မးသဲ 11
11
အဖဳးစူထံစီၤယိၤဟၣ်အပွဲၤသဓဳ
(လူၤ ၇:၁၈-၃၅)
1ဘ့ယ့ၣ်ရှူးထူးလၤမှဲးလၤဝှါ စပွဲၤအပျဲၢ်အဘီၣ် ၡံးကၠံၢ်ပွဲၤ နဳၤ, စဟဲးထာ်ကဲၤဘ့နဳၤ စာ်ဘိထဲၢ် စကသိၣ်အံာ်သီအံာ်ကၱာ်ဒီထိးလၤဒဳ လၢ်ဝၤအအူးတစီာ်အပူၤနဳၤ.
2ဘ့နဳၤစီၤယိၤဟၣ်အီၣ်တဲၤကၱတၱၢ်ပူၤ, စသၱာ်ဟဲဘဲာ်ခရၱာ်အတဲးဖၱးတဲၤမဲၤတစီာ်ဒဳၣ်, စသဓဳကဲၤစပွဲၤအပျဲၢ်အဘီၣ်ကၠံၢ်ပွဲၤလ့ၤဒဲလၢ်ဝၤ ကယဳၤ, 3“နဲၤမၱာ်အကလ့ၤဘဲာ်တပွဲၤနဳၤဧါ. မၱတမၱာ်နီး ဝၤအီၣ်ဆိ ဧိၢ်ဘဲာ်ဝ့ၤအလဝ့ၤတပွဲၤ ဧါ.”
4ကၱာ်ဒီ ယ့ၣ်ရှူးဒီၣ်က့ၤစဲာ်တစီာ်ကယဳၤ, “က့ၤဒီဆးပီၢ်စီၤ ယိၤဟၣ်တဲၤထဲၢ် သံသၱာ်ဟဲ ဘဲာ်ကၱာ်သံစာ်ထၱးဘဲာ်တစီာ်နဳၤ. 5အကၢ် ဓူခံးတစီာ် စာ်ထၱးက့ၤ. အခၣ်ဒ့းတစီာ်ဟဲးက့ၤ, ပၠၤအကလးကၠံး တစီာ်ဝၱၤစါထာ်က့ၤ, အနံၤကူၤ တအဳတစီာ်သၱာ်ဟဲထာ်က့ၤ, အသံတစီာ်ထာ် ပဳၤက့ၤ, အဆဲးညဲဖဳးတစီာ်ဘဲာ်ဒီထိးလၤနံၤ တဲၤသးလဳၢ်သးလၤ အံာ်အဝၱၤအကဲ. 6အဘဲာ်တဲၤဟိးဝၱၤမၱာ်, ပၠၤထဲၢ် ယခဳးယစဲ အသးတဟဲးကဲနီၤတပွဲၤနဳၤ.”
ခရၱာ်အတဲၤခးသဲသၱးစီၤယိၤဟၣ်အနံၤခံ
7ကၱာ်ဒီဘ့အနဳၤတစီာ်က့ၤဝှါ, ယ့ၣ်ရှူး ဒီၣ်ကဲၤပၠၤအပဳၤအဟီးတစီာ် စီၤယိၤဟၣ်အဝၱၤ အကဲကယဳၤ, “သံဟဲးထာ်စာ်မၤစီၤယိၤဟၣ် ဒဳလဳၤသံမံးဇ့ၤခဳးနဳၤနဲၤ. ကပီၤအဟိးယံၤယၢ် ကလံၤအကျဲတဘီနဳၤဧါ. 8နီး, မၱာ်သံ မၱာ်သံဟဲးထာ်စာ်ကဲၤတၤနဲၢ်. ပၠၤအကြဳၢ်အန့ၤ တဲၤ ကြဳၢ်တဲၤဘူ အကပဳၢ်ဖူတပွဲၤနဳၤဧါ. စာ်ပီၢ်, ပၠၤအကြဳၢ်အဘူအန့ၤ အစာ် ဘိကနဳၤတစီာ် အီၣ်ဒဳ ဆးဖြဳဆးဖြးတစီာ်အရှံၣ်ပူၤနဳၤ. 9မၱာ်သံ ဟဲးစာ်ဒီတၤနဲၢ်. ဝံတပွဲၤဧါ. ဘဲာ်ဟဳ, မၱာ်စဓဳၤလံဝံတပွဲၤတခီ. 10မၤနဲၢ်ကဒီၣ် ဓဳၤဒဳၣ်, အယဳၤမၱာ်ပၠၤထဲၢ် တဲၤဝှ့းလၤကဲၤအဝၱၤ အကဲတပွဲၤ နဳၤကယဳၤ, ‘စာ်ပီၢ်, ယကနှးလ့ၤ ယပွဲၤဇိၤနလှီမီၢ်, စကပြးတီၤလီၤနကျဲးဒဳ နလှီမီၢ်နဳၤ.’ 11ယဒီၣ်သံအတၱၢ်အမှး, ပၠၤအအီၣ်လၤအံာ် အမံၤမှူးအကျဲ, အဓဳၤလံ အဖဳးစူထံစီၤယိၤဟၣ်တအီၣ်နီး. ပရၤဆါအၡံးဖဳးလံအခီဒဳမီၢ်ခဳးအထံအက့ၤတပွဲၤ ဓဳၤလံတပွဲးစဲာ်. 12ကၱာ်ဒီ ဘ့အဖဳးစူထံ စီၤယိၤဟၣ်အခၠၱးထိဓဳၤခဳနူၤယဳၤနဳၤ, မီၢ်ခဳးအထံ အက့ၤခး ဘဲာ်တဲၤမဲၤနဳၤမဲၤပဲၤ, ကၱာ်ဒီအမဲၤနဳၤ မဲးပဲၤတဲၤတစီာ်ဖၱးနံၤပိာ်နံၤတပွဲးစဲာ်. 13မၤနဲၢ်ကဒီၣ်ဓဳၤဒဳၣ်, ဝံလဳစါစဲးကၱာ်တဲၤမှဲးလၤ ဒီဆးတီၤလီၤ ကဲၤတဲၤထိဓဳၤ စီၤယိၤဟၣ်အခၠၱး နဳၤလီၤ. 14ကၱာ်သံကသးအဲး ဘူၣ်ဒဳၣ်, ပၠၤတပွဲၤယဳၤ စမၱာ် စီၤအ့ၤလံယၤထဲၢ် အကလၤ ဘဲာ်တပွဲၤနဳၤ. 15ပၠၤအနံၤကူၤအီၣ်, အသၱာ် ဟဲတဲၤတပွဲၤ, စသၱာ်ဟဲဒီဧဲၤ.
16“ခဳနူၤယဳၤ, ယကဒဳးသီတြီၤ ပၠၤအယဳၤ တစိၤကၱာ်တၤနဲၢ်. စမၱာ်အစာ်ဘိအပံၤစဖဳး အဆးနါအီၣ်တဲၤပွၱၤတဲၤဆဲအတကျၢ်ခဳး, ကၱာ် အဒီၣ်အခီကလဳၢ်တစီာ်ကယဳၤနဳၤ, 17‘ဝၤအူးနံၤထဳသံထွဲ, မၱာ်သံ တက့ၤစူးက့ၤခး ကဲၤနီး. ဝၤကအဳကယၢ်ထဳ, မၱာ်သံတယဳၤတဟး ကဲၤ နီး.’ 18မၤနဲၢ်ဒဳၣ်, စီၤယိၤဟၣ်ဓဳၤလ့ၤ, စတအၣ်တအီနီး ကၱာ်ပၠၤ ဒီၣ်, ‘စနှဲးအီၣ်.’ 19ပၠၤအဖဳးဓဳၤလ့ၤ, စအၣ်စအီကၱာ်ဒီပၠၤဒီၣ်, ‘စာ် ပီၢ်, ပၠၤအဓဳၤအၣ်ကၱာ်အဘဲာ်လီၢ်သဳးပၡံးထံ, ကၱာ်ဒီ အတၤတဲၤမှူ ကၱာ် တဲၤခီၣ်ဝဲၤဖဳးတစီာ် အသီၣ် တပွဲၤ.’ ပရၤဆါ, တဲၤဇၤတဲၤပျၤနဳၤကဘဲာ် သိထိးအံာ်ကီဒဳအဖဳးအလံၤတစီာ်အီၣ်နဳၤ.”
အူးအကဳာ်ဆးတစီာ်
(လူၤ ၁၀:၁၃-၁၅)
20ဘ့နဳၤစဝဲၢ်ထဳးဟီကဲၤအူး, ထဲၢ်စတဲၤပီၤ တဲၤပၤအီၣ်အဲ တကၱာ်ဖၱထာ်ကဲၤအူးအပူၤတစီာ်နဳၤ, မၤနဲၢ်ကဒီၣ်ဓဳၤဒဳၣ်, အတသးအဲးဆး လၤက့ၤ အသးကၱာ်ခးလှိက့ၤ တဲၤခီၣ်ဝဲၤအနံၤခံနီး အစဲ နဳၤ. 21“ဘဲာ်ကၱာ်နဲၤ, ဃၤရၤစံၣ်, ဘဲာ်ကၱာ်နဲၤ, ဘ့ၤသစဲဒၤ, မၤနဲၢ်ကဒီၣ်ဓဳၤဒဳၣ်, တဲၤပီၤတဲၤပၤထဲၢ်အဖၱထာ်ကဲၤနပူၤတစီာ်, ကဖၱထာ်မၤစိၢ်ကၱာ်စံဒိၣ်အပူၤဒဳၣ်, စခးလှိ အီၣ်ယၱၢ်ထဳဧဲၤစတဲၤခီၣ်ဝဲၤဒဳ စံးဖ့းကၱာ်ဖဲး အကျဲနဳၤ. 22မၱာ်ယဒီဆးသံ, ဘ့တဲၤစံးရး အမူၤနံၤနဳၤ, စိၢ်ကၱာ်စံဒိၣ်အတဲၤစံးရး ကတဆိး ကီ ပွ့သံအဲနီးနဳၤ. 23ကၱာ်ဒီနဲၤ, ကပ့းရနီၣ် အူးနဳၤ, နသးအဲးမဲၤထာ်ယၱၤနန့ၤ, ဘးထာ်မီၢ်ခဳး လဲၢ်ဧါ. နဘဲာ်ဆးလၤကီထိဓဳၤလၤ တဲၤလၤယီၢ် အလ့ၤနဳၤ. မၤနဲၢ်ကဒီၣ်ဓဳၤဒဳၣ်, တဲၤပီၤတဲၤပၤ ဖၱထာ်နအီၣ် တစီာ်, ကဖၱထာ်မၤစဒိၣ်အူးအပူၤဒဳၣ်, ဘဲာ်တဘဲာ်နီးအကအီၣ်ဝ့ၤ ထိခိ တနံၤ ယဳၤ. 24မၱာ်ယဒီဆးနဲၤ, ထဲၢ်ဘ့တဲးစံးရး အမူၤနံၤနဳၤ, စဒိၣ် အလၢ်ခဳး အတဲၤစံးရး ကတဆိးကီပွ့အစာ်ဘိနအဲနဳၤနီး.”
လ့ၤထၱးယဲၤကၱာ်အီၣ်ဆီးဒဲ
(လူၤ ၁၀:၂၁-၂၂)
25ဘ့နဳၤယ့ၣ်ရှူးဒီၣ်ဖျီထာ်ကဲၤကယဳၤ, “အဳအပာ်, မီၢ်ခဳးကၱာ် လၢ်ခဳးအဘၱာ်စဲာ်, ယထါ အံာ်နဲၤဒဳနလဲၢ်ဟူၣ်တဲၤအယဳၤတစီာ် ပၠၤ အတဲၤ သၱာ်ဟဲအီၣ်ကၱာ်အထၱနံၤကိၢ်နံၤတစီာ်အလှီမီၢ်, ကၱာ်ဒီနမဲၤသၱာ်ဟဲကဲၤ ပၠၤ အပံၤစဖဳး အယဳၤ တစီာ်အခဳးအစဲနဳၤ. 26ဘဲာ်ဟဳ, အပာ်, မၤနဲၢ် ကဒီၣ်ဓဳၤဒဳၣ်, အဘဲာ်ကဲၤနသးကနဳၤ.
27“တဲၤလဳစါစဲးမၱာ် ယပာ်အံာ်လၤယစူး ခီးပူၤ. ကၱာ်ဒီအပာ် ကဝှါ, အသၱာ်ဟဲဖဳးတအီၣ် တဗွဲနီး, ကၱာ်ဒီဖဳးကဝှါ, အသၱာ်ဟဲပာ်တအီၣ် တဗွဲနီး.
28“သံလဳစါစဲး အလၤဘဳးလၤဓၢ်ကၱာ် အတဲၤဘံာ်တဲၤဇၢ် ထဳးတစီာ်, လ့ၤထၱးပီၢ်ယဲၤ, ကၱာ်ယကအံာ်ဆီဓူၢ်ဆီးဒဲကီသံ. 29ယးထာ်ပီၢ်ယနှဲးယးဘီသံပျ့ဘးခဳး, ကၱာ် ဖၱးနံၤပီၢ်တဲၤသၱာ်ဟဲဒဳယအီၣ်နဳၤ. မၤနဲၢ်, ယမၱာ်အသဳးဘၱာ်သးယူၢ်ကၱာ်အပဲၢ်ဘိးလၤအန့ၤ, ကၱာ်ဒီသံကပး ထၱးကီတဲၤဆီဓူၢ်ဆီးဒဲဒဳသံသဳးသံသး အနံၤခံ. 30မၤနဲၢ်ကဒီၣ် ဓဳၤဒဳၣ်, ယနှဲးယး ဘီမၱာ်အၡဳ. ယတဲၤဘံာ်မၱာ်အဖံ.”
Currently Selected:
မးသဲ 11: GBA
Highlight
Share
Copy
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
