Luk 5

Inska manis alkan ba

(Mt 4.18-22; Mk 1.16-20)

1Yu kum Jisas Genesaret lakunka un ra bûi kan ba ra, upla ailal pali balan ban aiawaia âpu prais, witin nani Gâd bîla walaia want kan bamna. 2Jisas kaikan lakun ba un ra duri wâl bîla baman bâra kan; inska âialkra nani baha dwarka nani wina taki ai tanka nani sikbi kan. 3Jisas ba baha dwarka kum Saiman dukia kan ba ra aimaki, makaban un ba wina wiria biara ra sâkbia; bamna witin duri ra iwi, baha wina upla nani ra smalkan.#Mt 13.1-2; Mk 3.9-10; 4.1. 4Witin smalki luan ba ra, Saiman ra win:

—Duri na brih taki was kau tihu ra, bara tân nani ba lulks inska alkaia.

5Saiman pana win:

—Smasmalkra, yang nani tihmia aiska wark takri, diara kumi sin alkras;#Jn 21.3. ban sakuna man baku wan wisma bamna, yang tân ba lulkamna.

6Witin nani tân ba lulkan ba ra, inska ailal pali alkan,#Jn 21.6. bara tân ba dakwi kan. 7Bamna witin nani duri wala ra ai pânika nani bâra kan ra ai mihta wauhan bal hilp munbia dukiara. Bara witin nani balan, bara duri wâlsut ba inska nani ni banhwan kan, rungwaia man kata. 8Baku bamna, Pita naha kaikan ba ra, Jisas mawanra ai lula kriki, naku win:

—¡Yang wina taks, Dawan, yang na upla kum saura sna bamna!#Job 7.19-20; Law 39.13.

9Kan Saiman tâ iwan kan, baha nani witin wal kan ba sin, baku inska ailal pali witin nani alkan ba dukiara. 10Baku sin Sebedi luhpia waitna nani Jems bara Jan, Saiman pânika nani kan ba sin tâ iwan kan. Sakuna Jisas Saiman ra win:

—Si bripara; naha piua wina man upla âialkra kama.

11Bamna witin nani duri nani ba auhya un ra bri si sunan, bara diara nani sut swi si, Jisas wal wan.

Jisas lipar sikniska bri waitnika kum rakisa

(Mt 8.1-4; Mk 1.40-45)

12Jisas tawan kum ra kan ba ra, lipar sikniska bri waitnika kum balan. Witin Jisas ra kaikan, ai mawan tasba ra kauhi, makaban:

—Dawan, man want sma kaka, ai râks.

13Baku bamna, Jisas ai mihta ni kangbi, win:

—Yang want sna, bamna mai rakuna.

Naha aisin ba ra, lipar sikniska ba witin wina takan. 14Bamna Jisas adar yan, naha sturka na upla kumi ra sin wibia apia. Kuna naku win:

—Prîs ra wih wînam ba mariks, bara klin takram dukiara prisantka ba yas, Moses lâ yan ba kat.#Lib 14.1-32. Baku mika upla nani mai kaikbia man rawram ba.

15Sakuna Jisas sturka ba kau buki kata, bamna upla ailal ba asla taki kata, witin wina walaia bara ai sikniska nani wina sin rakan kabia wisi. 16Ban sakuna, Jisas lika upla âpu pliska ra wih, ai pura suni kan.

Jisas wakia lâwan waitnika kum rakisa

(Mt 9.1-8; Mk 2.1-12)

17Yu kumi Jisas bui upla smalki kan. Bahara iwi kan parisi nani bara Lâ Smasmalkra nani ba sin; witin nani Galili tawanka sirpi bani wina, Judia wina bara Jerusalem wina sin balan kan. Baha sim piua ra, Gâd karnika ba mariki kan Jisas mita, upla siknis nani ba raki. 18Baku kan ba ra, waitna tila nani mita, twilkaia krikrika lupia kum ra, wakia lâwan waitnika kum twilki brih balan; witin nani want kan waitna ba utla ra dingki Jisas mawanra mangkaia. 19Sakuna upla ailal kan ba mita, ansak dimaia plis sakras kan. Bamna witin nani utla bahna ra uli, baha watla bahna pîska nani ba saki, bahak twilkaia krikrika lupia ba lahban upla nani lilapas ra, Jisas mawan kat. 20Baha nani kasak lukanka ba Jisas mita kaikan, bara siknis waitnika ra win:

—Waitna, man saurkam nani ba sut swih tikan sa.

21Baku bamna, Lâ Smasmalkra nani bara parisi nani sin mahka ai kupia wal aisi luki kan: “¿Naha na ya, Gâd mapara witin naku saura aisi na? Upla âpu sa wan saurka swih tikaia, Gâd baman lika.”

22Jisas baha nani dîa luki kan ba pat kaikan, bamna win:

—¿Dîa kan man nani baku lukisma ki? 23¿Ani ba kau isi sa wiaia: ‘Man saurkam nani ba swih tikan sa’, apia kaka: ‘Man bus, bara mahka waps’? 24Bamna, man nani ra pain mamrikaisna, Upla Luhpia Waitna naha tasba ra saurka nani swih tikaia karnika brisna.

Bamna wakia lâwan waitnika ra win:

—Man ra mai wisna, bus, krikrikam lupia ba bris, bara wamtla ra mahka was.

25Baha sim piua ra, wakia lâwan waitnika ba witin nani sut mawanra buan, bara witin aitniki kan krikrika ba brih mahka ai watla ra wan, Gâd ra mayuni. 26Upla sut baha kaiki tâ iwan, Gâd ra sin mayunan, bara sibrin uya kira naku win:

—Yawan naiwa diara aihka pali kaikan sa.

Jisas Libai paiwisa

(Mt 9.9-13; Mk 2.13-17)

27Naha ningkara, Jisas mahka taki wan, bara waitna kum kaikan ai apiska ra iwi kan ba, ai nina Libai; witin lika Rom ra lal blikaia lal mana saki kata kumika kan. Jisas mita win:

—Nini blîks.

28Baku mika, Libai mahka ai dukia nani sut swi si, Jisas nina blikan.

29Baha ningkara, Libai ba Jisas dukiara ai watla ra lilia tara kum daukan. Rom ra blikaia, lal mana saki manis bara upla wala nani uya sin witin nani aikuki tibil ra iwi kata. 30Sakuna parisi nani, Lâ Smasmalkra nani ai lukanka kumi bri ba aikuki, Jisas disaipilka nani mapara aisi, naku win:

—¿Dîa kan pisma bara disma man nani Rom ra lal mana saki bliki uplika nani aikuki, bara saura dadaukra nani sin?#Lk 15.1-2.

31Jisas pana aisin:

—Upla wîna pain nani ba daktar want apia sa, sakuna sikniskira nani lika. 32Bamna yang balras upla kasakkira nani ba paiwaia, sakuna upla saurakira nani lika, witin nani ai saurka nani wina ai kupia lakbia dukiara.

Plun piras ba dukiara, Jisas ra makabi walisa

(Mt 9.14-17; Mk 2.18-22)

33Baku bamna, witin nani bui Jisas ra makabi walan:

—¿Dîa kan, Jan nina blablikra nani bara parisi nina blablikra nani sin, aima ailal plun piras ai pura suni banhwisa, sakuna man disaipilkam nani lika piu bani plun pîsa, bara sin dîsa?

34Jisas pana win:

—¿Man nani sip sma ki, marit pata ra paiwan nani ba yarka plun wahwaia, marit takan waitnika ba kau witin nani wal asla sa ba ra? 35Sakuna piua balbia, marit waitna ba witin nani wina dakbi sakan kabia; baha piua ra lika witin nani Gâd ra luki plun piras kabia.

36Jisas naha maprika sturka sin baha nani ra win:

—Upla âpu sa, prâk raya wina pîs klaki prâk almuk ra pîs mangkaia. Baku daukbia kaka, prâk raya ba tiwbia; baha purkara, baha pîska raya ba prâk almuk wal pain kabia apia. 37Baku sin, wain raya ba daiwan taya batilka almuk ra laiki mangkras, kan wain raya ba daiwan taya batilka ba baikbia, bara wain ba batilka wâlsut tiwbia. 38Baha mita, wain raya ba daiwan taya batilka raya ra mangkaia sa. 39Wain almuk dadira ba wain raya diaia laik apia sa, kan witin wisa wain almuk ba kau pain sa.

Currently Selected:

Luk 5: MSKTU

Highlight

Copy