ESTER 6

Haman ɔsə gɔn Mardose dɔ gúú tə́

1Ndɔ̄ɔ́ ndɔ̄ ngeé ń noō tə́ ní ɓīī ɔdə reē kum mban̄g tə́ alé. Adə̄ ni-əda kadə̄ reēn̄ kə makətūbə̄ yá̰a̰ gə̄ ń rāān̄ yá̰a̰ ɓāl̄ ko̰o̰ ɓē yān tə́ ní. Tə́dan̄ makətūbə̄ ní ta kumən tə́. 2Tə́dan̄ i gotə najə̄ yā Bigtan nin̄ kə Teres áji mbang kə́ jōó gə̄ kə́ ngé ngɔ̄m̄ ta róbə́ ndogə̄ yā mban̄g ń sāān̄ tɔ̄l̄ mban̄g Jerses á Mardose teē kə gírdə́ dɔɔ́ ní. 3Anī mban̄g əda na: Əndān̄ nja Mardose i kə rí tāmən tə́ ō, ɔsən̄ gɔnən i ba̰ý ō? Ngé kəla yān gə̄ tél ədanən̄ na deē na rāā yá̰á̰ kógə̄ḿ sḛy tām̄ yān tə́ alé. 4Anī mban̄g əda na: I náā n i ndágə looó? Tá Haman reē ndágə loo kə́ gidə kújə yā mban̄g tə́ i kəda mban̄g tə́ kadə ənī kəlā míndə Mardose tə́ ba kə do̰ō̰n dɔɔ́ tū kāgə̄ tɔ̄l deē ń n-rāā tām̄ yān tə́ ní tə́. 5Ngé kəla gə̄ tél ədan na: I Haman n i ndágə looó ní. Anī mban̄g əda na: Ādə̄ udə kə laā! 6Haman udə anī mban̄g dəjen na ké deē ń mban̄g gḛy kɔsə gɔnən ní ké a rāān̄ seneé i ba̰ý wa? Anī Haman gír̄ najə̄ kə̄ kemən tə́ əda na: I náā kə́ rang n mban̄g a ɔsə gɔnən kanjə̄ kadə̄ i mā ní? 7Tā anī Haman əda mban̄g na: Deē ń mban̄g gḛy kɔsə gɔnən ní a? 8A reēn̄ kə kūbə̄ mban̄g kə́ mban̄g əla rɔ̄n tə́ ō, sə́ndá kə́ mban̄g alə̄n kɔ̄ɔ́ kə́ əlan̄ yá̰á̰ súū rɔ̄ yā mban̄g dɔn tə́ ō. 9A adə̄n̄ de kə́ bo kógə̄ḿ yā mban̄g kūbə̄ ní ō, sə́ndá ní ō. Ni a əla kūbə̄ ní rɔ̄ deē ń mban̄g gḛy kɔsə gɔnən ní tə́ ō, a əndān dɔ sə́ndá ní tə́ ō. A njə̄rā seneé kə gō róbə kɔsə kə́ kem ɓēé ba a əda de gə̄ non tə́ na: Deē ń mban̄g gḛy kɔsə gɔnən ní mban̄g a rāān i beé!

10Tā anī mban̄g əda Haman na: Āw̄ láẃ ún kūbə̄ ō, ə́hɔ́ sə́nda ō, ba ī-rāā tītə̄ ń ədań noō kə Mardose Jipə ń ndi ta róbə yā mban̄g tə́ ní. Yá̰a̰ malang ń ɔ́jə́ ní ī-lōō kəya̰ kógə̄ḿ kɔ̄ɔ́! 11Haman un kūbə̄ ō, əhɔ sə́nda ō. Əla kūbə̄ ní rɔ̄ Mardose tə́ ō, əndān dɔ sə́ndá ní tə́ ō, ba njə̄rā seneé kə gō róbə kɔsə kə́ kem ɓēé. Ni-əda de gə̄ non tə́ na: Deē ń mban̄g gḛy kɔsə gɔnən ní mban̄g a rāān i beé!

12Gō tə́ anī Mardose tél aw̄ gogə́ ta kújə yā mban̄g tə́. Haman tél aw̄ gogə́ ɓēé kə nāgá. Rɔ̄n ur̄ wak kɔ̄ɔ́. Ni seĺ yá̰a̰ ta kumən tə́ kɔ̄ɔ́ yā kutə̄ń dɔ rɔ̄sɔl̄ yān. 13Ni ɔjə nə̄yá̰n Jeres gotə yá̰a̰ malang ń rāān ní ō, ɔjə madə̄n gə̄ malang ō. Ngé kum kedə̄ yān gə̄ ō, nə̄yá̰n ō, ədanən̄ na: Ré Mardose ń ə́lá gír kəsō non tə́ toō i Jipə anī ā ásə rāā yá̰á̰ kógə̄ḿ seneé alé, ā ī-to i dan tə́sō tə́ non tə́ ngándáńg! 14Nin̄ a ɔrə̄n̄ najə̄ seneé ɓáý anī áji mbang gə̄ reē ugə̄n̄, ba ɔsən̄ kə Hamanaá ta kaw̄ loo yá̰a̰ kəsa ń Ester ra ní tə́ kanjə̄ kɔr bā̰ā̰.

Currently Selected:

ESTER 6: SARDC

Highlight

Copy