1 Pedro 4
4
Ñi' 'oonolec ỹilot'eguet ga' nesetaxat 'me ỹanem ñi' Dios
1Chan'eesa dójo' 'éeta so' Cristo 'uo da' ne'queténaxac da' ló'oquiaxac, 'ami nataq'en qaỹa 'te 'uo ga' 'aviquíitapega da' 'an'queténaxaquii. Qá'a jega'me 'uo da' ne'queténaxac da' ló'oquiaxac, jega'me cá'ai da' n'etaxalóxo, 2da' qaidi jega'me taiỹi da' 'ad'óiỹaxaquii, 'anchaachíitaỹi qomle ga' 'éetapeec ñi'me Dios, qana'chi sa 'av'íchii ga' sa nó'in 'éetapeec da' 'adapáchiỹaxaquii. 3Qá'a qai'soo'le saua' 'uáudeegue 'uóidi da' 'av'íchiitac jen'me noqopita jen'me sa ỹaateton ñi' Dios. Jesaa'me 'uóidi 'ami 'ovíitaaue jen' namanaxanaxapi, sa nó'in qoỹíitapeecpi, notaxapi, qataxa jen'me naỹáquiaxacpi 'me niqui'ỹáxacpi, qataxa da' ỹómaxac let'ádaic, qataxa 'antamñiitapecot jen' n'onatacpi niquí'i 'me sa qoỹasen. 4Jen'me siỹaxadipi ỹátaqta loual'aguet da' 'ami sa 'ami 'te 'aualiquiỹóoue jen'me sa nó'inpi 'me ỹ'étetac. Chan'eesa jen' siỹaxadipi sa 'ami 'te ỹiỹamaxata'pe da' 'ami detaxaỹa'alo. 5Qaláxasa jen'me siỹaxadipi taỹá'a da' ỹ'axátem ỹima jen'me ỹ'étetac ñi'me Dios 'me ma'le sóxote niỹamaxateta't da' nimit da' loic jen' siỹaxadipi 'me nec'alétaiỹi qataxa jen'me sóxote ỹileu. 6Qá'a jen'me sóxote ỹileu, qaláxasa ỹivíd'a da' qoỹ'axátem da' n'aqtac, qaidi da' l'óiỹaxac sa di'ỹoq da' nec'alétaiỹi da' 'ená'am da' l'óiỹaxac ñi'me Dios. Temaqaidi da' joca'li huetalégue jen' 'aléua, sóxote toqo' da' qonimit da' 'ená'am ỹima jen' laỹipi siỹaxadipi.
7Ma'le nadíit'a da' loiquiaqa' ỹimaquéna. Chan'eesa ỹátaqta 'anlóiteegue qomle, qataxa ỹátaqta sa 'au'aidíñii da' 'antamnaxaquii. 8Qaláxasa ỹátaqta ỹágueegue qomle 'aviñii da' jalcote da' 'adsóxodiquii, qá'a da' nauochidíỹaxac ỹ'éte'uo da' ỹátaqta jalcote na' janoicpi qoỹapalaxat. 9Qataxa ñi' 'oonolec da' 'oñíita ỹátaqta ỹilo'oguet ga' laqáỹa da' namaxasoxoic, qataxa sa quetapeelégue. 10Qataxa ñi' 'oonolec ỹátaqta ỹilot'eguet ga' nesetaxat 'me ỹanem ñi' Dios da' d'onataxaalégue jen' laỹipi, 'oñí'ỹam ga' ỹátaqta ỹaỹáten da' ỹilo'ogue jen' ỹodapecachi lachítaqtaxanaxatpi ñi'me Dios. 11Da' 'uo ga' qoỹanem da' d'aqtaxan, qaa'le naua' l'aqtaqa ỹátaqta naqainaua naua' l'aqtaqa ñi' Dios. Qataxa ga' qoỹanem da' l'onataxanaxac, qaa'le naqaida da' l'añaxac 'me ỹanem ñi' Dios. Ỹima jen' qoỹacoolégue da' qoỹí'et jen'me náỹi da' qaidi qoỹi'ỹoxoden ñi'me Dios, chiỹoqóchiỹi so' Jesucristo. Jeso'me 'me lalémaxaset da' li'ỹoxodic qataxa da' l'añaxac 'me qaỹa 'te ga' loiquiaqa'. Já'a, na'chi naq'áita dójo'.
Da' 'queténaxac ỹasouaxat da' qodictelégue so' Cristo
12'Ami ỹaqai'ỹolqa, sa 'te qomle da' 'adoual'ỹaguet na' sa p'áteta 'anapiinaguiquii 'me 'ami nivitalo da' 'ená'am da' 'uootaxa 'ami huañiilo ga'me p'asáiỹi sa qoỹauanápiỹi. 13Na'chidato' qomle da' ỹátaqta 'au'amaqchíñii da' 'ami 'aneuáñiỹa'uo jen' ne'queténaxacpi so' Cristo, qaidi ỹátaqta 'ami saqachiilo da' 'antónaxaquii qomle 'aulói'ỹa da' li'ỹoxodic qomle ỹivíta da' n'iỹílaq jeso'me. 14Da' 'uootaxa 'ami qoỹisoueet'ape ỹasouaxat so' Cristo, qaa'le ỹátaqta 'ami madet'ape, qá'a jeso'me qaỹa 'te ga' 'ená'am da' li'ỹoxodic lepaqal ñi' Dios 'ami huetaavlo. Jen' siỹaxadipi ỹátaqta sa ỹodiáquenaac da' detaxaỹá'a so' Cristo, qaláxasa 'ami ỹátaqta 'avi'ỹoxodíñii jeso'me. 15Da' 'uo ga' 'oonolec da' 'oñíita da' 'uo da' ne'queténaxac, qaláxasa 'ena't qomle da' ỹasouaxat da' laataxanaxaic, 'uootaxa cacháxaic, 'uootaxa jega'me ỹ'étetac jen'me sa nó'inpi, qataxa tátapee'uo ga' sa lalémaxaset. 16Qaláxasa ga' 'uo da' ne'queténaxac ỹasouaxat da' quétapegue' so' Cristo, n'óota jega'me da' sa nepecoq. Na'chidáta da' ỹi'ỹoxoden ñi'me Dios, ỹasouaxat da' 'equegue so'me.
17Qá'a ma'le ỹivíta di' lalóqo' da' qoỹ'áuaxaachiiñi da' qonimit ñi' 'oonolec jen'me lec'oqtepi ñi' Dios. Da' qoỹ'áuaxaachiiñi da' senqáta, ¿jái'chogamaxa 'éeta qomle ga' loiquiaqa' jen'me sa ỹalaxaguet da' l'aqtac ñi' Dios? 18Qá'a jen'me n'óota da' lasoxoc da' ỹátaqta 'uo da' laqalaic da' qonec'alaxatéegue, ¿jái'chogamaxa hua'ague ga' 'éeta ga' lasoxoc jen' 'itaxalóxoicpi qataxa loicoló'olpi? 19Chan'eesa ga' mai'chi chiỹaqaỹi ñi' Dios da' 'uo qa'en da' ne'queténaxac, n'óota da' jega'me quet'ot da' ỹ'étetac ga' ỹiỹamqáchiiñi. Na'chidáta da' ỹip'axan'ot ñi' Dios da' l'óiỹaxac 'me mai'chi l'onatac, qá'a jiñi'me ỹátaqta ỹipaquetelégue ga' 'enaac.
Currently Selected:
1 Pedro 4: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
