Luk 19

Jisas bara Sakius wal

1Bara Jisas Jeriko ra dimi, tawan bîla bâk luya kan. 2Bahara waitna yuyakira kum bâra kan, ai nina ba Sakius; witin ba lika lal mana sasakra Rom ra yaia nani wihtka kata. 3Naha Sakius na Jisas ba kaikaia want kan kakaira takaia dukiara; sakuna sip kaikras kan witin na waitna prahni kan mita, baha purkara upla sin ailal pali kan bamna. 4Witin tâura plapi wan kaikaia sip kaia wisi, bara kwah damni dusa kum ra ulan, baha lamak Jisas lui waia kan bamna. 5Jisas bahak luya kan, ai purara tawi kaiki, win:

—Sakius, pat muni bal iws, naiwa man wamtla ra yang takaskaia sna bamna.

6Bara Sakius aihni bal iwan, liliakira Jisas ba brin. 7Naha kaiki, upla nani mahka brukwi aisin, Jisas ba upla saurakira watla ra takaskaia wan. 8Bara Sakius ai mina ra bûi, Dawan ra win:

—Kaiks, Dawan, dîa brisna ba wina bakriki prais umpira nani ra yabisna; bara upla dukia kunin muni implikri kaka, kau aima walhwal prais yabaisna.

9Jisas bila:

—Naiwa naha watla ra swaki sakan lâka ba balan sa, naha waitna na sin Ebraham kiamka sa bamna. 10Upla Luhpia Waitna na balri sa, diara tiwan ba pliki swaki sakaia.#Isi 34.16; Mt 18.11.

Lalah maprika lilka ba

(Mt 25.14-30)

11Jisas naha diara nani aisi kan ba ra upla nani ba kau wali kan, witin naha maprika lilka na aisin#Mt 25.14-30. pat Jerusalem ba baila kan bamna, witin nani ba luki kan baha sim piua ra Gâd king aimaki lâka ba balbia.

12Bamna witin bila: “Pain kulkan waitnika kum bâra kan, witin kuntri laihura wan, bahara king aimakaia, ningkara kli ai watla ra balaia. 13Kau taki waras ba ra, ai albika matawalsip paiwan balan, bara kumi bani ra lalah manakira pali kum mihta ra mangki, naku win: ‘Naha lalahka na wal man nani bisnis dauki bas, yang kli balamna ba kat.’ 14Sakuna ai kuntrika uplika nani mita misbara kaikan, bara witin ninara upla nani bliki, maisa paki, win: ‘Yang nani want apia sna naha waitnika wan kingka kabia.’

15“Sakuna ban king mangkan, bara kli ai kuntrika ra balan. Witin bui ai albika nani ra lalah yan ba sut paiwan, bamna kaikaia want kan baha nani ba ai lalahka ba purara kau dîa sakan sapa. 16Pas ba bal, naku win: ‘Kingki, man lalahkam lika kau aima matawalsip prais pura sakri sa.’ 17King ba mita pana win: ‘Yamni daukram; man alba yamni pali sma; diara wiria mapa ra kasak kapram bamna, yang mita tawan matawalsip wihtka mai mangkuna.’ 18Wala kum bal, win: ‘Kingki, man lalahkam ba kau aima matsip pura sakri sa.’ 19Naha albika ra sin win: ‘Man lika tawan matsip wihtka kama.’

20“Bara wala kum bal, wisata: ‘Kingki, kaiks, man lalahkam nâra sa. Yang angsar kum ra blaki, main kaiki bri kapri; 21kan man dukiamra sibri kapri, kan man ba waitna kupiam karna kum sma, bara wahbi brisma man iki swiras sma ba wina, bara mâ krikisma man bui mangkras sma ba wina sin.’ 22Bara kingka mita pana win: ‘Alba saura, man bîlam aisisma ba wal lâmka daukamna. Yang waitna karna sna tânka ba man kaikisma, bara wahbisna yang mita iki swiras sna ba wina, bara mâ sin krikisna yang mita mangkras sna ba wina. 23Bamna, ¿dîa kan lalahki ba bank ra dingki swiras kapram, bara baku mika yang waitla ra kli balaia piua lalahki ba kau pura briaia kapri kan?’ 24Baha nani bahara kan ba ra, king ba mita win: ‘Witinka mihta wina lalah mâ ba bris, bara yas matawalsip purara sakan uplika ra.’ 25Witin nani mita pana win: ‘¡Sakuna baha uplika pat lalah mâ matawalsip brisa!’ 26King ba pana win: ‘Yang mai wisni, bri uplika ba ra kau yaban kabia, sakuna ya diara briras ba, diara wiria lupia bri ba sut mihta dakban kabia.#Mt 13.12; Mk 4.25; Lk 8.18. 27Bamna waihli nani yang ai kingka ai briaia apia win ba, nahara brih bal, maiwan kat sut iki banhs.’ ”

Jisas Jerusalem ra dimisa

(Mt 21.1-11; Mk 11.1-11; Jn 12.12-19)

28Naha diara na aisin ningkara, Jisas Jerusalem ra impaki auya kan. 29Pat Betfagé bara Betania tawanka lamara balan, Olivet ilka wi yaba lamara, bara witin mita ai disaipilka wâl saki bliki, 30naku win:

—Baha tawanka kau lamara ba ra was, wama bara biriku kum wilkan ba wal prawma, upla kumi sin kau ulras ba. Baha ba lanhki, bri bal. 31Bara upla kum kra mamkabi walbia kaka: ‘¿Dîa muni lanhkisma?’, wis Dawan ba want takisa.

32Bamna disaipil nani ba wan, bara Jisas dîa witin nani ra win ba kat wal prawan. 33Baku bamna, biriku ba lanhki banhwi kan, dawanka nani mita witin nani ra makabi walan:

—¿Dîa kan birikuki ba lanhkisma?

34Witin nani pana win:

—Dawan ba want takisa.

35Bamna witin nani bui Jisas ba brih wan, ai kwalka nani biriku ba nina dusa ra palki, Jisas baha purara sunan. 36Jisas auya kan ba ra, ai kwalka nani yabal ra palki kata. 37Witin pat Jerusalem lamara balan kan, bara Olivet ilka wina bal iwaia man kan ba ra, disaipil nani daknika aiska ba ai bîla baikra tara ni, tingki wih mayunan, diara tara nani, witin nani ai nakra pali kaikan ba dukiara. 38Naku aisi banhwi kan:

—¡Yamni kabia Dawan nina ra aula kingka ba!#Law 118.26. ¡Kasbrika purara kupia kumi lâka bara prana ba laih purara sa!

39Bamna parisi tila nani, upla nani tilara kan ba bila:

—Smasmalkra, ninam blablikra nani ra lawi dauks.

40Sakuna Jisas pana win:

—Yang mai wisni, naha nani ai bîla prakbia kaka, walpa nani ba ai bîla saki wini banhwi kabia.

41Witin pat Jerusalem lamara balan, bamna tawanka ba kaiki, Jisas baha pura mata ini, 42naku win: “Man kaikram kata, naiwa piua kupia kumi lâka dukiara dîa pali want sma ba; sakuna nanara baha sut ba yukukan sa, bara man sip kaikras. 43Bamna piua saura nani man ra balbia, bara man waihlam nani mita tnamya kir kutbanka daukbia; witin nani sin tnamya bani wina bal taki mai alkbia, 44bara ban tasba ra sin mai batakbia. Upla nani man ra iwi banhwi ba sut sin ikan kabia, bara man ra walpa kumi walpa wala purara ban swin kabia apia, Gâd mai swaki mai sakaia balan piua ra man mita tawi kaikras kapram ba mita.”

Jisas tempel klin sakisa

(Mt 21.12-17; Mk 11.15-19; Jn 2.13-22)

45Bamna Jisas tempel ra dimi, baha nani upla ra diara atki bara pana atki kan ba sut kangbi saki, 46naku win:

—Ulbanka ra naku win sa: ‘Yang waitla ba pura sunaia watla sa’;#Ais 56.7. sakuna man nani mita âimplikra nani watla daukram.#Jir 7.11.

47Bara yu bani Jisas tempel ra upla smalki kan,#Lk 21.37. bara prîs wihtka nani, Lâ Smasmalkra nani bara upla tâ aimaki nani ba mita nahki ikaia sapa pliki banhwi kata. 48Sakuna nahki ikaia yabalka ba sip witin nani sakras kan, upla sut mita Jisas ra aman pali wali kan bamna.

Currently Selected:

Luk 19: MSKTU

Highlight

Copy