Ipilipin 4

1 # 2 Kor 1:14; 1 Ses 2:19,20. Aso iinacanaka luminan, lukemuit da, akaiyalama ka akaboko da, kobwaata kwaŋin kicasito kotoma Ejakait, luminan, 2Eŋaiŋait Euodia, eŋaiŋait da Suntuke, koiaas kaomit adiopet, kotoma Ejakait. 3#Sab 69:28; Luk 10:20. Eebo, kelipit jo da, ekiŋariŋaret ajookot lokabeit, kiŋarak aŋor ŋun, nuetaaritos nenipe keoŋ toma Akiro Nukajokak, ka Kelement da, ka ikeswamak ice da lukaupaka, luejaas ikiroriakec toma oitabo loka aijar.

4 # Pil 3:1; 2 Kor 13:11. Kiyalamas kotoma Ejakait apaarasia kere; abala bobo ebe kiyalamas. 5#Bur 10:37; Yak 5:8,9. Kojenun akusiiyapaara kotuŋa kere. Eapie Ejakait. 6#Mat 6:25-34; Kol 4:2; 1 Pet 5:7; Sab 145:18; Yok 14:27. Siriyaloŋoŋoete akirot kere, konye kotoma akiro kere toma ailip ka aiŋaiŋa nepepe kaimal, kitejenut Edeke nuikotosi. 7#Kol 3:15. Ainapakin da naka Edeke naedeparit ajenun kere, kidarenenei itauonokus ka aomisiokus kotoma Kristo Yesu.

8 # Rom 12:17. Nuesalito iinacan, nueraas nukabeit kere, nuibusakinito kere, nuedolito kere, nukalaunak kere, nutemela kere, nuisupete kere, arai ejai ajokis kere, ido arai ejai aiturit, koomoomoete ŋun. 9#1 Ses 5:23; Rom 16:20; 1 Kor 14:33. Akiro da nuipotu kisisiata kamakaŋ, kodumutu da, kopuputu da, koanyutu da kamakaŋ, kiswamaenenete ŋun; ejaenena da Edeke loka ainapakin kayes.

10Konye eyalama noi kotoma Ejakait, naarai kwana atubor apak ekwarutu da akusiwomisio kanukaŋ, kwabo ipotu koomitos ŋun konye kemamei yes apak, 11#1 Tim 6:6. Mere ebe enera kanuka eipud; naarai abu kesisia adauna kwape ajaar kere. 12#2 Kor 6:10. Ajeni aitisilio, ajeni da alitoro; kaŋinikirot, ido kotoma akiro kere, ketuutooritai aiyeiyea naka aimonikin ka ariebo eteŋei da, alitoro ka aiŋonara da. 13#2 Kor 12:10; 2 Tim 4:17. Apedorit kere kotoma kaŋol kaloketogogoni.

14Konye ipotu kiswamata ejok naimorikikinotor kaiticaniokaŋ, 15#2 Kor 11:9. Ijenete yesi da Ipilipin ebe, kotoma ageunet naka Akiro Nukajokak, naanyounio koMakedonia, amamei ekanisa loemorikikina keoŋ kotoma akirot naka aikor ka aijaun, dimarai yes bonik, 16#Asw 17:1. naarai koSesalonika da ipotu kijukakis eoŋ irwan atipet ka nakiareit kanuka eipudika. 17#1 Kor 9:11. Mere naarai amoot ainakinet, konye amoot araito nuiyatanakinos otiaikus. 18#Any 29:18; Esk 20:41; Pil 2:25. Konye ajai kiboro kere, alitoro da; etekoro, kadau aijaun lukijukunete kama ka Epapurodito, aures naeuru maa, asubanit naecamunitai naitoiokit Edeke. 19Ekadeke da itekori luipudasi kere kwape ejaar akebar kotoma aibuses toma Kristo Yesu. 20Kojai aibuses mama ejai Edeke Papawok ikar ka ikar. Amen.

21Kiyogaete ŋinikalaunan kere kotoma Kristo Yesu. Kiyogaete yes iinacan luejaas keoŋ, 22#Pil 1:13. Kiyogaete yes lukalaunak kere, aitelekarit ŋul lukokal loka Kaisar.

23Asianut naka Ejakait Yesu Kristo kojai kimoyonokus.

Currently Selected:

Ipilipin 4: AOV1961

Highlight

Copy