Apastil Nani Sturka 23

1Pal ba Ju lâka dadaukra wihtka nani ba kaiki, naku win:

—Muihki nani, piua bani ban naiwa kat sin, Gâd mapara lukanki na pain brisna.

2Bamna Ananías, prîs nani sut wihtka ba, Pal lamara bûi kan uplika nani ra adar yan, witin ba lika ai bîla kat prukbia. 3Sakuna Pal pana win:

—¡Dawan mita man ra mai prukbia yu kumi, kuninkira!#Mt 23.27. ¿Man baha iwaika ba wina lâ ba kat lâika daukisma ki? Sakuna kaiks, man mita lâ ba krikisma, ai prukaia adar yabisma bamna.

4Baha nani bâra kan ba win:

—¿Man baku Gâd prîska tara ba swira daukisma ki?

5Pal bila:

—Muihki nani, yang kaikras kapri witin ba prîs tara kan ba, kan Ulbanka ra naku wisa: ‘Man tasbayam wihtka mapara saura aisapara.’#Imp St 22.28.

6Bamna Pal kaikan, Ju lâka dadaukra wihtka tila nani ba sadiusi nani, bara wala nani ba parisi nani kan. Bara witin ai bîla baikra karna ni wini, aisin:

—Muihki nani, yang na parisi sika,#Ap St 26.5; Pil 3.5. kan aisiki ba parisi kan bamna. Bara nahara lâ ra ai bri na lika, pruan nani kli raya bubia bîla kaikisna ba tâwan.

7Naha aisin ba ra, parisi nani bara sadiusi nani aikuki mahka pana pana aisi blahwan, bamna aidrubanka ba dakni wâl takan. 8Kan sadiusi nani wisa pruan nani ba kli bubia apia,#Mt 22.23; Mk 12.18; Lk 20.27. insal nani bara spirit sin âpu; sakuna parisi nani lika baha diara nani sut ba kasak lukisa. 9Sut ba wini banhwi kan; bamna parisi daknika tila ba wina Lâ Smasmalkra tila nani sin buan, bara win:

—Naha waitnika na diara saura kumi sin daukras, ban kra spirit kum, apia kaka insal kum sapa witin ra aisin.

10Blahwanka ba tara kan bamna, kamandanti ba sibri kan. Witin luki kan ban kra upla nani mita Pal ba alki kalki yuya man daukbia. Baku bamna, witin mita suldiar nani paiwan, Pal ba baha nani tila wina saki, kli kwartil ra brih wabia.

11Tihmia wala ra, Dawan mita Pal ra bal win: “Pal, kupiam karna bri bas; Jerusalem ra, yang witniski aisaram ba baku, man Rom ra sin aisama.”

Pal ikaia lâ daukan

12Yu wala titan, Ju nani asla taki swer taki kira lâ daukan, witin nani plun pibia apia, diara sin dibia apia, Pal ikbia ba kat. 13Pal ikaia swer taki ba lika waitna asla 40 pura kan. 14Witin nani prîs tara nani ra bara wihta almuk nani ra sin wih win:

—Yang nani swer taki kira lâ daukri, plun piaia apia, diara sin diaia apia, Pal ikamna ba kat. 15Bamna man nani bara Ju lâka dadaukra wihtka nani aikuki kamandanti ra aisas, yauhka Pal ba man nani mamwanra bri balbia, ai lâka ba kau pain pliki kaikaia baku. Bara kaiks, yang nani lika pat ridi kamna Pal ba ikaia, kau man nani mamwanra waras ba ra.

16Naha sturka na Pal lakrika luhpia waitna wahma kum kiama ra diman, bara witin kwartil ra wan baha tânka ba Pal ra maisa pakaia. 17Bamna Pal mita kiaptin kum winan witin ra balan, bara win:

—Naha tukta waitna wahma na kamandanti ra brih was; witin sturi brisa wiaia.

18Bara kiaptin ba tukta waitna wahma ba bri kamandanti ra wan, bara win:

—Baha Pal yawan silak ra bri ba mita ai paiwan wari, bara ai win naha tukta wahma na sturi man ra mai wiaia brisa, bamna man ra bri balamna.

19Kamandanti ba mita tukta wahma ba mihta ra alki, wal aihka tnaya ra taki, makabi walan:

—¿Man dîa ai wiaia brisma ki?

20Bara tukta waitna wahma ba bila:

—Ju nani lâ daukan mamkabaia, yauhka man Pal ba Ju wihtka nani mawanra bri waia, kunin baman ai tânka ba kau pain pliki kaikaia baku. 21Bamna man baha nani bîla walpara; kan witin nani tila wina waitna 40 pura yukuwi bîla kaikisa, swer sin taki banhwan plun piaia apia, diara sin diaia apia, Pal ikbia ba kat. Bara nanara baha nani ridi pali sa, dîa man wima ba bîlam kaikisa.

22Bara kamandanti tukta waitna wahma ba mahka blikan wan, bara win witin ra dîa sturka aisin ba upla kumi ra sin wiaia apia.

Pal ba wihta tara Félix ra blikan

23Kamandanti bui kiaptin wâl witin ra winan balan, bara adar yan suldiar nani ridi sâkbia Sesaria ra waia, tihmia 9 aklak, 200 suldiar ai mina ra wapaia, 70 ba lika aras ra uli, wala 200 ba lika langsa bri kan. 24Baha purkara, adar yan aras nani ridi daukbia Pal ulaia dukiara, bara sin win Pal ba yamni pain wihta tara Félix mihta kat brih wabia. 25Witin nani ba wal wauhtaya sin naku ulbi, blikan:

26“Claudio Lisias ba wina Félix wihtka tara ba ra lakula daukisa: ¡Naksa! 27Ju nani mita naha waitnika na alki ikai kan, sakuna walri witin na Rom suliarka sa, bamna suldiarki nani aikuki wih dakbi sakri. 28Yang sin walaia want kapri, dîa pali tâwan ai dahra kwahki kan ba, bamna Ju nani wihtka nani mawanra brih wari, 29bara tânka pliki kaikri, bara baha lika witin nani ai lâka ba dukiara kan, sakuna witin ra ikaia, apia kaka silak ra mangkaia pâtka âpu pali kan. 30Sakuna yang sturi walri, Ju nani mita witin na ikaia lâ daukan, bamna man ra blikuna, bara yang wîri dahra kwakwahkra nani ba sin man mamwanra bal aisabia. Bamna aisabi.”

31Bamna suldiar nani mita dîa witin nani ra adar yan ba kat, Pal ba brih tihmia Antípatris ra brih wan. 32Yu wala titan, suldiar nani ai mina wapi nani kan ba sut kli kwartil ra wan, sakuna aras ra uli kan ba lika ban Pal wal wan. 33Witin nani Sesaria ra balan ba ra, wauhtaya ba wihta tara mihta ra mangkan, bara Pal ba sin. 34Wihta tara ra wauhtaya yan aisi kaikan ningkara, makabi walan Pal ba ani wina sapa. Cilicia wina sa win walan ba ra, 35witin Pal ra win:

—Man wina walamna damhra kwahki nani ba aidrubi balbia taim.

Bara adar yan suldiar mihta ra mangkaia, king Herod watla ra bri si main kaiki bri kabia.

Currently Selected:

Apastil Nani Sturka 23: MSKTU

Highlight

Copy