Mateo 20

Qodaloqtenaxana so' 'onataxanaxaicpi

1Da' l'onataxanaxac ñi' Dios 'me net'ague da' piỹem, jeda'me 'ená'am ga' lalémaxaset ga' nanaqa' jan' uva 'me potéta da' néte'ta da' ỹiláaque ga' l'onatáxanaxanecpi, da' qaidi qonaqat jan' jala jaso' lañiise uvas. 2Qana'chi jeso'me detaxaỹapégue' jeso' 'onataxanaxaicpi da' d'onataxanỹi 'en jaso' 'oonole denario di' 'oonolec nolo'. Ỹim, qana'chi ỹamaxái'ỹa so' lanaxanqa' da' d'onataxan. 3Joca'li ma'le qaỹat'ague jaso' c'atena so' néte'ta, qana'chi ỹitaxa v'iỹílaxaỹi jeso'me 'aco'. Qana'chi jeso'me ỹilalégue so' laỹi 'onataxanaxaicpi 'me huét'a so' nemáqa', qaỹa 'te ga' l'onatac. 4Qana'chi 'enapego' jeso'me, 'enaaco': “'Ami nataq'en 'auc'áchiỹa qomle di' ỹanaxanqa' da' 'auapogaxañii. Jaỹim ỹátaqta sepagaqchíichiỹi qomle jaga' laso'vi ga' 'ad'onataquii.” Qana'chi jec jeso'me 'onataxanaxaicpi. 5Joca'li ma'le nolo' laiñi, qana'chi v'iỹílaxaỹi so' 'aco'. Qataxa so' laiñi so' jávit, ỹitaxa v'iỹílaxaỹi, 'ená'am 'en so' 'uáichiiñi. 6Qataxa joca'li sóxote ma'le nadíichiiñi jaso' c'atena, qana'chi ỹitaxa v'iỹílaxai'ỹa jeso'me 'aco' so' nemáqa'. Qana'chi ỹitaxa ỹilalégue so' laỹi 'onataxanaxaicpi qaỹa 'te l'onatac. Qana'chi 'enapego', 'enaaco': “¿Tóoqo'chi 'ovíit'a jénjo' so' nolo'ta, qaỹa 'te ga' 'ad'onataquii?” 7Qana'chi jeso'me 'enapega'to': “Qá'a qaỹa 'te ga' qo'mi ỹ'onataxanaxa'n, tadeno' souqát'a jénjo'.” Qana'chi jeso' 'aco' 'enaaco': “'Ami nataq'en 'auc'áchiỹa qomle di' ỹanaxanqa' da' 'auapogaxañii. Jaỹim ỹátaqta sepagaqchíichiỹi qomle jaga' laso'vi ga' 'ad'onataquii.” 8Joca'li ma'le pí'ỹaq, qana'chi so' 'aco' 'enapego' jeso'me huaidooma, 'enaaco': “'Aviỹáxanee'ga ga' ỹ'onatáxanaxanecpi. Ỹim, qana'chi 'auseeten, 'au'áuaxañi qomle da' 'auseeten jega'me niỹaqa'aguet da' d'onataxan, cha ỹivíd'a 'auen jen'me 'uáichiiñi d'onataxan.” 9Ỹim, qana'chi janac jeso'me d'onataxáatac joca'li ma'le nadíichiiñi jaso' c'atena. Qana'chi ñi' 'oonolec jeso'me ỹaconguet jaso' 'oonole denario 'me laseete ga' d'onataxan di' 'oonolec nolo'. 10Joca'li ma'le ỹivíta jeso'me 'uáichiiñi da' d'onataxan, qana'chi jeso'me 'éetapecogamaxa da' 'uootaxa ỹágueegue qoỹin jaga' laseete. Qaláxasa nataq'en jeso'me ỹaconguet jaso' 'oonole denario ñi' 'oonolec. 11Joca'li ỹaconguet jaso' laso'vi, qana'chi qodalemataỹa so' 'aco'. Qana'chi qoỹinapéga, 12qoỹinaaco': “Jeso'me p'áteeguepi 'chi cada'acolec da' d'onataxan, qalqaiga 'ená'am 'auen jañi' laso'vi da' 'auseeten. Qaamaxa qo'mi ỹimáñi so' nolo' da' ñidoqtapeeguet so' netap da' s'onataxanaqátac.” 13Qaláxasa jeso'me 'aco' 'enapego' so' 'oonolec so' 'onataxanaxaicpi, 'enaaco': “'Am senapéga jaỹim sa sañoxot da' sa sepagaqchinỹi jaso' 'adaso'vi. Qá'a ca'li 'am setaqátapegue', qaa'le 'am séetapega da' 'au'onataxanỹi jaso' 'oonole denario di' nolo'. 14Chan'eesa 'am n'óota da' 'auaconguet jana' 'adaso'vi, qana'chi 'oc. Qá'a jaỹim sétaaque da' 'ená'am jaso' 'adaso'vi jaga' sanem jeso'me p'áteegue da' d'onataxan. 15Qá'a ¿séetapega sa sañoxoto' da' jaỹim mai'chi soiquíitac ga' sanaỹi jaga' mai'chi ñaicaua? ¿'Uootaxa 'anquiỹátapega da' ỹasouaxat da' jaỹim choxodénataxanaxaic?” 16Naqaida qomle da' 'éeta jen'me naỹi p'áteegue, qaa'le jen'me qomle 'uáueegue. Qataxa jen'me naỹi 'uáueegue, qaa'le jen'me qomle p'áteegue. Qá'a naỹi ỹátaqta jalcote jen'me qoỹiỹáxanaaque, qaláxasa sa 'amaqtaq qomle jen'me niquiỹacpi.

So' Jesús ỹitaxa ỹ'axát'a da' nalaataguec

(Marcos 10.32-34; Lucas 18.31-34)

17So' Jesús joca'li ma'le taiỹi da' Jerusalén, qana'chi ỹiỹotai'ỹalo saua' doce lapaxaguenataqa, qana'chi 'enapegalo, 'enaaco':

18—'Ami 'auaỹáchiñii da' qo'mi naỹi sec'átaxasee'ma di' Jerusalén. Huá'a qomle jidi'me, qana'chi jen' siỹaxaua lec'óxot qoỹaneuó'o na' let'alpi na' letaxaỹáxanaxanecpi na' siỹaxadipi da' qodetaxaỹapégue' ñi' Dios qataxa jen'me dapaxaguenataxanapeec jen'me naqátaxacpi, da' qaidi jen'me ỹoiquinaac ga' nalaataguec jen'me, 19qataxa ỹaneuó'o jen'me ỹaqá'a ga' chiỹoxogue, qaidi ỹi'uena't jen'me, qataxa ỹi'uaxáatac, ỹim, qana'chi ỹip'enaséguem. Qaláxasa qomle ma'le ỹivid'alo gaua' tres noloqo'te, qana'chi jen'me nec'aliséguem.

Da' ỹiỹáxanaaque jaso' lat'e' saua' Jacobo qataxa so' Juan

(Marcos 10.35-45)

20Qana'chi nichíi'uo so' Jesús jaso' lat'e' saua' Jacobo qataxa so' Juan, 'me lec'óqo'te so' Zebedeo. Qana'chi jaso'me náictapee'to saua' lec'óqo'te da' ỹisocoto naua' liliictel so' Jesús, da' qaidi ỹiỹaxanot. 21Qana'chi so' Jesús ỹinatétac jaso'me, 'enaaco':

—¿Jái'chogamaxa 'auauótaaque?

Qana'chi jaso'me 'enaaco':

—'Auan qomle naỹi ga' 'ad'aqtac, qaidi qomle ỹivíta ga' lalóqo' da' 'ad'onataxanaxac da' 'am net'a, qana'chi ga' 'oonolec náajo' dos ỹalqa 'uo ga' na'ague na' 'adoic, qataxa ga' laqáỹa, qaa'le na'ague na' 'an'emaq.

22Qana'chi so' Jesús 'enaaco':

—'Ami sa 'auaỹáchiñii ga' náỹi jeda'me 'aviỹáxañiitapee'uo. ¿'Ami séetapega 'auañoxochii qomle da' 'auachíỹi da' ñi'queténaxac 'me sega'me jaỹim qonỹómaxanỹi qataxa da'me chiláxac 'me sáaue?

Qana'chi jesaa'me 'enapega'to':

—Já'a, sañoxotaq.

23Qana'chi jeso'me 'enaaco':

—Já'a, 'eesa 'ami sega'me 'anỹómiiỹi jega'me ñi'queténaxac 'me sáaue qataxa jeda'me chiláxac. Qaláxasa dójo' lasoxoc da' 'ona'ague da' ỹoic qataxa jen' ñ'imaq, qaa'le jeda'me sa jaỹim qoỹanem da' san. Qá'a na'chigáta jega'me sóxote da' ỹaqátaxata't jiñi'me ỹit'a Dios 'me naqaiga ga' qoỹanem.

24Saua' laqáỹa' diez lapaxaguenataqa joca'li demachíta dójo', qana'chi jesaa'me ỹátaqta dalemataỹalo jesaua' dos naqáỹa'. 25Qana'chi so' Jesús ỹiỹáxanoovlo jesaa'me, qana'chi 'enapegalo', 'enaaco':

—'Ami 'auaỹáchiñii na' lasoxola'pi na' ỹodapecachi siỹaxadipi da' jen'me ỹátaqta 'ená'am ga' 'aco' da' ỹamaqaac na' laỹi, qataxa jen'me 'uañaxaicpi, jen'me ỹátaqta ỹ'ét'ec da' ỹalaxaguet da' lamaxasóxonaxac 'en na' laỹi. 26'Ami, qaa'le 'ena't da' na'chi 'éeta dójo' 'adasoxoquii. Na'chidáta da' ga' sétaaque 'amaqtáqaic da' 'oñíita, qaláxasa jega'me neuálaxaitapegue' na' laỹi, 27qataxa gamachaqaiga da' 'oñíita da' sétaaque 'uáichiiñi, qaa'le jega'me na'chiga ga' lamaxasec na' laỹi. 28Qana'chi 'ená'am jen' siỹaxaua lec'óxot da' jen'me sa janac da' qaidi qoneuálaxaitapegue'. Na'chidáta da' janac jen'me, qaidi neuálaxain, qataxa ỹan da' l'óiỹaxac, da' 'ená'am qa'en jaga' laso'vi qaidi jalcote jen' qonec'alaxatéegue.

So' Jesús 'en nauáachidiñi saua' dos qana'mi

(Marcos 10.46-52; Lucas 18.35-43)

29Joca'li ma'le quéd'ai di' noic Jericó jesaa'me, qana'chi ỹátaqta jalcote so' siỹaxadipi 'equegue so' Jesús. 30Huo'oi saua' dos qana'mi ñíchidiñi, nétra'uo na' lai so' naq'aic. Jesaa'me joca'li demachítrapegue' so' Jesús náte'uo so' huétr'a, qana'chi jesaa'me n'alaxadíseguem, 'enapega'to':

—¡'Am qadesaliaxanec 'me lec'óxot so' qadet'a David, qo'mi 'auchoxode'n qomle!

31Qana'chi so' siỹaxadipi 'éetapegalo' jesaa'me, qaidi ỹ'imádete'. Qaláxasa jesaa'me ỹitaxa nichíỹaxatreegue da' liỹáxanaxa'j, 'enapega'salo':

—¡'Am qadesaliaxanec 'me 'am lec'óxot so' qadet'a David, qo'mi 'auchoxode'n qomle!

32Qana'chi so' Jesús nichaachiñi, qana'chi ỹiỹaxanalo jesaa'me qana'mi. Qana'chi ỹinatét'ape, 'enaaco':

—¿Jái'chogamaxa sétaaque da' 'ami s'eteque?

33Qana'chi jesaa'me 'enapega'to':

—'Am qadesaliaxanec, sétaaque da' ñauanáqchiiñi.

34Qana'chi so' Jesús ỹátaqta 'uo da' lichoxodénataxanaxac jesaa'me, qana'chi ỹipoteua'alo naua' l'ai'te. Qana'chi jesaa'me nauáachidiñi, qana'chi quetegue jeso'me.

Currently Selected:

Mateo 20: PLGNT93

Highlight

Copy