Luqaassa 14

Qassekka Yesussay issi hargancha sanbbata gallas pathides

1Issi gallas Yesussay quma maanaas Farsawista halaqatape issa so gelida wode asay wuri Yesussa ay oothanakonne gidi ayfe iza bolla tooki xellides. 2Heenka asatethay izas purin wayetiza issi assi iza sinthan dees. 3Yesussaykka Muse woga erizaytanne Farsawista saketizadde sanbbata gallas pathanaas koshize koshennee? gidi oychchides.

4Istika co7u gida izikka addezza bochchiddi pathi yeddides. 5Qassekka intefe issi asas sanbbata wode nay woykko booray kundidi olan geliko eeson heeraka kesonta uray oone? gides.

6Istika oychas aykko zaroka demmnaas dand7ibeyitenna

Bena ziq histethinne imatha moko

7Xeygetida asati uttanaas boncho so koyishin Yesussay beyidi leemuso istas hiz gidi yoottides. 8Issi assi nena sarges xeysiko boncho son utofa, nepe bollara bonchetizaddey xeysetiko 9Intena nam77antaka xeysidaddey yiidi ne utidasoza hayssaddes yeda gaana, nenika yelatashe ziqaso banddassa. 10Gido attin xeysetida wode ziqaso xellada utta, nena xegidaddey yiidi ta lagge haaya dhoqason utta gaandes, nenika he wode nenara maaddan utida asa wurso sinthan bonchetana. 11Ays giiko bena dhoqqu histizaddey wuri ziq gaana bena ziq histizaddey wuri dhoqqu gaana.

12Yesussaykka xeygidaddeza hiz gides quma woykko ka7o muzanas xeysiko neysatho nena xeysidi muzonta mala ne laggeta woykko ne ishata, ne dabota, woykko durista woykko dure guttata xegopa 13Gido attin asa xeysada muzana koyko manqota, kushey toy bayndda wobistane qooqeta xeysa neni anjetana. 14Xeysetidayti kushe zaranaas danda7onta gish xillota dentha wode nees kushey zaretana.

Wogga diggisa leemusoteth

15Maaddan Yesussara issife utidaytape issay hayssa siyidi Xoossa kawotethan shiiqidi maaddafe miza uray anjetidadde gides.

16Yesussaykka hizgides issi assi wolqama diggisa giigisidi daro assi xeygides.

17Diggissa maana wodeyka gakin xeygetida imathata wurikka giigida gish ha yite gidi xegana mala ba ashkkara yeddides. 18Gido attin wurikka beso hara gaaso shiishidi isoy ha7i gade shamadis baada beyanas besses hachsi tana lancofa gides.

19Hankoysika tani ichachu waxa boora shamadis izista paaca xellana gish hach tana lancofa gides.

20Qasse hara asaykka tani buro miishratethan days baannaas danda7ikke gides.

21Oothanchayka kitetida soope simmidi hezati gidayssa ba Godas yoottides. he wodeka diggisa giigisidays hanqetidi oothancha hizgides, elella oydu oge kezada manqota, kusheynne toy bayndda wobista qomaxatanne ayfey bayndda qooqeta ha geltha gides.

22Oothanchayka zaaridi ta Godo ne tana azazidaysa wursa poladis burokka utetha soy dees gides.

23Godazikka oothanchaza gede oydu oge keza ta keeth kumana mala pudene dugenne aadhdhizaytta wolqara geltha. 24Tani tuma gays diggisa maana xeysetidaytape issi urayka duunan gelthenna gides.

Yesussa kaaloy bena yarsho koyees

25Daro derey izara issife bizayssa beyidi guye simmida Yesussay hizgides. 26Taako yizay wuri ba aawanne ba, ba machchonne nayta, ba ishatanne michchista ba duus gidiin ixonta agikko tana kaallizadde gidanas danda7enna. 27Be masqale tookidi tana kaalontay tana kaallizadde gidanas danda7enna.

28Inte issi assi keethe keexanas koyko polanaas danda7anakkonne danda7ontako koyrotidi ba bira qopontay oone? 29Keetha keexana doomidi wursanaas hanonta ixxiko beydda assi wuri iza bolla miicana. 30Istika hizgana haysi addezzi keeth oykides shin polibeyna.

31Woykko issi kawoy hara kawora olistana giigiidi nam77u tamu shi asa assi ekki yiza kawo zaranaas tamu shi ola asara zaranakonne uttidi qopontay oone? 32Ola zaranaas danda7ettontta milatida bettikko buro hahon dishin maqaynanas gaana yedes. 33Izaka mala inte oonikka gidiin bees dizaysa aggontay oonikka tana kaallizadde gidanas danda7enna.

Go7onta maxine leemuso

34Maxiney lo7oshin maxiney mal7onta ixxiko go7ena, 35Gadeni yegin gidonta gish co kare wora yegetes siyiza haythi diza assi siyo.

Currently Selected:

Luqaassa 14: GGMNT

Highlight

Copy