Luk 15

Sîp tiwan maprika lilka ba

(Mt 18.10-14)

1Lal mana saki Rom ra bliki nani bara upla saurakira nani sut Jisas lamara balan, witin ba wina walaia. 2Bara naha dukiara, parisi nani bara Lâ Smasmalkra nani sut Jisas mapara brukwi, aisi kan:

—Naha waitnika upla saurakira nani ba ai lamara brih, aikuki sin plun pîsa.#Lk 5.29-30.

3Bamna Jisas naha maprika sturka na baha nani ra wisata: 4“¿Ya man nani tilamra witin sîp 100 kum brisa, bara baha wina kumi tiwbia kaka, 99 ba swi si, tiwan ba pliki auya apia, baha sâkbia ba kat? 5Witin sakan ba ra, liliakira ai pahpaya ra sunisa,#Ais 40.11; Isi 34.11-12; Jn 10.1-16; Hib 13.20. 6bara ai watla ra bal, ai uplika nani bara ai watla lamara iwi nani ba sut asla wini brih, naku wisa: ‘Man nani, yang wal liliam bas, kan sîpki tiwan kata ba sakri sa.’ 7Yang mai wisni, baha sim natka ra, kasbrika purara ba ra kau lilia tara bâra sa upla saurakira kumi ai kupia lakuya ba piua, sakuna upla pain 99 ai kupia lakaia âpu kan ba dukiara lika baku apia sa.

Lalah tiwan maprika lilka ba

8“Baku sin, ¿ani mairka witin lalah mâ matawalsip bri ba wina kumi tiwbia kaka, lamp angki, utla pain pali pahbia apia, sâkbia ba kat plikisa? 9Witin sakan ba ra, ai uplika nani bara ai watla lamara iwi nani ba sut asla paiwi, wisa: ‘Man nani, yang wal liliam bas, kan lalahki mâ kum tiwan kan ba pat sakri sa.’ 10Yang mai wisni, baha sim natka ra, Gâd insalka nani ba lilia sa upla saurakira kum ai kupia lakuya ba ra.”

Luhpia waitna tiwan maprika lilka ba

11Jisas naha sin wisata: “Waitna kum luhpa waitna wâl bri kan. 12Witin nani wâl ba wina kau wahma ba ai aisika ra win: ‘Aisiki, naika diara aikaia sma ba mahka aik.’ Bamna aisa ba mita diara nani sut ai luhpia wâl ra yui yan. 13Yu kulki luan ningkara, luhpia waitna kau wahma ba ai dukia nani sut asla wahbi brih, plis laihura wan, bara bahara saura baman dauki, ai lalahka kata ba sut âpu tikan. 14Ai lalahka sut âpu tikan ningkara, plun tiwan tara pali kum baha pliska ra balan, bara witin mahka plun wahwan. 15Bamna witin baha kuntrika uplika kum wal wark takaia wan, bara baha uplika mita daiwan auhbi bri kan ba pliska ra blikan, kwirku nani main kaikaia. 16Witin sin brin dauki kan ai biara ba banhkaia plun taya nani kwirku nani pi kan ba ni, sakuna upla kumi pan baha sin sip yaras kata. 17Bâra mika witin ai kupia wal aisin: ‘¡Papiki watla ra wark uplika nani ba plun manis brisa, kuna yang lika nahara plun bla pruisna! 18Bara yang aisiki ra kli tawi wamni, bara wimni: Aisiki, yang saura yâri, Gâd mawanra bara man mamwanra sin; 19yang kli luhpiam ai wiaia sip apia, sakuna warkkam uplika kumi baku ai kulks.’ 20Bamna witin mahka yabal ra aimaki wapan ai aisika watla mata.

“Sakuna witin kau laihura kan ba ra, ai aisika mita latwan pali kaikan, bamna mapara plapi wih, ai klahkla ilingki, kiawali, witin ba brin. 21Baku mika luhpia waitna bila: ‘Aisiki, yang saura daukri, Gâd mawanra bara man mamwanra sin; bamna yang na man luhpiam kli ai wiaia sip apia.’ 22Sakuna aisa ba ai albika nani ra wisata: ‘Aihni muns bara prâk kau pain pali ba saki bri sal dingks; mihtadingka sin kum ai mihta ra dingks, sûs sin ai mina nani ra. 23Bîp lupia batanira ba sin sal iks, ¡bara kaisa yawan baha pih lilia daukaia! 24Kan naha luhpi waitna pruan kan, kli rawan; tiwan kan, yawan bui witin na kli sakan sa.’ Bamna mahka lilia daukan.

25“Baha piua ra, luhpia waitna almuk ba insla ra kata; witin insla wina pat utla lamara balan ba ra, miusik lilia dans puli binka ba walan. 26Witin alba nani ba wina kum winan balan, bara makabi walan dîa takisa sapa. 27Alba ba bila: ‘Man muihkam balan, bara aisikam mita yan bîp lupia batanira ikan, witin ba pain bara yamni balan bamna.’ 28Sakuna muihnika almuk ba ai kupia baikan, dimaia sin apia win; bara aisika bal, makaban utla ra dimaia. 29Bara witin ai aisika ra wisata: ‘Man pain kaikisma nahara nahki mani ailal man warkkam takisna, aima kumi sin bîlam lulkras, sakuna aima kumi sin man guts lupia kum pan aikras, yang upliki nani aikuki lilia briaia. 30Sakuna naha man luhpiam balan sa, witin lika man lalahkam rug mairin saura nani wal bahki ra baman tikan, bara witin dukiara man bîp lupia batanira ba ikram.’

31“Bara aisa ba bila: ‘Luhpi, man lika yu bani yang wal sma, bamna diara sut brisna ba man dukiam atia sa. 32Sakuna nanara lika pain sa yawan lilia tara daukaia, kan muihkam pruan kata ba kli rawan sa; witin tiwan kan ba, kli yawan sakan sa.’

Currently Selected:

Luk 15: MSKTU

Highlight

Copy