Apastil Nani Sturka 3
3
Skahwa waitna kum rakan ba
1Yu kumi, tutni 3 aklak pura sunaia piua ra, Pita Jan wal tempel ra uli wan. 2Yu bani tempel durka Painkira wi ba lamara, waitna kumi aisubi takan wina skahwa kan ba, bri sal iki swin kan, upla nani dimi auya nani ra lalah hilpka makabia dukiara. 3Naha skahwa waitna kaikan Pita bara Jan wal tempel ra dimuya kan, bara witin ra diara yabia wisi makaban. 4Pita Jan wal lika naha skahwa waitna ra tawi kaikan, bara Pita bila:
—Yang nani kat ai kaiks.
5Bara waitna ba witin nani kat tawi kaikan, ai kupia ra lukan witin ra diara yabia. 6Sakuna Pita bila:
—Yang silbar bara gul kumi sin maikaia âpu sna; ban sakuna dîa brisna ba, baha lika sip kamna maikaia: ¡Jisas Kraist Nasaret wina ba nina mâki mai wisna, man mahka bûi, waps!
7Bara Pita mita mihta aihkika kat alki tâ baiki bukan, bara baha pali piua ra ai mina nani, ai lukutbaika nani sin pain takan. 8Baha pali yua ra, skahwa waitna ba ai mina ra pali tit bûi, mahka wapan. Bamna witin apastil nani aikuki tempel ra diman, wapi ban srutwi, Gâd ra mayuni kira. 9Upla nani mita sin kaikan, skahwa waitna kata ba wapi, ban Gâd ra mayuni kan. 10Baha diara aihka takan ba dukiara upla nani sut tâ iwan pali takan, aihka sin lukata, kan witin nani mita waitnika na kasak kakaira pali kan bamna; witin sika tempel durka Painkira wi ba lamara iwi hilp makabi kan ba.
Salaman durka bilara Pita aisin ba
11Skahwa kan rawan waitnika ba lika Pita bara Jan wal wina sip dakwi takras kata, bara upla nani sut sirang iwi plapi balan tempel ra Salaman durka wi ba tani ra, witin nani bâra kan ba kat. 12Pita naha diara kaikan, bara upla nani ra naku win: “Israel luhpia nani, ¿dîa kan tâ iwan taki, yang nani kat ai kaiki banhwisma? ¿Man nani lukisma naha waitnika witin nanara wapi tauki na, yang nani karniki ni, apia kaka dîa yang nani yamni daukri ba tâka mita rakri? 13Apia, sakuna Ebraham, Aisak, Jekob bara wan damika nani sut Gâdka mita ai Luhpia Jisas ba purara pali buki prana daukan,#Imp St 3.15. baha sim Jisaska ra sika man nani mita wihta nani mihta ra mangkatma ba,#Ais 52.13—53.12; Pil 2.7-9. bara Pailat pri sakaia win ba ra, man nani apia wisatma ba. 14Baha uplika holikira bara kasakkira ba pri sakaia makabaia ba watlika ra, man nani upla saurakira pali kum ni pri sâkbia makabatma.#Mt 27.15-23; Mk 15.6-14; Lk 23.13-23; Jn 19.12-15. 15Baku, raya kaia lâka wankaia sip uplika ba man nani mita ikram. Ban sakuna, Gâd bui witin ba pruan wina kli bukan, bara yang nani sika baha witniska nani. 16Naha sim Jisaska nina ra kasak luki ba mita sika naha waitna wapaia karnika brin, naiwa man nani sut kaikisma na, Jisas nina ra kasak lukan lâka ba mita sika. Baha kasak lukan mita sika aiska pali rawan na, baku man nani sut kaikaia sip sma.
17“Muihki nani, nanara yang tânka ba brisna, man nani wihtkam nani aikuki Jisas ikram ba lika, tânka briras katma dîa dauki katma sapa. 18Kuna baku natka bâk baman Gâd sip kan, witin ai prapitka nani bâk Misaya ba pât wauhbia dukiara aisin ba, tnata alkaia. 19Baku bamna, man nani sut daukankam saura nani wina mahka Dawan ra taws, bâra mika saurkam nani sut ba diki sakan kabia. Baku bamna, Dawan bui man nani mai rakaia piua ba blîkbia, 20bamna Jisas ba blîkbia, witinka man nani dukiam wisi kan wina pat sakan kan ba Misaya baku. 21Ban kra nanara Jisas Kraist ba kasbrika purara takaskaia sa, diara nani sut Gâd mita raya daukbia kat, witin ai prapitka nani bâk piua luan nani ra aisin ba baku. 22Baku bamna, Moses mita wan damika nani ra naku maisa pakan sa: ‘Dawan Gâd mita man nani muihkam nani tila wina, prapit kumi saki blîkbia yang ai blikan na baku. Bamna man nani bui witin ai smalkanka ra pain wali bas. 23Upla bani baha prapitka ba bîla walras kabia kaka, âpu daukan kabia, bara Israel nisanka wina saki lulkan kabia.’#Kli S 18.15-19; 34.10.
24“Baku bamna, prapit nani sut ba, Samuil wina ai kainara, ban aisin sa naha dukiara. 25Gâd ai pramiska nani ai prapitka nani bâk aisin ba man nani dukiam sika aisin; Gâd wan damika wal lâ daukan lâka prapatika ba man nani sin dawanka sma. Gâd bui Ebraham ra win: ‘Tasba ra nisan nani sut ba man kiamkam nani bâk yamni munan kabia.’#Bla St 12.3; 22.18. 26Bamna Gâd ai Luhpia Jisas pruan wina kli bukan ba ra, witin ba man nani ra pas blikan man nani ra yamni mai munaia, man nani kumi bani saurkam nani ba swiaia bara kupiam lakaia.”
Currently Selected:
Apastil Nani Sturka 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua