TA KƏLA 25

Abəraham oy. Ngán kaa Abəraham kə́ rang gə̄

1Abəraham taā dəyá̰ kə́ rang ɓáý to̰, rī dəyá̰ ní na i Ketura. 2Ketura ojə Jimran ō, Yokəsan ō, Medan ō, Madian ō, Isəbak ō, Sua ō seneé. 3Yokəsan ojə Saba ō, Dedan ō. Ngán kaa Dedan i Asur gə̄ ō, Letus gə̄ ō, Leum gə̄ ō. 4Ngán Madian i Epa ō, Eper ō, Hanok ō, Abida ō, Elda ō. De gə̄ ń noō malang i ngán Ketura gə̄ ō, ngán kaan gə̄ ō.

5Abəraham əya̰ yá̰a̰ kənge yān malang adə̄ Isaak. 6Dan ń ni-ndi kə kumneé ɓáý ní, adə̄ ngán də̄yá̰ gidə ndogə̄ yān gə̄ kadə̄ karī gə̄ pá tá kadə̄ əla sedə́ sa̰y kɔ̄ɔ́ rɔ̄ ngōnə̄n Isaak tə́ dɔ nang kə́ gír ɓē tə́ tə́. 7Abəraham rāā ɓāl̄ ɓú kə kutə sīrí kə kalən kə́ mí anī oy. 8Ni-ndi kə rɔ̄nelēé dɔ ɓə́gan tə́ ngá̰ý pá tá kadə̄ oy aw̄ gō kaan gə̄ tə́ ɓáý. 9Ngánən gə̄ jōó Isaak ō, Ismael ō dubə̄nən̄ bəlo mbal̄ kə́ Makəpela tə́ kem ndɔr̄ yā Epəron ngōn̄ Sohar ń i Het ní tə́. Bəlo mbal̄ ní ra sɔɔ̄n̄ ta naā kə Mamre. 10I ndɔr̄ ń Abəraham mang jī Het gə̄ tə́ ní. Dubə̄n̄ Abəraham ō, nə̄yá̰n Sara ō i loo ń noō tə́. 11Gō yo Abəraham tə́, Nə́ɓā rāā majə kə ngōnə̄n Isaak. Ni-ndi i kadə bəlo man̄ kə́ Lahai Roi tə́.

12Gír kojə yā Ismael ngōn̄ ń Abəraham ojə kə Agar dəyá̰ kə́ Ejiptə tə́ kə́ nge kəla yā Sara ní n toó: 13Rī ngán Ismael gə̄ kə gō kojədə́ gēé n toó: Nebayot ō, Kedar ō, Adəbeel ō, Mibəsam ō, 14Misəma ō, Duma ō, Masa ō, 15Hadad ō, Tema ō, Yetur ō, Napis ō, Kedəma ō. 16Ngán Ismael kə́ kutə gidə i jōó gə̄ n noó. Nin̄ i ngār gə̄ kə dɔdə́ gēé dɔ gír kojə yādə́ gə̄ tə́. Əndān̄ rīdə́ dɔ ɓē yādə́ gə̄ tə́ ō, dɔ kem ndogə̄ yādə́ gə̄ tə́ ō. 17Ismael rāā ɓāl̄ ɓú kə kutə mətá kə kalən kə́ sīrí anī, oy aw̄ gō kaan gə̄ tə́. 18Ɓē yā ngán kaan gə̄ əla gír i Habila bátə́ ugə̄ń Sur. Sur i kadə Ejiptə tə́, kum kə̄ Asur. Nin̄ ndin̄ i kə kéŕdə́, ɓoon̄ naā kə gotə ngán kaa Abəraham kə́ rang gə̄ alé.

Najə̄ yā Jakob

(25—36)

Esau nin̄ kə Jakob

19Gotə najə̄ yā Isaak ngōn̄ Abəraham n toó:

20Isaak rāā ɓāl̄ kutə sɔ́ anī, taā Rebeka ngōkó̰o̰ Laban. Rebeka i ngōn̄ Betuel, de kə́ Aram kə́ dɔ nang kə́ Mesopotami#25.20 Mesopotami: Á̰a̰ī Tkg 24.10 tə́. 21Isaak rāā Kɔ́ɔ̄ɓē ɓɔ́ tām̄ yā nə̄yá̰n tə́, tɔdɔ̄ nə̄yá̰n i dəyá̰ kə́ kujə. Anī Kɔ́ɔ̄ɓē a̰a̰ kum tō ndoō yān, adə̄ nə̄yá̰n Rebeka un mósə ngōn̄, ndān̄ i ndəngā gə̄. 22Ngán gə̄ tɔ́sə̄n̄ naā kem kó̰ó̰də́ tə́, anī kó̰ó̰də́ əda na ré i beé anī ké n-ndān̄ ngōn̄ i yā rāań rí wa. Ni-aw̄ dəje Kɔ́ɔ̄ɓē, 23anī Kɔ́ɔ̄ɓē əda na:

Nápar de gə̄ jōó i kemií tə́.

Gír de gə̄ jōó a teēn̄ kemií tə́.

Gír de kə́ kógə̄ḿ gə̄ a ngangə̄n̄ tɔȳ madə̄də́ gə̄.

Nge kə́ nga tɔ́gə a əla dɔn gíŕ tɔ́gə yā nge kə́ dūú tə́.

24Dan ń ndɔ̄ kojə yān ugə̄ anī Rebeka ojə ndəngā gə̄. 25Nge kə́ teē kété kərē kasə. Rɔ̄n i bḭḭ̄ malang tītə̄ rɔ̄ dā̰ beé, adə̄ əndān̄ rīn na i Esau#25.25 Esau kə ta Hebəro kumən na i rɔ̄n i bḭḭ̄ malang.. 26Ba ngōkó̰o̰n əhɔ i gándən n teēń, əndān̄ rīn na i Jakob#25.26 Jakob kə ta Hebəro kumən kógə̄ḿ na i gándə.. Ɓāl̄ Isaak i kutə mehḛ́ loo ń ojən̄də́ ní.

27Ngán gə̄ ní tɔgən̄. Esau téĺ gáw nge ndo̰. Ni i deē bembə, ba Jakob i de kə́ sɔl̄ lɔm, ni-ndi i kem kújú ɓēé. 28Isaak tár Esau tām̄ kəsa ń a əsa dā̰ tɔ̄lə̄n tə́ ní, ba Rebeka tár i Jakob tá.

29Ndɔ̄ kógə̄ḿ tə́, dan ń Jakob ndi a ndīr̄ yá̰a̰ anī, Esau tél bembeé, kɔr asən nák. 30Ni-əda Jakob na:

m̄-rāāī ɓɔ́, ādə̄m̄ yá̰á̰ kə́ kərē kasə njo̰ ń noō tə́ ādə̄ m-ə́sa na kɔr rāām̄ ngá̰ý.

I tām̄ najə̄ ń noō tə́ ń əndānəń rī Esau na i Edom ní. Kumən na i kərē kasə njo̰. 31Jakob tél ədan na:

Ādə̄ m̄-mangiī ta róbə kənge yá̰a̰ ndəbā yāí kə́ loo ngatɔ́gə́ tə́ pá tá.

32Esau ədan na:

M-ā m-óy ɓō ní, ta róbə kənge yá̰a̰ ndəbā kə́ loo ngatɔ́gə́ tə́ a teēm̄ i rí?

33Jakob tél ədan na:

Ə̄nī míndí ādə̄m̄ pá tá.

Anī Esau ənī míndən adə̄n əda na n-əya̰ ta róbə kənge yá̰a̰ ndəbā kə́ loo ngatɔ́gə́ tə́ n-adə̄n. 34Tā anī Jakob adə̄n mápa ō, kum la̰tíi#25.34 La̰tíi: I kə ta nasárá, i kōō kə́ kumən to tītə̄ kum mənjo kə́ ndīr̄ adə̄ to man̄ ō. Esau taā əsa ō, a̰ȳ man̄ gō tə́ ō, ba aw̄. Esau kídə̄ ta róbə kənge yá̰a̰ ndəbā kə́ loo ngatɔ́gə́ tə́ i beé.

Currently Selected:

TA KƏLA 25: SARDC

Highlight

Copy