Taitus 1

Lakula bîla

1Yang Pal, Gâd dukia dadaukra, Jisas Kraist apastilka sna, ba mita naha bîla ulbisna. Yang na witin mita ai blikan sa, Gâd mita bâk saki brin uplika nani kasak lukanka lâka ba hilp munaia; bara witin nani ba sin, Gâd ra luki kaia tânka kasak ba kakaira taki banhbia dukiara, 2bara raya ban kaia lâka yawan wan kainara briaia bîla kaiki ba sin tânka bribia. Gâd, witin kunin aisaras ba mita, naha rayaka na pramis wan munan, kau tasba na tâ krikras kaina wina; 3bara nanara, ai piua pali ba kat, baha ba latan wan marikan sa, ai bîla blikan ba bâk. Baha ba yang mihti ra mangkan sa, bara Gâd wan Sasakra adarka mita yang aisi smalkri. 4Taitus, kasak lukan lâka ban bri ba tânka ra luhpi aihwa sma ba, naha wauhkataya mai ulbisni.#2 Ko 8.23; Gal 2.3; 2 Ti 4.10. Gâd wan Aisa bara Dawan Jisas Kraist wan Sasakra wal mita man ra yamnika maikbia, bara kupia kumi lâka sin.

Creta ra Taitus wark daukan ba

5Yang Creta kîka dakura ra mai swiri, diara nani kau wapnika mangkaia kan ba man mita daukma wisi; bara tawan bani ra sin serts almukka nani mangkaia, kupiam krauki dîa daukaia mai wîri ba tânka kat. 6Serts almukka kum ba, pât kumi sin âpu kaia sa; witin ai maya mairin kumi baman bri kaia sa, bara ai luhpia nani ba lalukra nani kaia sa; baha nani nina ra, saura yan sturka bara upla bîla sip wali daukras sturka sin âpu kaia sa. 7Kan ani uplika pura kakaira warkka bri ba, witin lika Gâd warkka nani ba ai mihta ra brisa, bara baha mita witin pât kumi sin âpu kaia sa. Witin ba lal karna kaia apia sa, daukanka saura bri uplika kaia apia sa; bla tatakra kaia apia, unsasabra sin apia, saurka lâka wina lalah alkaia apia. 8Sakuna, piu bani upla wala nani ai watla ra briaia wilin kaia sa; diara yamni dauki uplika kaia sa, ai sinska pain bri kaia, kasakkira, holikira bara ai kupia alki takaski kaia. 9Sturi kasakkira witin ra smalkan ba kat, ban alki bri kaia sa, bara baku mika upla wala nani ra smalkanka pain yabi, witin sip kabia tâ baikaia, bara baha smalkanka mapara nani ba sin kupia alkaia.#1 Ti 3.2-7.

10Kan sip ai kupia alki takaskras uplika ailal bâra sa, bara kau pali Ju nani, kristian takan nani ba tilara, bara witin nani diara bahki nani baman aisi, upla nani ra kunin muni taukisa. 11Baha nani bîla ba prakaia sa, kan witin nani mita diara smalkaia apia ba smalki, watla bîla aiska nani kupia aihka lakisa; ai swira sin âpu lalah nahki briaia dukiara baman luki banhwisa.

12Sim Creta kîka dakura wina prapit kum bui sika ai tahkia nani ra naku aisin: “Creta uplika nani ba, ban kuninkira nani sa, daiwan kraskira nani, bîla maihsira nani bara sringwaskira nani sin.” 13Bara witin diara kasak ba kat aisan. Ba mita sika man mita baha nani ra karna pali lawi dauks, bara baku lika witin nani ba kasak lukan lâka mapa ra yamni nani kabia; 14bara Ju nani kisi sturka nani aisi nani ba, bîla walbiara, kasak lâka ra bahki kulki uplika nani lâ nani yabi ba sin alki bribiara.

15Ani uplika nani ai sinska klin bri ba mapa ra, diara sut ba klin sa; sakuna kasak lukras uplika nani bara ai sinska sin klin briras ba mapa ra lika, diara kumi sin klin âpu sa, kan witin nani sinska ba bara ai kupia dara walra ba sin tâski baman sa. 16Witin nani bila Gâd ra kakaira nani wisa, sakuna ai daukanka nani ba ni lika apia wisa. Witin nani ba uya saura pali baman sa, sip bawras uplika nani bara wark yamni kumi sin daukaia aitani apia banhwisa.

Currently Selected:

Taitus 1: MSKTU

Highlight

Copy