Aswamisio 10

1 # Mat 8:5; Asw 27:1. Kojai etuŋanan koKaisarea ekekiror Korunelio, ekapolokiton loka erioŋet loenyaritai Italian, 2etuŋanan loeyoŋit Edeke, nepepe ka lukokaleke kere, lokekorenenei nukaitim nuipu otuŋa, ka ailipenen da Edeke tir. 3#Asw 3:1. Kosawa lokikanyetekaoŋon loka apaaran koany kaitapoet kaitebeikin emalaika loka Edeke ebunit neejai ŋesi, lokinera ebe, “Korunelio.” 4Kosesen noi, kokurianar, kobala ebe, “Anyoika, Ejakait?” Kotema ŋes atiar, “Adokasi ailipikon ka aikorokon araun aisitunet akonyen nuka Edeke. 5Aso kwana kiyakia ituŋa Yopa, konyarau Simon loenyaritai Petero: 6#Asw 9:43. Ipejokinit ŋesi Simon, ekekisikisan imukulen, loejai eketogo ariri kaŋolol.” 7Nakelosio emalaika loeneras kaŋes, konyarau iarei kokejaanakinakake lukotogo, ka eserikalet ediopet loeyoŋit Edeke kotoma kaŋul kalukijaanakinete ŋes tiritir; 8nakedaunia aitatamikin akiro kere, kijuka kes Yopa.

9Kapaaran naatupakini, nakelosioto, ka aapikin ere, kodoka Petero kuju oswi loketogo ailip, kosawan ikanykape luka paaran. 10Korieb noi eteŋei, kokoto ainyam: konye napitemonokinio, kogelakin ekemoyo, 11#Asw 11:5-17. koany akuj eŋaara, ka ibore yenejesunitai, bala aisuka naepol, ijoliliunitoi kwap kowaitin iwoŋon, 12Nakejaas iponesio kere luka itiaŋ, ka lueliatos kakwap, ka ikweny luka apak, 13Kobu eporoto ebe, “Petero, konyou; koar, konyam.” 14#Esk 4:14; Leb 11:1-47. Konye kotema Petero atiar, “Mam cut, Ejakait; naarai mam anyamenenei ibore yeniketal, karaida yenimam elai.” 15#Mat 15:11; Mk 7:15,19. Kobu eporoto irwan nakiareit ebe, “Luitalaunit Edeke, sirikinyara ijo luketal.” 16Kiswama akirot ŋin irwan auni, atipet kinyakarai ibore ii toma akuj.

17Napebuonokin Petero kotauke apolou naka aitapoet naanyunit, koany, kobwoete ituŋa lukiyakuunit Korunelio kokek, kedaut aiŋitun etogo loka Simon, 18Konyarata kiŋita arai ipejot Simon loenyaritai Petero nen. 19#Asw 13:2; 15:28. Napeomoomoi Petero aitapoet, kotema Emoyo ŋes atiar, “Koany, ejaas ituŋa iuni lukimooto jo. 20Aso konyou, kijesar kwap, koupakinos kakes komam ibuonokin; naarai eoŋ ejukunit kes.” 21Kijesun Petero mama ejaas ituŋa, kobala ebe, “Eoŋ lo lokimooto; iponitos kanuka akiro anyoika?” 22Kotemasi atiar, “Korunelio, ekapolokiton, etuŋanan loedolit Ioeyoŋit Edeke, loitojokitai kotoma ateker kere naka Iyudayan, abu emalaika lokalaunan kikwenya ŋes anyaraun jo alosit togoke, tetere iirari akiro kamakon.” 23#Asw 11:12. Kisukunyik kes araut ikepejok.

Kapaaran naatupakini konyou kolot kakes, koupakinos da ice koinacan luko Yopa kaŋes. 24Kapaaran naatupakini kolomasi Kaisarea. Kidaret kes Korunelio, kotukokinite lukajenake ka ikepadic da. 25Napelomari Petero, kisiriam Korunelio ŋes, kibirokin akejeke, koma ŋes. 26#Asw 14:15; Apu 19:10. Konye Petero kitonyou ŋes, kobala ebe, “Kobwo; arai eoŋ da etuŋanan.” 27Napinera, koloma kodum ituŋa luipu etukokina; 28kotema kes atiar, “Ijenete yesi ikulepek kwape eraar naketal Eyudayat aimorikikina arai aipejokin etuŋanan kere loka ateker ace; konye abu Edeke ketodik eoŋ ebe mam ebusakinit anyara idiotuŋanan yeniketal arai yenimam elai. 29Kanuka ŋun nakanyaraunere, abu komam aŋeri, Aso keŋisit anyoin akirot nakinyaritotor eoŋ.”

30Kotema Korunelio atiar, “Eraas apaarasia aoŋon atuboros, kwape esawa lo, abu karicite esawa lokikanyetekaoŋon loka ailip kotogoka; ido koany, kobwo etuŋanan kakonyeneka enapit luimiliasi, 31kabala ebe, ‘Korunelio, eirar akoniilip, akoniikor da eitun kakonyen nuka Edeke. 32Aso kiyakia ituŋa Yopa, konyarau Simon loenyaritai Petero; ipejokinit ŋesi togo loka Simon, ekekisikisan imukulen, kariri naka aŋolol.’ 33Aso abu kanyarau jo atipet, iswama ejok abunore. Aso kwana kija ne kere akonyen nuka Edeke, keirasi kere nukicorakinit Ejakait jo.”

34 # Ikis 10:17; 1 Sam 16:7; Rom 2:11. Kosodi kooŋ Petero akeituk, kotema atiar, “Abeit ajenu ebe mam Edeke etiakatiakai ituŋa, 35#Yok 9:31; 10:16. konye kotoma ŋiniteker yeneyoŋit, kiswama da nuedolito, ecamuni ŋesi. 36#Sab 107:20; 147:18; Isa 52:7; Nak 1:15; Mat 28:18. Akirot nakijukakini idwe luka Isirael, elimonokini akiro nukajokak nuka ainapakin kotoma Yesu Kristo, (ŋes Ejakait loka kere,) 37#Mat 4:12-17. ijenete yesi akirot naalimoritai anatar Yudaya kere, ageun koGalilaya, akaulo ka aibatisa naalimonokini Yokana; 38#Isa 61:1; Mat 3:16. Kwape kinyonyoikinia Edeke Yesu loko Nasaret akinyet naka Emoyo Lokalaunan ka apedor; lokelosenenei iswamai nuejok, itaŋaleununei kere lukiticani Satan, naarai kejai Edeke nenipe kaŋes. 39#Ikis 21:22. Kirai isio ikajenak luka akiro kere nukiswamai ŋesi kakwap naka Iyudayan, koYerusalem da; koarata ŋol kaikajakin okitoi, 40#1 Kor 15:4-7. Abu Edeke kitajaru ŋes kapaaran nakiwuniet, koinak ŋes aitodiario; 41#Yok 14:19,22; 15:27; Asw 1:4. mere kotuŋa kere, konye mamakosi luabu Edeke koseu sek araut ikajenak, lukinyami ka aimat da nepepe kaŋes kedau ajarun kokatwak, 42#Asw 17:31; Rom 14:9,10; 1 Pet 4:5; 2 Tim 4:1. Kicorak sio kalimonokis ituŋa, ka aiteienun da ebe ŋol ŋes lekedakakini Edeke araut ekatubon loka ikajarak ka ikatwak da. 43#Isa 33:24; 53:5,6; Yer 31:34; Esk 34:16; Dan 9:24. Ŋol ŋes itejenunitos inabin kere ebe kanuka ekekiror ŋinituŋanan yeniyuuni ŋes edumuni aisionio naka adiakanareta.”

44Naperiŋa Petero inera ŋun, kodoik Emoyo Lokalaunan kere lukiirarete akirot. 45Koumokis lukiyuunito lukekepitai lukeupunos ka Petero, naarai abukokin Imo da ainakinet naka Emoyo Lokalaunan. 46#Asw 2:4; 19:6; Mk 16:17. Naarai kiirasi kes ineras kaŋajepa ka aitopoloor Edeke. Kosodi Koboŋok Petero ebe, 47“Epedori kereka ituŋanan aisimik akipi nuka aibatis ituŋa lu, luainakin Emoyo Lokalaunan kwape kaoni?” 48#Yok 4:40. Kicorak kes aibatisao kokiror loka Yesu Kristo. Kosodete kilipata ŋes asalakin apaarasia nuipupuuto.

Currently Selected:

Aswamisio 10: AOV1961

Highlight

Copy