Luk 23

Jisas Pailat mawanra

(Mt 27.1-2,11-14; Mk 15.1-5; Jn 18.28-38)

1Baha nani sut buan, bara Jisas ba Pailat mawanra brih wan. 2Bahara witin nani mahka Jisas dahra saki, naku wisata:

—Yang nani naha waitnika na saki banhri wan uplika nani kupia warbi muni kan. Witin bila, Rom kingka Sisar ra lal mana aibapi banhwamna apia, bara sin wisa witin ba Misaya, wibia kaka, king kum sa.

3Bara Pailat mita makabi walan:

—¿Man sma ki Ju nani Kingka ba?

Jisas pana win:

—Man aisaram ba baku sa.

4Bamna Pailat prîs tara nani ra bara upla sut ra sin win:

—Yang naha waitnika na ra pât kumi sin sakras pali.

5Sakuna witin nani ai tâ baiki pali aisin:

—Witin ai smalkanka ni Judia aiska ba kupia warbi munisa, Galili ba wina ban naha pali kat sin baku daukisa.

Jisas Herod mawanra

6Pailat naha walan ba ra, makabi walan naha waitnika na Galili wina sapa. 7Witin nani âu win ba ra, Galili wihtka tara Herod ra blikan wan, baha piua nani ra witin sin Jerusalem ra kan bamna. 8Herod lika Jisas kaikan ba ra, lilia pali takan, kan piua wihka witin kaikan dauki kan, bamna witin dukiara walan kan bara sin luki kan sain aihka kum pan daukka kaikaia. 9Diara uya makabi walan, sakuna Jisas pana diara aisaras kata. 10Baku sin bahara kata prîs tara nani bara Lâ Smasmalkra nani, bara witin nani karna pali ai dahra saki aisi kata. 11Ba ningkara Herod bara ai suldiarka nani aikuki bahki pali kulkata bara witin ra lawaska kikaia wisi, bamna kwala pranakira pali sin dingkan king baku. Ningkara, Herod mita witin ba kli Pailat ra blikan. 12Baha piua wina, Pailat ba Herod wal ai uplika takan, kaina piua ra lika wal ai waihla kan bamna.

Jisas lâka daukan ikaia dukiara

(Mt 27.15-26; Mk 15.6-15; Jn 18.39—19.16)

13Bamna Pailat mita prîs tara nani, wihta nani bara upla nani sut asla paiwi, 14naku win:

—Man nani naha waitnika bri balram ba ra, ai wiram nahki witin mita upla nani kupia warbi munisa, bamna yang bui man nani mamwanra makabi walri, kuna kaikram yang bui witin swakwanka kumi sin sakras, man nani dahra kwahki aisisma ba. 15Herod mita sin diara sakras, bara kli yawan ra blikan sa. Bamna kaikisma, witin pruaia pâtka kumi sin daukras sa. 16Bamna yang wipi muni, lanhkamna.

17[Lilia piua tara ra, Pailat silak uplika kum uplika nani ra lanhki yaia lâ bri kata, ai natka kan baku.]

18Sakuna sut mahka ai tâ baiki winan:

—¡Naha waitnika kaikan wan daukras! ¡Barabas lika pri sâks!

19Naha Barabaska na silak ra mangkan kata, witin tawan ra war bukan bara upla nani sin ikan bamna. 20Pailat Jisas ba pri sakaia want kan bamna, witin nani ra kli aisin; 21sakuna witin nani kau ai tâ baiki winan:

—¡Dus prihni ra sas! ¡Dus prihni ra sas!

22Naha kira aima yumhpa Pailat mita win:

—¿Bamna dîa saura daukan sa ki? Pruaia pâtka kumi sin witin ra yang sakras sni. Yang wipamni ningkara, pri sakamna.

23Sakuna witin nani ai tâ baiki wini, makabi kan dus prihni ra sabia. Witin nani taibi wini kan, bamna dîa witin nani want kan ba kat brin. 24Pailat wilin takan witin nani dîa makabi kan ba kat daukaia, 25bara baku, witin nani makaban waitnika ba pri sakan, witinka tawan ra war bukata ba bara upla nani sin ikan ba, sakuna Jisas lika witin nani want kan ba kat daukaia yan.

Jisas dus ra saban ba

(Mt 27.32-44; Mk 15.21-32; Jn 19.17-27)

26Jisas ba dus ra sabaia brih auya kan ba ra, Cirene wina waitnika kum wal prawan nina Saiman bara baha ba alki banhwan; witinka ba tawan sirpi kum wina aula kan, bara dus prihni ba witin ra yan twilkaia Jisas nina tani ra.

27Upla ailal ai nina bliki kan, mairin nani sin ini, sarikira pali witin dukiara wini banhwi kata. 28Sakuna Jisas baha nani ra tawi kaiki, naku win:

—Jerusalem mairka nani, yang puri mata inpara, sakuna man nani puram mata ins, bara luhpiam nani pura mata ini banhs. 29Kan piua nani ba balbia ba ra, naku wibia: ‘Yamni pali sa baha mairka nani sip luhpa baikras ba, sip kwihra tiwras kan ba, bara ai luhpia ra sin tiala dakakras kan nani ba.’ 30Baha piua ra upla nani ba il nani ra wibia: ‘¡Yang nani purira kauhs!’; il sirpi nani ra sin wibia: ‘¡Yang nani puri biks!’#Os 10.8; Par M 6.16. 31Bamna dus kura lupia ra naha diara sut na muni kaka, ¿dus lâwan ra dîa mika munras kabia ki?

32Saura dadaukra wâl sin brih auya kata, Jisas wal ikaia. 33Witin nani Lalkamhka mâki ba tasbaya ra balan ba ra, Jisas ba dus prihni ra saban, saura dadaukra wâl ba sin: kumi ba aihkika tani ra, wala ba smihka tani ra. 34Witin nani dus prihni ra sabi kan ba ra, Jisas bila:

—Aisa, naha pâtka na witin nani ra ban swih tiks, kan witin nani dîa dauki sapa ai tânka briras.

Bamna suldiar nani Jisas kwalka ba yaura tawbia sapa kaikaia, lat lulkan.#Law 22.18. 35Upla nani sin bahara bûi kaiki kata, wihta tara nani mita sin ai lawaska kiki, naku aisi kan:

—Upla wala nani ra swaki sakan; bamna nanara witin swak takbia, witin ba kasak Misaya sa kaka, Gâd mita bâk sakan ba.

36Suldiar nani sin ai lawaska kiki, ai lamara bal, wain swahwan yan diaia. 37Witin nani sin wi kata:

—¡Man ba kasak Ju nani Kingka sma kaka, man silp swak taks!

38Wauhtaya kumi ulbi witin lal purara mangkan kata ba ra baha ba naku kata: “Naha sika Ju nani kingka.”

39Saura dadaukra nani witin aikuki dus ra paman kan ba wina kumika mita witin ra swira dauki, naku wi kata:

—¡Man ba Misaya kaka, wînam swak sâks bara yang nani na sin swaki ai sâks!

40Sakuna wala ba mita ai pânika ba ra lawi dauki, win:

—¿Man lika Gâd ra sibrin lukras sma ki, man sim pâtka mununhtara sma ba? 41Man ba yang wal lika pât wahwaia aitani pali sa, kan dîa yawan daukan ba mana sika aibapi na; sakuna naha waitnika lika diara saura kumi sin daukras.

42Bamna witin bila:

—Jisas, man king aimaki kama ba ra, yang ra luki bas.

43Jisas pana wisata:

—Kasak mai wisni, naiwa yang wal man Paradais ra kama.

Jisas ba pruan

(Mt 27.45-56; Mk 15.33-41; Jn 19.28-30)

44Yu ba 12 aklak kan ba ra, tihmia iwan tasba aiska ra, ban tutni 3 aklak kat. 45Lapta ba ai ingnika ba sakras, bara tempel ra kwala paman kan ba#Imp St 26.31-33; 2 Kr 3.14. lilak kalwan. 46Bara Jisas ai bîla baikra tara winan:

—¡Aisa, spiritki na man mihtam ra mangkisna!#Law 31.5; Ap St 7.59.

Naha aisin ningkara, witin pruan.

47Rom kiaptinka baha kaikan, Gâd ra mayuni, win:

—Kasak pali naha waitnika na pâtkas pali kata.

48Upla sut aidrubi balan kan ba dîa takan ba sut kaiki kan, bara witin nani ai lama pruki, kli mahka wan. 49Sakuna Jisas kakaira nani sut bara mairin nani sin Galili wina ai nina bliki banhwan kan ba,#Lk 8.2-3. laih wina naha diara nani na kaiki kata.

Jisas raiti ra bikan

(Mt 27.57-61; Mk 15.42-47; Jn 19.38-42)

50Waitna kasak pain kulkan waitnika kum bâra kan, ai nina ba Josep, witinka ba Judia tawanka kum nina Arimatea wi ba wina kata. Witin na sin Ju lâ dadaukra wihtka nani kum kata. 51Naha Josep lika Gâd king aimaki lâka bîla kaiki kata, bamna witin lâ wihtka nani dîa dauki kan ba tilara dimras kan. 52Bamna witin Pailat ra wih, Jisas wîna tara ba makaban. 53Dus prihni wina lahbi ikan ba ra, kwalyapa kum ni karbi, walpa ni daukan raitka kum ra tnikan bara bahara kau upla kumi sin bikras kata. 54Baha piua ba lika ris yua ba dukiara ridi takaia kan, bara piua ba pat baila kata.

55Mairin nani Jisas wal Galili wina balan kan ba sin wan, raiti ba sin kaikan bara wîna tara sin nahki tnikan ba sut pain pali kaikata. 56Ai watla ra kli tawi balan ba ra, isint kîa pain nani bara batana nani sin ridi daukan.

Jisas raiti wina buan ba

(Mt 28.1-10; Mk 16.1-8; Jn 20.1-10)

Ris briaia#Imp St 20.10; Kli S 5.14. lâka ulban ba kat mairin nani ba baku daukan,

Currently Selected:

Luk 23: MSKTU

Highlight

Copy