Jã 8

Ta lo dekïdë kï ngeða ngaw

(Oo Rom 7:3; Mat 5:28 teen 32; 1 Kor 6:9)

1Jeju aw dø mbalbo birgt. 2Kisî ritit tel ðe and kam kuj ndub Luwaht gog, na deg tube ðen roat. Jeju ndï ber ndï ndood. 3Ngéndang maktub kï Parisïg ðen kï dekïdë mad'n høna kï ngaw ndana dan degt. 4Kamla elïn Jeju anan: Ngendoodeg, dekïdë'n ndïn høna kï ngaw. 5Moij ndaj mber kam mberkïndat lon kad kï tïla dekïdë kï titbe kï mbal; na î ye, ta loi i ði? 6Elïn ta 'nten ndï nána ne kïtakad'n ngahn ne lo kun døa. Na Jeju ned kïber, ndï ndang nyamad kï ngon jin døningt. 7Na lon ndï ndïjena ta kï døtdøt ye, sïra ron kïdõ na eld an: De'n ða majal nja kïða al kusït a ne kï laa kï mbal dasa. 8Tel ned kïber ndang nya døning kï ngon jin gog þaitø. 9Lon oon dø ta 'nten ye, deg'n non telïn kïða, kïða, mba girra dø kïbogt mbã teen dø degt kï dødug, na nyan Jeju kïkïðabe, kï dekïdë'n non kï lot'n ndanat dan degt. 10Kamla Jeju sïra ron kïdõ, ela an: Ngékundøi în ða a? De kï høi kï ta goto a? 11Dekïdë tur an: Gotø Bïraþe. Jeju ela an: Mî tø m'høi kïta al aw, na ot ða majal gog ta.

Jeju i kunj kïta deg kï døningt

(Oo Jã 1:4 teen 5,9 teen 12; Jã 5:36 teen 37; Jã 12:46 teen 50)

12Jeju tel eld ta an: Mî la mî kunj kïta deg kï døningt ne ye. De'n ndï ndulo gom a ne, a ndia kam tilt al bat, na a ngah kunj kumkajir. 13Kïtø 'nten Parisïg elïna anan: I ndï i manaj dø roit, najkïma loi i rota al. 14Jeju turd an: Ke m'ndï manaj dø romt kaa ne, najkïma lom i rota. Kïtø m'ger lon m'teet kï lon m'ndï m'awt tø, na i gerïn lon m'teet al ke lon m'ndï m'awt. 15I ndï i gangïn ta kïgo tagahdet, na mî m'ndï m'gangta dø det mad al. 16Ke m'ndï m'gangta kaa ne, takïgang lom i rota kïta mî kïkïðam al; na Bøwïn lam i nat sem. 17Ndangïn kam mberkïndat losï an: Najkïma lo deg joo i rota. 18Mî m'ndï m'manaj dø romt, na Bøwm în hã lam ndï mãmnaj ho. 19Kïtø 'nten ndïjena anan: Bøwi i ða a. Jeju tur an: I germïn mî ke Bøwm al. Ni i germïn a ne i gerïn Bøwm ho. 20Jeju eltag'n non lon ndï ndoon deg kam kuj ndub Luwaht, lot'n sundï nar ndït. Na de kï høa goto kïta døkàd loa asï al þaitø.

Jeju elta kawïn dõ ro Bøwïnt

21Jeju eld tø an: M'ndï m'aw na a i sahmïn na a oin kam majalt losï; lon m'ndï m'awt asïn teet al. 22Kïtø ta non juipg elïn ne anan: A tøl ron e? Kïtø el an lon m'ndï m'awt asïn teet al; 23Jeju eld an: În kï ber, mî kï dõ: În kï døningt'n ðan, na mî kï døningt al. 24I kïta 'nten la m'elsïn m'an a oin kam majalgt losï. 25Ndïjena anan: Î nõ a? Jeju eld an: Mî dagïro'n non m'elsï lo yaþoodat nu. 26M'aw kï tag ngãibe kad m'el døsït, kï tag ngãibe kad m'gang døsït tø, na ngelam i ngerota; nyag'n m'oo taat koon la m'ndï m'el deg kï døningt ne ye. 27Juipg oon kad i ta lo Bøw hã el al. 28Kïtø 'nten Jeju eldïn an: Lon a i gan ngon de dõ, kamla a i gerïn køi køi kad mî la i mî ye, na m'ndï m'ða nya mad kï døm al, na m'ndï m'elta tit'n Bøwm ndoomïn. 29Ngelam i nat sem, nyam kïkïðam al, kïta m'ndï m'ða nyag kï nela kïndøgndøg. 30Lon ða eltag'n non þaitø ye, deg ngãibe taan ta loa.

Ta kï rota ðe kokïro Luwaht

31Kamla Jeju el Juipg îgïn adïna kamd an: Îla i ndïn kï kamtat lom a ne, în ngéndoog lom kïrota, 32a i gerïn rota, rota tø a taa nyasï dõ. 33Turïna anan: Jî ngaka Abraham, kï ða þer lo de mad nja kïða al; titibãi i ndï el an: A taa nyasïn dõ a? 34Jeju turd an: Rota, rota la m'ndï m'elsï ye, dekïðen'n hø ða majal a ne, i þer lo majal. 35Þer a ndï kï kam kujt lo ngen mbãkïnõt al, ngon la a ndit mbãkïnõt ye. 36Titbe tø la, îla Ngon a ta nyasï dõ a ne, a i ndïn kï ta nyandõ kï jeje. 37M'ger în ngaka Abraham, na i ndï sahn ðob tølïm, kïta ta lom ngah lo kamsït al. 38M'elta nya'n m'oo ro Bøwmt; na în i ndï ðan nya'n oon dø kokïro Bøwsït. 39Turïna anan: Bøwj i Abraham; Jeju eld an: Neni în ngan Abraham a ne, a i ðan kïlag lo Abraham. 40Na tajigla i ndï sahn ðob tølïm, kïta m'elsï rota'n m'ndoo koro Luwaht. Abraham ða beal. 41I ndï ðan kïlag lo Bøwsï.

Elïna anan: Jî ngan'g kï oojïnj kïgo ða ngawt kï sah dekïdët kï nõbe al, na j'aw kï Bøwj kïðabe, ad i Luwah. 42Jeju eld an: Neni Luwah i bøwsï a ne, ni a i tarmïn kïta m'tee ko kam Luwaht la m'ðe ye. 43Kïtøði i gerïn ne girr takelïm al a? Kïtø asï koon dø ta lom al. 44I ndïn kï bøwsï ad i sitan i go ndigt losï kad i ðan kïgo nyurkõgt lo bøwsï. I ngetøl deg lo yaþoodat nu, ða do rotat al. Lon ndï eltakïbal a ne, ndï un kï døn, kïta i ngetakïbal. 45Na mî m'ndï m'el rota, na admïn kamsï al. 46Nõ kusït la asï høm kïta dø majalt a? Î la m'ndï m'el rota a ne kïtøði admïn ne kamsï al a? 47De'n i lo Luwah a ne, ndï oo dø ta lo Luwah. Na în taa ne, i oon dø ta lom al, kïta în lo Luwah al.

Jeju i kïbo tøi Abraham

(Oo Heb 12:3; Jã 10:26 teen 33; Kol 1:17)

48Juipg turïna anan: J'el got hã j'an î de kï Samarit, na ndil kïmajal i kamit ale? 49Jeju tur an: Ndil kïmajal goto kammt, na m'ndï m'øsïgon Bøw ta køsï, na în i ndï øsïn gonïm al. 50Mî m'ndï sah kad tøm mî kïbe ko al, ngesaha ndï nõ ndï gangta tø. 51Rota rota la m'ndï m'elsï ye, îla de mad ngomgo ta lom a ne, a oo koi kï njakïða al bat. 52Juipg elïna anan: Tajigla kï ger jeje ndil kïmajal i kamit. Abraham oi, ngékelta kï ta Luwaht kaa oin; na i ndï el an: Îla de mad ngomgo ta lom a ne a oo koi kï nja kïða al bat. 53Ad î kïbo tøi Abraham kï Bøwj'n oi yo? Ngékelta kï Luwaht kaa oin. Î ye î nyai nõ a? 54Jeju turd an: Îla mî kïþe m'ndï m'ad tøm ko a ne, tø ko lom i nya kï kari. Bøw la ndï ad tøm ko ye. Bøwïn i ndï kunïna Luwah losï. 55I gerïna al, na mî m'gera maj. Îla m'an m'gera maj al a ne, ma mî ngetakïbal titsï, na m'gera maj, m'ndï m'ngom go ta loa tø. 56Bøwsï Abraham þakul koo ndø ðe'm, na ooa, ða ronel tø. 57Juipg elïna anan: I ða þal dømi al þaitø yela oo Abraham yo. 58Jeju turd an: Rota rota la m'ndï m'elsï ye, lon oojïn Abraham al þaitø mî nõ. 59Kïtø 'nten øin mbalg kï'n tïlana ne, na Jeju yaron, tee kam kuj ndub Luwaht kø.

Currently Selected:

Jã 8: MB80

Highlight

Copy