Mark 10
10
Jisas aisisa marit lâka krikaia dukiara
(Mt 19.1-12; Lk 16.18)
1Jisas Kapernaum wina taki wan, Judia tasbaya ra wan, Jordan awala lalma tani tasbaya ra. Bahara upla ailal ba kli ai lamara balan, bara Jisas ai natka kan ba baku, kli witin nani ra smalki kan. 2Bara parisi tila nani Jisas lamara balan, trabil ra dingkaia wisi. Witin nani makabi walan, lâ sapa waitna kumi ai maya mairin ra swiaia ba. 3Witin pana naku win:
—¿Moses dîa man nani ra mai smalkan ki?
4Witin nani bila:
—Moses adar yan, wan maya mairin wal swiaia; witinka ra swiaia lâka wauhkataya kum yabi, ningkara mahka dakwi takaia trabil âpu kira.#Kli S 24.1-4; Mt 5.31.
5Bara Jisas bila:
—Moses baha lâka yan man nani kupiam karna ba mita. 6Sakuna blasi pali, Gâd diara nani paskan piua, ‘Witin bui waitna, mairin wal paskan.#Bla St 1.27; 5.2. 7Baha mita waitna ba ai aisika, ai yaptika wal ba swi si ai maya mairin wal asla takbia; 8bara wâl ba ai wîna kumi baku takbia.’#Bla St 2.24. Bara kumi baku takbia, wâl lika apia. 9Baha mita Gâd mita asla prakan ba, upla mita dakbi sakaia sip apia pali sa.
10Witin nani utla bilara kan ba ra, disaipil nani kli baha dukiara makabi walan. 11Jisas bila:
—Ani waitnika ai maya mairin ra mahka swibia kaka mairin wala wal marit takaia dukiara, ai maya pas ba mapara marit lâka sauhkisa. 12Bara mairin mita ai maya waitna ba swi si, waitna wala wal marit takbia kaka, witin sin marit lâka ba sauhkisa.#Mt 5.32; 2 Ko 7.10-11.
Jisas tuktan sirpi nani ra yamni munisa
(Mt 19.13-15; Lk 18.15-17)
13Bara tuktan tila nani Jisas ra bri balan, witin nani ra ai mihta ni kangbia wisi. Sakuna disaipil nani mita tuktan nani bri balan uplika nani ra lawi dauki kan. 14Jisas baha kaiki baha nani ra lawi daukan, bara naku win:
—Swis tuktan nani ba yang ra balbia, witin nani takaskpara, kan Gâd kingka lâka ba witin nani sâtka uplika nani dukia sa. 15Kasak pali mai wisna, ani uplika tuktan baku Gâd king aimaki lâka ba briras kaka, witin sip bahara dimbia apia.#Mt 18.3.
16Bara tuktan nani ba ai klahkla ra buki, ai mihta nani purara kahbi, yamni munan.
Wahma lalahkira kum Jisas wal aisisa
(Mt 19.16-30; Lk 18.18-30)
17Bara Jisas kli impakan ba ra, waitna kum plapi bal, ai mawanra ai lula kriki, makabi walan:
—Smasmalkra yamni, ¿yang raya ban kaia lâka ba briaia kaka, dîa daukaia sna ki?
18Jisas bila:
—¿Dîa muni yang ra yamni ai wisma? Yamni ba kumi baman sa, wala âpu, baha ba Gâd sa. 19Man, Gâd lâka nani ba pain kaikisma: ‘Upla ikpara,#Imp St 20.13; Kli S 5.17. marit lâka sauhkpara,#Imp St 20.14; Kli S 5.18. implikpara,#Imp St 20.15; Kli S 5.19. upla ninara kunin aisapara,#Imp St 20.16; Kli S 5.20. upla ra kunin munpara, aisikam bara yaptikam wal ba pain kulks.’#Imp St 20.12; Kli S 5.16.
20Bara waitna ba bila:
—Smasmalkra, yang tuktan sirpi kapri wina baha ba sut kulkisna.
21Bara Jisas witin ra latwan kaiki, win:
—Kau diara kumi man âpu sma: was, bara diara brisma ba sut atki lalahka takbia ba umpira nani ra yas, bâra mika kasbrika purara ba wina mamna brima; ningkara bal, nini blîks.
22Sakuna waitna ba naha walan ba ra, sari takan, bara ai kupia sarikira mahka wan, witin yuyakira pali kan bamna.
23Bara Jisas kir tawi kaiki, ai disaipilka nani ra win:
—¡Yuyakira nani lika Gâd king aimaki ba lâka prana ra dimaia karna pali sa!#S L 11.28.
24Disaipil nani baha wali tâ iwan, sakuna Jisas kli win:
—Luhpi nani, ¡karna pali sa Gâd King aimaki lâka tasbaya ra dimaia! 25Kiamil kum silak nakra bâk dimi luaia ba kau isi pali kabia, lalahkira kum Gâd king aimaki lâka tasbaya ra dimaia ba wal.
26Naha wali tâ pali iwi banhwan, bara pana pana makabi walan:
—Baku kaka, ¿ya swakwi takaia sip kabia ki?
27Jisas witin nani ra kaiki, win:
—Upla nani naha sip daukbia apia, Gâd lika sip sa, Gâd mapa ra diara sut sip sa bamna.
28Bara Pita win:
—Dawan, yang nani dîa dîa bri kapri ba sut swi si, ninam blikri.
29Jisas pana win:
—Kasak mai wisni: Ya ya yang dukira bara sturi yamni ba dukiara sin ai watla, ai muihni nani, ai lakra nani, ai aisika, ai yaptika, ai luhpia nani, ai tasbaya swisa kaka, 30naha tasba ra, naha piua ra 100 prais kau utla nani, muihni nani, lakra nani, yapti nani, luhpa nani, tasba sin bribia, rausauhkan nani tilara; bara naika balaia tasbaya ra, raya ban kaia ba bribia. 31Sakuna ailal nanara tâura aimaki ba, ninara tawbia; bara ailal nanara ninara ba, tâura tawbia.#Mt 20.16; Lk 13.30.
Jisas ai pruanka dukiara pat aima yumhpa aisuya
(Mt 20.17-19; Lk 18.31-34)
32Witin nani Jerusalem yabalka ra uli auya kan ba ra, Jisas lika disaipil nani tâura wapi kan. Witin nani tâ iwan kan ba ra, sibrinkira ai nina bliki kan. Bara Jisas kli disaipil 12 ba tnaya ra saki, dîa dîa takaia kan ba mahka smalkan. 33Witin nani ra win: “Man nani kaikisma, yawan Jerusalem ra uli auya. Bahara sika Upla Luhpia Waitna ba prîs tara nani bara Lâ Smasmalkra nani mihta ra mangkbia, bara witin nani mita pruaia pâtka ra lakbia ba ra, upla tringsar nani mihta ra mangkbia. 34Ai lawaska kikbia, yabalaya tuhbia, prukbia, bara ikbia, sakuna yu yumhpa ningkara, witin pruan wina kli bubia.”
Jems bara Jan wal diara kum makabisa
(Mt 20.20-28)
35Bamna Jems bara Jan wal, Sebedi luhpia nani ba, Jisas lamara bal, naku win:
—Smasmalkra, yang nani mamkabisna ba wankma lukisna.
36Bara witin baha nani ra makabi walan:
—¿Dîa want sma yang bui man nani ra dauki maikamna?
37Witin nani bila:
—Man king iwaikam pranakira ra iwma ba ra, yang nani wina kumi mihtam aihkika ra iwaia, wala ba smihkam tani ra.
38Bara Jisas bila witin nani ra:
—Dîa makabisma ba man nani tânka briras. ¿Man nani sip sma ki yang dimna kapka ba wina diaia, bara tahbi daukanka brimna ba sin briaia?#Lk 12.50.
39Witin nani bila:
—Yang nani sip sna.
Jisas witin nani ra win:
—Kasak pali: yang dimna kapka ba wina dima, bara yang ra tahbi ai daukbia ba man nani ra sin tahbi mai daukbia; 40sakuna yang mihti aihkika ra bara smihki ra sin iwaia ba lika, yang mita yaia sip apia sna. Baha lika ani uplika nani dukia wisi ridi daukan ba, baha nani ra yan kabia.
41Disaipil matawalsip ba baha wali, Jems bara Jan wal mapara lawan. 42Sakuna Jisas witin nani ra naku win:
—Man nani kaikisma kuntri wihtka nani ba, kuntrika dawanka takisa, bara tilara kau tara nani ba baha nani purara karnika alkisa. 43Sakuna man nani tilamra baku kabiara. Baha man nani wina ya kau tara kaia lukisa kaka, wala nani napakanka takaia sa;#Lk 22.25-26. 44bara ani uplika man nani tilamra tâura kaia lukbia ba, sut albika kaia sa.#Mt 23.11; Mk 9.35; Lk 22.26; Ecl 3.18. 45Kan Upla Luhpia Waitna ba sin balras upla mita dukia daukbia dukiara, sakuna upla dukia daukaia,#Lk 22.27; Jn 13.12-15. bara rayaka sin yaia, upla ailal swaki sakaia ba mata.
Bartimius blain ba Jisas mita rakisa
(Mt 20.29-34; Lk 18.35-43)
46Bara witin nani Jeriko ra wan. Bara Jisas ai disaipilka nani, upla ailalka ai nina bliki kan ba aikuki tawan ba wina taki auya kan ba ra, blain waitna, yabal tnaya ra iwi diara makabi kan. 47Bara Jisas Nasaret wina ba walan ai lamara aula kan, bara diara kaikras ba mahka naku winan:
—¡Jisas, Debit Luhpia Waitna, kupiam swapni ai kaikram!
48Upla ailal mita lawi daukan ai bîla prakbia wisi, sakuna kau ai bîla baikra tara wini kan:
—¡Debit Luhpia Waitna, kupiam swapni ai kaikram!
49Bara Jisas takaski, naku win:
—Witin ba paiws.
Bara witin nani blain waitna ba wini, naku win:
—Tâm baiki bus, witin mai winisa bamna.
50Bara ai kwalka lulki, pâli tit bûi, Jisas lamara balan. 51Bara Jisas witin ra makabi walan:
—¿Dîa want sma yang bui man ra mai daukamna?
Blain ba witin ra wisata:
—Smasmalkra, yang diara kaikaia want sna.
52Jisas witin ra win:
—Sip sma mahka waia; pat rawram sa, kasak lukram bamna.
Baha nakra klipan kum ra blain ba kaiki kan, bara yabal ra Jisas nina blikan.
Currently Selected:
Mark 10: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
