Luk 11

Jisas bara pura sunra ba

(Mt 6.9-15; 7.7-11)

1Yu kumi Jisas plis kum ra ai pura suni kan. Witin ai pura suni luan ba ra, disaipil nani ba tila wina kum mita naku win:

—Dawan, pura sunaia wan smalks, Jan ai disaipilka nani ra smalkan ba baku.

2Jisas bila witin nani ra:

—Man nani puram sunma ba ra, naku wis:

‘Aisa, ninam holikira ba kulkan kabia.

Man king aimakaia ba yarka balbia.

3Yu bani, yang nani aitani piaia praiska plun aiki bas.#S L 30.8-9.

4Yang nani saurki nani ba ban swih tiks,

wan mapara saura dauki uplika nani ra

yang nani mita saurka tikisna ba baku.

Wan traika kaikan mihta ra ban wan swipara.’

5Jisas naha sin kau win:

—Yawan ban wibia kaka, man nani wina kumi ba ai uplika ra wibia brit kum brisma, bara tihmia wâl bakriki baha watla ra wih wisa: ‘Upliki, pliskam yang ra brit yumhpa lin ai muns, 6kan bisiura pali upliki kum impaki, yang waitla ra balan, bara witin ra diara yabaia âpu sna.’ 7Yang kasak nu sna utla bilara ba baha luki pana wibia apia: ‘Man bui yang ra trabil ai munpara; dur ba pat prakan sa bara luhpi nani sin yang wal krikri ra sa, bamna yang bui man ra diara kumi sin maikaia sip apia sna.’ 8Yang bui man nani ra mai wisna, witin bubia apia diara kumi sin yaia apia dukiara, sakuna ban witin mita want wibia ba sut yabaia, kli kra trabil munbia apia dukiara. 9Baku bamna, yang bui man nani ra mai wisna: Makabi bas, bara Gâd mita maikbia; pliki bas, bara sâkma; dur ra kingbi bas, bara man nani ra kwâkan kabia. 10Kan ya makabi ba, brisa; bara ya pliki ba, sakisa; bara dur ra kingbi ba ra sin, kwâkan sa.

11“Ban kra man nani wima kumi ba aisa kum sma kaka, ¿sip kama ki luhpiam inska makabia kaka, piuta kum ni yaia? 12¿Kalila mahbra makabia kaka, misri ni yaia? 13Man nani upla saura, ban sakuna luhpiam nani ra diara pain nani yaia nu sma, ¡kau pali Aisikam kasbrika purara ba Spirit Holikira yabia, baha nani witin ra makabia ba ra!#Jn 14.13-14; 15.7,16; 16.23-24; 1 Jn 3.21-22; 5.14-15.

Sitan karnika Jisas brisa wisi dahra saki ba

(Mt 12.22-30; Mk 3.20-27)

14Jisas mita pirit saura kum, waitna kum ra sturi aisaras bîlas dauki bri kan ba wina kangbi saki kan, bara pirit saura ba takan ba ra, bîlas kata ba mahka sturi aisin. Naha dukiara upla nani tâ iwan takan. 15Sakuna upla tila nani bila: “Naha waitnika pirit saura nani kangbi saki ba, Bilsibub karnika mita, kan witin sika lasa nani wihtka sa.”#Mt 9.34; 10.25.

16Wala nani lika traika kaiki makaban, sain aihka kum kasbrika pura wina dauki marikbia.#Mt 12.38; 16.1; Mk 8.11. 17Sakuna Jisas lika kaikan baha nani dîa luki kan ba, bamna win:

“Ani king tasbaya yakan tar baiwi taki, kumi wala mapara aiklabi ba, aisawbia; ani utla uplika sin aiklabi dakwi taki ba, baha sin aisawbia. 18Baku sin, Sitan yakan dakwi takbia kaka, ¿nahki ai karnika ba ban kabia ki? Naha yang wisna, kan man nani ai wisma, yang pirit saura nani kangbi sakisna Bilsibub karnika ni. 19Baha ba baku sa kaka, ¿ya mita ninam blablikra nani ba ra baha nani kangbi sakaia karnika yabisa ki? Baha mita witin nani marikisa man nani lika mistik ra sma. 20Sakuna Gâd karnika ni sika pirit saura nani kangbi sakisna ba, bamna marikisa Gâd Kingka lâka ba pat man nani ra balan sa.

21“Waitna karnikira kum aiklabaia dukia nani wal ai watla ba aihwaki kaiki kaka, bahara dîa bâra ba lika pain kabia. 22Sakuna witin wal kau karnakira kum ba mita pura lubia kaka, baha aiklabaia dukia nani kasak kulki bri kata ba sut mihta dakbia, bara upla wala nani ra sin yabia.

23“Ya yang wal apia ba, maipara sa;#Mk 9.40. bara ya yang wal wahbras ba, yakabisa.

Pirit saura kli tawi balan ba

(Mt 12.43-45)

24“Upla wina pirit saura taki auya ba ra, witin tasba lâwan nani bâk impaki watauki ris plikisa. Sip sakras ba ra, ai kupia wal aisuya: ‘Yang waitla wina takatna ba ra kli waia sna.’ 25Kli aula ba ra, baha uplika ba sakuya sim utla kum pahban, pain sin skahkan ba baku. 26Bamna witin auya, bara pirit saura witin wal kau saura pali 7 brih aula, bara sut ba uplika ba ra dimuya, bamna baha uplika rayaka ba kau saura takuya, kan piua ra kata ba wal.”

Liliaka kasak ba

27Jisas naha diara nani na aisi kan ba ra, upla nani ba tila wina mairin kum ai tâ baiki winan:

—¡Lilia pali sa baha mairka mai baikan ba, bara mai pakan ba!

28Witin pana aisin:

—¡Kau yamni pali sa baha uplika nani Gâd bîla wali, ba kat dauki nani ba!

Upla saura nani ba sain aihka kum makabisa

(Mt 12.38-42; Mk 8.12)

29Upla kau ailal bal Jisas lamara asla taki kan; bamna witin mahka baha nani ra naku aisi, win: “Naha piua uplika nani na lika saura sa, kan witin nani sain aihka kum makabisa;#Mt 16.4; Mk 8.12. sakuna sain kumi sin marikan kabia apia, prapit Jona sainka baman lika. 30Jona ba Ninibi ra iwi uplika nani mapa ra sain kum kata ba baku,#Jon 3.4. Upla Luhpia Waitna ba sin naha piua uplika nani mapa ra sain kum kabia. 31Lâ tara piua ra waupasa tani kwinka ba tit bûi, naha piua uplika nani na pât ra lulkbia, kan witin sika plis laih pali wina balan, Salaman sinska lâka tara ba walaia;#1 Ki 10.1-10; 2 Kr 9.1-12. bamna kaiks, diara kum nahara yana lika Salaman purkara kau tara sa. 32Lâ tara piua ra, Ninibi uplika nani sin tit bûi, naha piua uplika nani ra pât ra lulkbia, kan baha nani Jona mita smalkan ba ra, ai saurka nani wina ai kupia lakan;#Jon 3.5. bara nahara na Jona purkara kau tara sa.

Wan wîna tara lampka ba

(Mt 5.15; 6.22-23)

33“Upla kumi sin âpu sa, lamp angki ba ra plis kum ra yukuki swi ba, apia kaka, baks tara kum munhtara mangki ba; sakuna witin lika purara sunuya,#Mt 5.15; Mk 4.21; Lk 8.16. upla nani bal dimi ba ingni bri kaia dukiara. 34Wan nakra nani ba lika wan wîna tara lampka baku sa; man namkra nani ba pain sa kaka, man wînam tara aiska ingni brisa; sakuna man namkra nani ba saura sa kaka, wînam tara aiska ba tihmu ra sa. 35Aman kaiks, baha ingnika brisma ba tihmu takbiara. 36Baku bamna, wînam aiska ra ingni brisma kaka, tihmu wiria sin âpu, baku mika diara nani sut ba param kaikma, lamp kumi ai ingnika maiki ba baku.”

Jisas bui parisi nani bara Lâ Smasmalkra nani dahra sakisa

(Mt 23.1-36; Mk 12.38-40; Lk 20.45-47)

37Jisas aisi kata ba mahka swin ba ra, parisi kum mita paiwan ai watla ra plun piaia. Bara witin dimi, tibil ra mahka iwan. 38Parisi ba kaikan, Jisas lâ ba kat ai mihta sikbras plun pi kan ba, bamna aihka lukan. 39Sakuna Dawan bila:

—Man nani parisi nani lika kâp bara plit ba nina tani baman sikbisma, sakuna man nani kupiam ra lika implikan lâka bara diara saura ni sin aibanhwan sa. 40¡Taniskira nani! ¿Man nani kaikras sma ki, witinka lata tani daukan ba, kupia bîla tani sin daukan sa? 41Sakuna man nani mita umpira nani ra diara yabi bas bîla tani ra bâra ba wina, bara baku mika diara sut klin daukan kabia.

42“¡Alai, man nani, parisi nani! Mint wahia, ru wahia bara diara sirpi pâwi ba sut wina Gâd ra matawalsip bani wina kumi yabisma ba,#Lib 27.30. sakuna diara wapni bara Gâd latwanka lâka bîla walras sma ba. Naha diara nani sika man nani daukaia sma ba, diara wala nani sut ba sin ban dauki kira.

43“¡Parisi nani, alai pali kabia man nani ra! Kan Ju nani priaska watla nani ra tara kulkan nani iwaika ba brin mai dauki, bara man nani want sma yabal ra upla nani tara mai kulki lamkula wibia.

44“¡Alai pali kabia man nani ra! Kan man nani lika raiti yukuwan ra ba baku, upla mita purak ai dara walras wapi lui ba baku sma.

45Lâ Smasmalkra kum pana win:

—Smasmalkra, man naha aisisma na wal yang nani ra sin swiri daukisma.

46Sakuna Jisas pana win:

—Man nani Lâ Smasmalkra nani mampara sin alai pali kabia, kan upla sip twilkaia apia karbanka nani ba upla pahpaya ra sunisma twilkbia wisi; sakuna man nani lika mihtam kulkaika kumi ni sin kangbras.

47“¡Alai pali kabia man nani ra!, kan man nani sika damikam nani mita Gâd prapitka nani ikan raitika ba paskisma. 48Baha wal marikisma, damikam nani dîa daukan ba man nani mampa ra pain; bamna damikam nani ikan, sakuna man nani lika raitika nani ba paskisma.

49“Baha mita, Gâd ai sinska lâka tara ba wal naku wisata: ‘Yang bui witin nani ra prapit nani bara apastil nani sin blikamna, sakuna baha nani wina tila kum kum ba ikbia, bara wala nani ra lika bliki rausauhkbia.’ 50Bamna Gâd naiwa piua uplika nani ra tasba paskan piua wina, ai prapitka nani iki banhwan tâlia mana makabia, 51Abel#Bla St 4.8. tâlia ba wina Sakaraya#2 Kr 24.20-21. tâlia ba kat. Sakaraya sika altar bara tempel wal lilapas kat ikan ba. Baku bamna mai wisna, Gâd baha traska dukiara sika naiwa piua uplika nani ra alkbia sa.

52“¡Alai pali kabia man nani Lâ Smasmalkra nani ra! Kan man nani diara tânka kaikaia kîka brisma ba; sakuna man nani sin dimras bara diman dauki nani ra sin yaram dimras.

53Jisas baha wina takan ba ra, Lâ Smasmalkra nani bara parisi nani witin mapara ai kupia baikan, bara diara ailal makabi wali sin trabil muni kan, 54bara aihwaki kaiki kata dîa pan witin nani walbia kaka, witin dahra sakaia.

Currently Selected:

Luk 11: MSKTU

Highlight

Copy