɓa bel̄ ō, tūr̄ kumən kə̄ dām̄ mbɔ́r ɓē kə́ geleé tə́ tá jā̰ bɔ̄gə̄n ō ní,
i kə ta kūl̄ kur̄ dɔí a?
27I ḭ̄ n ə́da kə̄rō na kə ḭḭ bɔ̄gə̄ kə aw̄ dɔɔ́
tá kə rāā ɓēn dɔ mbalá dɔɔ́ ní a?
28Ni-rāā ɓēn dɔ mbalá,
ta yīgə́ mbal̄ kógə̄ḿ kə́ deē asə kaw̄ kugə̄ tū tə́ aĺ tə́.
29Ni-ndi dɔɔ́ nú a umə̄ń dā̰ kə́ yā kəhɔ kəsan. Kumən a̰a̰ loo teē sa̰y.
30Tɔdɔ̄ dā̰ kə́ kə mósó nel̄ ta ngánən gə̄ ngá̰ý.
Loo malang ń nīń i tū tə́ ní, deē a ənge kə̄rō tū tə́.
Currently Selected:
JOB 39: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
