JOB 13
13
Job tūr̄ əda na n gḛy kɔr̄ najə̄ kə Nə́ɓāá kə gō kemənneé
1A̰á̰ā̰, yá̰a̰ malang ń noō ní, kumḿ a̰ā̰ ō, mbīḿ ōō ō, m̄-ger̄ kum ō.
2Yá̰a̰ ń sḭḭ̄ ī-gerī ní, mā m̄-ger̄ ō,
tá mā m̄-mbóo m̄-tɔȳsí aĺ ō!
3Ba mā, m̄-sāā kɔr̄ najə̄ i kə Nə́ɓā kə́ tɔ́gən i ngá̰ý.
M-ɔ̄r̄ najə̄ dɔ rɔ̄ḿ tə́ i kə Nə́ɓāá.
4Ba yāsí sḭḭ̄ ngé gól̄ loo gə̄ tāa anī,
sḭḭ̄ i ngé rāā de gə̄ mo̰y kə́ rɔ̄kum aĺ gə̄.
5Nə́ngētə́ ī-ndiī i kə tasí kə́ mbóó anī,
ā ī-toī tītə̄ de kə́ ngáā gə̄!
6Ní, ōōī najə̄ ń m-ā m-ɔ̄r̄ yā nējə̄ń najə̄ dɔ rɔ̄ḿ tə́ ní,
ī-nēlī mbīsí ōōiń najə̄ ń a teē taḿ tə́ kadə̄ m̄-rɔ̄ɔń dɔ rɔ̄ḿ tə́ ní.
7I Nə́ɓā n úniī rīn ɔ̄rīneé najə̄ kə ngamaá ní a?
Ī-tə́daī najə̄ gə̄ ī-gólīneé loo i tām̄ yān tə́ a?
8Ī-tetiī rɔ̄sí i gōn̄ tə́ a? I Nə́ɓā n ā ɔ̄rī najə̄ tām̄ yān tə́ ní a?
9Ré ni go̰ō̰ gə́le kemsí anī, a majə tām̄ yāsí tə́ a?
Ā ī-gól̄niī tītə̄ loo gól̄ deē ndul a?
10Ká ré sḭḭ̄ āwī kə gír̄ yāsí kə́ ī-raī dɔ tə́ loo mundə̄ tə́ gə̄gē anī,
ni a gákə̄sí najən̄ tə́.
11Bo yā Nə́ɓā adə̄sí ɓōĺ alé a? Ni-əla ɓōĺ kə́ ngá̰ý kemsí tə́ alé a?
12Najə̄ gə̄ ń ɔ́yiī kə̄ naā tə́ ní, ton̄ i tītə̄ bū kə́ əga nding beē ō,
najə̄ gə̄ ń ūtīneé gidə rɔ̄sí ní ton̄ i tītə̄ ndogə̄ mbal̄ beé ō.
13Ūtī tasí! Ə́ya̰mī! Ká i rí n a rāām̄ gə̄gē anī,
i mā n m-ā m-ɔ̄r̄ najə̄!
14Ká ré i yā kadə̄ m-ə̄nī rɔ̄ḿ kɔ̄ɔ́ gə̄gē anī,
m-ə̄ndā dɔ rɔ̄ḿ danaá kɔ̄ɔ́ ɓá.
15Rɔ̄kum, Nə́ɓā a tɔ̄lə̄m̄. Yá̰á̰ kə́ kadə̄ m-ə̄ndā kemḿ dɔ tə́ gətóo.
Ɓá tā ba, m-ā m̄-rā non tə́ yā nējəń najə̄ dɔ hálə́ḿ tə́.
16Tá i loo rāān kə́ tītə̄ ń noō n a ajəm̄ ní.
Tɔdɔ̄ deē kógə̄ḿ kə́ nge gól̄ loo asə ra ta kum Nə́ɓā tə́ alé.
17Ōōī a, ōōī najə̄ kɔrə̄ḿ!
Ādə̄ najə̄ ń m-ā m̄-tútə́sí kum ní, udə mbīsí tə́.
18Adə̄ i ni n toó: M-āw̄ kə najə̄ yāḿ no nge gān̄g sarya tə́,
ba m̄-ger̄ kadə̄ najə̄ i yāḿ.
19I beé ní, i náā n ndigə kɔjə kadə̄ najə̄ i gōtə́ aĺ ní?
M-ə̄ndā dɔ rɔ̄ḿ danaá kɔ̄ɔ́ ɓá kadə̄ ré najə̄ əhɔm̄ anī, m-ūtə̄ taḿ ō, m-óy ō.
20Nə́ɓā yāḿ, úń yá̰a̰ jōó ngóy dɔḿ tə́ kɔ̄ɔ́ ādə̄m̄,
loo ń noō tə́ m-ā m-lōō ɓɔ̄ɔ̄ rɔ̄ḿ kɔ̄ɔ́ ta kumií tə́.
21Ún jīí dɔḿ tə́ kɔ̄ɔ́.
Ī-lōō kəla ɓōĺ kə́ ngá̰ý kemḿ tə́ to̰.
22Gō tə́ anī ɔ̄r̄ najə̄ na m-ā m̄-tūrī tə́.
Aláa ré m-ɔ̄r̄ najə̄ anī, ā ī-daləm̄.
23Yá̰á̰ kə́ gōtə́ aĺ gə̄ ń m̄-rāā ní i kóndóńg? Majaĺ yāḿ gə̄ i kóndóńg?
Kəsō ń m-ə̄sō wōn̄g ō, majaĺ ń m̄-rāā ō ní, ɔ́jəm̄ ādə̄ m̄-ger̄.
24Ún kumií kɔ̄ɔ́ ta yāḿ tə́ ō, ī-rāām̄ madə̄ ba̰ā̰í tə́ ō, i tām̄ rí tə́?
25I mbī kámbə́ ń nél un a dáyń ní n ī-sāā kəhɔn ní a?
i mu kə́ tutə n ī-gḛy ngɔ̄də̄ gō ní a?
26Ḭ̄ ī-ndang najə̄ kə́ ngan̄g ngá̰ý gə̄ dɔḿ tə́ ō,
yá̰á̰ kə́ gōtə́ aĺ gə̄ ń m̄-rāādə́ dan balsááḿ tə́ ní, ḭ̄ ə̄ndā najə̄n dɔḿ tə́ ō,
27ḭ̄ ə̄nī kángə́lá njaḿ tə́ ō,
ə̄ndā kumií gō yá̰a̰ rāāḿ gə̄ tə́ malang ō,
ə̄ndā ma̰ȳ gotə njaḿ ō?
28Tá mā i yá̰á̰ kə́ a ur ndujə̄ pul pul tītə̄ kāgə̄ kə́ ur ruú beé ō,
tītə̄ kūbə̄ kə́ kíndīŕ gə̄ əsan̄ beé ō.
Currently Selected:
JOB 13: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.