Judas 1

Lakula bîla

1Yang Judas,#Mt 13.55; Mk 6.3. Jisas Kraist warkka dadaukra bara Jems muihnika ba, naha wauhkataya ulbisna, Gâd Aisa mita latwan kaiki ba bara paiwan ba, baha nani Jisas Kraist mita kan kahbi brisa. 2Bamna man nani lika yamni kaikan lâka, kupia kumi bara latwan lâka manis pali bri banhs.

Kunin smalki nani ba

(2 Pita 2.1-17)

3Muihki laitwankira nani, uya pali brin ai dauki kan, baha swaki sakan lâka yawan nani bri ba dukiara man nani ra ulbaia, sakuna nanara daira walisna naha ba daukaia sna, baku natka ra mamkabaia, man nani kasak lukankam ba dukiara aiklabi kama, baha lika aima kum yaban kata Gâd uplika nani ra. 4Bamna upla tila nani, kunin lâka ni tilara diman sa. Baha nani ulbanka ra pat maisa pakan sa, pât ban kaia ba ai dukia bribia. Baha nani lika upla saura nani sa, witin nani lika Gâd umpira kaikanka lâka ba brih, kunin lâka ra laki wan Dawanka kumi ba, Jisas Kraist ra kulkaia apia wisa.

5Man nani pain nu sma, kuna brin ai daukisa, Dawan ba mita sika Israel luhpia nani ba Idsip wina sakan,#Imp St 12.51. ningkara witin nani tilara, ani uplika nani kasak lukras kan ba âpu sauhki tikan.#Kul K 14.29-30. 6Bara insal nani, ai pliska bri kan ba main kaiki briras, sakuna ai watla pali ba sin swin nani ba, baha nani ra Gâd mita ban kaia ra priski, silak watla tihmu ra brisa, lâ tara yua balbia ba kat. 7Baku sin Sodoma, Gomora bara baha lamara tawan nani kan ba, baha insalka nani kauhan ba baku witin wîna nani sîn tara brinka mita munan saurka ra diman; saurka uba dauki ba mita, paskanka ban bâra ba mapara takan. Baha mita pauta ami ban kaia pâtka ba wahwan bara upla sut ra kupia kraukanka kum baku takaskan sa.

8Sakuna baha sut purkara, naha uplika nani yaprisauhkan kaiki ai wîna tara ra tâski daukisa, Dawan karnika ba bahki sakisa bara karnika aiska bri ba ra swira paskisa. 9Bamna arkinsal Maikel,#Dn 10.13,21; 12.1; Par M 12.7. Moses wîna tara briaia ba dukiara dibil wal aiklabi blahwi kan ba ra,#Kli S 34.6. witin dibil ra swira dauki kira pât ra lakras kan; sakuna naku baman win: “Dawan mita klala maikbia.”#Sak 3.2. 10Sakuna naha uplika nani lika witin nani ai nakra kaikras ba dukiara saura aisisa; ai sinska ni dukia tânka pliki kaiki ba lika sim daiwan nani ai sinska âpu ni kaiki ba baku sa, bamna dukia nani yus muni ba lika, witin nani yakan âpu takaia dukiara sa.

11¡Baha nani alai sa!, Ken daukanka nina blikan ba mita.#Bla St 4.3-9; Hib 11.4; 1 Jn 3.12. Lalah briaia dukiara, Balaam baku aimawahkan,#Kul K 22.1-35; Par M 2.14. Coré mapara buan tâka mita pruan ba baku, witin nani sut sin pruisa.#Kul K 16.1-35. 12Man nani aikuki pana pana latwan lâka ra lilia dukia daukisma ba lika, swira lâka pali sa; kan baha liliaka ra witin nani pih bara dih lilia takisa, kuna kulkanka lâka lika âpu pali sa, bara sepad nani baku, witin nani lika ai wîna kat baman main kaikisa. Witin nani sin kasbrika nani lî âpu kan, pâsa mita brih auya ba baku sa; dus nani ai piua kat sin mâ sakras kan, ai plamaya wina daikan bara aima wâl pruan ba baku sa. 13Kabu ripka prautkira nani baku, ai daukanka saura nani ba wina swira lâka nani ukatka ba sakisa; slilma nani ai yabalka tikan nani sa, pât ban kaia ra lulkan sa, tihmu tara tilara kaia.

14Bamna Henoc sin,#Bla St 5.18,21-24. naha sika Adam wina matlalkahbi pura kumika ba, witin lika Gâd dahra aisi, baha dukiara naku win: “Yang kaikri Dawan aula kan, ai insalka nani tausin ailal nani wal 15upla nani sut lâka daukaia, saura daukan nani ba saurka mana pât ra lulkaia, ai saurka nani daukan ba tâka mita, baku sin bîla karna nani witin mapara aisin ba tâka mita.” 16Naha nani sika brukwi aisasara bara diara sut ba saura baman sa aisi nani ba, witin nani ai âuyapah kaia dukia nani baman pliki taukisa; praut bîla nani sin aisisa, hilp briaia dukiara upla nani painka baman aisisa.

Kristian nani ra kupia kraukanka ba

17Sakuna muihki laitwankira nani, man nani kupiam krauki bas, patitara piua wina wan Dawan Jisas Kraist apastilka nani bui 18man nani ra mai aisin ba: “Tnata yua nani ra upla nani bâra kabia, diara holi ba dukiara lawaska kiki kabia, bara witin nani ai brinka ba kat baman sin tauki kabia.”#2 Ti 3.1-5; 2 Pi 3.3. 19Bamna naha nani mita sika upla nani aihka aihka dakbi saki ba; witin nani Gâd Spiritka âpu ba mita ai wîna brinka baman bîla wali daukisa.

20Sakuna muihki laitwankira nani, man nani lika kasak lukankam lâka holi ba kat ban bûi bas. Spirit Holikira karnika ra puram suni bas. 21Gâd latwanka lâka ra ban bas, bara bîla kaiki bas wan Dawan Jisas Kraist mita ai kupia pihni lâka ra, raya ban kaia lâka ba wankbia.

22Namhpa namhpa luki uplika nani ba hilp muns ai lukanka wapni kat bri kaia. 23Upla tila nani ba, pauta wina swaki sâks; bara kli upla wala nani ra lika umpira kaiks, witin nani ba sîa bris, ai kwalka nani ba kat sin sibrinka bris, kan baha ba sut sin tâski pali takan sa, ai rayaka saura ba mita.

Prakaia mayunanka ba

24-25Gâd kumi baman bara swaki wan Sasakra ba, karnika brisa main mai kaikaia kauhmara sîa, witin ai mawan pranakira ra maikka buma tâski âpu liliakira. Gâd ra mayunan kabia, tara kulkan lâka karnika bri ba lâka, bara lâ wihtka kaia aitani kulkan lâka ba sin, wan Dawan Jisas Kraist bâk patitara piua ba wina, nanara bara ban kaia ra. Baku kabia.

Currently Selected:

Judas 1: MSKTU

Highlight

Copy