Luk 2

Jisas aisuban ba

(Mt 1.18-25)

1Baha piua nani ra king tara Augusto mita adar kum blikan, tasba aiska ra upla nani iwi ba sut ai nina mangkan kaia sa. 2Naha lika nina mangkanka pas kata, Quirinio Siria tasbaya ra wihta tara aimaki kan ba piua ra. 3Upla sut wan ai aisubanka tawanka kat ai nina ulbaia.

4Baku bamna, Josep Galili tawanka kum Nasaret ba wina taki, Judia tawanka kum nina Betlehem wi ba ra balan. Bahara sika king Debit aisubi takan ba, Josep ba sin Debit kiamka kan bamna. 5Josep Meri wal Betlehem ra wan ai nina mangkaia; baha piua Meri lika Josep wal marit takaia lâ daukan kan, bara sin aisubaia pali man kata. 6Witin nani Betlehem ra kan ba ra, Meri aisubaia piua ba balan. 7Bahara witin ai luhpia waitna tawahkia ba aisuban, bara kwala ra karbi, daiwan pata watla ra tnikan, witin nani hutil ra takaskaia plis âpu kan bamna.

Insal nani sepad nani ba wal

8Betlehem tawanka lamara, twi ra sepad nani takaski kan; witin nani tihmia ra ai sîpka nani main kaiki kata. 9Dawan insalka kumi witin nani ra param takan, bara Dawan prana ba sin witin nani ra kir ingwan; bamna sepad nani ba sut sibrin pali takan. 10Sakuna insal ba bila: “Man nani si bripara, kan yang bui man nani ra sturi pain kum mai wiaia balri, naha na upla sut mapa ra lilia tara kabia. 11Man nani ra naiwa Debit Tawanka ra Sasakra kum aisubi takan sa, witin sika Kraist, wan Dawan. 12Tukta ba sakaia naha na man nani ra sain baku kabia: witin ba sâkma kwala ra karban bara bîp pata watla ra tnikan.”

13Baha sim piua, insal ba lamara insal wala nani kasbrika pura ba wina balan, bara Gâd ra mayuni, naku aisan:

14“¡Gâd ra mayunan kabia laih purara!

¡Kupia kumi lâka tasba ra,

witin mita yamni kaiki uplika nani tilara!”

15Insal nani ba kasbrika purara mahka wan ba ra, sepad nani ba pana pana ai walka ra tawi aisi kan:

—Kaisa yawan Betlehem ra diara takan Dawan bui wan maisa pakan ba kaikaia.

16Witin nani aihni pali wan, bara sakan Meri, Josep bara tukta lupia ba sin bîp pata watla ra tnikan kan. 17Sepad nani witin ba kaikan, tukta lupia ba dukiara insal dîa win ba sut maisa pakan. 18Upla sut baha sturka walan ba, tâ iwan kan. 19Sakuna Meri lika naha diara nani sut na ai kupia ra brih, aihka luki kan. 20Sepad nani kli mahka tawi wan, Gâd ra mayunan kan, dîa dîa witin nani kaikan bara walan ba dukiara, kan dîa dîa witin nani ra aisin ba kat takan bamna.

Tukta Jisas ba tempel ra brih wan

21Yu 8 alkan ba ra, tukta lupia ra Aisa sainka daukan,#Lib 12.3. nina sin Jisas mâkan. Baha pali nina ba insal mita Meri ra mâkbia win,#Lk 1.31. kau witin kwihra tiwras kan ba ra.

22Moses lâka ra ulban ba kat, witin nani ai wîna klin sakan baku, piua ba aimakan ba ra, tukta lupia ba sin Jerusalem ra brih wan Dawan ra yabaia. 23Witin nani baku daukata, kan Dawan lâka ra ulban sa: “Tukta waitna tawahkia bani ba, Dawan dukia holikira sakan kabia.”#Imp St 13.2,12. 24Witin nani sin sakripais daukan Dawan lâka ra ulban ba baku: butku wâl, apia kaka, butku sirpi wâl.#Lib 12.6-8.

25Baha piua nani ra, Jerusalem ra waitna kum iwi kata ai nina ba Simian. Witin lika waitna kasakkira, Dawan ra sin ai pura suni mayuni kan, Israel luhpia nani pri sâkbia ba sin bîla kaiki kata. Spirit Holikira ba witin wal kan, 26bara Spirit sin witin ra maisa pakan prubia apia, Misaya Gâd mita blikaia pramis win ba kaikras kaka. 27Spirit Holikira tâ brin bamna, naha waitnika tempel ra wan, bara Josep Meri wal mita Moses lâka kat daukaia tukta Jisas ba tempel ra brih balan ba ra, 28Simian mita tukta lupia ba ai klahkla ra buki bri, Gâd ra mayuni, naku wisata:

29“Dawan, nanara, pramiskam ba tnata alkan sa:

sip sna swirka dukiam dadaukra ba

ai âuyapah lâka ra pruaia.

30Kan pat kaikri swaki takan lâka ba,

31man mita upla sut mawanra

mangkram ba.

32Ingni kum nisan nani ra#Ais 42.6; 49.6; 52.10.

ingni yabi ba,

bara man uplikam Israel luhpia nani ra mayunra lâka yaia.”

33Josep bara Jisas yaptika Meri wal lika Simian diara nani aisi kan ba dukiara aihka tâ iwan kan. 34Simian witin nani ra yamni munan, Jisas yaptika Meri ra naku wisata:

—Kaiks, naha tukta lupia na mangkan sa, Israel luhpia nani uya kauhbia, bara kli bubia ba dukiara sin. Witin na upla uya bahki kulkaia sainka kum kabia, 35bamna baku lika upla bani ai kupia ra dîa luki ba tânka marikbia. Bara naha diara nani sut na, man mampara sord kumi baku kupiam ra dimi mâ walak lubia.

36Bahara sin Gâd prapitka mairka kum bâra kata, ai nina ba Ana, witin Penuel luhpia, Aser taika kan. Witin pat almuk pali kata; tiara pali marit taki, ai maya wal mani 7 iwi kan, 37bara nanara piarka ba mani 84 bri kata. Witin sin tempel wina uya takras, ban bahara Dawan dukia dauki kan, kakna bara tihmia Gâd ra luki plun piras kira ai pura suni. 38Baha sim piua ra Ana sin bal diman, bara Dawan ra tingki win. Ningkara, tukta Jisas dukiara mahka aisin, baha nani Jerusalem pri sakan kabia bîla kaikan sut ra.

Nasaret ra kli wan ba

39Dawan lâka ra dîa mangkan ba sut dauki tnata alkan ba ra, witin nani ai tawanka pali Nasaret ra balan, baha ba Galili tawanka ra sa.#Mt 2.23. 40Tukta ba pâwi kan, bamna kau karna bara kau sinskira sin taki kan, Gâd sin yamni pali muni kata.

Tukta Jisas ba tempel ra

41Mani bani, Josep Meri wal lika Jerusalem ra wan Insal luan Yua Liliaka ba kulkaia dukiara.#Imp St 12.1-27; Kli S 16.1-8. 42Jisas mani 12 alkan, ai aisika ai yaptika wal Jerusalem ra wan piua tara ba luaia, witin nani ai natka kan ba baku. 43Insal luan Yua tara nani ba luan ba ra, witin nani kli ai watla ra mahka tawan, Jisas lika Jerusalem ra takaskan, ai yaptika bara Josep sin baha tânka briras kan. 44Ban yu aiska impakan, bara witin nani lukan Jisas ba upla nani tilara aula kan; sakuna ai taya nani tilara, kakaira nani tilara sin plikan, 45kuna sip sakras kan. Baku mika witin nani kli ai bîla tawan Jerusalem ra plikaia.

46Yu yumhpa ningkara, witin nani bui Jisas ba sakan tempel ra, Lâ Smasmalkra nani tilara iwi, bara witin nani dîa dîa smalki kan ba wali, pana sin diara makabi wali kan. 47Baha nani Jisas ra wali kan ba sut tâ iwan kan, ai sinska tara ba dukiara, pana dîa witin nani mita makabi wali kan tânka param wi ba dukiara sin. 48Ai aisika bara ai yaptika wal baha kaikan ba ra, tâ iwan, bara ai yaptika bila:

—Luhpi, ¿dîa kan man baku pali wan munram? Kaiks, yang aisikam wal sarikira mai plikisna.

49Jisas bila:

—¿Dîa kan ai plikisma ki? ¿Man nani kaikras ki, yang na Aisiki warkka nani tilara kaia sna ba?

50Sakuna baha aisin tânka ba witin nani briras kata.

51Bara witin nani aikuki Nasaret ra wan, piua bani sin witin nani bîla wali dauki kata. Ai yaptika lika diara nani sut ba ai kupia ra mangki bri kan. 52Bara ban Jisas lika ai wîna tara mapa ra bara ai sinska mapa ra sin pâwi kan, bamna Gâd mita bara upla nani sut mita sin yamni kaiki kata.#1 Sa 2.26; S L 3.4.

Currently Selected:

Luk 2: MSKTU

Highlight

Copy