2 YÁ̰A̰ GƏ̄ 36

Joakajə ō, Joakim ō, Joakin ō, o̰o̰n̄ ɓē

(Á̰a̰ī 2 Mba 23.30—24.17)

1De kə́ kem ɓēé gə̄ unən̄ Joakajə kə́ ngōn̄ Josias əndānən̄ mban̄g gotə bɔbə̄n tə́ Jerusalem. 2Dan ń Joakajə ndi mban̄g ní ɓālə̄n i kutə jōó gidə i mətá. Ni-o̰o̰ ɓē i nāā mətá kem ɓē kə́ Jerusalem tə́. 3Mban̄g kə́ Ejiptə ń rīn na i Neko ní ɔrə̄n mbangāá kɔ̄ɔ́ ba gān̄g yā tīr̄ dɔ Juda gə̄ tə́, kadə̄ adə̄n̄ gində̄ arjā̰a̰ kə́ kɔȳn i kəlōo dūbú mətá ō, lɔ́ŕ kə́ kɔȳn i kəlōo kutə mətá ō. 4Gō tə́ anī ni-əndā Eliakim kə́ ngōkó̰o̰ Joakajə mban̄g dɔ ɓē ko̰o̰ kə́ Juda tə́ ō, dɔ ɓē kə́ Jerusalem tə́ ō, ba tūr̄ rīn kɔ̄ɔ́, əndā na i Joakim. Ba un ngōkó̰o̰n Joakajə aw̄ seneé Ejiptə tə́.

5Dan ń Joakim ndi mban̄g ní ɓālə̄n i kutə jōó gidə i mí. Ni-o̰o̰ ɓē Jerusalem ɓāl̄ kutə gidə i kógə̄ḿ. Ni-rāā yá̰á̰ kə́ majaĺ ta kum Kɔ́ɔ̄ɓē Nə́ɓā yān tə́. 6Nabukodonosor mban̄g kə́ Babilon reē ənīn rɔ̄ɔ̄. Do̰ō̰n kə súĺ gində̄ nə̄ngá kasə kə́ kəga gidə naā tə́ jōó ba aw̄ seneé Babilon. 7Nabukodonosor ɔy yá̰á̰ kə́ tayā tayā kə́ kem kújə yā Kɔ́ɔ̄ɓē tə́ gə̄ aw̄ tə́ndā kem kújə mban̄g yān tə́ Babilon.

8Gotə najə̄ yā Joakim ń na̰y ní ndangən̄ i kem makətūbə̄ yā mban̄g gə̄ kə́ Israel tə́ ō, kə́ Juda tə́ ō. Yá̰a̰ gə̄ ń ɔjən̄ kemeé ní i yá̰á̰ kə́ to yḛr kum gə̄ ń ni-rāā ní ō, yá̰á̰ ń teē dɔn tə́ ní ō. I ngōnən Joakin n o̰o̰ ɓē gotən tə́ ní.

9Dan ń Joakin ndi mban̄g ní ɓālə̄n i sɔ́sɔ́. Ni-o̰o̰ ɓē nāā mətá kə ndɔ̄ kutə kógə̄ḿ kem ɓē kə́ Jerusalem tə́. Ni-rāā yá̰á̰ kə́ majaĺ ta kum Kɔ́ɔ̄ɓē tə́.

10Dan ń ɓāl̄ kə́ kijə ugə̄ anī mban̄g Nabukodonosor əla de gə̄ adə̄ reēn̄ kə Joakin ō, yá̰a̰ gə̄ kə́ kem kújə yā Kɔ́ɔ̄ɓē tə́ kə́ gātə̄də́ i ngá̰ý gə̄ ō, Babilon. Ba əndā Sedekias kə́ ngōkó̰o̰ Joakim mban̄g dɔ ɓē kə́ Jerusalem tə́ ō, Juda tə́ ō.

Sedekias o̰o̰ ɓē. Taān̄ ɓē kə́ Jerusalem

(Á̰a̰ī 2 Mba 24.18—25.21; Jer 39.1-10; 52.1-27)

11Dan ń Sedekias ndi mban̄g ní ɓālə̄n i kutə jōó gidə i kógə̄ḿ. Ni o̰o̰ ɓē Jerusalem ɓāl̄ kutə gidə i kógə̄ḿ. 12Ni rāā yá̰á̰ kə́ majaĺ ta kum Kɔ́ɔ̄ɓē Nə́ɓā yān tə́ ō, gḛy tél kə rɔ̄neé kə̄ nang tə́ ta kum Jeremi nge koō ta ń Kɔ́ɔ̄ɓē əndā najə̄ tan tə́ kadə̄ ɔr̄ ní aĺ ō. 13Mban̄g Nabukodonosor ń ni ənī míndən adə̄n kə rī Nə́ɓāá ní ni mbātə́ kadə̄ ndi dɔn tə́ ō. Ni rāā dɔ ngan̄g, mbātə́ tél kə̄ rɔ̄ Kɔ́ɔ̄ɓē Nə́ɓā yā Israel tə́. 14Tá ngār gə̄ yā ngé tun̄ yá̰a̰ gə̄ ō, yā de kə́ kem ɓē gə̄ ō, malang rāān̄ háĺ kə́ gōtə́ aĺ gə̄ i ngá̰ý. Nin̄ rāān̄ yá̰á̰ kə́ to yḛr kum gə̄ malang ń nápar de gə̄ rāān̄ ní ō, rāān̄ adə̄ kújə ń Kɔ́ɔ̄ɓē ɔr̄ kamə̄n tayā tām̄ yān tə́ Jerusalem ní tél kújə́ kə́ yḛr ō.

15Kɔ́ɔ̄ɓē Nə́ɓā yā kaadə́ gə̄ əla ngámbang kəla yān gə̄ adə̄ tāān̄də́ kə kum mbang kə́ majaá ō, tāān̄də́ i kə̄ nja naā tə́ ō. Tām̄ kumən o̰o̰n najə̄ yā gḭ́r deē yān gə̄ tə́ ō, kújə yān tə́ ō. 16Banī nin̄ mbóon̄ kə ngámbang kəla yā Nə́ɓā gēé ō, kídə̄n̄ najə̄ gə̄ ń Nə́ɓā ɔr̄ sedə́ ní ō, ɓōlə́n̄ ngé koō ta yān gə̄ aĺ ō, adə̄ wōn̄g ń rāā Kɔ́ɔ̄ɓē kə gír deē yān gēé ní dáwán gətóo. 17Ta anī Kɔ́ɔ̄ɓē rāā adə̄ mban̄g kə́ Babilon reē ənīdə́ rɔ̄ɔ̄, tɔ̄l̄ ngé rɔ̄ɔ̄ yādə́ gə̄ bátə́ ugə̄ń kem loo kə́ táĺ yādə́ tə́ gə̄gē kə kaskaraá. Kumən o̰o̰n tām̄ yā balsáá tə́ aĺ ō, mandə tə́ aĺ ō, de kə́ tɔgə nājə̄ tə́ aĺ ō, de kə́ tɔgə ɓə́gá tə́ aĺ ō. Kɔ́ɔ̄ɓē əla yá̰a̰ malang kem jī mban̄g kə́ Babilon tə́. 18Yá̰a̰ malang kə́ bo gə̄gē kə́ dūú gə̄gē, kə́ kem kújə yā Nə́ɓā tə́ gə̄gē, yá̰a̰ ɓɔ̄ɔ̄ gə̄ kə́ kem kújə yā Kɔ́ɔ̄ɓē tə́ gə̄gē, yá̰a̰ ɓɔ̄ɔ̄ gə̄ yā mban̄g gə̄gē, yā de kə́ bo yān gə̄ gə̄gē ní mban̄g kə́ Babilon ɔy aw̄ń Babilon malang. 19De kə́ Babilon gə̄ əlan̄ hor dɔ kújə yā Nə́ɓā tə́ ō, tetən̄ ndogə̄ mbal̄ kə́ Jerusalem nang tə́ ō, tə́lan̄ hor dɔ kújə mban̄g gə̄ kə́ kemeé tə́ kɔ̄ɔ́ ō. yá̰á̰ kə́ gātə̄də́ i ngá̰ý gə̄ ní nujən̄neé kɔ̄ɔ́ malang ō. 20De gə̄ ń teēn̄ ta yo kaskar tə́ ní, mban̄g kə́ Babilon ɔydə́ aw̄ sedə́ Babilon. Nin̄ télən̄ ɓəlo yān gə̄ ō, yā ngánən gə̄ ō, yā ngán kaan gə̄ ō, bátə́ Persə gə̄ reē o̰o̰n̄neé ɓē. 21Najə̄ ń Kɔ́ɔ̄ɓē əndā ta Jeremi nge koō ta tə́ adə̄ əda ní rāā yá̰a̰ i tītə̄ ń noō. Jeremi əda kété na: A əya̰n̄ ɓē kɔ̄ɔ́ ɓāl̄ kutə sīrí kadə̄ dɔ nang ɔrə̄ń koō kum gotə ndɔ̄ sabat gə̄ ń ngán Israel gə̄ əndān̄ kumdə́ gírí aĺ ní tə́.

Sirus adə̄ ta róbə rāā kújə yā Kɔ́ɔ̄ɓē

22Kem ɓāl̄ ko̰o̰ ɓē kə́ ta kəga dɔ yā Sirus mban̄g kə́ Persə tə́ ní, Kɔ́ɔ̄ɓē gḛy rāā yá̰á̰ ń ni əndā ta Jeremi nge koō ta tə́ adə̄ əda kété ní. Ni ndól̄ hángal Sirus mban̄g kə́ Persə kadə̄ ənī mbēr̄ kógə̄ḿ ō, ndang makətūbə̄ kógə̄ḿ ō, kadə̄ ədan̄ de kə́ kem ɓē ko̰o̰ yān tə́ gə̄ malang na: 23Sirus mban̄g kə́ Persə ɔr̄ najə̄ i beé, əda na: Kɔ́ɔ̄ɓē, Nə́ɓā kə́ dɔ rā̰ tə́ adə̄m̄ ɓē ko̰o̰ gə̄ malang kə́ dɔ nang tə́ ō, nəkɔ́ əndā dɔḿ tə́ kadə̄ m̄-rāā kújə́ kógə̄ḿ Jerusalem kə́ Juda tə́ kə m-ādə̄n ō. Ní, i náā kə́ dansí tə́ n i de kə́ gírən teē i dan deē yān gə̄ tə́ ní? Ādə̄ Kɔ́ɔ̄ɓē Nə́ɓā yān i seneé ō, ādə̄ kɔ́ɔ̄ aw̄ ō.

Currently Selected:

2 YÁ̰A̰ GƏ̄ 36: SARDC

Highlight

Copy