Luk 21
21
Piarka mairin umpira ai prisantka yan ba
(Mk 12.41-44)
1Jisas tempel ra kaikan, lalah auhbaia watla ra yuyakira nani lalah mangki kan. 2Witin sin kaikan, piarka mairin umpira kumi lalah sint wâl mangkan. 3Baku mika, Jisas bila:
—Kasak mai wisna, naha piarka mairin umpira na kau mangkan, wala nani sut ba wal. 4Kan baha nani yabi ba lika, ai dukia nani bri ba wina kau tâka takaskan ba sika; sakuna piarka mairin na, ai umpirka ra, raya kaia dukia lupia bri kan ba sut pali yan.
Jisas bila tempel ba sauhki tikan kabia
(Mt 24.1-2; Mk 13.1-2)
5Upla tila mita tempel ba dukiara aisi kan, tempel walpaya nahki painkira nani ba ni skahkan ba dukiara, bara diara sât sât upla nani ai prisantka yan kan ba dukiara sin. Bamna Jisas bila:
6—Yua nani balbia ba ra, naha diara nani man nani kaikisma na sut sauhki tikan kabia, bara walpa kumi sin walpa wala purara ban swin kabia apia.
Tnata piua kainara sainka nani ba
(Mt 24.3-28; Mk 13.3-23)
7Bara makabi walan Jisas ra:
—Smasmalkra, ¿ahkia naha diara na takbia? ¿Naha dukia nani takaia sainka nani ba ani kabia?
8Jisas bila: “Aman kaiki bas, yarka sin kunin mai munbiara. Upla ailal yang nini bri balbia, bara ban naku wibia: ‘Yang sika Kraist’; bara ‘Nanara sika piua ba.’ Sakuna nina blîkpara. 9Man nani war nani sturka bara blahwan lâka nani sturka walma ba ra, si bripara, kan naha diara nani na pas takaia sa, sakuna tnata ba kau kabia.”
10Bamna Jisas kau ban aisi, win: “Nisan kumi nisan wala mapara aiklabia, kuntri kumi kuntri wala mapara war daukbia. 11Tasba nikban tara nani kabia, plun tiwan bara siknis sât sât nani plis ailal ra, bara kasbrika purara diara sibrinkira nani, sain aihka nani sin kabia.
12“Sakuna naha diara nani sut kainara, man nani ra mai alkbia, bara ninam bliki rau mai sauhkbia. Lâmka daukaia prias watla nani ra mai brih wabia, yang nini ba tâwan silak watla ra mai mangkbia; king nani mawanra, wihta tara nani mawanra sin mai brih wabia. 13Naha na man nani mampa ra sans kum kabia, yang dukira witnis aisaia. 14Baha mita piua kainara, man nani sinskam ba ridi bri bas, witniskam aisaia wisi trabil taki lukma apia ba dukiara, 15kan yang mita dîa aisaia sma bîla nani bara sinska lâka ba sin maikamni, bamna waihlam nani kumi sin baha mapara bubia apia, aisabia sin apia.#Lk 12.11-12. 16Aisikam, yaptikam, muihkam nani, tamya nani, uplikam nani sin waihlam mihta ra mai mangkbia. Man nani tilam wina kum kum mai ikan kabia, 17yang tâiwan sin tasba aiska na misbara mai kaikbia. 18Sakuna tâmwa ba wina mina kumi sin tiwbia apia. 19¡Ban bapi bûi kama kaka, raya ban kaia lâka ba brima!
20“Ani piua Jerusalem tawanka ba suldiar nani mita kutbi bri kabia ba ra, damra wali bas, sauhki tikan kaia ba baila sa. 21Bamna baha nani Judia ra banhwi ba il nani ra plapi waia sa; Jerusalem tawanka bilara nani ba takaia sa, baha nani insla ra ba sin tawan ra kli bal dimaia apia sa. 22Baha piua ba lika pât wahwaia piua nani kabia,#Os 9.7. bamna Ulbanka nani dîa aisi ba sut aimakaia sa. 23¡Umpira pali kabia, mairin kwihra nani ba bara ai luhpia nani tiala dakaki ba sin! Kan tasba na ra latwan tara uya kabia, bara pât saura pali sin naha uplika nani mapara kabia. 24Upla tila nani war ra pruan kabia, bara wala nani ra lika priski brih wan kabia plis wala nani ra; bara Ju apia nani mita Jerusalem ba ai mina ni taibia, piua mangkan ba tnata alkbia ba kat.
Upla Luhpia Waitna kli balbia ba
(Mt 24.29-35,42-44; Mk 13.24-37)
25“Bamna sain nani takan kabia lapta ra, kati ra bara slilma nani ra sin,#Ais 13.10; Isi 32.7; Jl 2.31; Par M 6.12-13. naha tasba ra nisan nani ba aihka aimawahkan kabia, bara sibrin tara sin takbia kabu ripka binka tara ba mita. 26Naha diara nani tasba ra takaia ba dukiara luki, upla nani kupia sin lap tiwbia; kan kasbrika purara karnika nani sut nikban kabia. 27Bâra mika, Upla Luhpia Waitna, kasbrika ra aula ba kaikbia, karnika tara bara ai prana ba wal.#Dn 7.13; Par M 1.7. 28Naha diara nani na mahka takaia ba ra, kupiam karna dauki, lamla ba purara buks, kan pri sakan lâka ba pat baila sa.”
29Jisas naha maprika lilka na sin wisata: “Kwah damni dusa ba ra kaiki bas, apia kaka dus sât wala nani ra sin. 30Ai wahia nani saki kan kaikisma ba ra, man nani mita kaikma lapta piua ba pat baila sa. 31Baha sim natka ra, naha diara nani takan kaikisma ba ra, damra wals Gâd King aimaki lâka ba pat baila sa.
32“Kasak mai wisna, diara nani na sut takbia, naha piua uplika nani kau prui tiwras ba ra. 33Kasbrika pura ba bara tasba na sin lui wabia, sakuna yang bîli nani ba lui wabia apia.
34“Bamna aman kaiki bas, tasba brinka nani ba mita, bla lâka nani mita bara naha tasba trabilka nani mita sin yarka kupiam nani ba karna takbiara, baha piua kra damra walras kaprika mai alkbiara sîa. 35Mina alkaia kumi ai bîla prakuya ba baku kabia, naha tasba ra iwi uplika sut ra. 36Bamna man nani ridi bas, bara piu bani sin puram suni bas, bara baku mika sip kama naha diara nani takaia ba wina swakwaia, ban sin Upla Luhpia Waitna maiwanra kaia.”
37Kakna piua ra Jisas tempel ra smalki kan,#Lk 19.47. kuna tihmia piua, Olivet ilka ra taki wi kan bahara takaskaia. 38Bamna upla nani sut yu bani titan pali tempel ra bali kan, Jisas smalkanka walaia.
Currently Selected:
Luk 21: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
