TA KƏLA 11

Kújə́ kə́ ngāl̄ ɓururu

1Dan ń noō tə́ ní de gə̄ malang kə́ dɔ nang tə́ a ɔrə̄n̄ i ta kə́ kógə̄ḿ beē, adə̄ kum najə̄ kɔr̄də́ i kógə̄ḿ beē. 2Dan ń nin̄ ḭḭn̄ i gír ɓē tə́ ní, aw̄ əngen̄ ndágə loo kógə̄ḿ nang kə́ Sinear tə́ rāān̄ ɓē tū tə́. 3Nin̄ ədan̄ naā dɔ dáńdə́ tə́ na kə n-ɔrə̄n̄ bəríkə kə n-tə́ngān̄ horoó. Bəríkə rāā rɔ̄n i kūbə̄rū mbal̄ tə́, ba bitum#11.3 Bitum: I yá̰á̰ kə́ ɔr durdur tītə̄ gómbə beé. A to gír nángāá adə̄ de gə̄ a ndērə̄n̄ i mbée. tá rāā rɔ̄n i bɔr tə́. 4Gō tə́ anī ədan̄ naā ɓáý to̰ na kə n-rāān̄ ɓē bo kógə̄ḿ ō, kújə́ kə́ ngāl̄ ɓururu kə́ dɔn ɔdə no rā̰ ō, kadə̄ rīdə́ kə ɓārəń ō, kə n-tə̄ndānəń naā kə n-tḭ̄ḭ̄n̄ kə̄ loo gə̄ tə́ dɔ nang tə́ aĺ ō.

5Kɔ́ɔ̄ɓē risə dɔ nang tə́ yā ka̰a̰ ɓē bo ō, kújə́ kə́ ngāl̄ ɓururu ń de gə̄ a rāān̄ ní ō. 6Anī ni-əda na:

Nin̄ malang i gír de kə́ kógə̄ḿ beē gə̄ ō, a ɔrə̄n̄ i ta kə́ kógə̄ḿ beē ō, tá yá̰á̰ ń əlan̄ gír rāā ní n toó ní, yá̰á̰ kə́ yā kɔgə̄də́ rāā yá̰a̰ malang ń a númə̄n̄ yā rāā ní a gətóo. 7Jə-risə j-aw̄ jə-tə́laī ta yādə́ naā tə́, ādə̄ oōn̄ ta yā naā to̰ alé.

8Kɔ́ɔ̄ɓē tə̄ndā tḭ̄ḭ̄də́ naā tə́ loo ń noō tə́, adə̄ aw̄n̄ kə̄ loo gə̄ tə́ malang dɔ nang tə́ ba lōōn̄ gír rāā ɓē ní tə́ kɔ̄ɔ́. 9I tām̄ najə̄ ń noō tə́ n əndānəń rī ɓē ní na i Babel#11.9 Babel kə ta Hebəro kumən na i tə́la naā tə́. ní. Tɔdɔ̄ Kɔ́ɔ̄ɓē tə́la ta yā de kə́ dɔ nang tə́ gə̄ malang naā tə́ i loo ń noō tə́ ō, ni tə̄ndā tḭ̄ḭ̄də́ kə̄ loo gə̄ tə́ dɔ nang tə́ malang i loo ń noō tə́ ō.

De gə̄ kə́ gír kaa yā Sem tə́ bátə́ ugə̄ń dɔ Abəram tə́

10Gír kojə yā Sem n toó: Sem rāā ɓāl̄ ɓú anī, ojə Arpaksad, ɓāl̄ jōó gō man̄ kaw̄ tə́. 11Gō kojə Arpaksad tə́ anī Sem rāā ɓāl̄ ɓú mí. Ni ojə ngáń kə́ dəngam kə́ rang gə̄ ō, ngáń kə́ dəyá̰ gə̄ ō.

12Arpaksad rāā ɓāl̄ kutə mətá gidə i mí anī, ojə Sela. 13Arpaksad rāā ɓāl̄ ɓú sɔ́ kə kalən kə́ mətá gō kojə Sela tə́. Ni ojə ngáń kə́ dəngam kə́ rang gə̄ ō, ngáń kə́ dəyá̰ gə̄ ō.

14Sela rāā ɓāl̄ kutə mətá anī ojə Eber. 15Gō kojə Eber tə́ anī Sela rāā ɓāl̄ ɓú sɔ́ kə kalən kə́ mətá. Ni ojə ngáń kə́ dəngam kə́ rang gə̄ ō, ngáń kə́ dəyá̰ gə̄ ō.

16Eber rāā ɓāl̄ kutə mətá gidə i sɔ́ anī ojə Peleg. 17Gō kojə Peleg tə́ anī Eber rāā ɓāl̄ ɓú sɔ́ kə kutə mətá. Ni ojə ngáń kə́ dəngam kə́ rang gə̄ ō, ngáń kə́ dəyá̰ gə̄ ō.

18Peleg rāā ɓāl̄ kutə mətá anī ojə Rehu. 19Gō kojə Rehu tə́ anī Peleg rāā ɓāl̄ ɓú jōó kə kalən kə́ ndōhó. Ni ojə ngáń kə́ dəngam kə́ rang gə̄ ō, ngáń kə́ dəyá̰ gə̄ ō.

20Rehu rāā ɓāl̄ kutə mətá gidə i jōó anī ojə Serug. 21Gō kojə Serug tə́ anī Rehu rāā ɓāl̄ ɓú jōó kə kalən kə́ sīrí. Ni ojə ngáń kə́ dəngam kə́ rang gə̄ ō, ngáń kə́ dəyá̰ gə̄ ō.

22Serug rāā ɓāl̄ kutə mətá anī ojə Nahor. 23Gō kojə Nahor tə́ anī Serug rāā ɓāl̄ ɓú jōó. Ni ojə ngáń kə́ dəngam kə́ rang gə̄ ō, ngáń kə́ dəyá̰ gə̄ ō.

24Nahor rāā ɓāl̄ kutə jōó gidə i ndōhó anī ojə Tera. 25Gō kojə Tera tə́ anī Nahor rāā ɓāl̄ ɓú kə kutə kógə̄ḿ kə kalən kə́ ndōhó. Ni ojə ngáń kə́ dəngam kə́ rang gə̄ ō, ngáń kə́ dəyá̰ gə̄ ō.

26Tera rāā ɓāl̄ kutə sīrí anī, ojə Abəram ō, Nahor ō, Haran ō.

27Gír kojə yā Tera n toó: Tera ojə Abəram ō, Nahor ō, Haran ō. 28Haran ojə Lot ba oy kum bɔbə̄n Tera tə́, ɓē kojən tə́ Ur, dɔ nang kə́ Kalde tə́. 29Abəram nin̄ kə Nahor taān̄ dəyá̰ gə̄. Rī nə̄yá̰ Abəram na i Sarai, ba rī nə̄yá̰ Nahor na i Milka. Milka i ngōn̄ Haran. Haran i bɔbə̄ Milka nin̄ kə Isəka. 30Sarai i dəyá̰ kə́ kujə, ngōnən gətóo.

31Tera un ngōnən Abəram ō, kaan Lot ń i ngōn̄ Haran ní ō, umən Sarai nə̄yá̰ Abəram ō, teē sedə́ kɔ̄ɔ́ Ur, dɔ nang kə́ Kalde tə́, ba aw̄ sedə́ kə̄ gō nang kə́ Kanaan tə́. Nin̄ aw̄n̄ bátə́ ugə̄n̄ Haran, ba ndin̄ tū tə́. 32Tera rāā ɓāl̄ ɓú jōó kə kalən kə́ mí anī, oy dɔ nang kə́ Haran tə́.

Currently Selected:

TA KƏLA 11: SARDC

Highlight

Copy