Apastil Nani Sturka 25

Pal Festo ra waia makaban

1Bamna Festo ba wihta tara aimakaia pliska ba alkaia wan, bara yu yumhpa luan ningkara, witin Sesaria wina Jerusalem ra wan. 2Bara prîs wihta tara nani, bara Ju tâ uplika nani mita witin ra Pal dahra kwahkan. 3Witin nani makaban, witin nani ra pain luki kaka, du pali Pal ba Jerusalem ra bri balbia. Witin nani pat lâ daukan kan Pal ba yabal ra ikaia, 4sakuna Festo mita win, Pal lika silak ra sa Sesaria ra, bara witin sin lukisa piua wiria ningkara, bahara waia. 5Bara naku win:

—Man nani tâm uplika nani ba blîks yang wal Sesaria ra wabia, bamna baha waitnika dîa swakwanka nani bri kaka, sip sa dahra kwahkaia.

6Festo ba Jerusalem ra kan yu 8, apia kaka yu matawalsip baku, baha wina kli Sesaria ra wan. Yu wala ra witin ai lâ iwaika ra wih iwan, bara win Pal ba witin ra bri balbia. 7Pal ba dimi balan ba ra, Ju nani Jerusalem wina aidrubi balan kan ba witin tnaya ra kir bal buan, bara mahka Pal dahra kwahki diara saura manis aisin. Sakuna baha tânka nani sut lika param apia kan. 8Bamna Pal ai tânka ba dukiara param saki aisin:

—Yang diara saura kumi sin daukras, Ju nani lâka mapara, tempel ba mapara sapa, bara Rom kingka mapara sin apia.

9Sakuna Festo lika Ju nani wal pain kaia ba dukiara, Pal ra makabi walan:

—¿Man Jerusalem ra waia want sma ki, bahara yang lâmka daukaia?

10Pal bila:

—Yang Rom kingka lâka daukaika pliska mawanra buisni, baha mita nahara lâika ba daukaia sa. Man sin pain kaikisma yang na Ju nani lâka mapara diara saura kumi sin daukras. 11Yang diara saura kum daukri bara pruaia aitani kaka, yang wilin sna pruaia. Sakuna daihra kwahki nani sut ba kasak apia kaka, upla kumi mita sin sip apia witin nani mihta ra ai mangkaia. Bamna yang makabisna Rom kingka mita lâika ba daukbia.

12Festo ai kupia krauki uplika nani wal aisin ba ningkara, witin bila:

—Rom kingka mita lâmka daukaia makabram bamna, man bahara waia sma.

Pal king Agripa mawanra

13Yu tila nani luan ningkara, king Agripa Berenice wal Sesaria ra balan Festo lakula wiaia. 14Yu ailal bahara takaskan bamna, Festo bui Pal lâka ba king ra maisa paki, win:

—Nahara waitna kum Félix mita silak ra swin sa. 15Yang lika Jerusalem ra katna, bara prîs wihtka tara nani bara Ju tâ uplika nani sut mita witin na dukiara saura baman dahra kwahkan, yang ra sin makaban pât ra lulkamna. 16Yang pana witin nani ra wîri, Rom wihtka nani ba lâ briras sa, upla kumi tânka pain pliki kaikras kira ban ikaia, uplika ba dahra kwahki uplika nani wal ai mawan prakras kaka, bara baku lâ dingki ba dukiara, sip sa ai tânka sin klir aisaia. 17Baha mita, witin nani nâra balan ba ra, pat pali yang yu wala mahka lâ daukaia iwaiki ra iwri, bara wîri waitna ba brih balbia. 18Dahra kwahki nani ba buan, sakuna yang luki katna ba baku, witin dukiara diara kumi sin aisaras kan. 19Witin nani aisi kan ba lika witin mapara ai sertska lâka ba dukiara baman, bara waitna kum nina Jisas, witin pruan sakuna Pal bila witin ba lika raya sa wisa. 20Nahmuna lâka daukaia yang tânka briras kapri, bamna yang Pal ra makabi walri, witin ai lâka Jerusalem ra daukan kaia want sapa. 21Sakuna witin makaban Rom ra king tara ba mita ai lâka ba daukaia, bamna adar yâri witin ba silak ra ban bri kabia, ani piua king tara ra blikaia sip kamna ba kat.

22Bamna Agripa mita Festo ra win:

—Yang sin brin ai daukisa, baha waitnika wina diara walaia.

Bara Festo bila:

—Yauhka pali man bui witin ba wina walma.

23Yu wala, Agripa Berenice wal balan, kasak pain aiskahkan kira. Witin nani lâ watla ra bal diman, suldiar wihtka nani aikuki, bara tawan wihtka nani sin. Festo mita blikan Pal ba bri balaia, bara witin ba bri balan. 24Bara Festo bila:

—King Agripa bara upla wala nani sin, yang nani aikuki nahara asla takram nani ba sut: Man nani pain kaikisma, nahki Ju nani naha waitnika dukiara saura baman ai win, Jerusalem ra bara naha Sesaria ra sin, piua bani ban ai win, witin ba pruaia sa. 25Sakuna yang kaikisna witin pruaia pâtka briaia diara kumi sin daukras sa. Sakuna witin makaban Rom ra king tara ba mita ai lâka ba daukbia, bamna yang wilin takri sa witin na king tara ra blikaia. 26Witin na tânka yang dawanki king tara ra diara ulbaia briras pali sna. Bamna witin na man nani mamwanra, bara kau pali, king Agripa, man mamwanra sin saki brih aulna, ai tânka ba pain makabi walma, bara yang sip kamna dîa pan ulbaia. 27Yang maipara tanis lâka sa, silak uplika kum blikaia, dîa pali witin dukiara dahra kwahkan ba tânka wiras sna kaka.

Currently Selected:

Apastil Nani Sturka 25: MSKTU

Highlight

Copy