یوحنا 12

مریم عیسی تَدهین بَکَردی

1شَش روز پِسَخ عیده پیش، عیسی اومَه بِیت‌عَنْیا را، هَ دِهی که ایلعازَر اوآ کا زندگی بَکَردی، هَ کسی که عیسی اَیی مَرده پَش زِندَه آکَردَش بَه. 2اوآ کا چَیی را سور دوشونَه. مارتا پذیرایی بَکَردی و ایلعازَر نی کَسونی کا بَه که عیسی نَه سِفرَه سَری کا نِشت بَه. 3اَ موقع، مریم ایلَه گِرونَه عطری سُنبل خالصی کا که تَقریبا نیم لیتر بَه پِگِتِشه و عیسی پایون دَسوشَه و اِشتَن گیسه اون نَه عیسی پایون خِشک آکَردِشه، اِنتَه که کَ عطری بونَه پُور آبَه. 4امّا یهودا اِسْخَریوط، عیسی ایلَه شاگِردون کا، که دومله بَیی خیانت کَردِشه، واتِشه: 5«چیرا اَمَه اِم عطری ایلَه کارگری سیصد روزی مُزدی قَدر نِخرَتِمونَه و چَیی پولی فَقیرون آنِدومونَه؟» 6یهودا اِمی واتِشه نِه اِمی واسی که فَقیرون فیکری کا بَه، بَلکَم اِمی واسی بَواتی که دِزد بَه؛ گروه خرجی پوله کیسه چَیی وَری کا بَه و یهودا اَ پولی کا اِشترا نی پِگِری. 7عیسی واتِشه: «اَیی نَه کاریرون مَبو! چوم اِم عطری چِمِن دَفن کَردِه روزی را غَم هَردَش بَه. 8فَقیرِن همیشه شِمَه نَه اِستینَه، امّا شِمَه مِن همیشه اِشتَن نَه نیرونَه.»

9وِرَه جماعتی یهودیون کا، وختی دَرَسِشونَه عیسی اوآ کایَه، اومینَه تا نِه فقط عیسی، بَلکَم ایلعازَری نی که زِنده آکَردَش بَه، بِوینِن. 10بَس، سَران کاهِنن نَخشه کَشِشونَه که ایلعازَری نی بِکِشِن، 11چوم باعث بییَه بَه وِر کَسِن یهودیون کا بِشون بِه عیسی ایمان بواَرِن.

عیسی ایلَه شاهی شیوار دَشو اورشلیمی دیلَه

12صِبی سَر، وِرَه جماعتی که عیدی را اومَه بینَه، وختی دَرَسِشونَه عیسی بومَی اورشلیم، 13نَخلی لاخه اون پِگِتِشونَه و شینَه چَیی پیشواز. اَوِن خِلِع بَکَردین و بَواتین:

«نجات بِدَه!

مِوارکَه اَ کسی که

خِداوندی نومی نَه بومَی،

مِوارکَه اِسرائیلی پاُتشا!»

14اَ موقع عیسی ایلَه خَرَه کُرَه ایی تِلفتِشه و اَیی دَنِشته؛ هَتَه که مقدّس نیویشته اون کا نیویشتَه بییَه که:

15«مَتَرس! اِی صَهیونی کوهی کِلَه،

دَیِس اِشتِه پاُتشا بومَی.

خَرَه کُرَه ایی کا دَنِشتَه و بومَی!»

16چَیی شاگِردِن اوّل اِم چییون نِزونیشونَه، امّا وختی عیسی مَردَه پَش زِندَه آبَه، ویر وَردِشونَه که اِم چییِن گِرد چَیی درباره مقدّس نیویشته اون کا نیویشتَه بییَه بَه و هَته نی اَیی نَه کَردِشونَه.

17اَ جماعتی که ایلعازَری دَخوندِه موقع مَقبره کا و چَیی زِنده آکَردِه مَردَه پَش، عیسی نَه بینَه، هِنتَه اِم اِتِفاقی را شهادت بَداین. 18جماعتی که شینَه چَیی پیشواز اِمی واسی بَه که دَرَسَشون بَه عیسی اِم علامت و معجزه اَنجام دوعَشَه. 19بَس فریسی فِرقه عُلما یَندی نَه واتِشونَه: «دَیِسه که دِ نیمَشایَه کاری بَکَرَه؛ دَیِسه که گِردِ دنیا چَیی دومله شَیینَه.»

یونانی یِن پیستِشونَه عیسی بِوینِن

20کَسونی دیلَه کا که عیدی عبادتی را اومَه بینَه اورشلیم، بعضی یونانی بینَه. 21اَوِن اومینَه فیلیپُسی وَر، که بیت‌صِیْدا شهری اَهالی کا، جَلیلی ولایتی کا بَه، و اَیی نَه واتِشونَه: «آقا، پیستِمونَه عیسی بِوینَم.» 22فیلیپُس اومَه و آندریاسی نَه واتِشه، و اَوِن هَر دِ نفر شینَه عیسی نَه واتِشونَه. 23عیسی اَوون نَه واتِشه: «اِنسانی زوعَه، مَردِه و زِندَه آبییِه وخت آرَستَه. 24حقیقتن، شِمَه نَه بَواتیم، اَگم گندِمَه دونه خاکی دیلَه کا مَدلَکِه و مَمِرِه، تَنخا بَمَندی؛ امّا اَگم بِمِرِه وِر بار بواَردی. 25کسی که اِشتَن جانی نَه خِش بِبو، اَیی اَز دَس بَدای. امّا کسی که اِم دنیا کا اِشتَن جانی نَه خِش مَبو، اَیی اَبَدی یَه زندگی را غَم بَردی. 26اَگم کسی مِن خدمت بِکَرِه، بَسی چِمِن دومله با؛ و جِگایی که اَز اِستیمَه، چِمِن خِدمتگذار نی اوآ کا بَبی. کسی که مِن خدمت بِکَرِه، دَده اَیی اَرج و قوبر بَدای.

عیسی اِشتَن مرگی کا گَف ژَنِه

27«حِسَه چِمِن جان پَریشونَه. چِه بوآجِم؟ بوآجِم، ”دَده اَ چِه کا که بَسی چِمِن سَر با، مِن نجات بده“؟ امّا اَز اِمی واسی اومیمَه اِم دنیا دیلَه. 28دَده، اِشتِه نومی جلال بِده!» اَ موقع سَسی آسِمونی نَه اومَه که: «جلال دوعَمه و هَنی جلال بَدایم.» 29جماعتی که اوآ کا مَند بینَه و اِمی دَرَسِشونَه، واتِشونَه: «گِرخونَه بَه.» بَقیه واتِشونَه: «ایلَه مَلائیکه اَیی نَه گَف ژَندِشَه.» 30عیسی جَواو دوشَه: «اِم سَس شِمَه را اومَه، نِه بَه مِرا. 31حِسَه اِم دنیا داوری موقع یَه؛ حِسَه اِم دنیا رَئیس، شیطان، بِرون فِر آدوعَه بَبی. 32وختی اَ صلیبی که اَز چَیی سَری کا مصلوبیمَه زَمینی کا دَرونجِن کفا، گِردِ مردمی دَرونجِم چِمِن طرف.» 33عیسی اِمی واتِشه تا نِشون بِدَه چِنتَه قرارَه بَمِرِه. 34جماعت واتِشونَه: «اَمَه توراتی کا دَرَسَمونَه، مسیح تا اَبَد باقی بَمندی، بَس چِنتَه یَه که بَواتیش اِنسانی زوعَه بَسی مصلوب بِبو؟ اِم اِنسانی زوعَه کییَه؟» 35عیسی اَوون نَه واتِشه: «تا روکَته زَمانی دییَر، نور شِمَه دیلَه کایَه. بَس تا وختی که حَلا نوری هِستِرونَه، بِمِجه، نَبادا تاریکی شِمَه بِگِرِه. اَ کسی که تاریکی کا مِجِه، نیمَزنِه کییا بَشی. 36تا وختی که نوری هِستِرونَه، بِه نور ایمان بواَره تا نوری خِردَنِن بِبییَن.»

وختی عیسی اِم گفون واتِشه، اوآنَه شَه و اِشتَن اَوون کا نِین آکَردِشه.

37با اِم که عیسی وِر علامت و معجزه اونی چَوون چِمی پیشی کا بَکَردی، حَلا نی بَیی ایمان نِوردِشونَه. 38تا اِشَعیای پیغمبری پیشگویی بِه حقیقت آرَستِه که واتَش بَه:

«اِی خِداوند، کی چَمَه پَیغومی باوَر کَردَشه،

و خِداوندی قدرت چیکی را آشکار آبییَه؟»

39هَتَه که اِشَعیای پیغمبر دییَر جِگایی کا واتَشه، اَوِن نِشاستِشونَه اَیی ایمان بواَرِن، چوم:

40«خِدا چَوون چِمون کور،

و چَوون دیلون سخت آکَردَشَه،

تا نبادا اِشتَن چِمون نَه بِوینِن،

و اِشتَن دیلون نَه بِفَهمِن،

و آگَردِن چِمِن طرف تا از اَوون شَفا بِدَم.»

41اِشَعیا اِمی واسی اِم چییون واتِشه که چَیی شکوه و جلالی ویندِشه و چَیی درباره گَف ژَندِشَه.

42با اِم وجود، حتی وِر کَسِن قومی پیله تَرون کا نی بِه عیسی ایمان وَردِشونَه، امّا فریسییون تَرسی کا، اِشتَن ایمانی اِقرار نِکَرین، نَبادا عبادتگاه کا اَوون بَرکَرِن. 43چوم مردمی تعریف تَمجیدی نَه خِدا تعریف تَمجیدی کا وِرتر خِش بینَه.

44و عیسی بِلندَه سَسی نَه واتِشه: «هَر‌کسی بَه مِن ایمان بواَرِه، نِه بَه مِن، بَلکَم چِمن ویسا آکَردَه ایمان وَردَشه. 45هر کسی مِن بَویندی، چِمِن ویسا آکَردَه بَویندی. 46اَز ایلَه نوری شیوار اومیمَه بِه دنیا تا هَر کسی بَه مِن ایمان بواَرِه، تاریکی کا مَمونِه. 47اَگم کسی چِمِن گفون دَرَسه، امّا اَوون عمل مَکَرِه، اَز اَیی داوری نِکَرِم؛ چوم که اومَه نیمَه تا دنیا داوری بِکَرِم، بَلکَم اومَیمه تا دنیا نجات بِدَم. 48کسی که مِن رَد آکَرِه و چمِن گفون قبول مَکَرِه، اَیی را دییَر داوریْ اِستَه؛ هَ گَفونی که واتَمه اَیی داوری یَه روزی کا محکوم بَکَردی. 49چوم اَز چِمِن طرفی نَه گَف ژَندَه نیمَه، بَلکَم دَده ایی که مِن ویسا آکَردَشَه اِشتَن مِن فرمان دوشَه که چِه بوآجِم و چِه کا گَف بِژَنم. 50و اَز بَزنیم که چَیی فرمان اَبَدی یَه زندگی یَه. بَس چیی که اَز بَواتیم دُرست هَ چیی یَه که دَده مِنَه واتِشه تا اَز بوآجِم.»

Currently Selected:

یوحنا 12: ITB

Highlight

Copy