SAHRUOTHUNA 2

1Cahaacata alyi hne avuo hne a chunglie a awpa bangkhuo ca sa pata ama cuo. 2#Pya 20.11 #Heb 4.4,10 Ning sariynapa ning ca Khazing ta a hriepa re kha patlung te re hrie li pata aa pahy. 3Caacuonakawta Khazing ta ning sariyna ca thluechiy pi te a pathe sa. Tahematapakieca capa ning ca Khazing ca sanapa re bangkhuo kha patlung te aa pahyna ningta a cuo.

4Alyi hne avuo hne a chunglie a awpa bangkhuo sana kaw ca cahaaca tana a cuo.

Sana Kaw A Hrangpa

Abyipa Khazing ta alyi hne avuo a sa ning hing 5alyi cunglie aphuv khaapahmuo aw valie, saciy khaapahmuo pu valie, tahematapakieca Abyipa Khazing ta alyi cunglie kha khy pasaa sa li lie pata alyi lieta lu a thlupa ahunghmuo aw valie yi. 6Cuorasala alyi chungtaata tiy kya pya te alyi kha a pahna diy. 7#1Kor 15.45 Cakhutaata Abyipa Khazing ta alyi diypa ta cawsaa kha a sa; hringna huv kha a hnaakhue chung luo sungsue te cawsaa ca a kya hring. 8Cakhutaata Abyipa Khazing ta ningchiyluo ta a awpa Eden lie kha diedung suokha tue te a sapa cawsaa ca capa lie ca a chi. 9#Bie 2.7; 22.2,14 Abyipa Khazing ta alyi taa cata a puvthesapa hne sa cuota a phapa thingkung a phangphang kha a papu sa. Diedung liekhingkhuo lie ca hringna thingkung, a pha hne a chie pachangkhuna thingkung zaw kha a papu sa.

10Eden taa cata diedung tiy bya riypata cavaa vaa kha lang te, capa taa cata cavaa vaa paliy ta aa che. 11Cavaa vaa khanapa a ming ca Pishon cuo te, capa cavaa ca siy pyanapa Havilah ruo kha cahraw te a lang. 12Capa ruo taata a pyapa siy ca siy phasapa phang ta a cuo. Bdellium thingcathliy muosungpa hne oniks lungvaa muosungpa zaw a pya. 13Cavaa vaa hningnapa a ming ca Gihon ta a cuo; capa cavaa ca Kush ruo kha cahraw te a lang. 14Cavaa vaa thungnapa a ming ca Tigris ta cuo te, capa cavaa ca Assiria ningchiyluo kuo kha cahraw te a lang. Cavaa vaa paliynapa ca Zufrates cavaa ta a cuo.

15 Abyipa Khazing ta diedung thlu riypa hne mangchiy riypata cawsaapa ca Eden diedung chunglie ca a chi. 16Abyipa Khazing ta cawsaapa kha naw pi te, “Diedung lie thingthyi phangting hing na ning khu, 17cuorasala a pha a chie thleduo khuna thingkungpa a thyi hing ca ning'a vaciy, na ning kieca na ning ningpa ta na thiy aa,” a ta.

18Cakhutaata Abyipa Khazing ta, “Cawsaapa ama selaw ta a awpa hing pha vyi; a byatuv riypa tana a viesaa pakha i sapa aa,” a ta. 19Caacuonakawta Abyipa Khazing ta alyi taa khata saruopa phangting hne pavaa phangting kha sa te, cawsaapa'a luo ca ming paphya riypata a vaakhyi. Cawsaapa ta ming a dina haa yi khata ama ming ta a cuo pathla. 20Cawsaapa ca ta ing lie a ziypa sahring bangkhuo, avuo lie a zupa pavaa bangkhuo hne ruo lie a awpa saruopa bangkhuo kha ming a sa; cuorasala cawsaapa ca ama a byatuv riypa viesaa hnyi vyi. 21Caacuonakawta Abyipa Khazing ta cawsaapa kha thuvhunglung khata pahmung sa te, aa hmung chung cata a vuoruv suokha kha a da te capa aa danapa ca a saa ta a paping. 22Abyipa Khazing ta aa dapa a vuoruv cata cawsaanung pakha kha sa te cawsaapa'a luo ca aa vawkhyi. 23Cakhutaata cawsaapa ca ta,

“Ata hing muo i ruv chung taapa ruv,

i saa chung taapa saa ta a cuo ta;

Capaa chungtaata lapa a cuo nakawta,

Canung ta pata kupa cuo se,” a ta.

24 # Mat 19.5; Mar 10.7-8; 1Kor 6.16; Efe 5.31 Caacuonakawta capaa ta a paa hne a nung kha thuse yi te a napuv kha a hlaw te pang kha ta ama cuopa hingta a cuo. 25Capaa hne a napuvnung ca ama pahning ta ama thliehripa ta ama cuo, cuorasala ama nang zaa vyi.

Currently Selected:

SAHRUOTHUNA 2: LNT

Highlight

Copy