Rut 4
4
Boas norok Rut sa
1Boas la'a nia odamata para'ik tatama la'a sidadi i tuk nia aro'o. Nia hati aro'o, paipai li opu ai kakmia sidadi aro'o kmaa rahmutu rodi radada istori. Raik noro raik, ni famila hea manei bele selu rotu para sa noro Rut moso li murik aro'o. Oierek Boas ngauk ni nodi du'a, "A'u ai! Maa tuk paik la ari'a! A'u presiza o." Likmori erek kaik moso la'a tuk nia aro'o. 2Soruk Boas ngauk li opu, likmori ili sangulu para sai saksi, ni du'a la'a sia, "Senhor sia kmaa tuk paik la ari'a rodi tilu li ri'a." Sia moso kla'a tuk.
3Boas nadada la'a ni famila manei nania 'direitu selu rotu' la'a Rut du'a, "A'u ai, o mahnunuk enek hnauk nusa hitak hea manei ita famila Elimeleke nini erek iak taik? Mamuna, kuandu nusa plele, ni la'a liak nia nusa Moabe, soruk ni nati nia aro'o. Oierek ni sa paluk Noemi pa hnali alik nai aro'o, i karak nahnauk nusa aro'o. 4Tilu oierek, a'u moso mahnunuk du'a: ia li a'u du'a enek munak a'u ai o, tan a'u ai o mak bele selu rotu modi hmo'uk nusa aro'o. Tanba a'u ai o norok Elimeleke pau hea hleu hnauk. Oierek se a'u ai o karak mala nusa aro'o, du'a mema la la'ik li opu si matahngiru, para si sai nahngesa saksi. Masik se o te karak, du'a la saksi si matahngiru, tan a'u karak mala. Tanba a'u ai o mak famila kapehi li moro ni. Masik se a'u ai o te karak, nusa aro'o teruk ma a'u."
Likmori erek kaik tara, "Pa mouk. A'u mak mala."
5Oierek Boas du'a tera, "Te naree kai, masik a'u ai o tenki mahnunuk aia, se o mala nusa aro'o, o moso tenki sa moro hahata Moabe, ngai Rut. Tanba ni mak sa noro Elimeleke ni ana manei pa nanati. Oierek a'u ai o tenki sa moro ni modi neek hunarahu la'a ni sa manei pa nanati. Oierek, ni nusa norok rariku te sai nai ita famila."
6Likmori erek kaik tara, "Se oida erek, te naree kai, a'u te mala da. Tanba se a'u mala maka a'u nusa norok rariku pa laku. A'u rariku norok a'u ana sei sai a'u ai Elimeleke ni hunarahu nini. Oierek, ia li a'u te sanga mala. Surik a'u ai Boas hleu mak selu rotu nusa aro'o i sa moro hahata aro'o."
7(Nia mamuna li, se likmori Israel karak intrega si direitu oida lalaak hei la'a likmori hei rala, si koluk si sinelus kneek la'a likmori erek kaik. Erek nahngesa de, si pa intrega si direitu.)#Deuteronomio 25:9
8Oierek likmori erek kaik intrega ni direitu la'a Boas du'a, "O mak mala hleu," ni moso koluk ni sinelus neek la'a Boas nia la'ik li opu si matahngiru.
9Soruk Boas du'a la'a li opu norok likmori nahula kakmia aro'o du'a, "Senhor sia nahula sai saksi nia hengi hea ari'a kaik. Direitu ari'a pa teruk nia a'u. A'u du'a enek mema, a'u karak selu rotu Noemi ni lalaak hira-hirak nahula manei Elimeleke norok ni ana parani, Kilion norok Malon manei pa kakmati. 10A'u kakarak te pania hleu da nusa aro'o, masik a'u moso sa moro hahata Moabe, Rut, Malon ni sa paluk. A'u karak sa moro ni, tan a'u pa selu rotu direitu erek. Oierek, ami ruak ana bele sai Malon ni hunarahu. Ni famila norok ni likmori kakmia aldeia sei te raplinuk ni ngai. Mi mak sai saksi nia hengi hea ari'a kaik."#Deuteronomio 25:5-6
11Li opu kakmia sidadi aro'o norok likmori nahula manei ramahmutu nia aro'o tara du'a, "Mouk nunu! Ami kmatak doi roro ami mata. Ami mak sai saksi.
Hahata manei tatama nia o ruma,
Opuna'i noi ni sai nahngesa Rakel norok Leia.
Tanba likmori Israel nahula kmaa nai siruak hunarahu.
Opuna'i noi o sai likmori para'ik nia Efrata,
sai likmori manei ngai aia nia sidadi Belem.#Jenesis 29:31
12Setik la'a Opuna'i neek ana la'a o li murik hahata nge nana'ik erek,
oierek miruak hunarahu sai rea,
oida ita pau-tamu Peres ni hunarahu,
Juda norok Tamar si ana."
Boas norok Rut sehu ana
13Oierek Boas norok Rut sa. Kuandu siruak pa sa, Opuna'i da'ik Rut ni ana ngenak hati, para ni bele isi haruak. Ni riha ana parani hea.
14Ni riha retak, hahata ai kakmia Belem du'a la'a Noemi de,
"Hahii la'a Opuna'i!
Tanba Ni pa neek hunarahu la'a o,
para o famila si ngai te laku.
Para ana erek nahrau-hngirua sai likmori para'ik nia Israel.
15Surik ana erek
noi o haklara alik!
Surik ana erek
tau mata la'a o se o pa ho'ik!
Tanba o apu manei rariha o pau erek,
pa tinak ni domin la'a o.
Apu hea erek,
neek la'a o ia li alik ana parani ili haitu."
16Noemi nasau ana erek, tau mata ni oida ni ana doi.
17Hahata-hata kakmia sidadi aro'o raklungu du'a, "Agora Noemi oida pa nania alik ana. Erek te keko da!" Si kneek ngai la'a ana ere 'Obede'.
Kuandu Obede na'ik ma'a, ni nia ana parani hea, ngai Jesse. Jesse nia ana parani hea, ngai David manei sasai ara.
18Hairak hea ari'a, mak pau-tamu Peres ni hunarahu:
Peres sehu ana Esron.
19Esron sehu ana Raun.
Raun sehu ana Aminadabe.
20Aminadabe sehu ana Nason.
Nason sehu ana Salmon.
21Salmon sehu ana Boas.
Boas sehu ana Obede.
22Obede sehu ana Jesse.
Jesse sehu ana ara David.
Currently Selected:
Rut 4: BRKG
Highlight
Share
Copy
Want to have your highlights saved across all your devices? Sign up or sign in
Wycliffe Timor-Leste © 2025 Wycliffe Bible Translators Inc