TA KƏLA 18
18
Nə́ɓā əda na Sara na a ojə ngōn̄ kə́ dəngam
1Kɔ́ɔ̄ɓē ndɔ̄bə̄ Abəraham mbo̰ō̰ kāgə̄ sén gə̄ kə́ Mamre tə́. Abəraham ndi i ta kújə yān tə́. Loo i dan kadə ndaa. 2Ni-un kumən kə̄ dɔɔ́ anī, a̰a̰ de gə̄ mətá ran̄ ngɔr rɔ̄n tə́. Dan ń ni a̰a̰də́ anī, ḭḭ ta kújə yān tə́ kə ngɔ̄dɔ̄ɔ́, aw̄ ɔjə nodə́. Ni-ɔsə non nang tə́ nodə́ tə́ 3ba əda na:
Kɔ́ɔ̄ɓē, ré nelī seḿ anī, ī-lōō mān̄ dɔḿ tə́ kanjə̄ dəba. 4A reēn̄ kə maná sḛ́ý kadə̄ ī-tə́goīń njasí ō, ī-ndiī ɔ̄rī koō gír kāgə̄ ń toō tə́ ō. 5Tītə̄ ń ī-mānī i ta loo yāḿ tə́ ɓá ní, m-ā m-ādə̄sí yá̰á̰ sḛ́ý kadə̄ ə́saī, kadə̄ ə́ngeīń tɔ́gə́ tá úniīń ta njə̄rā yāsí. Nin̄ tél ədanən̄ na:
Ī-rāā tītə̄ ń ə́dań noō. 6Loo ń noō tə́ Abəraham téĺ láẃ, aw̄ gō Sara tə́ kújú, ədan na:
Ī-ndégə̄ ndujə̄ kə́ lándə̄ láẃ ādə̄ asə kem kār̄ tɔ̄jə̄ yá̰á̰ kə́ bo nja mətá. Ī-ló̰ȳ ba ī-tə́nā bəran. 7Gō tə́ anī, Abəraham a̰ȳ ngɔ̄də̄, aw̄ gō yá̰a̰ kul̄ gə̄ tə́, əhɔ ngōn̄ man̄g kə́ dā̰n ngəra aĺ ō, majə ō, adə̄ nge kəla yān kógə̄ḿ adə̄ rāā dā̰n láẃ.
8Ni-reē kə yibə̄ mangá ō, mba mangá ō, ngōn̄ man̄g ń rāān̄ oy ní ō, əndā no mbā yān gə̄ tə́. Dan ń mbā gə̄ a əsan̄ yá̰á̰ ní, nəkɔ́ ra kadədə́ tə́ gír kāgāá. 9Anī dəjenən̄ na ké nə̄yá̰n Sara ké i rá wa. Ni-tél ədadə́ na ndi kújú noō. 10Kɔ́ɔ̄ɓē əda na:
Kem ɓāl̄ kə́ gogə́ tə́ kum beé anī, m-ā m̄-tél yā reē ɓēé looí, ɓáa nə̄yá̰í Sara a ojə ngōn̄ kə́ dəngam kɔ̄ɔ́.
Sara ndi ta róbə kújə́ tə́ gidə Abəraham tə́ a oōń najə̄ ní. 11Abəraham ō, Sara ō, tɔgən̄ ɓə́gá ngá̰ý kɔ̄ɔ́, adə̄ Sara əndā kemən dɔ kojə ngán gə̄ tə́ to̰ alé. 12Sara əgō kə̄ kemən tə́ ba əda na:
Ngɔlaā m̄-tɔgə kɔ̄ɔ́ ō, ngaaḿ i de kə́ tɔgə ɓə́ga ō. Kum mbang ɓīī kə dəngameé yāḿ mā i kə́ mān̄ kɔ̄ɔ́ ō. 13Anī Kɔ́ɔ̄ɓē əda Abəraham na:
I tām̄ rí tə́ á Sara əgō ba əda na n-tɔgə ɓə́ga kɔ̄ɔ́ ké n-a n-ojə ngōn̄ i ba̰ý wa ní? 14Yá̰á̰ kə́rēý kə́ dum̄ Nə́ɓā i noó a? Ɓāl̄ kə́ gogə́ tə́ m-ā m̄-tél yā reē ɓēé looí, ɓáa Sara a aw̄ kə ngōn̄ kə́ dəngam kógə̄ḿ jīn tə́. 15Ɓōĺ rāā Sara adə̄ nējə̄ najə̄, əda na n-əgō alé. Kɔ́ɔ̄ɓē tél ədan na əgō rɔ̄kum.
16De gə̄ ní ḭḭn̄ dɔɔ́ əsōn̄ róbó, aw̄n̄ kum kə̄ Sodom. Abəraham əndādə́ róbó. 17Kɔ́ɔ̄ɓē əda na:
Yá̰á̰ ń m̄-sāā rāā ní, kə m̄-mundə̄ Abəraham a? 18Ni a tél kaa gíŕ nápar de kə́ ngá̰ý gə̄ kə́ tɔ́gə́də́ i ngá̰ý. M-ā m̄-rāā majə kə nápar de gə̄ malang kə́ dɔ nang tə́ gə̄ sɔɔ̄nəń ni. 19m̄-gə̄rān i tām̄ kadə̄ əndā dɔ ngánən gə̄ tə́ ō, dɔ ngán kaan gə̄ tə́ ō, kadə̄ unən̄ róbə yāḿ, kadə̄ háĺdə́ i gōtə́ ō, súmūú ō, yā kadə̄ m̄-rāań yá̰á̰ ń m-ə̄nī míndə́ḿ yā rāā kadə̄n ní. 20Anī Kɔ́ɔ̄ɓē əda Abəraham na:
Sekə́n̄ de kə́ Sodom gə̄ ō, Gomor gə̄ ō, sekə́ kə́ ngan̄g ngá̰ý rɔ̄ḿ tə́. Yá̰a̰ gə̄ ń rāān̄ ní majaĺ ngá̰ý. 21Adə̄ m-ā m̄-risə yā ka̰ā̰ ké yá̰a̰ rāādə́ gə̄ malang to i tītə̄ ń sekə́nəńdə́ rɔ̄ḿ tə́ ní rɔ̄kum wa. Ré i kə gōó aĺ anī, m-ā m̄-ger̄.
22Mbā gə̄ ní, kə́ jōó gə̄ aw̄n̄ kum kə̄ Sodom, banī Kɔ́ɔ̄ɓē tá na̰y gogə́ kə Abərahamaá. 23Abəraham ndɔ́tə̄ kə̄ rɔ̄n tə́ ngɔr, dəjen na:
Ā ī-tɔ̄l̄ de kə́ súmūú naā tə́ kə nge kem nduluú a? 24Majanī de kə́ gōtə́ gə̄ kutə mí ndin̄ kem ɓēé ní, ā ī-tɔ̄l̄də́ ō a? Ā ī-mā̰ȳ rɔ̄í dɔ ɓē tə́ tām̄ de kə́ súmūú kə́ kutə mí gə̄ ń ndin̄ kemeé tə́ ní aĺ a? 25Tɔ̄l̄ de kə́ súmūú naā tə́ kə nge kem nduluú, kadə̄ yá̰a̰ yā de kə́ súmūú to tītə̄ yā nge kem ndul ní i yá̰a̰ rāāí ḭ̄ alé. Yá̰á̰ kə́ rāā tītə̄ ń noō i yá̰a̰ rāāí ḭ̄ alé. Nge gān̄g sarya dɔ de gə̄ malang kə́ dɔ nang tə́ tə́ a rāā yá̰á̰ kə́ gōtə́ aĺ alé. 26Kɔ́ɔ̄ɓē tél əda na:
Ré m-ə́nge de kə́ súmūú gə̄ kutə mí kem ɓē kə́ Sodom tə́ anī, m-ā m̄-mā̰ȳ rɔ̄ḿ dɔ ɓē tə́ malang tām̄ yādə́ tə́.
27Abəraham tél əda na:
Kɔ́ɔ̄ɓē, ī-mā̰ȳ rɔ̄í dɔḿ tə́, tɔdɔ̄ mā i bumbə́ru ō, bū ō, ba m̄-nāā kɔr̄ najə̄ seí. 28Majanī, dan de kə́ súmūú gə̄ kə́ kutə mí tə́ ní, kə́ mí gə̄ gətóon̄. Ní, ā ī-nujə ɓē malang sɔɔ̄ń kə́ mí gə̄ ń gətóon̄ ní a? Kɔ́ɔ̄ɓē əda na:
Ré m-ə́nge de kə́ súmūú gə̄ kutə sɔ́ gidə i mí kem ɓēé anī, m-ā m̄-nujə ɓē ní alé.
29Abəraham ɔr̄ najə̄ ɓáý to̰, əda na:
Majanī de kə́ súmūú gə̄ kemeé i kutə sɔ́ ngóy. Anī Kɔ́ɔ̄ɓē əda na:
M-ā m̄-rāā yá̰á̰ kógə̄ḿ alé sɔɔ̄ń de kə́ kutə sɔ́ gə̄ ń noō.
30Abəraham əda na:
Kɔ́ɔ̄ɓē, m̄-rāāī ɓɔ́, ré m-ɔ̄r̄ najə̄ ɓáý anī, ī-lōō kadə̄ wōn̄g rāāī seḿ. Majanī, de kə́ súmūú gə̄ i kutə mətá beē ngóy kemeé. Kɔ́ɔ̄ɓē tél ədan na:
Ré m-ə́nge de kə́ súmūú gə̄ kemeé i kutə mətá anī, m-ā m̄-rāā yá̰á̰ kógə̄ḿ alé.
31Abəraham əda na:
Ī-mā̰ȳ rɔ̄í dɔḿ tə́ tām̄ ngəra kum tām̄ yāḿ tə́. Majanī, de kə́ súmūú gə̄ i kutə jōó beē ngóy kem ɓēé. Anī Kɔ́ɔ̄ɓē tél ədan na:
M-ā m̄-nujə ɓē alé sɔɔ̄ń de kə́ kutə jōó gə̄ ń noō.
32Abəraham əda na:
Kɔ́ɔ̄ɓē, m̄-rāāī ɓɔ́, ī-lōō kadə̄ wōn̄g rāāī seḿ, na m-ā m-ɔ̄r̄ najə̄ gogə́ to̰ alé. Ba ré de kə́ súmūú gə̄ kemeé i kutə ngóý ní? Anī Kɔ́ɔ̄ɓē əda na:
M-ā m̄-nujə ɓē ní alé sɔɔ̄ń de kə́ kutə gə̄ ń noō.
33Dan ń Kɔ́ɔ̄ɓē ɔr̄ najə̄ kə Abəraham oy anī, ɔtə aw̄. Ba Abəraham tá tél aw̄ gogə́ ɓēé.
Currently Selected:
TA KƏLA 18: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
