Aswamisio 15

1 # Leb 12:3; Gal 5:2. Konye kijesunos icetuŋa anyoun koYudaya, kisisianakis iinacan ebe, “Arai mam kikepio kwape ejaar epone loka Musa, mam ipedorete aitajario.” 2#Asw 11:30; Gal 2:1. Kosodi kedaut Paul ka Baranaba epeget kituŋa kaŋul ka aibakibak noi, kicorakis iinacan Paul ka Baranaba ka ice kakesi adokar Yerusalem mama ejaas ikiyakia ka imakio kanuka akirot kaŋin. 3Aso kotwar ekanisa kes kitoro akwapin nuko Poinike ka Samaria, itatamete aibelokin naka Imo, kisiyalamikis noi iinacan, 4#Asw 14:27. Nakedolioto Yerusalem, kisukunyik ekanisa, ka ikiyakia ka imakio, kitejenut akiro kere nukiswamai Edeke nepepe kakes. 5Konye konyout lukiyuunito ice lukorioŋet loka Iparisayon, kobalas ebe, “Ibusakinit aikep kes, ka aicorakin da airic ikisila luka Musa.”

6Kotukokinos ikiyakia ka imakio tetere eomoomoete akirot ŋin, 7#Asw 10:1-43; 11:15. Kedaut aibakibak noi, kobwo Petero kotema kes atiar, “Iinacan, ijenete ebe kapaarasia nugeet, abu Edeke koseu kokidiŋikus, tetere iirarete Imo akirot naka Akiro Nukajokak kaitukuka, kiyuut. 8#Asw 2:4; 10:44. Edeke da loejeni itauon luka ituŋa kitejenik kes, koinak Emoyo Lokalaunan kwape kiinakinia oni; 9#Asw 10:34. kwabo mam etiakit oni ka kes, konye itesegaari itauonokec kaiyuun. 10#Gal 3:10; 5:1; Mat 11:30. Aso kanukinyo ikoduniata Edeke kanuka aibwaikin aiookot omurisiŋa luka ikesisiak, namam lukapapaawok karaida oni kipedorit airioŋ? 11#Gal 2:16; Pes 2:4-10. Konye kiyuunit ebe kitajario kanuka asianut naka Ejakait Yesu, kwape kakesi.”

12Kosodi kililiŋ atukot kere; kopupokis Baranaba ka Paul itatamete aanyuneta ka nukaumokin nukiswamai Edeke kotomakec komo, 13#Asw 21:18; Gal 2:9. Nakedauniata aililiŋ koboŋok Yakob ebe, “Iinacan, kiirarai. 14#Asw 15:7-9; Luk 1:68. Kitejenu oni Simeon kwape kisiaunia Edeke aanyanar Imo, alemun kotomakec ituŋa kanuka ekekiror. 15#Amo 9:11,12. Ecamanara nu kakiro nuka inabin, kwape iwadikatere ebe,

16 # Amo 9:11-12; Yer 12:15. ‘Akaulo kaŋun aboŋuni,

Aduki bobo ewema loka Daudi lokibiror;

Aduki bobo amejeke,

Eticasi ŋes,

17Tetere luesalito luka ituŋa emoete Ejakait,

Ka Imo kere luenyaritai ekakiror,

18 # Isa 45:21. Ebala Ejakait nu, loitejenunit akiro nu ameun apeŋo.’

19Kanuka ŋun atubi eoŋ kwanata ebe, Mam kiticani ŋul luibelokinos mama ejai Edeke kotoma Imo, 20#Any 34:15-17; Leb 3:17; 5:2; 17:10-16; 18:6-23; Age 9:4. konye kewadikakisi kes kinaca nuesiliaka nuka aputosia, ka adoteu, ka itiaŋ luemiedio ka aokot. 21#Asw 13:15. Naarai ameun katurio nupeŋo ajaas lualimonokinete akiro nuka Musa kaŋolire, naarai esiomio ŋinisabato kotoma atukosia.”

22Kosodete kitojoka ikiyakia ka imakio ka ekanisa kere, aseun ituŋa lukotomakec, aiyakiar Antiokia nepepe ka Paul ka Baranaba; kes luta, Yuda loenyaritai Barasaba, ka Sila, lukeraas ikeŋarenikinok koinacan: 23kiwadikata kwanata kijukasi kakaninikec ebe: “Iinacan ikiyakia ka imakio mama ejaas iinacan lueraas Imo kotoma Antiokia ka Suria ka Kilikia, ayogan, 24#Asw 15:1. Naarai kipupu ebe ituŋa ice lukepote kamakosi kiticanata yes kakirokec, isibuonokinete itauonokus, numam sio kicorakinit, 25kitojok sio, kemorikikina ketau ediopet, aseun ituŋa aiyakuun mama ijaas nepepe ka Baranaba ka Paul luminanawok, 26ituŋa luijaikinito aijarakec kanuka ekiror loka Ejakaitiwok Yesu Kristo, 27aso kijuku Yuda ka Sila, lukilimokinete akiro nupenu kaitukekec. 28#Mat 23:4. Naarai itojokit Emoyo Lokalaunan ka sio da kenyeis aisibwok yes abwokon naitelekarit akiro nu nuibusakinito: 29Kes nuta ebe, Kinaca iboro lueinakinio aputosia araut asuban, ka aokot, ka itiaŋ luemiedio, ka adoteu da. Arai kitikokinos kaŋun, iswamaete ejok, Yoga do,”

30Kosodi ketwar, kijesaros Antiokia; kotukokis ekodet kere, koinakis ebalua. 31Nakesiomiata, kiyalamikinos kanuka aitalakario kaŋin, 32#Asw 11:27; 13:1. Yuda ka Sila da, lukeraas inabin, kitalakasi iinacan kakiro nuipu, kitogogoŋo kes. 33Kosalakis ŋina adaun apak, kotwara kes iinacan aboŋor kainapakin mama ejaas lukiyakuunete. [34Konye kitojok Sila asalakin nen.] 35Konye kosalakis Paul ka Baranaba Antiokia, isisianakinete ka alimonokin akirot naka Ejakait, nepepe ka icetuŋa da luipu.

36 # 1 Ses 3:5. Ketuboros apaarasia adis, kotema Paul Baranaba atiar, “Aso kabonosi kwana kaanyanasi iinacan kaŋolire nekiilimonokinit akirot naka Ejakait, kaanyutu kwape ejaatar.” 37#Asw 12:12,25. Kokoto Baranaba ayaŋaar Yokana loenyaritai Marako aupar kakes, 38#Asw 13:13; Kol 4:10. Konye mam kitojokit Paul ayaŋaar ŋol lokinyeini kes koPampulia, komam elosete kakes aswam. 39#Asw 4:36; 13:4. Kosodi kojau epeget loepol kidiŋikec kiton neatiakatar, koyaŋa Baranaba Marako kikwaŋaros Kupuro, 40konye Paul koseu Sila konyou, ilipakinete iinacan tetere einakinio asianut naka Ejakait. 41Kitor Suria ka Kilikia, itogogoŋi ikanisan.

Currently Selected:

Aswamisio 15: AOV1961

Highlight

Copy