JAKƏ 5

Tāā kə́ tām̄ yā ngé kənge yá̰á̰ gə̄ tə́

1Ngɔlaā ní, sḭḭ̄ ngé kənge yá̰á̰ gə̄, ə́gaī kɔŕ ō ī-nōōī ō, tām̄ yā yá̰á̰ kə́ to kum tō ndoō gə̄ ń a reēn̄ kə̄ dɔsí tə́ ní. 2Yá̰a̰ kənge yāsí ndum kɔ̄ɔ́. Kur̄ gə̄ əsan̄ kūbə̄ yāsí gə̄. 3Lɔ́r yāsí ō, gində̄ arjā̰a̰ yāsí ō, əhɔn̄ kārā. Ba kārā ní a ɔr̄ najə̄ kə́ majə tām̄ yāsí tə́ aĺ ō, a tél i hor kə́ a o̰o̰sí ō. Ngɔlaā i ta ngóy ndɔ̄ gə̄, ba sḭḭ̄ ɔ́siī dɔ yá̰a̰ kənge yāsí gə̄ kə̄ naā tə́ ɓáý to̰. 4Á̰a̰ī, ngé kəla gə̄ əjan̄ kōō kə́ kem ndɔr̄ yāsí gə̄ tə́, banī sḭḭ̄ ɔ̄gīdə́ nar tətōdə́, adə̄ nar ní əga kɔŕ! Ba nōō rɔ̄ yā ngé kəja kōō gə̄ ní əsō mbī Kɔ́ɔ̄ɓē kə́ bo kə́ tɔ́gən i ngá̰ý tə́. 5Sḭḭ̄ ī-ndiī dɔ nang tə́ i dan yá̰á̰ kə́ majə gə̄ tə́ ō, i dan rɔ̄nel̄ tə́ ō, sḭḭ̄ ə̄ndāī mbóĺsí tām̄ yā ndɔ̄ tɔ̄l̄sí tə́ ō. 6Ī-gāngī sarya dɔ de kə́ gōtə́ tə́ ba ī-tɔ̄l̄niī, tɔdɔ̄ ni-dum̄sí alé.

Tə́gā ta ō, ndɔ̄ȳ ō

7Tā anī ngákó̰ó̰ḿ gə̄, ī-tə́gāī tasí bátə́ kadə̄ Kɔ́ɔ̄ɓē reē ugə̄ń. Á̰a̰ī nge ndɔr̄ loo ngóō kōō ń i yá̰á̰ kə́ majə ngá̰ý tām̄ yān tə́ kə́ teē dɔ nang tə́ ní: Ni-tə́gā tan bátə́ kadə̄ man̄ kə́ ta kəga dɔ edə ō, man̄ kaw̄ ɓēé edə ō. 8Sḭḭ̄, ī-tə́gāī tasí ō, ə́reī wursí ō, tɔdɔ̄ dɔ ndɔ̄ reē Kɔ́ɔ̄ɓē i ngɔr.

9Ngákó̰ó̰ḿ gə̄, ī-nōōī rɔ̄sí dɔ naā tə́ alé, ādə̄ Nə́ɓā gāngəń sarya dɔsí tə́ alé. Tɔdɔ̄ nge gān̄g sarya i ta róbə́ tə́ kɔ̄ɔ́. 10Ngákó̰ó̰ḿ gə̄, ngé koō ta gə̄ ń ɔrə̄n̄ najə̄ kə rī Kɔ́ɔ̄ɓēé ní, ī-ndájī tə́gā ta yādə́ dan yá̰á̰ kə́ tōr̄ gə̄ tə́. 11Tɔdɔ̄ ngé gə̄ ń əhɔn̄ rɔ̄də́ tɔgə ní rɔ̄də́ nel̄də́. Sḭḭ̄ ōōī kōō kəhɔń Job əhɔ rɔ̄n tɔgə ní ō, á̰a̰ī yá̰á̰ ń Kɔ́ɔ̄ɓē rāā seneé ta tɔ̄l̄ ta tə́ ní ō, tɔdɔ̄ Kɔ́ɔ̄ɓē i nge kem majə ō, nge ka̰a̰ kum tō ndoō yā deē ō.

12Tá, ngákó̰ó̰ḿ gə̄, ī-túbī kə dɔ rā̰á̰ aĺ ō kə dɔ nangaá aĺ ō, kə yá̰á̰ kə́ rangaá aĺ ō. Ādə̄ najə̄ yāsí, ré i a̰á̰ā̰ ɓáa, i a̰á̰ā̰ ō, ré i a̰ á̰ ɓáa, i a̰ á̰ ō, yā kadə̄ sarya yā Nə́ɓā əsōń dɔsí tə́ alé#5.12 K. 12: Á̰a̰ī Mat 5.34-37.

13Ré deē kógə̄ḿ kə́ dansí tə́ a̰a̰ tápə̄ anī, majə kadə̄ ni-ndɔ̄ȳ. Ré de kə́rēý i kə rɔ̄nelēé anī, majə kadə̄ ənī pā tɔ̄yń Nə́ɓā. 14Ré de kə́rēý i moy anī, majə kadə̄ ni-ɓāŕ kum kɔ̄ɔ́ gə̄ kə́ Egəlijə tə́ kadə̄ urən̄ yibə̄ dɔn tə́ kə rī Kɔ́ɔ̄ɓēé pá tá ndɔ̄ȳn̄ dɔn tə́. 15Tɔdɔ̄ ré ndɔ̄ȳn̄ sɔɔ̄ń taā ń nin̄-taān̄ kem Nə́ɓā ní anī, nge mo̰y ní a ajə. Kɔ́ɔ̄ɓē a unən yā kudən dɔɔ́ ō, a mā̰ȳ rɔ̄n dɔ yá̰á̰ kə́ majaĺ gə̄ ń ni-rāā tə́ ní ō. 16Ədaī naā gír majaĺ yāsí gə̄ ō, ī-ndɔ̄yī tām̄ yā naā tə́ ō, yā kadə̄ rɔ̄sí ngáań. Ndɔ̄ȳ yā de kə́ gōtə́ ní tɔ́gən i ngá̰ý ō, a rāā kəla ō. 17Eli i de kə́ yá̰a̰ rāān tītə̄ yājí. Ni-ndɔ̄ȳ kə ngangāá ngá̰ý kadə̄ man̄ edə alé, anī man̄ edə dɔ nang tə́ alé ɓāl̄ mətá kə nāā mehḛ́#5.17 K. 17: Á̰a̰ī 1 Mba 17.1; 18.42-45. 18Gō tə́ anī ni-ndɔ̄ȳ ɓáý to̰, anī dɔ rā̰ adə̄ man̄ edə ō, dɔ nang teē kōō ō.

19Ngákó̰ó̰ḿ gə̄, ré deē kógə̄ḿ dansí tə́ ndúm̄ kɔ̄ɔ́ tū najə̄ kə́ rɔ̄kum tə́, ba de kə́ rang tél reē seneé dɔ róbə́ tə́ anī, 20ā ī-gerī kadə̄ nge ń tél kə nge rāā majaĺ reē seneé dɔ róbə́ tə́ ní a ajə deē ta yo tə́ ō, a rāā kadə̄ majaĺ kə́ ngá̰ý gə̄ i kə́ mā̰ȳ rɔ̄ dɔ tə́ kɔ̄kə́ ō.

Currently Selected:

JAKƏ 5: SARDC

Highlight

Copy