Luka 19

1Koloma Yeriko kitorite kidiŋike, 2Ido koany, kojai etuŋanan ekekiror Sakayo; korai eketeleman esolo lokapolon, kerai da ekabaran, 3Kemoot ŋol aanyun Yesu kerai loka epone enyoin, mam epedoro kanuka ekodet, naarai kewuriana ŋesi. 4Koker kiŋaren, kodoka kuju osukamin, tetere eanyuni; naarai itorunit orot ŋol. 5Nakedolio Yesu aibois ŋin, kosesen okitoi, kotema atiar, “Sakayo, kodoku atipet; naarai kebusakinit lolo aiboikin togokon.” 6Kodoku atipet, kisukunyik ŋes kaiyalama, 7#Luk 15:2. Nakeanyuniata ituŋa kirurumata kere, kobalas ebe, “Aloma aiboikin ketuŋanan lokadiakanaran.” 8#Any 22:1; Mar 5:6,7. Kobwo Sakayo, kotema ŋesi Ejakait atiar, “Koany, Ejakait, akorakini lukican atutubet naka ikaboro; arai da arodit ituŋanan idiobore, atacakini irwan aoŋon.” 9#Luk 13:16; Asw 3:25; 16:31. Kotema Yesu ŋes atiar, “Adolu lolo aitaiario togo lo, naarai erai ŋesi da okoku loka Aburaam. 10#Mat 18:11; Esk 34:16; Yok 3:17; Luk 5:32; 1 Tim 1:15. Naarai abu Okoku loka etuŋanan amoot ka aitajar yenikeoliorit.”

11 # Mat 25:14-30. Nakiirariata ŋun, kiyatak alimokin awaragan, naarai keapie ko Yerusalem, ido naarai komunosi ebe etakanuni ajakanut naka Edeke atipet. #Luk 24:21; Asw 1:6. 12#Mk 13:34. Aso kobala ebe, “Kojai etuŋanan lokapolon, kolot akwap naelwana, tetere edumuni ajakanut, kosodi konyet aboŋun, 13Konyarau itomon kobulesinike, koinak kes ŋinituŋanan arupian atomon, kotema kes atiar, ‘Aso kogwelanasi aitodol neaboŋunio.’ 14#Yok 1:11. Konye kolaata ŋes ituŋa lukoreke, kiyakiasi ikiyakia atupar ŋes, alimokin ebe, ‘Mam kikoto ŋol ayait sio.’ 15Kosodi kanen nakeboŋunio, kodumunite akejakanut, kicorak anyaraun ibulesin ŋul luainakinit arupian, tetere ejenuni ameda naadumut kanuka agwelanar. 16Kobu losodit akonyeneke, kobala ebe, ‘Ejakait, akonirupia emedau ace atomon.’ 17#Luk 16:10. Kotema ŋes atiar, ‘Iswama ejok, ijo ebulesit loejok! Naarai irai lomunot kakirot naedit noi, koyaŋa apolou naka ireria itomon.’ 18Kobu lokiareit da, kobala ebe, ‘Ejakait, akonirupia emedau ace akany.’ 19Kotema ŋes atiar, ‘Ijo da koyaŋa ireria ikany.’ 20Kobu ece da kobala ebe, ‘Ejakait, koany akonirupia na, naeŋadakinit ogoe. 21Naarai abu kakurianar jo, naarai irai loininik: ilemuni numam ibwaikinit, idwenyi da numam iyeit.’ 22Kotema ŋes atiar, ‘Katubokini jo kakiro nuka aitukukon, ijo ibulesit loerono! Ibu kojeni ebe aninik eoŋ, alemi numam ebwaikinit, adwenyi da numam ayeit. 23Aso kanukinyo mam kiinakinia akarupian mama ejaas ikagwelanarak, tetere neabunio kadum nepepe kamedakec?’ 24Kobala lukebwoete eapias ebe, ‘Kodemut arupia, koinakis je loka arupian atomon.’ 25Kotemasi ŋes atiar, ‘Ejakait, ejaas ŋes arupian atomon.’ 26#Mat 13:12; Mk 4:25; Luk 8:18. ‘Katemari yes atiar, yenejai ibore einakinio; konye yenemamei ibore, edemunio ŋin da yenejaas kaŋes. 27Bobo da ŋul lukasurupoka, lumam akotos eoŋ ayait kes, koyaut ne, koarata kakonyeneka.’ ”

28Nakedaunia einer ŋun, kiŋarenik kes adokar Yerusalem. 29#Mat 21:1-9; Mk 11:1-10; Yok 12:12-16. Kosodi kanen nakeapiki Betepage ka Betaniya, komoru loenyaritai loka Iseitunin, kijuka iarei kokesisiak, 30kobala ebe, “Koloto ore loisesenete; nailomariata toma idumunete ikoku yenika asigiria eenitai, yenimam lem ibwanenit idiotuŋanan: kolacut, koinut. 31Arai kiŋisi ituŋanan ebe, ‘Kanukinyo ilacariata?’ iboŋokinete ebe, ‘Ejakait ipuda ŋes.’ ” 32Koloto lukijukario kodumut kwape kelimokinitere. 33Napelacunete ikoku yenika asigiria, kobalas ikulepek ebe, “Kanukinyo ilacariata isigiria?” 34Koboŋokis ebe, “Ejakait ipuda ŋes.” 35Koyaŋaut mama ejai Yesu, kopetanakis isigiria ikecenapen, kisibwanenoto Yesu. 36#2 Ika 9:13. Napelosi, kopetanakis ikecenapen orot, 37Nakeapikinia aijesaret naka Emoru loka Iseitunin, kogeu ekodet kere loka ikesisiak ailel ka aiturit Edeke keporoto loepol kanuka aswamisio kere nukapedor nuaanyut. 38#Sab 118:26; Luk 2:14. Kobalas ebe, “Isirereŋitoi Ekabaka loebunit kokiror loka Ejakait! Ainapakin kotoma akuj, ka aibuses da kokuju kakui!” 39Ice koParisayon lukejaas toma okodet kotemasi ŋes atiar, “Ekesisianakinan, kitoron ikonikesisiak.” 40Koboŋok ebe, “Katemari yes atiar, Arai kililiŋata lu, iworoete do amor.”

41 # 2 Ika 8:11; Yok 11:35. Nakeapiki koany ere, komonyak, 42#Ikis 32:29; Mat 13:14; Yok 12:38. kobala ebe, “Arai kojeni ijo kapaaran kana akiro nukiinakinete ainapakin! Konye kwana ibwaitai kakonyenekon. 43Naarai epote apaarasia nukidukokiniata lukasurupokon itutio airigaunia, kiridakinete jo airiamar iwaitin kere, 44#Luk 21:6; Sab 137:9. kibirokinete jo kwap, ka ikonidwe kotomakon, komam kinyeiniata amoru naidokokino amoru nace; naarai mam ibu kojen apak naka aanyanariokon.”

45 # Mat 21:12-16; Mk 11:15-18; Yok 2:13-16. Koloma toma oyekalu kogeu aireŋear lukagwelanarak. 46#Isa 56:7; Yer 7:11. Kobala kes ebe, “Iwadikatai ebe, ‘Ekatogo eraun etogo lokilipet’; konye yes ituluosi abua naka ikaŋatak.”

47 # Luk 21:37; 22:53; Yok 18:20. Kisisianakini ŋinipaaran kotoma oyekalu, Konye komooto isasedotin lupeti ka ikewadikak ka ikapolok luka ituŋa amudiar ŋes; 48konye mam eanyuna nuepedorete aswam, naarai kokotos noi ituŋa kere akiirar ŋes.

Currently Selected:

Luka 19: AOV1961

Highlight

Copy