2 Korint 12

Diara aihka nani Pal param kaikan ba

1Diara kumi sin hilp sakras upla kum witin yakan ai dukiara diara aisaia tânka ba wina, bamna kanra pain kabia diara aihka nani bara param kaikri dukia nani Dawan ai marikan nani ba aisaia. 2Yang waitna kum kaikisna, witin Kraist ra kasak lukisa, mani 14 luan ra baha waitnika ba kasbrika purara yumhpa ba kat brih wan kata. Pain kaikisna, witin ba wîna tara lâka ba kat brih wan sapa, apia kaka spiritka brih wan sapa; baha lika Gâd baman kaikisa. 3Sakuna baha waitnika tânka yang kaikisna ba lika, (witin ai wîna tara lâka kat kata sapa, apia kaka spiritka ra kata sapa kaikras sna, sakuna Gâd lika kaikisa); 4bara witin ba Paradais kat brih wan, bahara bîla baikra tânka sip briras ba walan, bara baha tânka sip upla kumi ra sin wiaia adar âpu kan. 5Baha sât waitnika ba dukiara lika yang sip sna maiyunaia, kuna yang pali dukira lika sip maiyunras, ban diara nani swapniki tânka param saki ba kaka lika. 6Ban kra yang painki tânka aisamna kra, kuna baha lika sinskas tânka lika apia, kan diara kasak ba baman aisi kamna sa; kuna baha daukras sni, baku lika upla kumi sin wibia apia, yang na kau tara dîa ai kaiki ba wal, apia kaka upla wala yang aisari wali ba wal sin. 7Diara nani param kaikri ba lika diara aihka pali kan, baha mita yang sip maiyunamna apia, wîni ra latwan kum aikan kata sin wîni tara ra kiaya kum ai diman ba baku, bara baha lika Sitan warkka baku balan kan wîni tara ra rausauhkaia. 8Baha latwan brisna ba wîni wina sâkbia dukiara, Dawan ra aima yumhpa makabri, 9kuna Dawan ai win: “Yang latwanki lâka sika man want sma ba; yang karniki ba kau pain param marikisni upla ba swapni ba ra.” Baha mita uya lilia sna swapnikira sna bamna, bara baku mika Kraist karnika ba yang ra param marikan kabia. 10Baha ba mita swapnika lâka nani wal lilia sna, swira paskan lâka nani, dîa dîa want kaia, rausauhkan lâka nani Kraist tâwan trabil nani brisna ba sin. Kan ani piua kau swapni sna kaka, kau karna sna baku daira walisna.

Korint sertska dukiara Pal ai kupia trabil bri ba

11Yang lika upla tanis kum baku diara daukri, sakuna man nani mita ai munram baku daukaia. Kan man nani lika yang painki bara yamniki aisaia sip kapram. Kan apastil tara nani man nani mita nina blikisma ba wal, yang kau mâyara apia sna, man nani diara apia ai kulkisma sakuna. 12Baha warkka man nani tilamra kupi bawikira pali daukri ba ai marikan sa, sain nani ba mita bara wark aihka nani ba mita sin, yang na kasak apastil sna. 13Bamna man nani ba serts wala nani wal kau mâyara sma lika mai kulkras katna, bara yang mita wirhika kumi sin man nani ra maikras katna. ¡Naha kupia sauhkanka na dukiara, pliskam saurki swih tiks!

14Nanara yang pat ridi sna man nani wih mai kaikaia bara naha kat aima yumhpa kabia, bara man nani mampara karban wirha kumi baku kamna apia. Kan dîa dîa brisma ba lika plikamna apia, kuna man nani pali ba mai pliki kamna; bamna aisa nani sika lalah nani apahki briaia sa ai luhpia nani dukiara, luhpia nani lika apia. 15Bamna yang maipa ra wilin pali tikamna dîa brisna ba man nani sulkam dukiara, bara yang pali wîni tara na sin ban tikamna; kaiks, man nani ra kau latwan mai kaikisna ba ra, man nani ba lika kau latwan ai kaikras taki banhwisma.

16Apia, yang lika man nani puramra karban wirha kum baku apia katna. Ban sakuna, upla tila aisi banhwisa yang namna âiya mâira sna bamna man nani minam ba alkaika kum ra wilkri. 17¿Dîa upla tila nani man nani ra blikri ba bâk kunin mai munri ki? 18Man nani mai kaikaia Taitus ra makabi blikri ba ra, wan muihni wala kum ba sin blikri. ¿Taitus mita kunin mai munan ki? ¿Kasak apia yang nani wâl ba sim sât tâinka briri, bara sim spiritka sin bri banhri?

19Ban kra man nani lukisma yang nani na man nani mamwanra pâtkas sna aisisna. Sakuna baku apia, yang nani Gâd mawanra bûi aisisna, Kraist uplika nani baku. Baha sut ba muihki laitwankira nani, man nani Spirit lâka ra kau pâwaia dukiara aisisna. 20Bamna si brisna man nani mai kaikaia wamna ba ra, yang brin ai dauki ba baku ban kra mai kaikamna apia, bara man nani ai kaikaia brin mai dauki ba baku kra ai kaikma apia. Si brisna ban kra man nani tilamra aiklaban nani, tuman lâka nani, kupia baikan lâka nani, wînam kat man lukan lâka nani, tatuskaia lâka nani, nina aisanka nani, praut lâka nani bara inipis lâka nani sut sin bâra kabia. 21Sibri sna kli balamna ba ra, Gâdki mita man nani dukiamra ai munka swiri takamna, bara ai munka upla manis dukiara inamna pat piua wihka saura daukisa sakuna tâski lâka ba sip swiras ba dukiara, waitna mairin wal marit âpu kira briaia lâka bara lâ saura lan takan ba dauki ban ba dukiara sin.

Currently Selected:

2 Korint 12: MSKTU

Highlight

Copy