Apastil Nani Sturka TÂ BÎLA NANI
TÂ BÎLA NANI
Naha wauhkataya ulbanka tâ pîska ba (1.1) Luk sturi yamni nani ulban ba wal praki kaikuya ba ra, kaikisa apastil wark nani daukan wauhkataya na, kainara sturi yamni nani ulban ba pîska tâka nani sa. Sip sa wiaia, sim ulbanka kum wina, pîska wala ba. Rait pali ba lika kainara ulbanka ba kli ulbisa, baku kau pain tânka briaia dukiara, Jisas kasbrika ra uli wan ba sturka, baha sturi yamni wauhkataya ra ulban kan ba.
Apastil wark nani daukan wauhkataya na ra aisisa, nahki Jisas Kraist nina blablikra pas nani kan ba, Spirit Holikira mita tâ brin bara kristian lâka kasak ba smalkan; Jerusalem wina Judia aiska ra, baha wina yahbra tani aiska, Sameria bâk, ban Ju apia nani tasbaya ra diman, Antíoco Siria ba kat brih wan. Baha wina Dawan bîla smalkanka ba kau ai tâura brih wan, Pal smalkanka wal; Asia Sirpi wina Grik tasbaya ra balan baha wina Rom ra diman, naha tawanka ba karnika tara alki bri ba kiapitalka sa.
Naha sika pas pali ra kristian aiawanka taki kan ba, baha ningkara muna tasbaya aiska ra diman, baha wina tasba aiska ra.
Naha aisanka ra, Pita bara Pal wal ba tâura saki bukan sa, tâ uplika kau tara nani baku. Sakuna kasak pali warkka tara na tâ bri ba lika Spirit Holikira sika, witin ai karnika bara tâura aimakan ba mita sika prias watla nani ba bal takan papaskrika, bara watla karnika ban kaia ra ba sika Kraist.
Baku bamna sika Spirit Holikira nina ba aima ailal pali wauhkataya ba ra mâki ba, Spirit Holikira ba, Pentikus yua ra karna pali lalukra nani purara bal iwan Jerusalem ra, baha piua wina tâ bri ba swiras ban brisa, tempel ra tâ baiki karna brisa, baku sin baha tâura aimaki nani ba ra, disaipil nani wark ban dauki auya kan ba piua aiska ra.
Kaina piua smalkanka nani ba, aisanka tara nani ra aisisa, bara dîa takan ulbi swin nani ba, marikisa nahki baha smalkanka nani ba, lalukra kumi bani ra tâ baikan ba, bara daknika nani witin wal kau ba ra sin.
Apastil wark nani daukan wauhkataya ba, dakbi sakanka yumhpa ra ulban sa:
(1) Tâura kristian nani Jerusalem ra, aiawanka ba (1.15—8.3), Jisas kasbrika purara uli wan ba ningkara, lâs adar yan ba ai pramiska nani (1.1-14).
(2) Kristian lâka Palestina tasbaya aiska ra diman ba (8.4—12.25).
(3) Ba ningkara Mediterráneo tasbaya aiska ra wan ba, baku ban Rom kat; Pal pas pali taki wan ba smalkaia (13.1—14.28), Jerusalem ra apastil nani wih almuk nani wal asla aisin ba (15.1-35); aima wala smalkaia taki wan ba (15.36—18.22); aima yumhpa ra smalkaia taki wan ba (18.23—21.16) bara Pal aima yumhpa ra silak ra kauhan ba, Jerusalem ra, Sesaria ra bara lâs ba Rom ra (21.17—28.31).
Currently Selected:
Apastil Nani Sturka TÂ BÎLA NANI: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua