Yakob 5

1 # Luk 6:24. Aso ca yes ikabarak, komonyata kibwololoto kanuka ican lukiponikinete yes, 2#Mat 6:19. Abos abarakus, anyama ikajekel akusinapito. 3#Awa 16:27. Amasiki esabukus ka epuesakus, amasikinikec da eraun ajenanut mamakus, enyami awatekus kwape kakim. Ipotu kidiata iborokus luka akais nuipu toma apaarasia nukawasia. 4#Ikis 24:14-15; Leb 19:13; Mal 3:5; Isa 5:9; Yob 31:38-40. Koany, iworoi eropit loka ikeswamak luasakata imanikoriakus, loimikitos yesi; aloma aimony naka ikadwenyak aki nuka Ejakait loka ajoresio. 5#Luk 16:19,25; Yer 12:3. Ipotu kisiyalamikinos kakwap, kominakinito aboliasio; kitutumata ikusitauon kotoma apaaran naka aario. 6Ipotu kitetelekasi akiro ekadoliton, koarata da; mam ŋes itepega yesi.

7 # Ikis 11:14; Yok 2:23; Sek 10:1; Yer 5:24; Luk 21:19; Bur 10:36. Aso iinacan, kotitiŋonokinete, kiton abunore naka Ejakait. Koany, idarit ekakorion araito nuka akwap nuketiai loepol, etitiŋikinit kes kiton ainakinio akiru naka aiporo ka naka akamu da. 8#Bur 10:25; 1 Ses 2:16; 3:13. Kotitiŋonokinete yesi da, kiticata itauonokus, naarai eapie abunore naka Ejakait. 9Iinacan, siriŋuurianakinos, kinyeis atubokinio; koany, ebwoi ekatubon kokek. 10#Mat 5:12. Iinacan, koyaŋaasi inabin araut aanyunet naka aiticanio ka atitiŋikin, luapotu kinerasi kokiror loka Ejakait. 11#Yob 1:21-22; 2:10; Sab 103:8; 111:4; Dan 12:12. Koany, kinyarit luetitiŋikinete luisirereŋitoi. Ipotu kiirasi nuka atitiŋikin naka Yob, ido ipotu koanyut kwape kiswamakinia Ejakait ŋes kawasia, kwape eraar Ejakait lokasianut naepol ka aitim.

12 # Mat 5:34-37. Konye nuitelekarito kere, ikainacan, siriyapoenenete, karaida alimit akuj, karaida akwap, karaida aiyaposit ace kere, konye akusikirot, “eebo,” korai eebo, ka “mam” da korai mam, kinyeis aibirokin atubokinio.

13 # Sab 50:15; Kol 3:16. Ejai kereka yeniticanio kotomakus? Kilip. Ejai bo yenelakara? Koye nukaiturit. 14#Mk 6:13. Ejai kereka yenedeka kotomakus? Konyarau imakio luka ekanisa, kilipakis ŋes, kinyonyoikis akinyet kokiror loka Ejakait; 15#Mk 16:18. ailip da nakaiyuun itajari ikadekan, itonyouni da Ejakait ŋes; arai da kiswamat nukadiakanar, isionio ŋes. 16Aso kolimonokinos akusidiakanareta bonik ka bonik, kilipanakinos da, tetere iŋaleunete. Ailip naka ikadoliton epedori noi aswam, 17#1 Ika 17:1; 18:1; Luk 4:25; Asw 14:15. Kerai Eliya etuŋanan lokepone kwape kalowok, kilip noi kinye akiru aitep, ido mam abu kotepak akwap adaun ikar iuni ka ilapio ikanykape. 18#1 Ika 18:42-45. Kosodi kilip bobo, koinak da akuj akim, kora akwap araitoke.

19 # Gal 6:1. Ikainacan, arai kepaa idio kayesi ainyein abeit, kosodi idiopet ainyakun ŋes, 20#Awa 10:12; 1 Pet 4:8; Sab 51:13. kitejenut ŋes ebe yeninyakuni ikadiakanaran kotoma apaar naka erotoke, itajari akeijar kotoma atwanare, erapari da adiakanareta nukepuak.

Currently Selected:

Yakob 5: AOV1961

Highlight

Copy