Marako 12

1 # Mat 21:33-46; Luk 20:9-19. Kogeu einer kakes kawaragasia ebe, “Abu etuŋanan kira amana naka emusabibu, kirigak abwas, kobok aipany nacues, koduk aiteis, kititiŋ ikakoriok, kolot akwap ace. #Isa 5:1-2. 2Kedol apak kiyakia ebulesit mama ejaas ikakoriok, tetere edumuni araito nuka amana naka emusabibu kama ejaas ikakoriok. 3Kikamut ŋol, kibuŋata, kotwarata atitai. 4Kijuka bobo ecebulesit mamakec; kobelebelata, kisuruma ileic, 5Kijuka ece; koarata ŋes: ka ice da luipu; kibuŋata ice, ice da koarata. 6Aso kesalit bobo ediopet, okoku lominat: kiyakia ŋol da kawasia, kobala ebe, ‘Eyoŋete okokuka.’ 7Konye kineranakinos ikakoriok ŋul ebe, ‘Lo ŋes lokeruman; aso kaarata ŋes, koraun airum nawok.’ 8#Bur 13:12. Kikamut ŋes, koarata, kocakasi kiŋa kamana naka emusabibu. 9Aso ikonakini ai ejakait loka amana naka emusabibu? Ebuni emudiari ikakoriok ŋul, einakini ice amana naka emusabibu, 10#Sab 118:22. Mam kereka isiomito nuiwadikatai nu ebe,

‘Amoru nakeŋerete ikadukok,

Ŋin ŋes keponi kitaraunai amor nakapolon naka agor:

11Abuni akirot ŋin kama ejai Ejakait,

Erai nakaumokin kakonyenewok’?”

12Komoata aikamun ŋes; konye kokuriaka ekodet; naarai apotu komisiikis ebe enerakinit kes awaragan ŋin: kinyeis ŋes koloto.

13 # Mat 22:15-22; Luk 20:20-26. Kiyakiasi ice koParisayon ka luKerodian mamakeŋ, tetere elokete ŋes kakiro. #Mk 3:6. 14Nakedolokis, kotemasi atiar, “Ekesisianakinan, kijeni ebe irai ijo lokabeit, kwabo mam ipodo idiotuŋanan kere: naarai mam iseseni ejautene loka ituŋa, konye isisianakini erot loka Edeke kotoma abeit. Ibus kereka ainakin Kaisar esolo arai bo mam? 15Kiinakini, arai bo mam kiinakini?” Konye kojen ŋesi ekecesoswai, kotema kes atiar, “Kanukinyo kikoduniata eoŋ? Koinunai adenari, kaany.” 16Koinut. Kotema kes atiar, “Nakaŋai aput na ka nukiwadikatai?” Kotemasi atiar, “Nuka Kaisar.” 17#Rom 13:7. Koboŋok Yesu kotema kes atiar, “Kotacakis Kaisar nueraas nuka Kaisar, ka Edeke da nueraas nuka Edeke.” Koumokis noi jokan.

18 # Asw 23:8; Mat 22:23-33; Luk 20:27-38. Kopotu Isadukayon mamakeŋ, luebalas ebe emamei ajarun; kiŋita ŋes ebe, 19#Ikis 25:5; Age 38:8. “Ekesisianakinan, abu Musa kiwadikak sio ebe, Arai ketwana onace ketuŋanan, kinyek akeberu emamei ikoku, eyaŋaari onaceke akeberu, tetere edumakini onaceke aur. 20Kejaas iinacan ikanykaarei: komany losodit aberu, kotwana komam inyeinit aur; 21Kirum lokiareit ŋes, kotwana, komam inyeinit aur; ka lokiwuniet da kwape kwaŋin. 22Kiton lukanykaarei kere komam inyeinito aur. Kokaukec kere kotwana aberu da. 23Aso kotoma ajarun eraun ŋin aberu nakaŋai kama kaŋul? Naarai kerai aberu naka lukany kaarei kere.”

24Kotema Yesu kes atiar, “Mere akirot na ŋes ipaanariata yesi? Naarai mam ijenete nukiwadikatai, karaida apedor naka Edeke. 25Naarai naejaruniata kotoma okatwak, mam emanyete, karaida amanyio: konye eraas bala imalaikan toma akui, 26#Any 3:2,6; Mat 8:11; Luk 16:22. Konye nuka lukatwak ebe itajarunio; mam isiomito kotoma oitabo loka Musa kotoma owai loka Ekiot, kwape kelimokinia Edeke ŋes ebe, ‘Arai eoŋ Edeke loka Aburaam, Edeke loka Isaak, ka Edeke loka Yakob da’? 27Mam ŋes erai Edeke loka lukatwak, dimarai loka lukajarak; ipaarete noi.”

28 # Luk 10:25-28; Mat 22:34-40; Luk 20:39,40. Kobu ediopet kokewadikak, kiira kes iŋitanaros, kojenu ebe aboŋoki kotenan, kiŋit ŋes ebe, “Ani aicorakinet nasodit kakere?” #Luk 10:25-28. 29#Ikis 6:4-5. Koboŋok Yesu ebe, “Nasodit ŋes na ebe, ‘Kiira wu Isirael; Ejakait Ewokodeke, erai Ejakait ediopet. 30#Yok 15:12. Komina Ejakait Ekonideke kekonitau kere, ka akoniijar kere, ka akonicoa kere, ka akonigogoŋ kere.’ 31#Leb 19:18. Nakiareit da ŋes na ebe, ‘Komina ikoniidunyet kwape iminar bon.’ Emamei aicorakinet ace nakapolon aitelekarit nu.” 32#Ikis 4:35; 6:4. Kotema ekewadikan ŋes atiar, “Abeit, Ekesisianakinan, iner kotenan ebe erai ŋesi ediopet; kwabo emamei ece dimarai ŋes, 33#Kos 6:6; 1 Sam 15:22. Amina ŋes ketau kere, ka ajenun kere, ka agogoŋ kere, ka amina ikeidunyet kwape eminar bon, itelekarit noi ainakineta nuicweio kere ka asuban da.” 34#Asw 26:27-29. Nakeanyunia Yesu ebe aboŋoki kapirianut, kotema ŋes atiar, “Mam jo ilwana kajakanut naka Edeke.” Akaulo kaŋun amamei bobo yeniketitiŋikinit aiŋit ŋes akirot.

35 # Mat 22:41-46; Luk 20:41-44. Koboŋok Yesu, nakisisianakinia koyekalu, ebe, “Biai bo ebalatatar ikewadikak nuka Kristo ebe erai okoku loka Daudi? 36#Sab 110:1; 2 Sam 23:2; Yok 7:42. Abu Daudi elopet kiner kanuka Emoyo Lokalaunan ebe,

‘Abu Ejakait kotema Ekajakait ebe,

Kiboikin akanika nakoteten,

Aitodol neebwaikinia lukasurupokon kwap kakejenekon.’

37Daudi elopet enyarit ŋes Ejakait; aso keraun bo biai ikekoku?” Kopupokinite ekodet loapol kaiyalama,

38 # Mat 23:1-39; Luk 20:45-47. Kinera kaisisianakinike ebe, “Kocoito ikewadikak, luekotosi alosit konapito inapen lueojak, ka aiyogao kagwelanareta, 39ka iicoloŋo lukapolou katukosia, ka aiboisio nukapolou kopucin. 40Luecamete itogoi luka apuserun, luijoseete ebe ilipete nukaojak; edumunete ŋul atubokinio naitelekarit.”

41 # Luk 21:1-4. Kiboikin koseseni aiŋadis, koany kwape ecakanakinia ekodet apesan toma aiŋadis; luipu keraas ikabarak kocakanakis nuipu. #2 Ika 12:9. 42Kobu apuserut nakican kocakak ikapun iarei luerai apesa. 43Konyarau ikekesisiak, kotema kes atiar, “Abeit katemari yes atiar, acakaki apuserut ŋin nakican luipu adepar kere luecakanakinete aiŋadis, 44#2 Kor 8:12. Naarai acakakis ŋul kere kideikina luipu; konye ŋin kotoma ocanike acakaki lukejaatar kere, ŋes aijarake kere.”

Currently Selected:

Marako 12: AOV1961

Highlight

Copy