Mark 12

Wark tatakra saura nani maprika lilka ba

(Mt 21.33-46; Lk 20.9-19)

1Bamna Jisas witin nani ra maprika bîla nani ni mahka smalkan, bara naku aisin: “Waitna kum kan, witin ai nasla ra wain dusa mangkan;#Ais 5.1-2. bara kir klar kutban, wain laya taibi sakaia pliska kum daukan bara tawer kum bukan, diara sut ba pain aihwakbia wisi. Ningkara, nasla ba wark tatakra nani mihta ra mangki si, witin kuntri wala ra impakan. 2Dâkaia piua aimakan ra, alba kum warkka tatakra nani ra blikan dîa dâkbia ba wina, witin ra yabia dukiara. 3Sakuna witin nani mita alba ba alki prukan, bara mahka blikan wan diara sin yaras pali. 4Bara insla dawanka ba alba wala kum blikan, sakuna naha ra lika walpa ni sabi, lal ra pruki baiki, saura pali munan. 5Bara kli insla dawanka ba wala kum blikan; naha ra lika witin nani bui ikan. Baha ningkara kau ailal blikan, kuna tila prukan, tila ikan.

6“Kau kumi baman takaskan kan: ai luhpia waitna aihwa ba, baha ra latwan pali kata. Baha blikan ban luki: ‘Witin nani bui luhpi ra kulkbia.’ 7Sakuna wark tatakra nani ai mânka naku aisin: ‘Naha sika diara nani na dawanka kabia; bamna kaisa witin na ikaia, bara diara nani ba yawan dawanka takaia.’ 8Bamna witin ra alki ikan, bara wîna tara ba nasla wina sakan.”

9Bara Jisas makabi walan: “¿Bara dîa lukisma man nani daukbia wain nasla dawanka ba? Witin bal baha wark tatakra nani sut ikbia, bara nasla ba upla wala nani ra yabia.

10“¿Man nani Ulbanka ra aisi kaikras katma ki? Naku wisa:

‘Utla mâmakra nani mita bahki kulkan walpaya ba,

naha walpaya na tâura bapan walpaya takan.

11Naha na Dawan mita daukan sa,

bara wan nakra ra diara aihka pali sa.’ ”#Law 118.22-23.

12Bara witin nani trai kaikan Jisas ra alkaia, kan witin nani kaikan naha maprika lilka aisin na, witin nani mapara aisin. Sakuna upla nani ra sibri kan bamna, witin ra swi si, mahka wan.

Lal mana aibapaia tânka ba

(Mt 22.15-22; Lk 20.20-26)

13Bara witin nani mita Jisas ra, parisi nani, bara Herod uplika nani sin blikan, yaka dîa pana aisabia bara dahra kwahkaia dukiara. 14Baha nani bal witin ra win:

—Smasmalkra, yang nani kaikisna man lika diara kasak ba kat aisisma, upla dîa aisi ba man kulkras, kan man upla nani mawan ba kulkras, sakuna Gâd yabalka ba kasak tânka kat smalkisma. ¿Rom wihtka tara ra lal mana aibapaia ba lâ sa ki, apia kaka, lâ apia? ¿Yang nani lal mana aibapaia sna, apia kaka aibapaia apia sna ki?

15Sakuna Jisas baha nani kuninka ba kaiki kan, bara witin nani ra naku win:

—¿Dîa kan man nani traiki kaikisma? Lalah mâ kum sal aik yang kaikaia.

16Witin nani sal yaban, bara Jisas baha ra kaiki, witin nani ra makabi walan:

—¿Naha mawan lilka na, ya dukia, bara nahara nina ulban na ya nina sa?

Witin nani pana win:

—Rom wihtka dukia sa.

17Bara Jisas witin nani ra win:

—Man nani Rom wihtka ra yas, dîa Rom wihtka dukia ba, bara dîa Gâd dukia ba, Gâd ra yas.

Bara aisin ba dukiara, tâ iwan.

Pruan wina kli buaia dukiara makabi walanka ba

(Mt 22.23-33; Lk 20.27-40)

18Bara sadiusi tila nani Jisas ra kaikaia wan. Naha nani bila pruan nani ba sip bubia apia wisa.#Ap St 23.8. Bara naha dukiara Jisas ra naku makabi walan:

19—Smasmalkra, Moses naku ulbi wan win: Waitna kum ai maya wal luhpa sakras ban prubia kaka, muihnika ba bui ai piarkika ba briaia sa, bara witin wal ai luhpia sakaia sa ai muihni pruan ba watlika ra.#Kli S 25.5. 20Waitna 7 bâra kan, sut ai muihni atia. Kau almukka ba mairin kum brin, bara luhpa âpu ban pruan. 21Bara witin ningkika bui ai piarkika ba brin, bara baha sin luhpa sakras ban pruan; ningkara witin ningkika ba sin baku takan. 22Bara baku man 7 ba sut witin wal brin, sakuna kumi sin luhpa sakras. Sut pruan ningkara, mairin ba sin pruan. 23Bamna raiti wina bui kli raya taki banhbia piua ra, ¿ani pali ba mairka maya waitna kabia, kan 7 ba sut witin wal marit takan bamna?

24Bara Jisas witin nani ra win:

—Man nani mamwahkisma, man nani ulbanka nani tânka briras sma bamna, Gâd karnika ba sin kaikras sma ba mita. 25Pruan nani ba bubia ba ra, witin nani marit takbia apia, kan witin nani lika insal nani kasbrika purara ba baku kabia. 26Sakuna pruan nani buaia ba dukiara, ¿man nani Moses wauhkataya ra aisi kaikram ki, nahki witin ra kiaya dusa klauhi kan wina aisin ba baku? Witin ra naku win: ‘Yang sika Ebraham, Aisak, Jekob Gâdka.’#Imp St 3.6. 27¡Gâd lika pruan nani Gâdka apia sa, sakuna raya nani Gâdka sa! Baku bamna, man nani lika uba mamwahki banhram sa.

Gâd lâka kau tara ba

(Mt 22.34-40)

28Bara Lâ Smasmalkra kum balan witin baha nani wal blahwi kan ba walan. Witin kaikan Jisas baha nani ra pain aisin kan, bamna witin ra makabi walan:

—¿Lâ sut wina, ani ba kau tara sa ki?

29Jisas pana win:

—Lâ sut tilara tâura ba lika naha sa: ‘Wals, Israel: Dawan wan Gâdka ba kumi baman sa. 30Man Dawan Gâdkam ra latwan kaikma kupiam aiska, sulkam aiska, lukankam aiska, bara karnikam aiska ni.’ Naha sika lâ kau tara ba.#Kli S 6.4-5. 31Wala naha wal baku ba lika naha sa: ‘Uplikam ra wînam ra latwan kaikisma ba baku latwan kaikma.’#Lib 19.18. Naha nani purkara lâ wala âpu sa.

32Bara Lâ Smasmalkra ba witin ra win:

—Pain aisaram, Smasmalkra. Kasak pali man aisisma Gâd kumi baman sa, bara wala lika âpu sa, witin baman.#Kli S 4.35. 33Bara Gâd ra kupia aiska, lukanka aiska, sulka aiska, karnika aiska ni latwan kaikaia ba, wan uplika ra wan wîna baku latwan kaikaia ba sin, sakripais nani, daiwan nani altar ra angki ba sut wal kau purkara sa.#Os 6.6.

34Bara Jisas naha waitna luki kira witin ra win ba kaiki, pana witin ra naku win:

—Gâd kingka tasbaya ba wina laihura apia sma.

Bara upla kumi sin kli witin ra diara makabi walaia lukras kan.#Lk 10.25-28.

¿Kraist ba ya kiamka sa?

(Mt 22.41-46; Lk 20.41-44)

35Jisas tempel ra smalki kan bara makabi walan:

—¿Dîa kan Lâ Smasmalkra nani wisa Misaya ba Debit luhpia sa? 36Kan Debit pali Spirit Holikira ingnika mita, naku win:

‘Dawan mita yang Dawanki ra win:

Man mihti aihkika ra iws,

yang mita waihlam nani

minam munhtara mangkamna ba kat.’#Law 110.1.

37¿Bamna nahki Misaya ba Debit kiamka kabia, kan Debit pali bui witin ra Dawan wisa kaka?

Upla nani, ailal kan ba, ai kupia liliakira ni Jisas ra wali kan.

Jisas mita Lâ Smasmalkra nani dahra sakisa

(Mt 23.1-36; Lk 11.37-54; 20.45-47)

38Jisas ai smalkanka ra, witin nani ra naku win: “Lâ Smasmalkra nani ra aman kaiks, witin nani prâk yari dimaia lihki ba, bara tawan bilara upla ai lakula wibia sin lihki ba. 39Ju nani priaska watla ra witin nani kau plis tara briaia lihkisa, plun piaia ra sin kau plis pain nani ba plikisa, 40piarka mairin nani ra sin ai watla dakbisa, bara kunin man ai pura sunra yari sunisa. Witin nani sika kau klala tara bribia ba.”

Piarka mairin umpira prisantka ba

(Lk 21.1-4)

41Yu kum Jisas tempel ra iwi kan, lalah mangkaika watla mawan kat. Witin lika upla nani lalah mangki ba kaiki kan, bara nahki lalahkira nani lalah ailal mangki kan ba sin. 42Piarka mairin umpira kum balan, bara lalah mangkaika watla ra lalah mâ sirpi wâl mangkan, praiska ba tara lika apia kata. 43Bara Jisas ai disaipilka nani ra paiwi, naku win:

—Kasak man nani ra mai wisni: Naha piarka mairin umpira na, wala nani lalah mangkaika watla ra lalah mangkan ba purkara kau yaban sa; 44kan witin nani sut ai lalahka ailal yuyaka ba wina yan, sakuna witin lika umpira, raya iwaia dukia kata ba sut yaban.

Currently Selected:

Mark 12: MSKTU

Highlight

Copy