Mateo 25
25
Qodaloqtenaxanalo saua' diez q'añole
1Qana'chi dójo' l'onataxanaxac ñi' Dios 'me net'ague da' piỹem, jeda'me 'ená'am qomle saua' diez q'añole 'me ỹaconalo saua' lecoỹadáxanaqtel 'me lasec na' aceite. Qana'chi ỹic'ádeta so' n'onáxac, da' qaidi huaqátetr'aguet jeso'me huó'on. 2Cinco jesaa'me qaỹa ga' ỹaỹáteedaac, qataxa cinco saua' ỹátenaxanaxail. 3Jesaa'me qaỹa ga' ỹaỹáteedaac joca'li jéque', qana'chi ỹáchi' saua' lecoỹadáxanaqtel, qaláxasa sa ỹáchi' ga' lasec da' ỹivíta da' c'ochíchiilo saua' lecoỹadáxanaqtel. 4Qaláxasa saua' ỹátenaxanaxail, jesaa'me ỹachít'ape saua' lecoỹadáxanaqtel qataxa saua' léte' saua' laqátaxanataqa lasec saua' lecoỹadáxanaqtel. 5Qá'a maliaxa huaỹáloqot'aguet jeso'me huó'on, qana'chi 'ena'uaque jesaa'me 'uo na' l'ochaqa', qana'chi d'ochi'. 6Qana'chi joca'li ma'le pí'ỹaq lauel, qana'chi qodemachíỹa so' natalaanaxac, 'eet'oi: “¡Ỹamtaa'le nóvi' na' huó'on, ỹa 'anp'áiỹiỹi, 'auqáchiit'aguet!” 7Qana'chi 'ena'uaque jesaa'me q'añole ñídiseguem, qana'chi ỹiỹamaxachidíñi saua' lecoỹadáxanaqtel. 8Qana'chi saua' cinco 'me qaỹa 'te ỹaỹáteedaac, jesaa'me ỹiỹáxatapecoto saua' laqáỹa' cinco 'me 'uo da' laỹátenaxanaxa'j, 'enapega'to': “Ỹa qo'mi 'auanema ga' lai na' lasec na' 'adecoỹadáxanaqtéldii'. Píiỹa, ma'le ỹamtaa'le 'o'm naua' qadecoỹadáxanaqtel.” 9Qaláxasa jesaa'me q'añole 'me ỹátenaxanaxail 'enapega'to': “'Ai', sa sasena'. Píiỹa, qomle qo'mi lochiỹai'ỹalo, nataq'en da' 'oñíita. N'óota da' 'auc'áchiỹa jega'me ỹimenaac, qana'chi 'aneuodíñiỹa ga' lasec naua' 'adcoỹadáxanaqtéldii'.” 10Qaláxasa jesaa'me cinco q'añole 'me qaỹa 'te ga' ỹaỹáteedaac, joca'li jéque' da' neuodéedaaque ga' lasec saua' lecoỹadáxanaqtel, qana'chi ma'le nivídeuo so' huó'on. Qana'chi jesaa'me q'añil 'me leuótete', qana'chi liquiáxa'u jeso'me da' p'ádeuo ga' n'onáxac. Ỹim, qana'chi qoỹapadínỹi so' som. 11Joca'li copát'a, qana'chi nivídedeuo saua' laqáỹa' q'añole. Qana'chi diỹáxat'ape, 'enapega'to': “¡'Am qadasoxola'! ¡Ỹa qo'mi 'au'ouateeta qomle!” 12Qaláxasa jeso'me 'enaaco': “Neegue't, 'ami sa saateto'n.”
13Qana'chi so' Jesús 'enaaco':
—'Ami ỹátaqta 'anlóitaiquio' qomle, qá'a sa 'auaỹáchiñii ga' nolo' qataxa ga' lalóqo' da' n'iỹílaq jen' siỹaxaua lec'óxot.
Qodaloqtenaxana jaso' nemena 'me huo'oi saua' qoỹanema
(Lucas 19.11-27)
14Dójo' l'onataxanaxac ñi' Dios 'me net'ague da' piỹem, jeda'me 'ená'am ga' siỹaxaua da' sétaaque taỹa ga' 'aléua laqáỹa. Qana'chi jega'me ỹiỹáxanalo saua' lamaxa's 'me ỹanema jaso' naicaua da' qaidi ỹilodelégue.
15Qana'chi so' 'oonolec jesaa'me ỹanem jaso' cinco mil, qataxa so' laqáỹa ỹanem jaso' dos mil, qataxa so' laqáỹa ỹanem jaso' mil. Qoỹanema jesaa'me jañi'me nalót'ai' liquiỹatete. Ỹim, qana'chi jec. 16Qana'chi so' lamaxasec 'me ỹaconguet jaso' cinco mil, jeso'me ỹ'onataxanaxan jaso'me nemena da' nemen. Qana'chi cinco mil jaso' laỹi jaso' lauéque. 17Qana'chi naq'áita nataq'en jeso'me ỹaconguet jaso' dos mil, jeso'me dos mil jaso' lauéque. 18Qaláxasa jeso'me ỹaconguet jaso' mil, jeso'me jec da' ỹoxochiñi jaso' naicaua so' ladípa, ỹachánỹi jaso' lesede.
19Joca'li ma'le sa lequese'eguelo saua' 'uóidi, qana'chi v'iỹílaq jeso'me ladípa' jesaa'me namaxa's. Qana'chi jeso'me naloqtena't da' l'onataxanaxa'j jesaa'me. 20Qana'chi 'uáichiiñi janac jeso'me ỹaconguet joca'li jaso' cinco mil, qana'chi nataq'en ỹanem so' ladípa jaso' laỹi cinco mil. Qana'chi 'enapego', 'enaaco': “'Am ỹadípa, jaỹim ca'li jaỹim 'auanem jaso' cinco mil. Qaláxasa naỹi jánjo' jan' laỹi cinco mil 'me ỹauéque.” 21Qana'chi so' nadípa 'enaaco': “Ỹátaqta ỹiỹamqáchiiñi, 'am 'ónaxaic namaxasec, 'am nepé'et. Qá'a 'am ỹátaqta 'aupaquetelégue da' 'aué'et jega'me sa lecolec, qaláxasa naỹi ỹátaqta let'ádaic qomle ga' 'am sanem da' 'aulolégue. Naỹi 'anp'áuo qomle da' 'am ñitónaxaua.” 22Ỹim, qataxa janac so' laqáỹa namaxasec 'me ỹaconguet joca'li jaso' dos mil. Qana'chi 'enaaco': “'Am ỹadípa, jaỹim 'auanem ca'li jaso' dos mil. Qaláxasa naỹi nataq'en jánjo' jan' laqáỹa dos mil 'me ỹauéque.” 23Qana'chi so' ladípa 'enaaco': “Já'a, ỹiỹamqáchiiñi, ỹátaqta 'am 'ónaxaic namaxasec, qataxa ỹátaqta 'am nepé'et. Qá'a 'aupaquetelégue da' 'aué'et ga' sa lecolec, qaláxasa naỹi jalcote qomle ga' 'am sanem da' 'aulolégue. Nataq'en 'am naỹi 'anp'áuo qomle da' 'am ñitónaxaua.” 24Qaláxasa joca'li nivídeuo so' namaxasec 'me ỹaconguet joca'li jaso' mil, qana'chi jeso'me 'enapego' so' ladípa, 'enaaco': “'Am ỹadípa, jaỹim saỹáten da' ỹátaqta 'am sa nedámchiỹi na' 'adauel da' 'anapoc jan' jala ga' sa 'adañiisec, qataxa da' 'alapóoseguem ga' sa 'adichiỹoxosec. 25Tadeeto' jaỹim 'uo da' ỹoqolánaxa. Qana'chi jaỹim soxochiñi jaso' 'anaicaua, soxotóoue jen' 'aléua. Qaláxasa jánjo' jan'me, qá'a mai'chi 'adalémaxasete.” 26Qana'chi jeso'me nadípa 'enaaco': “'Am namaxasec sa 'am nepé'et qataxa 'am huálaic. ¡'Am 'auaỹáten qalqaiga ca'li da' jaỹim ñapoc jan' jala ga' sa ỹañiisec, qataxa ỹapóoseguem jen'me sa ỹichiỹoxosec! 27Qalqaiga ¿tóoqo'chi sa 'auacháaue jañi' lai't jan' laicaua jana'me ñaicaua, mitaama'le naỹi da' ñóvi', qana'chi saconguet jaga'me lauéque jana'me ñaicaua?” 28Qana'chi 'enapego' jeso'me huétaaue, 'enaaco': “Ỹa 'auacoñíỹiỹet qomle jada'me mil 'me huet'asop jeda'me, qaidi 'auañimii jeda'me huet'asop jada' diez mil. 29Qá'a jega'me 'uo ga' huet'asop, qaa'le jega'me ỹágueegue ga' qoỹanem, qana'chi ỹátaqta qaỹa 'te ỹiuéetaaque. Qaláxasa jega'me qaỹa ga' huet'asop, qaa'le jega'me ỹivíd'a jega'me sa lecolec 'me huet'asop qodootáxanec. 30Qaláxasa da'me dójo' namaxasec 'me qaỹa ga' taiỹet, jeda'me 'auasaqáiỹi'ỹa na' n'álaxa na' p'áiỹi. Huá'a qomle, qana'chi noỹíitac qataxa ỹátaqta ỹiuoga't naua' lodaitel ỹasouaxat da' naỹaliaxa.”
Qomle qonimit jen' ỹodapecachi siỹaxadipi
31Qomle ỹivíta da' n'iỹílaq jen' siỹaxaua lec'óxot da' net'a, naquétaaue ỹima jen' lamaxa'spi piỹem lé'ecpi, qana'chi nánỹi jaga' nes'ónaxaqui 'me ỹ'oxodaq da' net'a. 32Qana'chi ỹima jen'me ỹodapecachi siỹaxadipi da' ỹimá'uo jen'me, qana'chi jen'me net'a ỹiỹotapecachi qomle jen' siỹaxadipi da' 'ená'am ga' ỹilotalégue jan' n'aanaxate da' ỹiỹotái'ỹa jan' n'aanaxate qataxa jan' quétaq. 33Qana'chi ỹip'axangue jen' loic jan' n'aanaxate, qataxa jan' quétaq ỹip'axangue jen' n'emaq. 34Qana'chi jénjo' net'a 'enapéga qomle jen'me siỹaxadipi p'aiỹi jen' loic, 'eet'oi: “'Auanaquíỹi qomle, 'ami 'me 'ami ỹichoxode'n jiñi'me ỹit'a. 'Aunoxoñiiuó'o qomle da' l'onataxanaxac 'me ỹaqátaxata't da' 'ami ỹanema ñi' Dios joca'li ỹímta ỹí'et jen' 'aléua. 35Qá'a jaỹim 'uo joca'li da' ỹoqouáxa, qaláxasa 'ami jaỹim 'auañimii ga' salic; qataxa 'uo da' siliinquip, qaláxasa jaỹim 'anỹómaxañii; qataxa sená'am ga' ỹaqá'a ga' sachiỹoxogue, qaláxasa 'auauóỹi ga' ỹ'acháqa'. 36Qataxa qaỹa 'te ga' ỹapoto, qaláxasa 'auauóỹi ga' ỹoxot; qataxa jaỹim selhuaac, qaláxasa jaỹim 'ausapchíitapega; qataxa jaỹim qoỹicoñi', qaláxasa jaỹim 'auc'áchiitapee'uo.” 37Qana'chi jen'me 'ónaxaic da' lasoxoc 'enaac qomle: “'Am qadasoxola', ¿jái'te huo'o' joca'li da' 'am seloqót'a da' 'adoqouat, qana'chi 'am sequi'ỹáxanaq? qataxa ¿jái'te huo'o' joca'li da' seloqót'a da' 'adiliinquip, qana'chi 'am ñiỹómaxanaq? 38Qataxa ¿jái'te huo'o' ca'li da' 'am seloqót'a da' 'auená'am ga' ỹaqá'a ga' chiỹoxogue, qana'chi sauoqo ga' 'ad'ochaqa', 'uootaxa da' qaỹa ga' 'adapoto, qaa'le 'am sanaxam ga' 'adoxot? 39¿'Uootaxa da' 'am seloqót'a da' 'adelhuaac, 'uootaxa da' 'am qoỹicoñi', qana'chi 'am sec'átaxa'uo?” 40Qana'chi jénjo' net'a 'enaac qomle: “Ỹátaqta 'eesa dójo' 'ami s'axatema, da' ỹima jénjo' 'av'íchiic ga' 'oonolec jénjo' ỹaỹi, da' temaqaidi da' qaỹa ga' nesáaque, qana'chi na'chaỹim 'me jaỹim 'av'íchiic dójo'.”
41Qana'chi jen'me net'a 'enapéga qomle na' p'aiỹi jen' n'emaq, 'eet'oi: “Jaỹim 'oquí'ỹai qomle, 'ami 'me qoỹa'uo da' 'ane'uaxánaguiquii. 'Ánỹi jidi'me dóle' 'me qaỹa 'te loiquiaqa' 'me qoỹaqátaxata't da' qaidi qoỹasaxánỹi so' qadó'o paiỹac qataxa jen'me lamaxa'spi. 42Qá'a jaỹim ca'li 'uo da' ỹoqouáxa, qaláxasa 'ami jaỹim sa 'auqui'ỹáxañii; qataxa 'uo da' noxop lamaic, qaláxasa 'ami sa jaỹim 'anỹómaxañii; 43qataxa sená'am da' ỹaqá'a ga' sachiỹoxogue, qaa'le sa 'auauóỹi ga' ỹ'acháqa'. Qataxa qaỹa ga' ỹoxot, qaláxasa sa 'auauóỹi ga' ỹoxot; qataxa jaỹim selhuaac qataxa sonétaaue jaga' necointáxanaxaqui, qaláxasa sa jaỹim 'ausapchiiuó'o.” 44Qana'chi jen'me siỹaxadipi 'enapega't qomle, 'enaaco': “'Am qadasoxola', ¿jái'te huo'o' joca'li 'am seloqót'a da' 'adoqouat, 'uootaxa 'adiliinquip, 'uootaxa da' 'ená'am da' ỹaqá'a ga' 'auachiỹoxogue, 'uootaxa qaỹa ga' 'adoxot, 'uootaxa 'adelhuaac, 'uootaxa 'am qoỹicoñi', qana'chi sa 'am ỹicochaxa?” 45Qana'chi jénjo' net'a 'eet'oi qomle: “Ỹátaqta 'eesa dójo' 'ami s'axatema, da' ỹima jen'me joca'li da' sa 'av'íchiic ga' 'oonolec jénjo' sa lecolec, nataq'en jaỹim sa 'auauóỹi ga' jaỹim 'av'íchiic.” 46Qomle ỹim, qana'chi jen'me siỹaxadipi táaue qomle jega'me qaỹa 'te loiquiaqa' ne'uaxánaguec, qaláxasa jen'me 'ónaxaic da' lasoxoc, qaa'le táaue qomle jega'me qaỹa 'te loiquiaqa' n'óiỹaxac.
Currently Selected:
Mateo 25: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
